Talalupangdon nga mga Punto Gikan sa Tulun-an sang Malaquias
Ang Pulong ni Jehova Buhi
Talalupangdon nga mga Punto Gikan sa Tulun-an sang Malaquias
ANG ginpatindog liwat nga templo sa Jerusalem natapos kapin na sa 70 ka tuig. Apang, sa paglipas sang tion, nagluya sa espirituwal ang mga Judiyo. Bisan ang mga saserdote nangin malaut. Sin-o ang magapatalupangod sang ila matuod nga kahimtangan kag magabulig nga mapasag-uli ang ila espirituwalidad? Gintulin ni Jehova ini nga buluhaton kay manalagna Malaquias.
Ginsulat ni Malaquias sing prangka ang katapusan nga tulun-an sang Hebreong Kasulatan nga nagaunod sang inspirado nga mga tagna sang Dios. Ang pagbinagbinag sa matagnaon nga pulong ni Malaquias makabulig sa aton nga maghanda para sa “daku kag makakulugmat nga adlaw ni Jehova,” kon laglagon na niya ang malaut nga sistema sang mga butang karon.—Malaquias 4:5, NW.
GINPASANDAD SANG MGA SASERDOTE ANG MADAMO
Ginpabutyag ni Jehova ang iya balatyagon sa Israel nga nagasiling: “Ginhigugma ko ikaw.” Apang gintamay sang mga saserdote ang ngalan sang Dios. Paano? Paagi sa ‘paghalad sa iya halaran sing tinapay nga dinagtaan’ kag pagdulot sing “piang kag masakiton” nga mga sapat.—Malaquias 1:2, 6-8.
“Ginpasandad [sang mga saserdote] ang madamu sa kasogoan.” “Nagaluibay ang tagsatagsa ka tawo sa iya utud.” Nagpangasawa ang iban sing di-Judiyo nga mga babayi. Ang iban naman nagluib sa “asawa sang [ila] pagkapamatan-on.”—Malaquias 2:8, 10, 11, 14-16.
Sabat sa mga Pamangkot sa Kasulatan:
2:2—Paano ni Jehova ‘ginpakamalaut ang mga pagpakamaayo’ sang balingag nga mga saserdote? Natabo ini kay sa baylo sang pagpakamaayo nga ginpangayo sini nga mga saserdote sa Dios, pagpakamalaut ang ila nabaton.
2:3—Ano ang buot silingon sang “hamlasan sing ipot” ang mga nawong sang mga saserdote? Suno sa Kasuguan, dapat dalhon sa gua sang kampo kag sunugon ang ipot sang ginhalad nga sapat. (Levitico 16:27) Ang paghamlas sing ipot sa mga nawong sang mga saserdote nagakahulugan nga ginsikway ni Jehova ang mga halad kag ginkangil-aran niya ang mga naghalad sini.
2:13—Kay sin-o mga luha ang nagtabon sa altar ni Jehova? Mga luha ini sang mga asawa nga nagkadto sa santuaryo sang templo agod mangamuyo kay Jehova. Ngaa tuman gid ang ila kalisod? Bangod bisan wala sing makatarunganon nga rason, gindiborsiohan sila sang ila Judiyo nga mga bana, ayhan agod makapangasawa sing mas bataon kag di-Judiyo nga mga babayi.
Mga Leksion Para sa Aton:
1:10. Wala si Jehova nahamuot sa mga halad sang makagod nga mga saserdote nga nagapabayad bisan sang simple nga mga serbisyo subong sang pagtakop sa mga ganhaan ukon pagdabok sa halaran. Daw ano ka importante nga ang nagapahulag sa aton pagsimba, lakip ang Cristianong ministeryo, amo ang aton di-makagod nga gugma sa Dios kag sa isigkatawo, kag indi ang materyal nga bentaha!—Mateo 22:37-39; 2 Corinto 11:7.
1:14; 2:17. Wala ginakunsinti ni Jehova ang pagkasalimpapaw.
2:7-9. Dapat pat-uron sang mga utod nga may katungdanan sa pagtudlo sa kongregasyon nga ang ila pagpanudlo nagahisanto sa Pulong sang Dios, ang Balaan nga Kasulatan, kag sa pasad sa Biblia nga mga publikasyon sang “tulugyanan nga matutum.”—Lucas 12:42; Santiago 3:11.
2:10, 11. Ginapaabot ni Jehova nga tumanon sang iya mga sumilimba ang laygay nga magminyo “lamang sa Ginoo.”—1 Corinto 7:39.
2:15, 16. Dapat tahuron sang matuod nga mga sumilimba ang ila pagpakigkatipan sa ila asawa sa pagkapamatan-on.
