Bann pwen enteresan dan liv Malaki
Parol Zeova i vivan
Bann pwen enteresan dan liv Malaki
TANP Zerizalenm in fini ganny rekonstri depi plis ki 70-z-an. Avek letan, spirityalite bann Zwif in deteryore en bon pe. Menm bann pret in vin koronpi. Lekel ki ti pou fer zot konn zot vre kondisyon spirityel e esey ed zot refer spirityelman? Zeova ti swazir Malaki pour fer sa louvraz.
Dernyen liv dan Lekritir Ebre ti ganny ekrir par Malaki. I kontyen bann profesi enspire par Bondye ki’n ganny ekrir dan en stil konvenkan. Etidye parol profet Malaki i kapab ed nou prepar nou pour “gran zour efreyan Zeova,” ler sa move sistenm pou vwar son lafen.—Malaki 4:5.
BANN PRET “IN FER BOKOU TONBE”
Zeova ti eksprim son santiman pour Izrael an dizan: “Mon’n kontan zot.” Me bann pret ti mepriz non Bondye. Ki mannyer sa? “Par prezant dipen kontaminen lo [son] lotel,” e par ofer konman sakrifis “en zannimo ki bwete oubyen ki malad.”—Malaki 1:2, 6-8.
Bann pret “in fer bokou tonbe an sa ki konsern lalwa.” Bann dimoun “in trai kanmarad.” Serten in marye avek bann madanm etranze. Lezot pa’n fidel avek “madanm [zot] zenes.”—Malaki 2:8, 10, 11, 14-16.
Larepons pour bann kestyon lo Labib:
2:2—Dan ki fason Zeova ti “modi benediksyon” bann pret rebel? Bondye ti fer sa dan sa sans ki benediksyon ki bann pret ti demande ti pou finalman vin en malediksyon.
2:3—Ki savedir “fann malpropte” lo figir bann pret? Dapre Lalwa, malpropte zannimo ki ti ganny sakrifye ti bezwen ganny anmennen an deor kan e ganny brile. (Levitik 16:27) Fann sa malpropte lo figir bann pret ti vedir ki Zeova pa ti aksepte sa bann sakrifis e i ti mepriz bann ki ti ofer zot.
2:13—Larm lekel ki ti kouver lotel Zeova? I ti larm bann madanm ki ti vin kot tanp pour sipliy Zeova. Akoz zot ti dan lapenn? Akoz zot msye Zwif ti’n ganny divors pour bann rezon ki ti kont Lalwa e tre probab pour marye avek bann fiy etranze.
Leson pour nou:
1:10. Zeova pa ti pran okenn plezir dan bann lofrann ki bann pret voras ti fer e ki ti demann larzan pour nenport louvraz senp ki zot ti fer parey ferm laport tanp ouswa alim dife lotel. I vreman enportan ki dan sa ki nou fer pour ador Bondye, enkli predikasyon, i ganny motive par lanmour pour Bondye ek nou prosen, me non pa pour ganny larzan!—Matye 22:37-39; 2 Korentyen 11:7.
1:14; 2:17. Zeova pa aksepte lipokrizi.
2:7-9. Bann ki annan privilez pour ansenny kongregasyon i devret fer sir ki sa ki zot ansennyen i an armoni avek Parol Bondye, Labib ek bann piblikasyon baze lo Labib ki sorti kot “sa serviter fidel.”—Lik 12:42; Zak 3:11.
2:10, 11. Zeova i ekspekte ki son bann serviter i pran o serye sa konsey pour marye “selon Senyer.”—1 Korentyen 7:39.
2:15, 16. Vre adorater i annan bokou respe pour sa promes ki zot ti fer avek madanm zot zenes.
‘SA VRE SENYER POU VIN KOT SON TANP’
“En sel kou sa vre Senyer [Zeova]” avek “sa mesaze lalyans [Zezi Kri]” pou vin kot Son tanp.” Bondye “pou vin obor zot pour ziz zot” e pou vin vitman pour temwanny kont tou sort move keksoz ki zot in fer. Deplis, “en liv souvenir” pou ganny ekrir pour bann ki annan lakrent pour Zeova.—Malaki 3:1, 3, 5, 16.
Sa zour ki “brile parey en four” pou vini e detrir tou bann move dimoun. Avan ki sa zour i vini, en profet pou ganny anvoye pour “anmenn leker bann papa ver zot garson e leker bann garson ver zot papa.”—Malaki 4:1, 5, 6.
Larepons pour bann kestyon lo Labib:
3:1-3—Kan eski “sa vre Senyer” ek sa “mesaze lalyans” ti vin kot tanp, e lekel ki ti ganny anvoye avan zot? Zeova ti vin kot son tanp atraver son reprezantan e i ti netway son tanp le 10 Nizan lannen 33 N.L. Sa ti ler Zezi ti al dan tanp e pous bann ki ti pe aste oubyen vann dan tanp. (Mark 11:15) Sa ti trwa-z-an edmi apre ki Zezi ti’n ganny swazir pour li vin lerwa plitar. Pareyman, i paret ki trwa-z-an edmi apre ki Zezi ti vin Lerwa dan lesyel, Zezi ti al avek Zeova kot son tanp spirityel e ti vwar ki son pep ti bezwen ganny pirifye. Dan premye syek, Zan-Batis ti ganny anvoye pour prepar bann Zwif pour larive Zezi Kri. Dan nou letan, en mesaze ti ganny anvoye pour prepar pep Bondye avan ki Zeova i vin kot son tanp spirityel. Byen boner dan bann lannen 1880, en group etidyan Labib ti konmans en travay pour ansenny bann dimoun senser bann vre lansennyman debaz lo Labib.
