Yikuma Yamaneni Kufuma muMukanda waMalaki
Izu daYehova daDumi
Yikuma Yamaneni Kufuma muMukanda waMalaki
KUFUMA hatuñulwiluwu tembeli muYerusalema mwahitili yaaka kubadika ha 70. Mukuhita kwampinji, wubwambu wawaYudeya naNzambi wazeyeli chikupu. Niatupristu ataminini kumu. Hinyi dinu wukuyanukishaku chiyadiñawu nikuyikwashaku kulonda aswili kwakwihi naNzambi? Yehova hakumwinka kaprofwetu Malaki mudimu wakuyileja.
Malaki wasonekeli mukanda wakukumishaku wamuNsona jachiHeberu mudi wuprofwetu wonenawu kudi Nzambi munjila yakukonkomwena. Neyi tukutiyilila chinakuhosha izu dawuprofwetu didi muMalaki, chikutukwasha kutalila “ifuku daYehova deneni dikweti woma,” hakakuma mpata yatama yamakonu.—Malaki 4:5.
ATUPRISTU ‘ANADIMBWISHI ANTU AMAVULU’
Yehova hakuhosha chatiyileñayi hadi aIsarela, nindi: ‘Ami nayikeña.’ Ilaña atupristu asawili ijina daNzambi. Munjilanyi? Kuhitila ‘mukulambula yakudya yajilola hakameña [kindi]’ nikuhana ‘chimuna chachifwayi hela chakata.’—Malaki 1:2, 6-8.
Atupristu ‘anadimbwishi antu amavulu munshimbi.’ Antu atachikili ‘kudibalumuka mukachi kawu.’ Amakwawu hiyakusumbula ambanda abula kwikala aYudeya. Amakwawu niwena hiyakukwatila ‘añodi jawu ahawukwenzi wawu makasu.’—Malaki 2:8, 10, 11, 14-16.
Malwihu amuNsona Anayakuli:
2:2—Munjilanyi Yehova ‘mwashiñililiyi nkisu’ jawatupristu abulileña kulondela nshimbi jaNzambi? Nzambi welili mwenimu kulonda nkisu yikukiswilañawu awa atupristu yikali ishiñu.
2:3—Indi “kumwañila tuji” kumesu awatupristu kwatalishili mudihi? Kwesekeja nachahosha Nshimbi, tuji twachimuna wunakulambulawu ateleli kututwala kunsa yachilombu nakutocha. (Alevi 16:27) Dichi kumwaña tuji kumesu awatupristu chayili mukwila nawu Yehova wakaanini nyilambu nawa antu alambwileña adiña chishimashima kudi yena.
2:13—Indi madilu awanyi abutili kameña kaYehova? Adiña madilu awambanda enjili kutembeli nakumulembelela Yehova. Chumanyi chayiletesheli kuneña? Anfumu jawu amuYudeya ayiseñeli chakadi nyiloña nawa ayishili, hekwawu ayili nakusumbula atunkaña akwituña dacheñi.
Yuma Yitukudizilaku:
1:10. Yehova hakeñeli nyilambu yaheneneñawu atupristu akweti lwisuku, adiña nakufwetesha nihakamudimu kantesha hohu chidi neyi kwenzela mapitu hela kubutula kesi hakameña. Komana kudifukula kwetu, ninyidimu yitwakoñaña mumudimu wawiniKristu, kusañumukeña nakukeña kwalala kutwamukeña Nzambi niatuñi netu, bayi kwakufwila maliku!—Matewu 22:37-39; 2 Akorinda 11:7.
1:14; 2:17. Yehova hakeñaña wunfwikijuku.
2:7-9. Ana adi nakukooleka kwakutañisha muchipompelu atela kwiluka nawu yuma yinakutañishawu yinakwendela hamu Nezu daNzambi, Nyikanda Yajila, ninyikanda yashindamena haBayibolu ‘yakalama washinshika.’—Luka 12:42; Yakoba 3:11.
2:10, 11. Yehova wakeñaña akwakudifukula indi kutiyilila kufumba kwakusumbwila ‘chiña mudi Mwanta hohu.’—1 Akorinda 7:39.
2:15, 16. Akwakudifukula alala alemesha chitiyañenu chamaluwi nañodawu wahawukwenzi wawu.
