Kua Teateamamao Ainei Koe no te Ra o Iehova?
Kua Teateamamao Ainei Koe no te Ra o Iehova?
“Kua vaitata te rā maata o Iehova, kua vaitata, e te rapurapu roa maira.”—ZEPHANIA 1:14.
1-3. (a) Eaa ta te Pipiria e tuatua ra no to Iehova ra? (e) Te aro atura tatou i teea “ra o Iehova”?
KARE to Iehova ra maata i te 24 ora te roa. E tuatau akaroaia te reira e ka raveia te akavaanga a te Atua ki runga i te aronga kino. E tumu to te au tangata kare e akamori ana i te Atua kia mataku i taua ra poiri ra, te riri otooto, te riri maata, te manamanata, e te akapouanga. (Isaia 13:9; Amosa 5:18-20; Zephania 1:15) “Aue i taua rā ra e!” i karanga ai te totou a Ioela, no te mea “te vaitata maira te rā o Iehova, ei mate ïa oki no ko mai i te Mana-katoatoa e tae mai ei.” (Ioela 1:15) Inara, i taua ra maata ra, ko te Atua te Akaora o taua aronga “ngakau tiratiratu ra.”—Salamo 7:10.
2 Ko te tuatua te “rā o Iehova” te akonoia ra ki te raveanga i ta te Atua akavaanga i te au tuatau tukeke. Ei akatauanga, kua tupu te “rā o Iehova” i to Iehova taangaanga anga i te au Babulonia kia rave i tana akavaanga ki runga i te iti tangata o Ierusalema i te mataiti 607 M.T.N. (Zephania 1:4-7) Kua tupu katoa tetai raveanga aiteite o ta te Atua akavaanga i te mataiti 70 T.N. i to te Atua taangaanga anga i te au Roma kia rave i tana akavaanga ki runga i te pa enua ngati Iuda tei kopae i tana Tamaiti. (Daniela 9:24-27; Ioane 19:15) Te totou katoa maira te Pipiria i te “rā o Iehova” me ‘tamaki aia i te au enua ravarai.’ (Zekaria 14:1-3) I raro ake i te akauruanga, kua akapiri atu te apotetoro ko Paulo i taua ra ra ki te parutia o Karaiti, tei akamata ki to Iesu akateronoangaia ei Ariki i te rangi i te 1914. (2 Tesalonia 2:1, 2) I to Iehova ra e aere viviki maira, kua tau meitaki tikai te irava mataiti no te Au Kite o Iehova no te 2007. Kua kiritiia mai mei ia Zephania 1:14, te tatau ra te reira e: “Kua vaitata te rā maata o Iehova.”
3 I te mea e te vaitata maira te ra maata o te Atua, ko te taime teia i te teateamamao ia koe. Akapeea koe i te akapapaanga no te reira ra? Eaa akaou atu taau ka anoanoia kia rave kia akapapa no te ra o Iehova?
Kia Vai Teateamamao rai Koe
4. No teea timataanga pakari tikai ta Iesu i akapapa atu iaia uaorai?
4 I roto i tana totou no runga i te openga o te akatereanga o te au mea nei, kua akakite atu a Iesu Karaiti ki tana au pipi e: “Kia vai teateamamao rai kotou.” (Mataio 24:44) I te tuatuaanga a Iesu i teia tuatua, kua papa meitaki aia no tetai timataanga pakari—tona mateanga ei atinga oko. (Mataio 20:28) Eaa ta tatou ka kite mai mei te tu i akapapa ai a Iesu iaia?
5, 6. (a) Akapeea te aroa i te Atua e te tangata i te tauturuanga ia tatou kia papa ua no te ra o Iehova? (e) No runga i te aroa no te tangata tupu, eaa te akaraanga ta Iesu i akanoo mai?
5 E aroa ngakau katoa to Iesu no Iehova e no Tana au turanga tuatua tau. No runga ia Iesu, te karanga ra a Ebera 1:9 e: “I inangaro koe i te tuatua-tika, e te rikarika ra koe i te kino; i akatainu ei te Atua to Atua ra, ia koe i te manongi ra o te rekareka, e maata rava atura i toou au oa ra.” No te mea kua aroa aia i tona Metua i te rangi, kua akono tamou a Iesu i te tiratiratu kiaia. Me aiteite to tatou aroa no te Atua e te akono ra i tana au umuumuanga, ka paruru aia ia tatou. (Salamo 31:23) Ka tauturu te reira aroa e te akarongo ia tatou kia vai teateamamao ua no te ra maata o Iehova.