ANG MATUOD NGA GINUO MAGASULOD SA IYA TEMPLO
“Sa hinali magasulod sa Iya templo ang matuod nga Ginuo [si Jehova nga Dios]” kag “ang mensahero sang katipan [si Jesucristo].” Ang Dios “magapalapit sa [iya katawhan] sa paghukom” kag mangin saksi nga madagmit batok sa tanan nga nagabuhat sing malain. Dugang pa, ang “tulun-an sang handumanan” ginsulat para sa mga tawo nga nagakahadlok kay Jehova.—Malaquias 3:1, 3, 5, 16, NW.
Magaabot ang adlaw nga “nagadabdab subong sang horno” kag pagalamunon sini ang tanan nga malaut. Antes mag-abot ina nga adlaw, ipadala ang isa ka manalagna agod “lisoon niya ang tagiposoon sang mga ginikanan sa mga anak kag ang tagiposoon sang mga anak sa ila ginikanan.”—Malaquias 4:1, 5, 6.
Sabat sa mga Pamangkot sa Kasulatan:
3:1-3, NW—San-o “ang matuod nga Ginuo” kag “ang mensahero sang katipan” nagsulod sa templo, kag sin-o ang ginpadala una sa ila? Sang Nisan 10, 33 C.E., nagsulod si Jehova sa templo paagi sa isa ka tiglawas, kag gintinluan ini. Amo ini ang tion nga nagsulod si Jesus sa templo kag gintabog ang mga nagapamaligya kag nagapamakal diri. (Marcos 11:15) Natabo ini pagligad sang tatlo ka tuig kag tunga sa tapos gintangdo nga Hari si Jesus. Sing kaanggid, pagligad sang tatlo ka tuig kag tunga sa tapos si Jesus ginpalingkod sa trono subong Hari sa langit, gin-updan niya si Jehova sa espirituwal nga templo kag nakita nga ang katawhan sang Dios kinahanglan nga tinluan. Sang nahauna nga siglo, ginpadala si Juan Bautista agod ihanda ang mga Judiyo sa pagkari ni Jesucristo. Sa aton tion, ginpadala sing una ang mensahero agod ihanda ang dalan para sa pagsulod ni Jehova sa iya espirituwal nga templo. Sadto pa sang katuigan 1880, ginsugdan sang mga estudyante sang Biblia ang pagpanudlo nga hilikuton agod tudluan ang sinsero nga mga tawo sing kamatuoran sang Biblia.
3:10—Ang paghatag bala sing “bug-os nga ikapulo” nagakahulugan nga ihatag naton kay Jehova ang tanan nga yara sa aton? Paagi sa kamatayon ni Jesus, gindula na ang Mosaikong Kasuguan, gani wala na ginapatuman ang paghatag sing ikapulo sang kinitaan sa pagsimba sa Dios karon. Apang, ang ikapulo may simbuliko nga kahulugan. (Efeso 2:15) Wala ini nagakahulugan nga ihatag ang tanan nga yara sa aton. Kon ang ikapulo ginahatag sadto kada tuig, ang aton paghatag karon sang tanan nga yara sa aton ginahimo sing makaisa lamang, sang gindedikar naton ang aton kabuhi sa iya kag ginsimbuluhan ang aton dedikasyon paagi sa pagpabawtismo sa tubig. Sugod sina nga tion, ang tanan nga yara sa aton iya na ni Jehova. Apang, sa gihapon ginatugutan niya kita nga ang bahin sang aton ginapanag-iyahan, nga amo ang simbuliko nga ikapulo, gamiton naton sa pag-alagad sa iya. Nagadepende ini sa aton kahimtangan kag suno sa ginapahulag sang aton tagipusuon. Lakip sa mga dulot nga ginahatag naton kay Jehova amo ang aton tion, kusog, kag pagkabutang nga ginagamit sa pagbantala sing Ginharian kag paghimo disipulo nga hilikuton. Lakip man sa sini ang pagtambong sa Cristianong mga miting, pagbisita sa nagamasakit kag may edad na nga mga masigkatumuluo, kag pinansial nga pagsakdag sa matuod nga pagsimba.
4:3—Sa anong paagi “tapakon [sang mga sumilimba ni Jehova] ang mga malauton”? Indi literal nga “tapakon [sang mga sumilimba ni Jehova] ang mga malauton,” subong nga makigbahin sila sa paglaglag niya sa ila. Sa baylo, malaragwayon nga himuon ini sang dutan-on nga mga alagad ni Jehova paagi sa bug-os tagipusuon nga pagbuylog sa selebrasyon sang kadalag-an pagkatapos malaglag ang kalibutan ni Satanas.—Salmo 145:20; Bugna 20:1-3.