‘MWANTA WALALA WAKENZA KUTEMBELI YINDI’
‘Mwanta walala [Yehova Nzambi] wakenza kutembeli Yindi chakukasumwisha’ hamu ‘nantemesha yindi yachitiyañenu [Yesu Kristu].’ Nzambi ‘wakakundama kwakwihi [nawantu jindi] kulonda yakayisompeshi’ nakwikala chinsahu chakuyinyakela akwakuluwalala ejima. Cheñi nawa, akasoneka majina awantu amwakamaña Yehova ‘mumukanda wakwanukaña nachu.’—Malaki 3:1, 3, 5, 16.
Ifuku ‘dinakudikita neyi kesi kamuluteñi’ dakenza nawa dakayishita antu atama ejima. Henohu idi ifuku kanda dinzi, kaprofwetu akamutemesha “[na]kubalumuna nyichima yawatata jawantu yakatali kudi anyanawu, ninyichima yawanyana yakatali kudi atata jawu.”—Malaki 4:1, 5, 6.
Malwihu amuNsona Anayakuli:
3:1-3—Mpinjinyi yenjiliyi ‘Mwanta walala’ “[ni]ntemesha wachitiyañenu” kutembeli, nawa hinyi watemeshelañawu dehi? HaNisani 10, 33 C.E. Yehova wenjili kutembeli yindi kuhitila mudi ñimenu nakuyitookesha. Iyi diyi mpinji yeñililiyi Yesu mutembeli nakutemunamu adiñi nakulanda nikulandisha. (Maku 11:15) Ichi chamwekeni yaaka yisatu nachikunku kufuma hamuwayishiluwu Yesu kwikala Mwanta Watondewa. Munjila yoyimu, chamwekeni neyi yaaka yisatu nachikunku kufuma hamuswanyikiluwu kwikala Mwanta mwiwulu, Yesu wayili naYehova kutembeli yakuspiritu nakuwana antu jaNzambi akeñeleña kuyitookesha. Munkulakaji yamwaka watachi, Yowanu Mpapatishu amutemeshelañahu dehi nakuleja aYudeya kwinza kwaYesu Kristu. Makonu, atemeshelañahu dehi ntemesha nakuloñesha njila yakwinza kwaYehova kutembeli yindi yakuspiritu. Kumatachikilu ayaaka ya 1880, izaza dawatudizi aBayibolu datachikili mudimu wakudiza Bayibolu kulonda kuleja antu ashinshika yuma yalema yayivulu yachalala chaBayibolu.
3:10—Komana kuleta “yamwikumi yejima,” chaya mukwila nawu kuhana yuma yetu yejima kudi Yehova? Chafwiliyi Yesu niNshimbi jamwinkeluwu Mosi jalekeli kuzatika, dichi kuhana yamwikumi hikunakukeñeka mukudifukula kudi Nzambi makonuku. Ilaña kuhana yamwikumi akwilumbulula muchifwikija. (Aefwesesa 2:15) Hichinatalishi mukuhana yuma yetu yejimaku. Hela chakwila chuma chamwikumi achileteleña yaaka yejima, ilaña etu twaletaña yuma yetu yejima kudi Yehova kamu hohu—hampinji yitunadihani kudi yena nikumwekesha kudihana kwetu kuhitila muchipapatishu chamumenji. Kufuma tuhu hayina mpinji, yuma yonsu yitukweti yambala yaYehova. Hela chochu, watwiteja kutonda chikunku hayuma yitukweti—chamwikumi chachifwikija—nakuchizatisha mumudimu windi. Iyi hiyuma yitukweti hanoyu mpinji nawa yinatuleji muchima wetu kuzatisha. Nyilambu yitwamwinkaña Yehova yidi neyi mpinji, ñovu, niyuma yitwazatishaña mumudimu wakushimwina Wanta nikwilisha atumbanji. Cheñi nikuwanika kukupompa kwawiniKristu, kuhempula ayeji niakwetu akakwitiya ashinakaja dehi, nikuhana wukwashu wamali kukudifukula kwalala.
4:3—Munjilanyi akwakudifukula aYehova ‘mwakadatolilawu atama’? Antu jaNzambi hamaseki ‘hiyakadatola atama,’ kuhitila mukwikalamu nambadi yawunsompeshi wakujilumunaku. Ilaña chinakulumbulula nawu ambuña aNzambi ahamaseki akadatola muchifwikija kuhitila mukuzañalala chikupu kukekalaku hanyima yakukuma kwetuña daSatana.—Masamu 145:20; Chimwekeshu 20:1-3.