6 Ko te aroa no te au tangata tetai tuanga maataia o to Iesu tu. E tikai, kua “aroa atura aia ia ratou, no te mea kua mate ratou i te roiroi, e kua pueurikiriki keia, mei te mamoe tiaki kore ra.” (Mataio 9:36) E no reira, kua tutu aere a Iesu i te tuatua meitaki ki te au tangata, mei te aroa rai e akakeu ra ia tatou kia akakitekite i te karere Patireia ki to tatou au tangata tupu. Ko te aroa i te Atua e no to tatou tangata tupu, te mea e akamaroiroi ra ia tatou ei au orometua Kerititiano e te tauturu ra ia tatou kia akapapa no te ra maata o Iehova.—Mataio 22:37-39.
7. Ia tatou e tapapa atura i to Iehova ra, eaa tatou ka rekareka ai?
7 Kua rekareka a Iesu i te rave i te anoano o Iehova. (Salamo 40:8) Me aiteite katoa to tatou tu, ka kite mai tatou i te rekareka i te oronga anga i te tavinianga tapu ki te Atua. Mei ia Iesu rai, e aronga oronga karapii kore tatou, e ka kite mai tatou i te mataora tikai. (Angaanga 20:35) Ae, “ko te rekareka ra no ko ia Iehova ra to [tatou] ïa maroiroi.” Ma te reira rekareka, ka papa meitaki atu tatou no te ra maata o Iehova.—Nehemia 8:10.
8. Eaa tatou ka akavaitata rava atu ei kia Iehova na roto i te pure?
8 Ko te pure akatenga ki te Atua tei tauturu ia Iesu kia akapapa no te au timataanga no te akarongo. Te pure ra aia i to Ioane papetito anga iaia. Kua pure a Iesu e tai po katoa i mua ake i te ikianga i tana au apotetoro. (Luka 6:12-16) E koai ia tangata tatau i te Pipiria tei kare i umere ana i te au pure ngakau tae a Iesu i te po openga o tona oraanga i te enua nei? (Mareko 14:32-42; Ioane 17:1-26) E tangata pure ainei koe, mei ia Iesu rai? E pure putuputu kia Iehova, auraka e rapurapu i te pure, e kimi i te aratakianga a te vaerua tapu, e e ariki viviki i te reira aratakianga me kitea mai te reira. Ko tetai pirianga pakari ki to tatou Metua i te rangi e puapinga maata tikai i teia tuatau taitaia, i te ra maata o te Atua e aere viviki maira. E no reira, e akavaitata rava atu kia Iehova na roto i te pure.—Iakobo 4:8.
9. Mei teaa te puapinga i te akamanakoanga atu i te akangateiteianga i te ingoa o Iehova?
9 I te akamanakoanga i te akangateitei i te ingoa tapu o Iehova, kua tauturu katoa ia Iesu i te akapapa atu no te au timataanga tana ka aro atu. Ko te tikaanga, kua apii aia i tana au pipi e i roto i ta ratou au pure ki te Atua, kia kapiti mai ratou i te au pati anga e: “Kia tapu toou ingoa.” (Mataio 6:9) Me e inangaro oonu tikai to tatou e kia akangateiteiia me kore kia akatapuia a Iehova, ka tauta pakari tatou kia kore tatou e rave i tetai apinga te ka akakino i te reira. Ei tupuanga, ka papa meitaki atu tatou no te ra maata o Iehova.
Ka Rave Ainei Koe i Tetai Au Tauianga?
10. Eaa ka tau ei kia akara matatioia to tatou oraanga?
10 Me ka aere mai to Iehova ra apopo, kua papa tikai ainei koe no te reira? Ka tau tatou tataki tai kia akara matatio i to tatou uaorai oraanga kia akatau me te anoanoia ra tetai au angaanga me kore au tu kia akatanotanoia. I te akamanakoanga i te tu poto ua e te tu papu kore o teia oraanga tangata nei, ka anoanoia tatou kia vai matakite i te pae vaerua i te au ra ravarai. (Koheleta 9:11, 12; Iakobo 4:13-15) E no reira ka akara tatou i tetai au tumu e umuumuia ra kia akamanakoia i roto i to tatou oraanga.