3:10—Eski donn ladim oubyen donn “tou dizyenm” i vedir donn tou sa ki nou annan avek Zeova? Lalwa Moiz ti fini avek lanmor Zezi, alor donn ladim i pa obligatwar pour bann ki ador Bondye ozordi. Me selman, donn ladim i annan en sinifikasyon senbolik. (Efezyen 2:15) I pa vedir donn tou sa ki nou annan. Ladim ti ganny donnen tou le-z-an, me nou nou ofer tou sa ki nou annan pour Zeova zis enn fwa zour ki nou batize pour montre ki nou dedye nou lavi avek Zeova. Apartir sa moman, tou sa ki nou annan i pour Zeova. Toudmenm, i les nou swazir serten keksoz ki nou kapab servi dan son servis, sa se ladim senbolik. I reprezant sa ki nou kapab donnen dan son servis dapre nou sirkonstans e sa ki nou leker i pous nou pour donnen. Bann lofrann ki nou donn Zeova i enkli nou letan, lenerzi ek resours ki nou servi pour anons sa bon nouvel e fer bann dimoun vin bann disip Zezi. I osi enkli asiste bann renyon Kretyen, vizit bann dimoun aze oubyen malad e servi nou larzan pour siport vre ladorasyon.
4:3—Dan ki sans bann serviter Zeova pou “kraz bann move dimoun”? Pep Bondye pa pou vreman “kraz bann move dimoun,” akoz zot pa pou donn lanmen Bondye pour egzekit son zizman lo bann move dimoun. Plito, sa i montre ki bann serviter Bondye lo later pou partisip plennman pour selebre laviktwar ler lemonn Satan pou’n fini.—Psonm 145:20; Revelasyon 20:1-3.
4:4—Akoz fodre nou “mazin . . . lalwa Moiz”? Sa lalwa pa’n fer pour bann Kretyen, i zis parey “en lonbraz bann bon keksoz ki pe vini.” (Ebre 10:1) Parkont, port latansyon lo lalwa Moiz i kapab ed nou pour vwar ki mannyer bann keksoz ki’n ganny ekrir pe ganny akonplir. (Lik 24:44, 45) An plis ki sa, sa lalwa i kontyen “bann realite dan lesyel.” I neseser ki nou etidye li si nou oule ganny konprenezon lo lansennyman ek kondwit Kretyen.—Ebre 9:23.
4:5, 6—Lekel ki “profet Eliya” ti pe reprezante? I ti ganny dir ki profet “Eliya” ti pou fer en travay restorasyon ki pou prepar leker bann dimoun. Dan premye syek N.L., Zezi Kri ti idantifye Zan-Batis konman “Eliya.” (Matye 11:12-14; Mark 9:11-13) Sa enn dan nou letan ki zwe menm rol avek Eliya in ganny anvoye “avan larive sa gran zour efreyan Zeova.” Ozordi, Eliya pe ganny reprezante par ‘lesklav fidel e pridan.’ (Matye 24:45) Bann Kretyen swazir pe touzour persevere dan sa travay restorasyon spirityel.
Leson pour nou:
3:10. Si nou pa donn Zeova nou meyer, sa i vedir ki nou pe priv nou lekor son benediksyon.
3:14, 15. Akoz move legzanp bann pret, bann Zwif ti vwar servis pour Bondye konman en keksoz ki napa gran valer. Bann ki ganny konfye responsabilite dan kongregasyon, i bezwen vin en model.—1 Pyer 5:1-3.
3:16. Zeova i gard en rikord tou bann ki annan lakrent pour li e tou bann ki fidel avek li. I mazin zot e i pou prezerv zot ler i anmenn en lafen avek sa lemonn mesan. Alor, annou pa perdi nou determinasyon pour gard nou lentegrite anver Bondye.—Zob 27:5.
4:1. Sa zour ki zot pou rann kont avek Zeova, tou le de, son “brans” konman son “rasin,” pou ariv ver son lafen, savedir zanfan pou ganny menm zizman avek zot paran. Pa sa i en responsabilite ki paran i annan vizavi zot zanfan miner! Bann paran Kretyen i bezwen travay dir pour ganny laprouvasyon Bondye e mentenir en bon relasyon avek li.—1 Korentyen 7:14.
“Annan lakrent pour sa vre Bondye”
Lekel ki pou ganny sove “sa gran zour efreyan Zeova”? (Malaki 4:5) Zeova i dir: “Zot ki annan lakrent pour mon non, soley ladrwatir pou sirman lev lo zot avek gerizon anba son lezel; e zot pou vreman sorti e pil lo later parey bann pti bef angrese.”—Malaki 4:2.
Zezi Kri, “sa soley lazistis,” pou briye lo bann ki annan lakrent ek respe pour non Bondye, e zot pou resevwar faver Zeova. (Zan 8:12) Pour zot, i osi annan en “gerizon anba son lezel,” setadir gerizon spirityel la konmela e osi en gerizon konplet fizikman, mantalman e emosyonnelman dan nouvo lemonn Bondye. (Revelasyon 22:1, 2) Eksite avek lakontantman, zot in vin “parey bann pti bef angrese.” Avek bann benediksyon ki pou vini, annou pran aker konsey Lerwa Salomon ki ti dir: “Annan lakrent pour sa sel vre Bondye e gard son komannman. Akoz sa i tou lobligasyon zonm.”—Eklezyast 12:13.
[Portre lo paz 28]
Profet Malaki ti demontre devouman ek devosyon pour Zeova
[Portre lo paz 31]
Sa ki nou ansennyen i devret an armoni avek Labib
[Portre lo paz 31]
Serviter Zeova i gard promes ki zot ti fer zour zot maryaz