Tanobada Hegegemadai Taunimanima ese Idia Gurigurilaia Gauna

MANI oi laloa taunimanima bilioni momo be gau tamona totona idia guriguri. Unai guriguri be guba bona tanobada ena lohia badana dekenai idia gwauraia. To, haida sibona be idia gurigurilaia gauna idia lalopararalaia. Momokani, taunimanima be unai guriguri idia gwauraia, a? Oibe, dina ta ta lalonai unai bamona idia karaia. Idia be dahaka totona idia guriguri? Dirava ena Basileia do ia mai!

Tahua gaukarana ta amo idia davaria, sibodia idia gwauraia Keristani tomadiho orea ibounai 37,000 bamona, idia gwau Iesu Keriso be edia Gunalaia Tauna. Unai orea edia memba taudia be 2 bilioni mai kahana. Momo be hanaihanai Aiemai Tamana o Lohiabada ena Guriguri idia gwauraia. Oi be unai guriguri oi diba, a? Iesu ese iena hahediba taudia ia hadibaia inai bamona: “Aiemai Tamana e, guba dekenai oi noho, oiemu ladana do ai hahelagaia. Oiemu Basileia do ia mai, oiemu ura gauna tanobada dekenai do ai karaia, guba dekenai idia karaia bamona.”​​—⁠Mataio 6:​9, 10.

Lagani 100 momo lalodiai, dubu idia lao taudia ese unai guriguri idia gwauraia loulou. Nega namodia bona nega dikadia ai, edia ruma bese ida bona idia ta ta be unai guriguri idia gwauraia. Mai edia lalona ibounai ida unai guriguri idia gwauraia. Momo be unai guriguri idia laloatao bona idia gwauraia loulou, to anina idia diba lasi. To, Kerisendom ena memba taudia sibona ese unai helaro eiava Dirava ena Basileia do ia mai totona idia guriguri lasi.

Keristani Lasi Tomadiho Oreadia

Iuda tomadiho taudia be edia lalokau varavara ta ia mase neganai, guriguri ta ladana Kaddish idia gwauraia. Ena be unai guriguri ena hereva ese mase ia herevalaia lasi, to nega momo unai lalohisihisi negana ai idia gwauraia. Unai guriguri ia gwau: “Mani [Dirava] ena Basileia be emu mauri negana lalonai do ia haginia . . .  haraga.” * Guna dubu helaga dekenai idia gwauraia gurigurina ta be Davida ena iduhu amo do ia mai Mesia ena Basileia ia herevalaia.

Keristani lasi tomadiho haida danu be Dirava ena Basileia idia ura henia. India ena niuspepa ta ladana, The Times of India, ese dubu gunalaia tauna badana ta ena hereva ia halasia. Unai tauna ia ura Hindu, Muslim, bona Keristani tomadiho do idia lalotamona, ia gwau: “Dirava ena Basileia korikorina ia gini totona, namona be Keristani lasi tomadiho bona Keristani tomadiho idia lalotamona.” Bona Strathfield, Australia dekenai, Islam tomadiho ena koledi ta ena hedmasta, be vanegai niuspepa ta dekenai ia gwau: “Muslim taudia iboudiai hegeregerena, lau danu lau abia dae Iesu be do ia giroa mai bona Dirava ena Basileia korikorina do ia haginia.”

Ita daradara lasi, taunimanima bilioni momo be Dirava ena Basileia totona idia guriguri. To, mai anina bada gauna ta mani oi laloa.

Reana oi diba vadaeni, ai Iehova ena Witnes taudia be inai magasin ai halasia, bona emu gabu dekenai ruma-ta-ruma-ta ai haroro gaukara ai karaia bona taunimanima ida Baibel ai herevalaia. Inai magasin ai printaia lalonai, ai ese inai gaukara be tanobada hegegemadai tano 236 bona gado 400 lalonai ai karaia noho.  Aiemai haroro gaukara ena hereva badana be Dirava ena Basileia. Mani oi itaia, inai magasin ena ladana be, Gima Kohorona Iehova Ena Basileia Ia Harorolaia. Nega momo taunimanima ai henanadai henia, bema idia be unai Basileia totona idia guriguri. Momo edia haere be, oibe. To, ai nanadaia bema idia diba unai Basileia be dahaka neganai, momo edia haere be, “Lau diba lasi,” eiava nega haida haere idia henia totona be ia auka bona idia daradara.

Vadaeni, dahaka dainai momo be idia diba lasi gauna totona idia guriguri? Reana, Dirava ena Basileia ena anina be ia hedinarai namonamo lasi, a? Lasi. Baibel ese Dirava ena Basileia ia gwauraia hedinarai goevagoeva. Unai sibona lasi, to Baibel ese ia herevalaia Basileia ena sivarai ese inai nega dikana lalonai oi dekenai helaro ia henia diba. Hereva iharuana lalonai, do ita tahua Baibel ese edena bamona unai helaro ia herevalaia. Bena, do ita itaia Iesu ese ia gurigurilaia Basileiana be edena bamona do ia vara.

[Footnote]