Eng Hunah Nge Pathian Ram Chu A Lo Thlen Ang?
Eng Hunah Nge Pathian Ram Chu A Lo Thlen Ang?
“LALPA, tûnah em ni Israelte hnênah ram i pêk leh dâwn?” (Tirhkohte 1:6) Tirhkohte chuan Isua’n a Ram a din hun tûr chu hriat an châk hle a. Kum 2,000 vêl lai a liam hnu tûn laiah pawh hian, mite chuan: Pathian Ram chu eng hunah nge a lo thlen ang? tih chu hriat an la châk reng a ni.
Isua’n Lalram chu a thu hrilh thupui bera a hman avângin, he zawhna chungchâng a sawi ngei i beisei a rinawm a. Sawi pawh a lo sawi ngei bawk a ni! Ani chuan a “lo kal lehna” tia a koh hun tiam chhûng nei chu vawi tam tak a sawi lang a. (Matthaia 24:37) * Chu a lo kal lehna chu Messia Lalram dinna nên a inkûngkaih tlat a ni. Eng nge chu a lo kal lehna chu? Krista lo kal lehna chungchânga Bible târ lan thudik pali chu i lo ngaihtuahho ang u.
1. Krista lo kal lehna chu a thih hnu hun rei tak hnua lo inṭan chauh tûr a ni. Isua chuan tehkhin thu a sawiah amah ngei chu mi tuemaw ‘ram awpna thu laa lokîr leh tûra khaw lam hla taka kal’ angin a insawi a. (Luka 19:12) Engtin nge chu entîr nei hrilh lâwkna chu a thlen famkim? Awle, Isua chu a thi a, kaihthawh leh a ni a; tichuan, ‘khaw lam hla tak,’ vânah chuan a kal a ni. Isua’n chu tehkhin thu-ah bawk chuan lal thuneihna neia a lo kal leh hun tûr chu “rei tak hnuah” chauh a ni ang tih a sawi lâwk a ni.—Matthaia 25:19.
Isua vâna a lâwn aṭanga kum tlêmtê a ral hnuah, tirhkoh Paula chuan heti hian a ziak a ni: “Ani [Isua] erawh hi chu chatuan atân sualte tâna inthawina pakhat chauh a hlan hnuin, Pathian ding lamah a han ṭhu ta zâwk a; chuta chin chu a hmêlmate a kephah nghahchhana siam an nih hma loh zawng a nghâk reng a,” tiin. (Hebrai 10:12, 13) Chuvângin, Isua’n vâna a chhoh hnuah lalna chang tûrin hun rei tak chhûng a nghâk a ni. Chu a nghah hun chhûng chu, rei tak ata a lo tiam tawh Messia Lalrama Lal ni tûra Pathianin a Fapa a siam hunah chuan a tâwp ta a. Chu chu Krista lo kal lehna inṭanna chu a ni. He hun pawimawh tak mai hi leia mihringte hian an hmu thei ang em?
2. A lo kal lehna chu mihringte mita hmuh theih a ni lo. Isuan’n a lo kal lehna chhinchhiahna a sawi tih hre reng ang che. (Matthaia 24:3) A lo kal lehna chu mihring mita hmuh theih ni sela chuan, chhinchhiahna pêk a ngai ang em? Entîr nân, tuifinriat en tûrin i zin chhuak angah han inchan ta la. Kawng tluanin i kal tumna hmun kawhhmuhtu che kawngsira chhinchhiahna intâr chu i hmu thei ang; mahse, tuifinriat kam i han thlen a, tuichim china i han din a, tuipui inpharh duai mai i han hmuh hnuah meuh chuan mite kawhhmuh nâna “Tuifinriat” tih chhinchhiahna intâr chu hmuh i inbeisei ang em? Beisei hauh lo vang! I mita i han hmuha awlsam taka i hriat mai tûr thilah chuan engvângin nge kawhhmuhtu chhinchhiahna chu a ngaih ang?