11. Eaa taau akakoroanga no te tatau i te Pipiria?
11 Ko tetai tumu maata koia oki ko te akoanga a te “tavini akono meitaki” kia tatau i te Pipiria i te au ra ravarai. (Mataio 24:45) Penei ka akariro koe ei akakoroanga naau kia tatau ma te akamanako oonu i te au Tuatua Tapu mei ia Genese kia Apokalupo e okotai taime i te au mataiti ravarai. Na te tatauanga e a pene i te ra, ka rauka ia koe i te tatau i te 1,189 pene o te Pipiria i roto i te mataiti okotai. Kua anoanoia te ariki tataki tai o Iseraela kia tatau i ta Iehova Ture “e ope ua atu tona au rā i te ora anga nei.” I te akaraanga, kua rave katoa a Iosua i te reira. (Deuteronomi 17:14-20; Iosua 1:7, 8) E mea puapinga tikai e kia tatau te au tiaki mamoe pae vaerua i te Tuatua a te Atua i te au ra ravarai, no te mea ka tauturu teia ia ratou kia oronga i te “tuatua ora”!—Tito 2:1.
12. Te vaitata anga mai te ra o Iehova, te akakeu ra ia koe i te rave i teaa?
12 I te vaitata anga mai te ra o Iehova, ka akakeu te reira ia koe kia aere putuputu ki te au uipaanga Kerititiano e kia piri pu tikai ki roto i te reira. (Ebera 10:24, 25) I te raveanga i te reira, ka tauturu ia koe kia akameitaki rava atu i toou au kite ei tangata tutu i te Patireia, te kimi ra e te inangaro ra i te tauturu i te aronga tei akonoia no te ora mutu kore. (Angaanga 13:48) Penei ka maroiroi atu koe i roto i te putuputuanga i roto i tetai au mataara ke atu, mei te tauturuanga i te ruaine e te akamaroiroianga i te mapu. Ka mataora tikai koe i te rave anga i te reira!
Toou Pirianga ki Etai Ke
13. Eaa te au uianga ka ui tatou kia tatou uaorai no runga i te akatupuanga i te tangata ou?
13 I te mea e ka tae mai te ra o Iehova, ka anoanoia ainei koe kia tauta pakari atu “kia akatangata ou oki ko tei angaia kia tau i te Atua ra, i te tuatua-tika e te tapu mou”? (Ephesia 4:20-24) Ia koe e tatanu ra i te au tu o te Atua, ka kite mai tetai ke e te ‘akono ra koe i ta te vaerua o te Atua ra’ e te akaari ra i to te reira au ua. (Galatia 5:16, 22-25) Ka rauka ainei ia koe i te tou atu ki tetai au angaanga tikai te akaari maira e te akatupu ra koe e toou pamiri i te tangata ou? (Kolosa 3:9, 10) Ei akatauanga, ka kitea ainei koe ei tangata takinga meitaki ki te au taeake irinaki e ki etai ke? (Galatia 6:10) Ka tauturu tetai apii putuputu i te au Tuatua Tapu ia koe kia akatupu i te au tu o te Atua te akapapa ra ia koe no te ra o Iehova.
14. Eaa tetai tangata ka pure ei no te vaerua tapu iaia e tauta ra i te tatanu i te tu akakoromakianga maata?
14 Akapeea me e tangata viviki ua koe i te riri e kua kite mai e te anoano ra koe i te tu akakoromakianga maata? E tuanga te reira no te ua te ka rauka i te vaerua o te Atua i te akatupu i roto ia koe. No reira, e pure no te vaerua tapu, i te aruanga i te au tuatua a Iesu e: ‘E pati, e e orongaia mai ta kotou; e kimi, e kitea ïa ia kotou; e topāpā atu, e kiritiia mai te pa ia kotou. Te tika na ia kotou, kino ua rai, kia oronga i te mea meitaki no ta kotou tamariki, ka tangaʼi oki i to kotou Metua i te ao ra, i te oronga i te vaerua tapu i te aronga e pati atu aia ra.’—Luka 11:9-13.
