Diambu Dilombwanga mu nza Yawonso
Diambu Dilombwanga mu nza Yawonso
YINDULA ndonga wantu belombanga diambu dimosi. Belombanga dio kwa ndiona una vo i mpungu a wisa muna nsema wawonso. Kansi, muna ndonga yoyo yawonso, akete kaka bazeye dina belombanga. Nga diadi dilenda kala kieleka? Elo, divangamanga lumbu yawonso. Nki belombanga wantu awaya? Ngiz’a Kintinu kia Nzambi belombanga!
Lufimpu lumosi lwasonga vo tezo kia 37.000 ma mabundu mekiyikilanga vo Akristu, awonso bevovanga vo Yesu Kristu i Mfumu au. Vioka mafuku mole ma mazunda (dois bilhões) ma wantu besambilanga muna mabundu mama. Ndonga muna mabundu mama beyikilanga e sambu kiaki vo sambu kia S’eto koko’zulu yovo Sambu kia Mfumu. Nga zeye sambu kiaki? Nze una Yesu kalonga kw’alandi andi, e sambu kiaki mu mvovo emi kiyantikilanga: “E S’eto koko’zulu, Yambula nkumbu aku yazitiswa. E kintinu kiaku kiza. O luzolo luaku luavangam’ova nza nze koko’zulu.”—Matai 6:9, 10.
Tuka tandu yayingi, asambidi bevovololanga e sambu kiaki ye luzitu lwawonso muna masambilu mau. Bevovololanga mpe mvovo miami muna sambu ya yau kibeni y’esi nzo zau, muna ntangwa mpasi ye muna ntangwa nsaka. Belombanga e sambu kiaki mu nsi a ntima yo zitu wawonso. Ndonga bazeye e mvovo mia sambu kiaki muna ngindu, kansi ke bazayidi mio nsasa ko. Ke Akristu a Kimpangila kaka ko besianga e vuvu yo lomba muna sambu vo Kintinu kia Nzambi kiza.
Kilombwanga mpe Muna Nsambila Zakaka
Maniongo ma Kaddish i sambu kitomene zayakana muna lukwikilu lw’Ayuda. Kana una vo ke sambu kia mafwa ko, kitoma sadilwanga muna zika mafwa. Muna sambu kiaki bevovanga vo: “Yambula [Nzambi] kasikidisa Kintinu kiandi muna lumbu ya zingu kiaku . . . , tuka mu wau.” * Muna sambu kiakaka kiankulu basambanga muna masambilu, bayikanga e vuvu kia Kintinu kia Masia wa mwan’a Davidi.
E nsambila zakaka zina vo ke zikwikilanga muna Kristu ko beyangalelanga elongi dia Kintinu kia Nzambi. Muna zulunalu The Times of India, mfumu mosi wa mwisi dibundu dia Índia muna tandu kia 19, wavavanga zaya mambu mafwanana muna lukwikilu lwa Hindu, Muçulumano y’Akristu, wavova vo: “Avo este yo leste ke yiyikakianini ko, e kintinu kiakieleka kia Nzambi ke kiyala ko.” Mfumu a sikola za dibundu dia Islâmica muna mbanza Strathfield, Australia wasoneka muna zulunalu mosi vo: “Yikwikilanga nze esi Muçulumano awonso, [vo] Yesu ovutuka mu sikidisa Kintinu kiakieleka kia Nzambi.”
Ka lukatikisu ko, ndonga belombanga yo vingila Kintinu kia Nzambi. Kansi, badika e diambu edi diasivi.
Nanga ozeye wo vo Mbangi za Yave bevaikisanga finkanda-nkanda fiafi, bekwendanga muna nzo ye nzo, muna zunga kiaku mu mokena yo wantu oma ma Nkand’a Nzambi. Owau mu 400 za ndinga ye nsi 236 tusadilanga e salu kiaki. Kintinu kia Nzambi i ntu a diambu wa nsangu tusamunanga. Muna kuma kiaki, e ntu a diambu wa finkanda-nkanda fiafi, Eyingidilu Disamunanga Kintinu kia Yave. Nkumbu miayingi tuyuvulanga wantu kana vo e Kintinu kiaki i kiau belombanga muna sambu. Ndonga bevovanga vo elo. Kansi, vava tuyuvulanga nki i Kintinu kiaki, ndonga bevutulanga vo “Kizeye kwame ko,” akaka e mvutu zau ke zasikila ko yovo za kondwa ziku.
Ekuma e ndonga yayi belombelanga diambu dina ke bazeye nsasa ko? Nga diadi disonganga vo diampasi mu bakula oma ma Kintinu kia Nzambi? Ve. E Kintinu kiatoma kieseswa muna Nkand’a Nzambi. Vana ntandu, nsangu za Nkand’a Nzambi mu kuma kia Kintinu zilenda kuvana e vuvu kiakieleka mu nza yayi yampasi. Mun’elongi dilanda, tusinga mona una Nkand’a Nzambi ukiesesanga e vuvu kiaki. I bosi omona una yilunganena e ndomb’a Yesu mu kuma kia Kintinu.
[Mvovo Vana Yand’a lukaya]
^ tini. 6 Nze una kalonga o Yesu muna sambu kia S’eto koko’zulu, muna maniongo ma Kaddish belombanga mpe vo nkumbu a Nzambi yazitiswa. Kana una vo ndonga bekatikisanga ekolo kazinga Kaddish kana vitila Kristu yovo kunima, ka tufwete sivika ko mu kuma kia mambu mafwanana ye sambu kia S’eto koko’zulu. O Yesu muna sambu kiaki kasadila mvovo mia nzenza ko. Mawonso kalonga muna sambu kiandi ma Sono ya Kiyibere ina bakala yau Ayuda. Yesu wakasakesa akw’andi Ayuda balomba mambu mana balombanga tuka kolo.