4:4—Ngaa dapat naton dumdumon “ang kasogoan ni Moises”? Wala ginaobligar ang mga Cristiano nga sundon ina nga Kasuguan, apang nagaserbe ini nga “landong sang maayong mga butang nga magaabot.” (Hebreo 10:1, NW) Ang pagtalupangod sa Mosaikong Kasuguan makabulig sa aton nga makita kon paano nagakatuman ang mga butang nga nasulat diri. (Lucas 24:44, 45) Dugang pa, nagaunod ang Kasuguan sing “simbuliko nga mga larawan sang mga butang sa langit.” Importante gid nga tun-an naton ini agod mahangpan naton ang Cristianong mga panudlo kag paggawi.—Hebreo 9:23, NW.
4:5, 6—Sin-o ang ginatiglawas ni “Elias nga manalagna”? Gintagna nga si “Elias” ang magahimo sing hilikuton sa pagpasag-uli, ang paghanda sang tagipusuon sang mga tawo. Sang nahauna nga siglo C.E., ginkilala ni Jesucristo si Juan Bautista subong si “Elias.” (Mateo 11:12-14; Marcos 9:11-13) Ang iya katumbas sa aton tion ginpadala antes “mag-abot ang daku kag makakulugmat nga adlaw ni Jehova.” Sa karon, si Elias nagatiglawas sa “matutom kag mainandamon nga ulipon.” (Mateo 24:45, NW) Ining hinaplas nga mga Cristiano, makugihon nga nagabulig sa mga tawo nga mapasag-uli ang ila kaangtanan sa Dios.
Mga Leksion Para sa Aton:
3:10. Kon wala naton ginahatag kay Jehova ang aton bug-os nga masarangan, ginadingutan naton ang aton kaugalingon sang iya mga pagpakamaayo.
3:14, 15. Ginpakadiutay sang mga Judiyo ang pag-alagad sa Dios bangod sang indi maayo nga halimbawa sang mga saserdote. Dapat mangin huwaran ang mga may katungdanan sa kongregasyon.—1 Pedro 5:1-3.
3:16. May rekord si Jehova sang mga nagakahadlok kag matutom sa iya. Ginadumdom niya sila kag pagaamligan kon laglagon na niya ang malauton nga kalibutan ni Satanas. Gani, dapat determinado gid kita nga huptan ang aton integridad sa Dios.—Job 27:5.
4:1. Sa adlaw sang paghukom ni Jehova, pareho ang madangatan sang “sanga” kag sang “gamut”. Kon ano ang paghukom sa mga ginikanan amo man ang sa mga anak. Gani, responsibilidad gid sang mga ginikanan ang ila menor de edad nga mga anak! Dapat panikasugan sang Cristianong mga ginikanan nga pahamut-an ang Dios kag huptan ang maayo nga relasyon upod sa iya.—1 Corinto 7:14.
“Magkahadlok sa Matuod nga Dios”
Sin-o ang maluwas sa “daku kag makakulugmat nga adlaw ni Jehova”? (Malaquias 4:5, NW) “Sa inyo nga nagakahadlok sa akon ngalan,” siling ni Jehova, “ang adlaw sang pagkamatarong magasilak gid, nga may pag-ayo sa mga pakpak sini; kag magagua kamo kag magalumpat sa duta nga subong sang pinatambok nga mga tinday nga baka.”—Malaquias 4:2, NW.
“Ang adlaw sang pagkamatarong,” si Jesucristo, nagasilak sa mga matinahuron nga nagakahadlok sa ngalan sang Dios, kag ginakahamut-an sila ni Jehova. (Juan 8:12) Para sa ila, may yara man “pag-ayo sa mga pakpak sini”—espirituwal nga pag-ayo sa karon kag bug-os nga pag-ayo sa pisikal, mental, kag emosyonal sa bag-ong kalibutan sang Dios. (Bugna 22:1, 2) Bangod sang kalangkag kag kalipay, daw subong sila sang “pinatambok nga mga tinday nga baka.” Samtang ginapaabot ina nga mga pagpakamaayo, pamatian naton ang laygay ni Hari Solomon: “Magkahadlok sa matuod nga Dios kag magtuman sa iya mga sugo. Kay amo ini ang bug-os nga katungdanan sang tawo.”—Manugwali 12:13, NW.
[Piktyur sa pahina 26]
Si manalagna Malaquias, makugi kag matutom nga alagad sang Dios
[Piktyur sa pahina 29]
Dapat nahisanto sa Biblia ang aton ginatudlo
[Piktyur sa pahina 29]
Ginapadunggan sang mga alagad ni Jehova ang ila katipan sa pag-asawahay