15. Eaa te ka tau kia raveia me e manamanata tetai i rotopu ia koe e tetai taeake irinaki?
15 Penei kua tupu tetai manamanata i rotopu ia koe e tetai taeake akarongo. No runga i te reira, e tauta pakari i te akatikatika i toou pirianga, i te akamaroiroianga i reira i te au e te taokotaianga o te putuputuanga. (Salamo 133:1-3) E akono i te akoanga a Iesu tei rekotiia ia Mataio 5:23, 24 me kore ia Mataio 18:15-17. Me te tuku ra koe i te ra kia opu e te riri ra rai koe, kia viviki koe i te akatikatika i te reira manamanata. E putuputu te taime te anoanoia ra te tu puareinga ua i te akakore i te ara. Kua tata a Paulo e: “Kia takinga-meitaki kotou ia kotou uaorai, ma te ngakau maru aroa ua ra, ma te akakore oki i te ara tetai e tetai, mei ta te Atua i akakore mai i ta kotou i te Mesia ra.”—Ephesia 4:25, 26, 32.
16. I roto i teea au mataara e umuumuia ai te tu tangi aroa i roto i te akaipoipoanga?
16 Te umuumuia ra te tu takinga aroa e, i tetai au taime, te akakoreanga i te ara i roto i te pirianga akaipoipo. Me ka anoanoia koe kia aroa e kia tangi aroa maata atu i toou tokorua akaipoipo, e tauta pakari i te akatupu i teia akakoroanga ma te tauturu a te Atua e tana Tuatua. E apinga ainei taau ka anoanoia kia akatupu i te aru anga ia 1 Korinetia 7:1-5 i te akaiti mai i te taomianga e kia kopae i te tu tiratiratu kore? Papu e, ko tetai tuanga teia o te oraanga e umuumuia ra te tane me kore te vaine i roto i te pirianga akaipoipo kia akaari i te “ngakau maru aroa.”
17. Eaa te au takainga ka tau kia raveia me rave tetai i te ara kino?
17 Akapeea me na roto i tetai tu, kua rave koe i tetai ara kino tikai? Kia viviki koe i te akono i te au takainga kia akatikatika i te reira turanga. No reira, e kimi i te tauturu a te aronga pakari Kerititiano. Ka tauturu ta ratou au pure e te akoanga ia koe kia maroiroi akaou mai i te pae vaerua. (Iakobo 5:13-16) E pure kia Iehova ma te tu tataraapa. Me kare koe e rave i te reira, ka tataraapa tikai koe e ka kinokino toou akava ngakau. Kua tupu te reira kia Davida, inara kua maru mai tikai aia i tona aakianga i tana ara kia Iehova! Kua tata a Davida e: “E ao tona, to te akakoreia tana ara, to tei tapokiia tona kino! E ao to te tangata, kare i tapepeia e Iehova i te ara, e kare e pikikaa o roto i tona ngakau.” (Salamo 32:1-5) Kua akakore a Iehova i te ara a te aronga tei ara mai e tei akaari i te tu tataraara tikai.—Salamo 103:8-14; Maseli 28:13.
E Noo ua Eiaa e Tuanga no te Ao
18. Akapeea koe i te akara anga i teianei ao?
18 Papu e te akara atura koe ki te ao ou manea tikai tei taputouia mai e to tatou Metua i te rangi. Akapeea koe i reira i te akara anga i teianei ao taiate tangata tuatua tau kore tei akatakakeia mei te Atua? Kare o Satani, “te ariki o teianei ao,” mana i rungao ia Iesu Karaiti. (Ioane 12:31; 14:30) Papu e kare koe e inangaro i te Tiaporo e tona ao kia akatere ia koe, e no reira e akarongo ki te au tuatua a Ioane e: “Auraka e anoano i teianei ao, e te au mea ravarai o teianei ao.” Ko te mataara tau meitaki te reira, no te mea “te ngaro ke nei teianei ao, ma ta to reira katoa e anoano nei: ko tei akono ra i to te Atua ra anoano, e tika ïa i te ora anga e tuatau ua atu.”—1 Ioane 2:15-17.
19. Eaa te au tu akakoroanga ta te au mapu Kerititiano e aruaruia ra kia akono?
19 Te tauturu ra ainei koe i taau tamariki kia ‘akono ia ratou uaorai kia kore e viivii i teianei ao’? (Iakobo 1:27) Ka inangaro a Satani i te uuti mai i taau tamariki mei tetai tangata rai e uuti maira i te ika tei mou iaia. E tukeke te au karapu e tetai au akaaerenga tei akanooia kia akao atu te aronga mapu ki roto i te ao o Satani. Inara te au tavini o Iehova, e tuanga takere ratou no te akaaerenga anake ua te ka ora atu i te openga o teia akatereanga kino o te au mea nei. E no reira kia akamaroiroiia te au mapu Kerititiano kia ‘maata te rave anga i te angaanga a te Atu.’ (1 Korinetia 15:58) Ka anoanoia te au metua tau i te Atua kia tauturu i ta ratou tamariki kia akanoo i te au akakoroanga te ka oronga mai kia ratou i tetai oraanga mataora e te merengo anga te akangateitei ra i te Atua e te tauturu ra ia ratou kia akateateamamao no te ra o Iehova.