4:4—Muloñadi ‘chitukwanukila nshimbi yamwinkeluwu . . . Mosi’? EniKristu hiyatela kulondela iyi Nshimbuku, ilaña yadiña ‘namwevulu wayuma yayiwahi yakenza.’ (Aheberu 10:1) Dichi neyi tukutiyililaña Nshimbi yamwinkeluwu Mosi chikutukwasha kumona chinakushikijewa yuma yasonekeluwu. (Luka 24:44, 45) Cheñi nawa, muNshimbi mwadiña “yifwikija yayuma yamumawulu.” Dichi neyi tukuyidiza chikuwaha neyi tunakukeña kwikala nantañishilu yawiniKristu niyililu.—Aheberu 9:23.
4:5, 6—Indi “kaprofwetu Elija,” wemenañakwinyi? Achishimwineñahu dehi nawu “Elija” wukazata mudimu wakutuñulula, dikwila nawu wakuloñesha nyichima yawantu. Munkulakaji yamwaka watachi C.E., Yesu Kristu wamulumbulwili Yowanu Mpapatishu nindi diyi “Elija.” (Matewu 11:12-14; Maku 9:11-13) Mulundanindi wamunanu mafuku anamutemeshi “hakela ifuku daYehova deneni dikweti woma dichidi kanda dinzi.” Makonu, Elija wemenañaku ‘nduñu wamaana nikashinshi.’ (Matewu 24:45) Idi izaza daweniKristu awayishewa dinakudikita hakukwasha antu kwikala nawubwambu naNzambi.
Yuma Yitukudizilaku:
3:10. Neyi tukañanya kumukalakela Yehova hakumina ñovu jetu dikwila nawu hitukutambwila nkisu jinduku.
3:14, 15. Hamuloña wayililu yawatupristu yatama, aYudeya atachikili kusekesha mudimu waNzambi. Ana adi nakukooleka muchipompelu chawiniKristu atela kwimika chakutalilahu chachiwahi.—1 Petulu 5:1-3.
3:16. Yehova wahembaña wunsahu wawantu amwakamaña nawa ashinshika kudi yena. Wayanukaña nawa wakayipulwisha hampinji yakajilumunayi adinu ituña datama daSatana. Dichi, bayi tuzeya hakuhemba kashinshi ketu kudi Nzambuku.—Yoba 27:5.
4:1. Hefuku dakulumbulula kudi Yehova, “mutayi” ‘nimuji’ yakamona chuma chimu—atwansi akayisompesha neyi chikasompeshawu anvwali jawu. Dichi anvwali akweti mudimu weneni wakukwasha anyanawu anyanya. Atata jawantu niamama jawanyana awiniKristu atela kuzata nañovu kulonda awani wuselewa waNzambi nikwikala nawubwambu wawuwahi nayena.—1 Akorinda 7:14.
‘Mutiyenu Nzambi Walala Woma’
Hinyi akapulwishawu ‘hefuku daYehova deneni dikweti woma’? (Malaki 4:5) Yehova nindi: “Enu mwatiyaña ijina dami woma, itañwa dakuloña dikweti kuuka mumpuula jadu dakayituntukila; mwakedika hanzi nakukiloka neyi anyana kañombi amwitaña.”—Malaki 4:2.
“Itañwa dakuloña,” Yesu Kristu, watoñekelaña hadi antu ekala nawoma wakwakama ijina daNzambi, nawa atambwila wuselewa waYehova. (Yowanu 8:12) Kudi wena, kudi cheñi “kuuka mumpuula jadu”—kuuka kwakuspiritu chakatataka nikuuka chikupu kwakumujimba, kwamuyitoñojoka mwituña dadiha daNzambi. (Chimwekeshu 22:1, 2) Hamuloña wakuzañalala, adi “neyi anyana kañombi amwitaña.” Chineli tunakutalila nkisu yamuchidiwu, twatela kutiyilila kufumba kwaMwanta Solomoni kwakwila nindi: “Mutiyi Nzambi woma, hembaku kuleja kwindi; chuma chatelela muntu chochenichi hohu.”—Mukwakutaŋisha 12:13.
[Mwevulu wudi hefu 28]
Kaprofwetu Malaki, kambuña Nzambi wadikita nawa wadihana
[Mwevulu wudi hefu 31]
Yuma yitwatañishaña yatela kwesekana hamu naBayibolu
[Mwevulu wudi hefu 31]
Ambuña Yehova alemeshaña chitiyañenu chawu chamaluwi