Jehovap oqaasia uumavoq

Malakip allagaanit pingaarnersat

NAALAFFIK sanaqqitaq Jerusalemimiittoq naammassilluni ukiut 70-it sinnerlugit napareerpoq. Juutilli Guutimut attaveqarnertik sanngiilliartorterujussuarsimavaat. Allaat palasit inuunerlungaarput. Kina uparuaajartussava pissutsit qanoq ajortiginerannik taakkuninngalu anersaakkut uummartitseqqinniaagaluarluni? Tamanna Jehovap pruffiiti Malakimut suliassiissutigaa.

Malakip allagai, allakkat Hebræerisuut atuagartaasa kingullersaat, oqaatsit kimittuut atorlugit allataapput, imaraallu siulittuutit Guutimit isumassarsiarititaasut. Malakip oqaasii siulittuutaasut eqqumaffigigutsigit „[Jehovap] ullussaa pingaartoq siooranaqisorlu“, pissutsit aaqqissuussaanerata guutiitsup maanna atuuttup atorunnaarsinneqarfissaa, piareersimaffigilluarnerussavarput. — Malaki 3:23.

PALASIT ’AMERLASUUNIK ORLUTITSISIMAPPUT’

(Malaki 1:1–2:17)

Jehovap Israelimut misigissutsini saqqummiuppai ima oqarluni: „Asavassi.“ Palasilli Guutip aqqanik asissuinermik ersersitsipput. Qanoq? ’Tassa nerisassat mingunnartut pilliiviutaanut aattaramikkit’ aamma „nersutaatit tusiattut nappaateqartullu“ pilliutitut sassaattaramikkit. — Malaki 1:2, 6-8.

Palasit ’ajoqersuussinermikkut amerlasuut orlutissimavaat’. Inuit ’inoqatiminnut ilumuunngitsuliortarput’. Ilaat allanertat paniinik nuliarsimapput. Allallu ’inuusuttuunerminiilli nuliarisaminnut ilumuunngitsuliorsimapput’. — Malaki 2:8, 10, 11, 14-16.

Allassimaffiit pillugit apeqqutit akineqartut:

2:2 — Qanoq paasisariaqarpa Jehovap palasit naalasseriitsut ’pilluaqqusaanerat perloqqusaaninngortikkaa’? Palasit taamaattut pilluaqqoqqullutik qinnutaat Guutip perloqqusaaninngortippaa.

2:3 — Qanoq paasisariaqarpa palasit kiinaannut ’perlukunik eqqaaneq’? Mosesip inatsisai naapertorlugit uumasut pilliutit perlukui tammaarfiup avataanukaallugit ikuallanneqartussaapput. (3 Mosesi 16:27) Palasit kiinaannut ’perlukunik eqqaaneq’ isumaqarpoq Jehovap pilliutit taakkuninngalu pilliisut ajattorai.

2:13 — Jehovap pilliiviutaa kikkut qulliinit matoorneqarpa? Tassaapput nuliaasut naalaffiliarlutik Jehovamut uummammiuminnik aniatitsisut qullii. Suna aliasuutigaat? Uimik juutiusut eqqunngitsumik pissuteqarlutik avimmatik qimallutillu, qularnanngitsumik allanertanik inuusunnerusunik nuliarniarlutik.

 Ilinniarfigisinnaasavut:

1:10. Jehovap iluarinngilai pilliutit palasinit piumatuunit pisut, taakkuami akileqqusarput allaat kiffartuussinimininnguanut soorlu matunik matusinernut pilliivimmilluunniit ikitsinermut. Pingaaruteqarpoq Guutimut inoqatitsinnullu asanninneq namminissarsiunngitsoq kajumississutigalugu, iluanaarusunneq kajumississutiginngisaannarlugu, Guutimut kiffartornitsinni, ilaatigut oqaluussinermi, iliuuseqarnissarput! — Matthæusi 22:37-39; 2 Korinthimiut 11:7.

1:14; 2:17. Jehovap ilumoortuusaarneq akuerinngilaa.

2:7-9. Ilagiinni ilinniartitsinissamik immikkut pisinnaatitaaffeqartut qulakkeertariaqarpaat ilinniartitsissutigisatik Guutip oqaasianut illernartumut atuagassianullu Biibililersaarutinut ’pilittaasup ilumoortup’ saqqummersitaanut naapertuuttuunissaat. — Lukasi 12:42; 2 Korinthimiut 6:14.

2:10, 11. Jehovap naatsorsuutigaa ’naalakkamiinnaq’ katinnissamik siunnersuut kiffami pimoorutissagaat. — 1 Korinthimiut 7:39.

2:15, 16. Guutimut kiffaasup ilumoortup katinnermi neriorsuutini „inuusuttuunerminiilli nuliarisaminut“ eqquutitissavaa.

