Wan Samting We Plante Man Raon Long Wol Oli Askem
Wan Samting We Plante Man Raon Long Wol Oli Askem
TRAEM tingbaot se plante milian mo bilian man oli prea from sem samting nomo. Oli askem long God, we hem i hae moa long olgeta man long heven mo wol blong i mekem wan spesel samting. Be, smol nomo long olgeta ya, oli save gud samting we oli prea from. ?Wan samting olsem i rili save hapen? Yes, samting ya i hapen evri dei. ?Ol man oli stap prea from wanem samting? !Hemia se Kingdom blong God i kam!
Wan ripot i talem se i gat klosap 37,000 skul we oli talem se oli Kristin, oli bilif long Jisas Kraes olsem Lida blong olgeta. I gat bitim 2 bilian memba blong ol skul ya. Bighaf blong ol man ya oli mekem prea ya we plante long olgeta oli kolem Lodsprea. ?Yu yu save prea ya? Taem Jisas i tijim ol man blong hem long prea ya, hem i stat olsem: “Papa blong mifala. Yu yu stap long heven. Nem blong yu i tabu. . . . [“Plis, yu mekem kingdom blong yu i kam,” NW], mo we olgeta man long wol oli mekem ol samting we yu yu wantem, olsem we olgeta long heven oli stap mekem.”—Matiu 6:9, 10.
Blong plante handred yia nao, ol man we oli stap wosip long God oli stap ripitim prea ya long ol jos. Oli stap talem bakegen prea ya taem oli joen wetem famle, taem oli stap olgeta nomo, long ol gud taem mo long taem blong trabol tu. Oli stap talem prea ya long fasin we i soemaot se oli agri long ol tok blong hem mo oli talem wetem filing tu. Samfala oli lanem prea ya baehat mo oli talem prea ya bakegen mo bakegen be oli no tingbaot mining biaen long ol tok blong hem. Yes, ol man ya we oli talem se oli Kristin oli wantem tumas we Kingdom blong God i kam mo oli prea from Kingdom ya. Be i gat narafala man tu we i stap mekem olsem.
Wan Samting We Ol Skul We Oli No Kristin Oli Askem
Wan prea we ol man Jiu oli savegud, hemia prea ya Kaddish we oli mekem evridei long ol haos prea. Prea ya i no tokbaot tumas ded no soasore, be ol man Jiu oli talem prea ya long ol taem we oli harem nogud from wan famle no fren i ded. Prea ya i talem se: “I gud sipos hem [God] i stanemap Kingdom blong hem hareap . . . long taem we yu stap laef yet.” * Wan narafala prea we oli stap talem long ol haos prea blong olgeta bifo, i tokbaot hop blong Kingdom blong Mesaea we i kamaot long famle blong Deved.
Plante man long ol skul we oli no Kristin, oli laekem tingting ya long saed blong Kingdom blong God. Folem niuspepa ya The Times of India, wan lida blong skul blong ol man India long ol yia 1800 we i wantem joenem skul blong ol man India, Muslim mo Kristin tugeta, i talem se: “Kingdom blong God bambae i no kam yet kasem taem we ol ples long is mo long wes oli joen tugeta.” Mo i no longtaem i pas, wan hedmasta blong wan skul blong Islam long Strathfield, Ostrelia, i raetem long wan niuspepa se: “Mi mi wan Muslim, mo mifala evriwan i bilif [se] Jisas bambae i kambak mo stanemap trufala Kingdom blong God.”
Yumi no sapraes we naoia i gat bilian man we oli putum tingting blong olgeta i stap strong long Kingdom blong God mo oli prea from tu. Be tingbaot wan samting we i pulum tingting blong yumi.
Ating yu save finis se ol Witnes blong Jeova, we oli wokem magasin ya, oli go long haos wanwan long eria blong yu blong storian long saed blong Baebol wetem ol man. Naoia, mifala i mekem wok ya long 236 kantri raon long wol mo long bitim 400 lanwis. Stamba samting we mifala i tokbaot hemia Kingdom blong God. From samting ya, i gud blong makem se taetel blong magasin ya i talem se Wajtaoa i Talemaot Kingdom Blong Jeova. Mo tu, plante taem mifala i askem long ol man sipos oli stap prea from Kingdom ya. Bighaf blong ol man oli ansa se yes. Be, taem mifala i askem se wanem ya Kingdom, plante man oli ansa se, “Mi no save,” mo ansa blong olgeta i no klia mo i olsem we oli no sua long hem.
?From wanem plante man oli prea se Kingdom blong God i kam be oli no save eksplenem se Kingdom ya i wanem samting? ?Yu ting se hemia from we save long saed blong Kingdom blong God i hafhaf mo i no klia? Nogat. Baebol i givim wan save we i klia mo i fulwan long saed blong Kingdom ya. Antap moa, mesej blong Baebol long saed blong Kingdom i save givim wan trufala hop long taem ya naoia we i fulap long trabol. Long haf we i kam biaen, bambae yumi luk olsem wanem Baebol i eksplenem hop ya. Mo biaen, bambae yumi luk ol tok ya blong prea blong Jisas i kamtru se Kingdom blong God i kam.
[Futnot]
^ par. 6 Long prea ya Kaddish oli askem tu blong nem blong God i stap tabu, sem mak olsem Lodsprea. Jisas i talem Lodsprea olsem wan eksampol we ol man oli save folem. Ol man oli stap agiu yet long saed blong stret taem we ol man Jiu oli bin wokem prea ya Kaddish, oli no sua se i bifo no afta long taem blong Kraes. Be nating se i olsem, yumi no mas sapraes sipos sam haf blong tufala prea ya oli sem mak. Lodsprea we Jisas i tijim long ol man blong hem, i no talemaot sam niufala spesel samting we neva man i harem bifo. Wanwan tok blong prea ya i stanap fulwan long Baebol we ol man Jiu oli gat long taem ya. Jisas i leftemap tingting blong ol man Jiu we oli biaen long hem, blong oli prea from ol samting we oli sud stap prea from longtaem finis bifo we hem i kam long wol.