Akara ki Mua Atu i te Ra Maata o Iehova
20. Eaa tatou ka akamanako ua ai i te ora mutu kore?
20 Ka rauka ia koe i te tapapa atu i to Iehova ra ma te ngakau maru me akamanako ua rai koe i te ora mutu kore. (Iuda 20, 21) Te akara atura koe ki te oraanga mutu kore i roto i te Parataito, e ka rauka ia koe i reira te manakonakoanga no te maroiroi mapu e te tuatau ope kore kia aruaru i te au akakoroanga meitaki tikai e kia kite maata atu no runga ia Iehova. Ka rauka ia koe i te apii tamou tikai no runga i te Atua e mutu kore ua atu no te mea tei te paepae ua te kite o te au tangata no runga i “tona ra au aerenga” i teianei. (Iobu 26:14) E manakonakoanga mataora tikai te reira!
21, 22. Eaa te au pukapukaanga ka rauka i rotopu ia koe e te aronga ka akatuakaouia mai?
21 I roto i te Parataito, ka rauka te aronga akatuakaouia mai i te akakite mai i tetai au mea kare tatou i kite ana no te tuatau tei topa. Ko Enoka tetai i reira te ka akamarama mai e akapeea i rauka ai iaia te mataku kore tei anoanoia i te akakite i te karere a Iehova ki te au tangata kare e akamori ana i te Atua. (Iuda 14, 15) Papu e ka akakite mai a Noa e mei teaa rai te tu i te patuanga i te araka. Ka rauka ia Aberahama raua ko Sara i te akakite mai i to raua manako i te akarukeanga i te au mekameka o Ura e te nooanga i roto i te au puakapa. E akamanako ia Esetera e akakite maira e akapeea aia i te paruruanga i te au inangaro o tona iti tangata e te araianga i te parani kino a Hamana kia takore ia ratou. (Esetera 7:1-6) E akamanako ia Iona e akakite maira i tona toru ra i roto i te kopu o tetai ika maatamaata me kore ia Ioane Papetito e akamarama maira i tona au manako i tona papetitoanga ia Iesu. (Luka 3:21, 22; 7:28) Mei teaa atura te au mea umere ta tatou ka kite mai!
22 I te tuatau o to Karaiti Tutaraanga Tauatini Mataiti, ka rauka ia koe te tikaanga manea i te tauturu i te aronga akatuakaouia mai kia rauka i “te kite i te Atua.” (Maseli 2:1-6) I teia tuatau, e mataora tikai i te kite i te au tangata e apii ra i te kite no te Atua ko Iehova e tei taangaanga i te reira! Inara e akamanako i toou rekareka i taua tuatau ra ki mua me akameitaki a Iehova i taau au tautaanga kia ikuiku i te au tangata mei te au tuatau roa i topa e kua ariu mai ratou ma te ngakau tae tikai!
23. Eaa ta tatou ka tauta i te rave?
23 Ko te au puapinga ta tatou e rekareka nei ei iti tangata no Iehova tei runga rava atu i ta tatou au tautaanga apa kore i te tare me kore i te akamanako oonu. (Salamo 40:5) Kua mataora tikai tatou no te au tauturu a te Atua i te pae vaerua. (Isaia 48:17, 18) Noatu to tatou au turanga, kia oronga tatou i te tavinianga tapu ma te ngakau katoa, ia tatou e tapapa atura i te ra maata o Iehova.
Akapeea Koe me Pau?
• Eaa “te ra o Iehova”?
• Akapeea koe i te akateateamamao ia koe no te ra o Iehova?
• I te ra maata o te Atua e vaitata maira, eaa te au tauianga ka anoanoia tatou kia rave?
• Eaa taau e akara atura ki mua me ope te ra o Iehova?
[Au Uianga Apii]
[Tutu i te kapi 12]
Kua vai teateamamao a Iesu no te au timataanga
[Tutu i te kapi 15]
Mei teaa atura te tikaanga manea kia tauturu i te aronga akatuakaouia mai kia rauka i te kite ia Iehova!