Taqiniw ukham mayisipxi

WALJA millón millón jaqinakawa pachpa arunakampi taqi kunxar Munañan Diosaru mayisipxi, uka tuqit amuytʼañäni. Ukampis kunsa mayisipki ukxa mä qhawqhanikiw yatipxi. ¿Ukham jan yatisa mayiñax utjaspati? Chiqpachansa, sapüruw ukham mayipxi. ¿Kunsa mayipxi? Munañamampix apnaqapxita, mä arunxa, Reinomax jutpan sasaw mayipxi.

Cristianüpxtwa sirinakatxa, niya 37.000 religionanakaw utji sasaw yatisi, ukatxa pä waranq millonat sipansa jila jaqinakarakiw ukar sarapxi. Ukar saririnakatxa niya taqiniw Jesusan mayisïwipatxa yatipxi. Jumax inas uka mayisïwit yatiraksta. Kunjamtï Jesusax arkirinakapar yatichkänxa, uka mayisïwix akham sasaw qallti: “Alaxpachankir nanakan Awkixa, sutimax jachʼañchatäpan. Munañamampisti apnaqapxita. Munañamasti luratäpan akapachanxa, kunjämäti alaxpachana luratäki ukhama” sasa (Mateo 6:9, 10).

Ukham arunakampix walja maranakaw Diosat amtasir jaqinakax taqi chuyma rezasipxi, janiw iglesianakti mayisipkixa, jan ukasti sapakisa jan ukax utanakapansa mayisipxapuniwa. Llakinkkasinsa ukhamarak kusisitäkasinsa, chuymatpachpunwa aka arunakampix mayisipxi. Yaqhipanakaxa, kunsa mayipxi uk jan amuytʼasaw uka kikpa arunakampix mayisipxi. Ukampis janiw cristianütwa sirinakakix Diosan Reinopat mayisipkiti, jan ukasti yaqhanakax mayisipxarakiwa.

Cristor jan iyawsir religionanakansa ukham mayisipxaraki

Jichha tiempo judionakan religionapanxa mä wali uñtʼat mayisïwipaxa qaddish fúnebre satawa. Janis jiwatanak tuqita ukhamarak janis llakisiñ tuqita parlkchixa, ukampis jaqi jiwäwinwa uka mayisïwxa rezapxi. Mä chiqax akham siwa: “Jupay [Diosay] reinop jichhürunakanxa uttʼaypan [...] ukhamarak jutïr urunsa” sasa. * Ukat sinagoganakan mayiski uka nayra yaqha mayisïwipanxa, Davitan wawapat jutir Mesiasan Reinopat parlaraki.

‘Janiw cristianonakäpkti’ sapki uka religionanakar sarir walja jaqinakaxa Diosan uttʼayat Reinopat yatxatañxa munapxarakiwa. The Times of India sat periodiconxa, India tuqinkir wali uñtʼat mä yupaychir jaqixa (1800 maranakan jakir jaqi), hinduismompiru, islam religionampiru ukhamaraki cristianüpxtwa sirinakampiruw mayachthapiñ munäna, ukat akham sänwa: “Kunapachatï Inti jalsu tuqinkirinakampi Inti jalanta tuqinkirinakampix qhumantasxapxani ukhakiw Diosan chiqpach Reinopax purinini” sasa. Strathfield (Australia) markan jikxataski uka islamista universidadan pʼiqtʼiripaxa akham sasaw jichhak mä periodicon arsüna: “Kunjamtï taqi musulmananakax sapkixa, Jesusax kuttʼaniniwa ukat Diosan chiqpach Reinop uttʼayani ukham amuyta” sasa.

Chiqpachansa, walja millón millón jaqinakaw Diosan Reinoparux suyasipki ukhamarak mayisipki. Ukampis mä jisktʼaruw jan kamsañsa yatipkiti.

Jumax yatpachätawa, aka revista qillqirinakaxa, mä arunxa, nänakaxa Jehová Diosan Qhanañchirinakapjamax Bibliat parltʼañatakiw marka masinakamar utat uta sarasax visittʼapxta. Aka uraqpachanwa ukham parlir sarapxta, jichhax 236 markanakanwa yatiyasipktxa, 400 arunakat sipansa jila arunakaru. Chiqanxa, Diosan Reinopatwa, mä arunxa, Diosan Apnaqäwipatwa parlapxta. Uk amuyañatakixa aka revistan sutip uñxattʼma: Yatiyañataki sat revista. Jehová Diosan Apnaqäwipat yatiyaski. Ukat “¿Munañamampisti apnaqapxita?” sas Diosar mayisirïtati sasaw waljanir jisktʼapxta, ukat waljanix “jïsa” sapxiwa. Ukat uka arunakampix kunsa maypachätan sataxa, janiw kamsañs yatipkiti, ukat yaqhipanakax yaqha tuqinakatak parlapxi.

¿Kunatsa jan sum yatkasas Diosan Apnaqäwipat waljanix mayipxpacha? ¿Chʼamäpachat uka tuqit yatxatañaxa? Janiwa. Ukax Biblianwa wali sum qhanañchasi, uka tuqit yatiñaxa aka jan wali tiemponakan suytʼäwinïñamatakiw chuymachiristamxa. Jutir yatichäwinxa, kamsis uka tuqit Biblianxa uk sum yatxatañäni.

[Qhanañchäwi]