Se Ẹben̄ede ke Ofụri Ererimbot

KERE nte ediwak miliọn, idem biliọn owo ẹkpeben̄ede n̄kpọ kiet. Mmọ ẹdọhọ akakan owo ke ekondo anam eben̄e emi. Edi ediwak mmọ itịmke ifiọk se mmọ ẹben̄ede emi. Ndi utọ n̄kpọ emi ekeme nditịbe? Ke akpanikọ enye ke etịbe kpukpru usen. Nso ke mme owo emi ẹben̄e? Mmọ ẹben̄e ẹte yak Obio Ubọn̄ Abasi edi!

Ndụn̄ọde kiet owụt ke n̄kpọ nte ido ukpono 37,000 ẹdu oro ẹdọhọde ke idi Christian ye nte ke mmimọ itiene Jesus Christ. Se ibede owo biliọn iba ẹsidụk mme ido ukpono emi. Ediwak mmọ ẹbọn̄ se ẹsiwakde ndikot Ete Nnyịn m̀mê Akam Ọbọn̄. Ndi afo ọmọfiọk akam emi? Jesus ekekpep mme mbet esie ndibọn̄ enye ntem: “Ete nnyịn emi odude ke heaven, yak ẹnam enyịn̄ fo asana. Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.”—Matthew 6:9, 10.

Ke ata ediwak isua idahaemi, mme aka ufọkabasi ẹsibọn̄ akam emi ediwak ini ke ufọkabasi. Mmọ n̄ko ẹsibọn̄ ye ubon mmọ ẹnyụn̄ ẹbọn̄ ikpọn̄, ke ini n̄kpọ ọfọnde ye ke ini n̄kpọ ọdiọkde. Mmọ ẹsibọn̄ akam emi ke ofụri esịt, ye ke edu ukpono. Ediwak mbon eken ẹmụm mme ikọ akam emi ẹdọn̄ ke ibuot ẹsinyụn̄ ẹtịn̄ enye ikereke m̀mê nso ke enye ọwọrọ. Idịghe mbon Christendom kpọt ẹbọn̄ akam ẹyom Obio Ubọn̄ Abasi edi.

Ẹsibọn̄ Akam Emi N̄ko ke Mme Ido Ukpono Eken

Ediwak owo ẹfiọk akam ikpo mme Jew. Okposụkedi akam emi mîtịmke inyene ebuana ye n̄kpa m̀mê mfụhọ, ẹsiwak ndibọn̄ enye ke ini owo akpade. Kop n̄kpọ kiet oro ẹsiben̄ede mi ke akam oro: “Yak enye [Abasi] ọsọsọp owụk Obio Ubọn̄ esie ke eyouwem fo. . . . ” * Akam en̄wen oro ẹkesibọn̄de ke synagogue  eset ekesiban̄a Obio Ubọn̄ Messiah oro otode ubon David.

Mbon eken emi mîdịghe Christian ẹsitiene ẹma Obio Ubọn̄ Abasi. Nte The Times of India ọdọhọde, akwa adaiso ido ukpono India kiet eke ọyọhọ isua ikie 19 emi okoyomde ndidian mbon Hindu, Muslim, ye mme Christian ọtọkiet ọkọdọhọ ete: “Ata Obio Ubọn̄ ididịghe tutu ẹdian edem usiahautịn ye usoputịn ọtọkiet.” N̄ko etubom ufọkn̄wed Islam ke Strathfield ke Australia, ekewet ọnọ ẹsọk mme andimịn̄ n̄wedmbụk n̄kpọntịbe ndondo emi ete: “Kpa nte kpukpru mbon Muslim eken ẹnịmde, ami mmenịm nte ke Jesus ayafiak edi ediwụk ata Obio Ubọn̄ Abasi.”

Eyịghe idụhe nte ke mbon oro ẹyomde ẹnyụn̄ ẹbọn̄de akam ẹben̄e Obio Ubọn̄ Abasi ẹsịm ediwak biliọn idahaemi. Edi kam kere n̄kpọ kiet emi akpade owo idem.

Etie nte afo ọmọfiọk ke mme andimịn̄ magazine emi, Mme Ntiense Jehovah, ẹsisan̄a ke ufọk ke ufọk ke obio mbufo ẹneme Ikọ Abasi ye mme owo. Ke ini ẹkemịn̄de ibuotikọ emi, nnyịn ikanam utom emi ke ofụri ekondo, ke n̄kpọ nte idụt 236 ye ke se ibede usem 400. Akpan ibuotikọ ukwọrọikọ nnyịn edi Obio Ubọn̄ Abasi. Kam ti ke ọyọhọ enyịn̄ magazine emi edi Enyọn̄-Ukpeme Ọnọ Ntọt Obio Ubọn̄ Jehovah. Nnyịn imesiwak ndibụp mme owo m̀mê mmọ ẹsibọn̄ akam ẹben̄e Obio Ubọn̄ oro. Ata ediwak mmọ ẹsinyịme ke imesibọn̄. Edi ima ibụp mmọ se Obio Ubọn̄ oro edide, ediwak mmọ ẹsidọhọ ke mmimọ ifiọkke, mîdịghe ibọrọ mmọ isitịmke in̄wan̄a owo.

Ntak emi utọ ediwak owo oro ẹben̄ede se mmọ mîtịmke ifiọk-ọ? Ndi edi sia ọsọn̄de owo ndifiọk se Obio Ubọn̄ Abasi edide, m̀mê koro enye awakde n̄kukọhọ? Ih ih. Ẹtịm ẹnam Obio Ubọn̄ oro an̄wan̄a ke Bible. Ke adianade do, se Bible etịn̄de aban̄a Obio Ubọn̄ Abasi ekeme ndinọ fi ata idotenyịn ke ndiọkeyo emi. Nnyịn iyese nte Bible etịn̄de se Obio Ubọn̄ Abasi edide ke ibuotikọ oro etienede. Ekem iyese ini emi ẹdibọrọde akam oro Jesus ọkọbọn̄de eben̄e Obio Ubọn̄ oro ete edi.

[Ikọ Idakisọn̄]