Kwagh u Ior Sha Tar Cii Ve Lu Sônon Yô

KWAGH u kpilighyol yô, iorov biliôn uhar sha tar mba sônon kwagh môm. Mba sônon or u hemban tahav sha won cii la kwagh. Nahan kpa, ka asande a ior kpuaa tseegh ve fe kwagh u ve lu sônon la jighilii ye. Kwagh a fatyô u eren nahan je kpa? Sha kpôô yô, kwagh ngu eren nahan hanma iyange. Kanyi kwagh ior mban cii ve lu sônonôô? Mba sônon ér Tartor u Aôndo u va!

I ker ahaba ér ukwaghaôndo mba sha tar 37,000 mba ve senge ér mba Mbakristu shi ve kaan ér Yesu Kristu ka Orhemen ve yô. Ior mba ve ze ukwaghaôndo mban hemba iorov biliôn uhar. Ve kpishi mba eren msen u Ter Wase la. U fa msen ne kpa? Msen u Yesu yange tese mbadondon un ne hii ér: “Ter wase u Sha, i̱ tsegha iti You, tartor Wou u̱ va, i̱ er ishima You shin tar kpaa vough er i eren i Sha nahan.”—Mateu 6:9, 10.

Mbazan adua ndera eren msen ne sha icivir ken ucôôci vev anyom uderi imôngo hegen. Shi icombor ve man ior asange asange ka ve shi kimbir msen ne sha shighe u dedoo man shighe u kwagh a tser ve kpaa. Mba kimbir msen ne sha ishima ve i môm. Mbagenev fa msen ne ken ityou shi mba kimbir un hanma shighe, kpa ve gema ve fa inja i asember a msen ne ga. Ka ior mba ken ukwaghaôndo mba ve senge ér mba Mbakristu la tseegh ve veren ashe a Tartor u Aôndo shi ve eren msen ér u va ga.

Ka Mbakristu Tseegh Ve Eren Msen Nahan Ga

Kwaghaôndo u Mbayuda ngu a msen ugen u ior ve fe un wuee, u i eren ken ushinagoge shin hen ku yô, mba yer msen shon ér Kaddish. I ôr kwagh u kuugh shin ijungwen ken msen ne jighilii ga, nahan kpa mba hembe eren un shighe u or kpe yô. Msen shon kaa ér: “[Aôndo] a shi ver Tartor na sha ayange a uma wou . . . a er nahan fefa je.” * Msen ugen u mbayiase eren ken ushinagoge yô ôr kwagh u ishimaverenkeghen i Tartor u Mesiya u a dugh hen tsombor u Davidi una va a mi la.

Ukwaghaôndo mbagenev mba ve lu Mbakristu ga la kpa Tartor u Aôndo sar ve. Ipipaabaver igen i í yer ér The Times of India la ôr kwagh u ityagheror u hemen kwaghaôndo ugen ken tar u India u lu uma ken derianyom u sha 19 la ér yange kaa wener: “Tartor u mimi u Aôndo la ua fatyô u van ga saa ityô yam man abuter aa lu ken mzough.” Yange gba orvesen ne ishima tsung u van a mzough hen atô u mba eren kwaghaôndo u Hindu man Mbamusulumi man Mbakristu kpaa. Semberee ne, kwase u hemen kôleeji u Mbamusulumi u ken gar u Stragthfield, ken tar u Australia ôr ken ipipaabaver igen ér: “M na jighjigh er Mbamusulumi mbagenev nahan [mer] Yesu una hide a va ver Tartor u mimi u Aôndo la.”

Sha kpôô yô, ior ubiliôn imôngo mba veren ashe a Tartor u Aôndo shi eren msen ér u va. Kpa nenge ase kwagh u kpilighyol u a lu zan hemen ne.

Alaghga u fa er se Mbashiada mba Yehova  mba se gber magazin ne, se lamen a ior ken Bibilo sha uya uya hen ningir wou yô. Se mba eren tom ne sha tar cii hegen, ken ityar 236 shi se mba pasen ior loho u Bibilo ken ijô hemba 400. Itinekwagh i kwaghpasen wase jighilii yô ka Tartor u Aôndo. A lu u nenge yô, iti i magazin ne jimin cii ér Iyoukura U Yôôn Tartor u Yehova. Ashighe kpishi ka sea pasen ior kwagh yô se pine ve aluer mba eren msen ér Tartor la u̱ va yô. Ior kpishi ka sea pine ve yô ve lumun ér mba eren. Nahan kpa, mbagenev kpishi ka sea pine ve kwagh u Tartor la u lu yô, ve kera fa ga, shin ve fa er vea pase jighilii ga.

Er nan ve ior kpishi ve sônon ér Tartor u̱ va man ve gem ve fe kwagh u Tartor shon u lu ga? Ka sha ci u Tartor u Aôndo ka kwagh u cimin, u a taver u kaven yôô? Ei. Bibilo pase kwagh u a lu Tartor u Aôndo wanger kpen kpen. Heela tseegh ga, kwagh u Bibilo i er sha kwagh u Tartor la una na u ishimaverenkeghen i mimi ken shighe u mbamzeyol ve ngee yum ne. Ngeren u a dondo ne una ôr se er Bibilo i pase ishimaverenkeghen shon yô. Shi se mase ôron kwagh u shighe u msen u Yesu yange er wener Tartor u Aôndo u̱ va la una kure sha mi vough yô.

[Footnote]