Furu sma na grontapu e aksi a srefi sani

DENKI a tori disi: hondrohondro milyun sma, iya, milyardmilyard sma e aksi a srefi sani. Den e aksi a moro hei sma na hemel nanga grontapu fu du wan spesrutu sani. Ma toku, furu fu den sma disi e aksi wan sani, aladi den no sabi soifri san na a sani di den e aksi. A sani disi kan? Fu taki en leti, a sani disi e pasa ibri dei. San na a sani di ala den sma disi e aksi? Den e aksi taki a Kownukondre fu Gado kon!

Soleki fa wan ondrosuku e sori, dan sowan 37.000 kerki de di e kari densrefi Kresten, fu di den e bribi taki Yesus Krestes na den Fesiman. Den kerki dati abi moro leki tu milyard memre. Furu fu den memre disi e begi a Wi Tata begi. Yu sabi a begi disi? Yesus ben leri en bakaman a begi disi, èn a e bigin so: „Wi Tata na hemel, meki yu nen kon santa. Meki yu kownukondre kon. Meki yu wani pasa na grontapu soleki fa a e pasa na hemel.”—Mateyus 6:9, 10.

Hondrohondro yari a de so taki sma taki a begi disi ibri tron baka te den e anbegi gado na kerki. Den e taki a begi disi, di den sabi na ede, te den de nanga famiriman, èn te den de den wawan, te den de na ini bun ten, èn te den de na ini muilek ten. Den taki den wortu disi nanga den heri ati èn nanga furu faya. Furu tra sma leri den wortu disi na ede èn den e taki den wortu sondro fu sabi san den wani taki trutru. Den memre disi fu den kerki di e taki dati den na Kresten, no de den wan-enkri sma di e howpu èn di e begi taki a Kownukondre fu Gado kon.

Sma fu tra bribi e aksi a srefi sani

Wan begi di furu sma sabi na ini a Dyu bribi, na a Kaddish begi di den e taki ibri dei na ini den snoga, noso te wan krosibei famiriman dede. Aladi a begi disi no abi fu du nanga dede noso sari, sma gwenti fu taki en te den e sari fu di wan lobiwan fu den dede. Den e aksi na ini a begi dati: „Meki Gado seti en kownukondre na ini a ten te yu de na libi . . . iya, meki a seti en gawgaw.” * Wan tra owru begi di sma e taki na ini  den snoga, e taki fu a howpu fu a Kownukondre fu a Mesias, a bakapikin fu David.

Sma fu tra bribi di no de Kresten, feni a tori fu Gado Kownukondre heri moi. Wan koranti na ini India ben skrifi fu wan prenspari kerki fesiman fu India fu a di fu 19 yarihondro. A man disi ben suku fasi fu meki a Hindu bribi, a Moslim bribi, nanga a Kresten bribi kon de wán. A ben taki: „A tru kownukondre fu Gado no sa seti teleki sma fu na owstusei nanga a westsei kon de wán na ini den sani di den bribi” (The Times of India). A driktoro fu wan Islam heiskoro na ini Strathfield, na Australia, ben skrifi no so langa pasa wan brifi gi wan koranti, taki: „Neleki ala Moslimsma, mi e bribi taki Yesus sa kon baka èn a sa seti a tru Kownukondre fu Gado.”

A no de fu taki dati milyardmilyard sma de di e howpu èn di e aksi taki Gado Kownukondre kon. Ma poti prakseri na wan moi sani di e kon now.

Yu sabi kande taki Yehovah Kotoigi, di e tyari a tijdschrift disi kon na doro, e go oso fu oso na ini yu birti fu taki nanga sma fu Bijbel. Na a momenti disi wi e du a wroko disi na heri grontapu na ini 236 kondre, èn na ini moro leki 400 tongo. A moro prenspari sani di wi e preiki, na a Kownukondre fu Gado. Te yu e luku en bun, dan a heri nen fu a tijdschrift disi e sori kaba taki dati de so, fu di a nen na A Waktitoren—A e taki fu Yehovah Kownukondre. Nofo tron wi e aksi sma efu den e begi taki a Kownukondre dati kon. Furu sma e taki dati den e du dati. Ma te wi e aksi den san na a Kownukondre, dan furu fu den no sabi, noso den no man gi wan krin piki èn den no de seiker san na dati.

Fu san ede so furu sma e aksi taki Gado Kownukondre kon, aladi den no sabi san na dati? A de so taki a Kownukondre fu Gado na wan sani di sma no man frustan krin? Nôno. Bijbel e taki krin san na a Kownukondre. Boiti dati, a Bijbel boskopu di e taki fu a Kownukondre kan gi yu wan trutru howpu na ini den muilek ten disi. Na ini na artikel di e kon now, wi sa si san Bijbel e taki fu a howpu dati. Baka dati wi sa si o ten a Kownukondre o kon soleki fa Yesus ben begi.

[Futuwortu]