’NAALAGAQ NAALAFFIMMINUT TIKIUKKUMAARPOQ’

(Malaki 3:1–3:24)

„Naalagaq“, Jehova Guuti, „tassanngaannaq naalaffimminut tikiukkumaarpoq“ „inngili [angeruseq pillugu aallartitaq, NV]“, Jiisusi Kristusi, ilagalugu. Guuti sassarumaarpoq innuttani ’eqqartuukkiartorlugit’ inatsisinillu unioqqutitsisut tamaasa ’piaartumik ilisimannittutut unnerluutigissallugit’. Aammattaaq ’mappersagaq allanneqassaaq Jehovamik mianerinnittut eqqaamaneqaqqullugit’. — Malaki 3:1, 3, 5, 16.

„Ulloq uutsitsivittut ikumasutut ittoq“ nalliutissaaq ikikkassallugillu guutiitsut tamaasa. Ullup tamatuma nalliutinnginnerani pruffiiti aallartinneqassaaq, taassumalu „saatsikkumaarpai angajoqqaat uummataat ernerinut ernerillu uummataat angajoqqaavinut“. — Malaki 3:19, 23, 24

 Allassimaffiit pillugit apeqqutit akineqartut:

3:1-3 — Qanga „Naalagaq“ aamma „inngili [angeruseq pillugu aallartitaq, NV]“ naalaffimmut tikiuppat, taakkualu sioqqullugit kina aallartinneqarpa? Ukiumi 33-mi nisanip qulingani aallartitamit sinniisoqarluni Jehova naalaffimminut tikiuppoq minguiarlugulu. Ullormi tamatumani Jiisusi naalaffimmut iserpoq tassanilu pisiniat tuniniaasullu aniatillugit. (Markusi 11:15) Tamanna pivoq Jiisusip kunnginngortussatut taninneqarnerata kingorna ukiut sisamassaat qiteqqullugu qaangiuttut. Tamatumunnga assingusumik pisoqarunarpoq Jiisusip, qilammi kunnginngortinneqarnermi kingorna ukiut sisamassaat qiteqqullugu qaangiuttut, Jehova naalaffimmut anersaakkut ittumut ilagimmagu paasillugulu Guutip innuttai minguiarneqarnissaminnik pisariaqartitsisut. Ukiuni hundredelinni siullerni Johannesi Kuisisoq aallartinneqarpoq juutit Jiisusi Kristusip tikiunnissaanut piareersariartorlugit. Nalitsinni Jehovap naalaffimminut anersaakkut ittumut tikiunnera sioqqullugu aallartitaq siuartinneqarpoq aqqut piareersariartorlugu. 1880-ikkunniilli Biibilimik Atuaqqissaartartut ikittunnguit sallusuissutit Biibilimeersut tunngaviusut pillugit inunnik eqqortuliorusuttunik ilinniartitsillutik aallartipput.

3:10 — „Pissarsiat qulingi ilanngarnagit“ Jehovamut aanneqartarnerat uagut pigisatta tamaasa Jehovamut tunniunnissaannut assersuunneqarsinnaava? Jiisusip toquata Mosesip inatsisai atorunnaarsippai, taamaattumik pissarsiatta qulinginik akiliisarnissarput piumasaqaataanngilaq. Pissarsialli qulinginik aatsisarneq assersuutaasumik isumaqarpoq. (Efesosimiut 2:15) Pigisatsinnik tamanik tunniussinissamut assersuutaanngilaq. Israelikkut ukiut tamaasa pissarsiat qulinginik tunisisarput, uagulli Jehova ataasiaammik tamanik tunivarput, tassa Jehovamut tunniulluinnarnitsinni tamatuminngalu kuisinnikkut ersersitsinitsinni. Tamanna killigalugu pigisavut tamaasa Jehovap pigilerpai. Periarfissippaatigulli pigisatta ilaanik — assersuutaasumik pissarsiat qulinginik — pissutsit atukkatta uummatittalu tunisinissamut kajumilersissutaanik taassumunnga kiffartornitsinnut immikkoortitsinissamut. Jehovamut pilliutigisartakkavut tassaapput piffissaq, nukiit iluaqutigisinnaasallu allat Guutip naalagaaffia pillugu oqaluussinitsinni ajoqersuganngortitsiortornitsinnilu atortakkavut. Pilliutinut aamma ilaapput kristumiut ataatsimiinnerinut najuunneq, napparsimasortatsinnut uppeqatitsitsinnullu utoqqarnut pulaarneq pallorfiginninnermillu ilumoortumik aningaasatigut tapersersuineq.

3:21 — Qanoq paasisariaqarpa Jehovap kiffaasa ’iluaatsut tullaarissagaat’? Guutip innuttaasa maani nunarsuarmiittut isikkaminnik tullaativillugit ’iluaatsut tullaarissanngilaat’, tassa Guuti ’iluaatsunut’ eqqartuussutiminik naammassinnippat peqataassanngillat. Assersuutaagunarpoq Saatanip silarsuaa peeruppat Jehovap kiffaasa nunarsuarmiittut uummatikkut iluunngarlutik ajugaanersioqataanissaannut. — Tussiaat 145:20; Saqqummersitat 20:1-3.

