Khawvêl Pum Puia Neih Dîlna Thuhmun Chu

MI MAKTADUAI za tam tak, tlûk leh dingâwn za tam takte’n thil thuhmun an dîl ṭheuh chu han ngaihtuah teh. Lei leh vâna thuneitu sâng ber hnênah dîlna engemaw bîk tak tipuitling tûrin an ngên a ni. Mahse, an thil dîl chu eng nge a nih hria an tlêm hle thung. Chutiang thil chu a awm thei tak tak ang em? Dik takin chu chu a awm thei a, nî tin a thleng bawk a ni. A nih, hêng mi zawng zawngte hian eng nge an dîl? Pathian Ram lo thleng tûrin an dîl a ni!

Chhût dân pakhatah chuan Kristiana inchhâl leh Isua Krista chu an Hruaitua chhâl sakhaw 37,000 vêl a awm a. Chutiang sakhaw vuantu mi tlûklehdingâwn hnih aia tam chu an awm a ni. An zînga mi tam takte chuan Lal Ṭawngṭaina tia hriat chu an chham ṭhîn. Chu ṭawngṭaina chu i hria em? Isua’n a hnungzuitute a zirtîr angin, heti hian a inṭan a ni: “Kan Pa vâna mi, i hming zahawm rawh se. I ram lo thleng rawh se. I duhzâwng vâna an tih angin leia mi’n ti rawh se,” tiin.​—⁠Matthaia 6:​9, 10.

Kum zabi tam tak chhûng chu Pathian betute chuan hêng thute hi biak inah urhsûn tak chungin an chham nawn tawh ṭhîn a. Chhûngkua leh mi mal angte pawhin hun ṭha leh ṭha loahte pawh an chham chhuak tawh bawk. Chûng thute chu rilru leh tih tak zetin an sawi chhuak tawh ṭhîn a. Mi dang tam takte pawhin a awmzia ngaihtuah lêm lovin an sawi chhuak tlut tlut ṭhîn. Kristianna rama mite chauh hi Pathian Ram beisei leh chu mi atâna ṭawngṭai an ni lo.

Sakhuanain A Khuahkhirh Loh Dîlna Chu

Judate ṭawngṭaina hriat lâr tak pakhat chu Kaddish tia an koh lusûn ṭawngṭaina hi a ni. Thihna leh lusûnna nên inkûngkaih chiah lo mah se, lusûn huna chham a ni ṭhîn. Chu ṭawngṭainaah chuan: “Ani [Pathian] chuan i dam chhûng ngei hian a Ram chu din lul se la . . .  thlentîr thuai thuai rawh se,” tia dîlna a tel a ni. * Hmân laia Synagogue-a ṭawngṭaina thu pakhat pawh chuan Davida in aṭanga Messia Ram lo thleng tûr beiseina chungchâng chu a sawi bawk.

Kristian rinna pawm lote pawhin Pathian Ram chu thil duhawm tak niin an hria a. The Times of India chanchinbu sawi dân chuan, kum zabi 19-naa India sakhaw hruaitu pakhat, Hindu, Mosolman, leh Kristian rinna dawhzawm tumtu chuan: “Pathian ram dik tak chu chhak leh thlang a inzawm phawt loh chuan a lo thleng lo vang,” tiin a sawi a ni. Strathfield, Australia rama Islam college-a an principal chuan tûn hnai mai khân chanchinbu pakhatah heti hian a ziak a ni: “Mosolman dang zawng zawngte angin, Isua chu a lo kîr leh ang a, Pathian Ram dik tak chu a rawn din ang tih ka ring a ni,” tiin.

Pathian Ram beiseitu leh dîltu tlûklehdingawn tam tak an tling tih chu rinhlelh rual a ni lo. Mahse, thil ngaihvenawm tak mai hi han ngaihtuah teh.

He magazine tichhuak a, Bible thu mite sawipui tûrin in vênga in tina kal ṭhîn keini Jehova Thuhretute hi i hre tawh mai thei a. He hna hi he thu ziak a nih lai hian khawvêl pum pui ram 236-ah kan thawk a, ṭawng 400  chuang hmanga thu hrilhna neih a ni. Kan thu hrilh thupui ber chu Pathian Ram chanchin a ni a. He magazine hming pum pawh hi Vênnainsâng Jehova Lalram Puanchhuahna tih a ni. Mite’n chu Lalram dîla an ṭawngṭai leh ṭawngṭai loh kan zâwt fo va. Mi tam takte chuan an dîl ṭhîn tih an sawi a ni. Amaherawhchu, chu Lalram chu eng nge ni tia kan han zawh hian mi tam takte chuan, “Ka hre lo” tiin min chhâng ṭhîn a; a nih loh vêk leh, an chhânna chu a chiang lovin a buai deuh nuai ṭhîn a ni.

Engvângin nge mi tam takte chuan an sawifiah theih loh thil chu an dîl? Pathian Ram chu hriatthiam harsa tak leh thil chiang lo a nih vâng em ni? Ni lo. Lalram chu kimchang tak leh chiang takin Bible-ah hrilhfiah a ni. Chu bâkah, Lalram chungchânga Bible thute chuan kan hun thim tak kârah hian beiseina dik tak a pe thei che. A dawta thuziakah chuan Bible-in chu beiseina a hrilhfiah dân chu kan hmu dâwn a. Tichuan Isua’n Ram lo thleng tûra a ṭawngṭaina chhân a nih hun tûr chu kan hmu ang. (w08 1/1)

[Footnote]