Dilomba didibu benza pa buloba bujima

ELA meji ne: bantu batue ku miliyare ibidi badi balomba mfumu mutambe bunene wa diulu ne buloba anu tshintu tshimue. Pabi, anu bantu bakese ke badi bamanye tshidibu balomba. Bualu ebu budiku mua kuenzeka anyi? Eyowa, budi buenzeka dituku dionso edi. Bantu bonso aba badi balomba tshinyi? Badi balomba bua Bukalenge bua Nzambi bulue!

Bilondeshile makumi adibu benze, kudi bitendelelu bitue ku 37 000 bidi bidiamba mudibi bia bena Kristo ne mudi Yezu Kristo mulombodi wabi. Bantu badi mu bitendelelu abi mbapite pa miliyare ibidi. Ba bungi badi basambila disambila ditubu babikila ne: Disambila dia Tatu wetu. Udi mudimanye anyi? Anu bu muvua Yezu mudilongeshe bayidi bende, didi dibangisha nunku: ‘Tatu wetu udi mu diulu, banemeke dîna diebe. Bukalenge buebe bulue. Benze pa buloba muudi musue bu mudibu benza mu diulu.’​—Matayo 6:9, 10.

Munkatshi mua bidimu bia bungi menemene, batendeledi mbambulule disambila edi ne kanemu mu bitanda biabu. Batu kabidi badiambulula mu mêku anyi muntu pa nkayende mu bikondo bimpe anyi bibi. Batu bambulula mêyi a disambila edi ne muoyo mujima. Bakuabu mbaakuate ku muoyo ne batu baamba kabayi bela meji ku tshidiwu umvuija to. Ki nganu bena mu Bukua-buena-Kristo batu batekemena Bukalenge bua Nzambi ne basambila bua dilua diabu to.

Bitendelelu bidi kabiyi bitaba Kristo bidi ne disambila dia muomumue

Kudi disambila kampanda didi dimanyike bimpe dia bena Yuda ditubu babikila ne: disambila dia Kaddish ditubu benza mu nsunagoga anyi mu madilu. Nansha mudidi kadiyi ditamba kuakula bua lufu anyi bua dibungama, batu batamba kudisambila dîba dia madilu. Mu disambila edi badi balomba ne: Nzambi “ajadikaku Bukalenge buende pautshidi ne muoyo . . . ne lukasa.” * Disambila dikuabu divuabu benza mu nsunagoga didi diakula bua ditekemena dia Bukalenge bua Masiya wa mu nzubu wa Davidi.

Bitendelelu bikuabu bidi kabiyi bitaba Kristo bitu bisue pabi kusambila bua Bukalenge bua Nzambi bulue. Bilondeshile tshimue tshibejibeji, mfumu wa tshitendelelu kampanda wa mu ditunga dia Inde uvua mumanyike bikole mu siekele wa 19 uvua musue kumanya malu adi apetangana mu tshitendelelu tshia bena Hindu, tshia ba Mizilman ne tshia bena Kristo. Mfumu au wakamba ne: “Bukalenge bulelela bua Nzambi nebulue anu padi bena ku Est ne bena ku Ouest badisangisha.” (The Times of India) Mulombodi wa tulasa kampanda tua ba Mizilman mu musoko wa Strathfield mu Australie, wakafundila bena tshibejibeji tshikuabu matuku adi panshi aa ne: “Anu bu ba Mizilman bonso, ndi ngitabuja ne: Yezu neapingane bua kujadika Bukalenge bulelela bua Nzambi.”

Kakuyi mpata, kudi bantu miliyare mivule badi bindile Bukalenge bua Nzambi ne balomba bua bulue. Kadi tangila bualu bua dikema.

Udi pamuapa mumanye ne: tuetu Bantemu ba Yehowa (badi bapatule tshibejibeji etshi) tutu tuya ku nzubu ne ku nzubu muaba uudi musombele bua kuyukila ne bantu malu a mu Bible. Tudi tuenza mudimu eu pa buloba bujima  mu matunga 236 ne mu miakulu mipite pa 400. Tshiena-bualu tshinene tshitudi tuyisha mBukalenge bua Nzambi. Ke bualu kayi tshiena-bualu tshijima tshia tshibejibeji etshi tshidi ne: Tshibumba tshia Nsentedi tshidi tshimanyisha Bukalenge bua Yehowa. Tutu tuebeja bantu ni batu basambila bua Bukalenge ebu. Ba bungi batu bitaba. Kadi, patudi tuebeja ba bungi tshidi Bukalenge ebu bumvuija, batu bandamuna ne: “Tshiena mumanye to,” anyi batu bandamuna mu mushindu udi kawuyi umvuika bimpe to.

Bua tshinyi bantu ba bungi badi balomba tshintu tshidibu kabayi mua kumvuija? Bualu Bukalenge bua Nzambi ntshintu tshidi katshiyi tshiumvuika anyi? Tòo. Mu Bible mbumvuije bualu bua Bukalenge bua Nzambi bimpe. Pashishe, tshidi Bible wamba bua Bukalenge ebu tshidi mua kukupesha ditekemena dia bushuwa mu matuku mabi atudi aa. Mu tshiena-bualu tshidi tshilonda, netumone mudi Bible wakula bua ditekemena edi. Pashishe netumone dîba diandamunabu disambila dia Yezu bua Bukalenge bulue.

[Mêyi adi kuinshi]