3:22 — Sooq „Mosesip inatsisai“ eqqaamasariaqarpavut? Kristumiut Mosesip inatsisaanik maleruaasussaanngillat, kisianni ’ajunngitsuutit nalliuttussat tarraraat’. (Hebræerit 10:1) Taamaattumik Mosesip inatsisai misissorutsigit, taakkunani siulittuutaasut qanoq eqquunnersut paasisinnaassavavut. (Lukasi 24:44, 45) Aammattaaq Inatsisit imaraat „qilanniittunik issuaanerit“. Tamakkuninnga misissueqqissaarnissaq pingaaruteqarpoq kristumiut ajoqersuutaat qanorlu pissusilersortariaqartugut paasissagutsigit. — Hebræerit 9:23.

3:23, 24 — „Pruffiiti Elia“ kimut assersuutaava? Siulittuutaavoq ’Eliap’ inuit iluarsarneqarteqqissagai uummataallu piareersarlugit. Ukiuni hundredelinni siullerni Jiisusi Kristusip Johannesi Kuisisoq tassaanerarpaa „Elia“. (Matthæusi 11:12-14; Markusi 9:11-13) Ullutsinni taassumunnga assersuunneqartoq aallartinneqassaaq „[Jehovap] ullussaa pingaartoq siooranaqisorlu nalliutinngikkallartillugu“. Ullutsinni Eliamut assersuutaavoq „kiffaq ilumoortoq silatoorlu“. (Matthæusi 24:45) Kristumiut tanitat eqimattat taakkua ulapputigisimavaat inuit allat Guutimut ajunngitsumik attaveqalernissaat.

 Ilinniarfigisinnaasavut:

3:10. Pitsaanerpaamik Jehova tuninngikkutsigu imminut taassumannga pilluaqqusaatinngitsuussaagut.

3:14, 15. Palasit maligassiuinerluttuummata juutit isumaqalersimapput Guutimut kiffartorneq pingaaruteqanngitsuusoq. Ilagiinni kristumiuni akisussaaffeqartut maligassiuilluartuusariaqarput. — 1 Petrusi 5:1-3.

3:16. Imminik mianerinnittut imminullu aalajaatsut Jehovap malugisarpai. Eqqaamavai, Saatanillu silarsuaa guutiitsoq atorunnaarsikkuniuk aniguisissavai. Taamaattumik Guutip isaani assuarnaattuarnissatsinnik aalajangiusimannikkunnaanngisaannarta. — Tussiaat 26:1.

3:19. Ullormi Jehovap kikkunnik tamanik eqqartuussiffissaa ’sorlammut’ aamma ’avaleqummut’ assigiimmik kinguneqassaaq. Meeqqat angajoqqaamittut eqqartuunneqassapput. Tamatuma erseqqissarpaa angajoqqaat qitornaminnut nukangasunut akisussaafferujussuaqarnerat! Ataataasut anaanaasullu kristumiut eqiasuillutik Guutimit akuerisaaniartariaqarput taassumunngalu ajunngitsumik attaveqartuartariaqarlutik. — 1 Korinthimiut 7:14.

„Guuti mianeruuk“

Kikkut ’Jehovap ullussaani pingaartumi siooranaqisumilu’ aniguissappat? (Malaki 3:23) „Ilissinnut atinnik mianerinnittunut,“ oqarpoq Jehova, „qinngorumaarpoq seqineq iluassuseqarfissaq, suluisa ataanni katsorsaaneqassaaq. Aniumaarpusi pisseqattaarumaarlusilu nersuteeqqatut puallarsikkatut.“ — Malaki 3:20.

„Seqineq iluassuseqarfissaq“, Jiisusi Kristusi, ’qinngoqqavoq’ Guutip aqqanik mianerinnittunut, taakkualu Jehovamit iluarisaaneq nuannaarutigisinnaavaat. (Johannesi 8:12) Misigissavaattaaq ’suluisa ataanni katsorsagaaneq’ — maannakkut anersaakkut peqqissineq Guutillu silarsuassaani nutaami timikkut, sianissutsikkut misigissutsikkullu peqqissilluinnarneq. (Saqqummersitat 22:1, 2) Qiimmattarnerminni ’nersuteeqqatut puallarsikkatut’ issapput. Tamakkuninnga pilluaqquneqarnissaq qilanaarisinnaagatsigu kunngi Salomop oqaaqqissaarutaa una maleruartariaqarparput: „Guuti mianeruuk inatsisaalu maleruarlugit, inuit tamarmik taamaaliortussaapput!“ — Oqaluussisartup oqaasii 12:13. (wE 12/15 07)

[Qupp. 18-mi assiliartaq]

Pruffiiti Malaki Guutimut kiffartorpoq aallussilluarluni tunniusimallunilu

[Qupp. 21-mi assiliartaq]

Allanut ilinniartitsissutigisavut Biibilimut naapertuuttussaapput

[Qupp. 21-mi assiliartaq]

Jehovap kiffaasa katinnermi neriorsuutertik eqquutitittarpaat