Isua chuan mihring mita hmuh theih thil sawi nân ni lovin, vâna thilthleng tûr an lo hriatthiam theih nâna ṭanpui tûr zâwkin, a lo kal lehna chhinchhiahna chu a sawi a. Tichuan, Isua chuan: “Pathian ram chu hmuh theihin a lo thleng lo ve,” tiin a sawi a ni. (Luka 17:20) Chuti a nih chuan, leia mite chu engtin nge chhinchhiahna chuan Isua a lo kal leh tawh a ni tih a hriattîr theih ang?
3. Isua lo kal lehna chu leia harsatna nasa tak chuan a hril ang. Isua chuan vâna Lalna changa a lo kal lehna chu leia indo te, ṭâm tla te, lîrnghîng te, hrilêng te, leh sualna pung zêlte chuan a hril ang tih a sawi. (Matthaia 24:7-12; Luka 21:10, 11) Engin nge hêng hrehawmna zawng zawngte hi thlentîr? Bible chuan Setana, “he khawvêl lal” chuan Krista’n Lalna a han chan tâkah chuan hun tlêm tê chauh a nei tih a inhriat avângin thinur êm êmin a awm tih min hrilh a ni. (Johana 12:31; Thu Puan 12:9, 12) Kan hunah hian, chutianga Setana thinurna leh Krista lo kal lehna chhinchhiahna hmuh tûr chu a tam hle a ni. A bîk takin, thilthleng chanchin chhuitute’n thil inher danglam hun nia an pawm kum 1914 aṭang phei kha chuan, he Krista lo kal lehna chhinchhiahna hi tûn hma zawng aia nasain khawvêl pum puiah a lo lang ta a ni.
Chûng thil zawng zawngte chu chanchin ṭha lo angin a lang mai thei; mahse, chutiang a ni lo. Chu mi awmzia chu, Messia Lalram chuan vânah ro a rêl mêk tihna a ni a. Chu sawrkâr chuan lei pum puiah hian ro a rêl thuai dâwn a ni. Chuti a nih chuan, chu Lalram rorêlna pawm tûr leh a khua leh tuite ni tûrin mite’n engtin nge chu Lalram chanchin chu an hriat theih ang?
4. Isua lo kal lehna chu khawvêl puma thu hrilhna hmanga chhinchhiah a ni. Isua chuan a lo kal lehna chu “Nova dam lai” ang a nih tûr thu a sawi a. * (Matthaia 24:37-39) Nova chu lawng tuktu mai a ni lo; “felna thu hriltu” a ni bawk a ni. (2 Petera 2:5) Nova chuan mite chu Pathian rorêlna a lo thleng thuai dâwn tih a hrilh a. Isua chuan a lo kal lehna hun chhûng chuan amah zuitute’n chutiang hna bawk chu an thawk dâwn tih a sawi a ni. Heti hian a hrilh lâwk a ni: “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tiin.—Matthaia 24:14.
Thuziak hmasaa kan hmuh tawh angin, Pathian Ram chuan khawvêla sawrkâr zawng zawngte hi a tiboral vek ang. Thu hrilhna chuan he vân lam sawrkâr hian chêt a rawn thawh thuai dâwn tih mite a hriattîr a, tihboralna lo thleng tûr laka tlânchhiat theihna leh chu Lal Ram khua leh tuite nih theihna hun remchâng awm chu mi zawng zawng hnênah a pe a ni. Chuti a nih chuan, zawhna pawimawh ber awm ta chu, Engtin nge i chhân lêt ang? tih hi a ni.
Pathian Ram Chu I Tân Chanchin Ṭha A Ni Ang Em?
Isua thu hrilh chu beisei tûr ṭha ber a ni a. Kum sâng tam tak liam taa Eden huana helna a chhuah hnu khân, Pathian Jehova chuan thil siam ṭhatu tûr leh mi rinawmte hnêna Pathianin atîr ata a thiltum—he lei paradis-a chatuana nunna—pe lehtu tûr sawrkâr din a tum a ni. Rei tak ata lo tiam tawh sawrkâr chuan vânah ro a rêl mêk a ni tih hriat aia thil phûrawm zâwk eng nge awm thei ang? Hei hi thil chiang lo leh pawimawh lo a ni lo, a tak ngeia thil awm hi a ni!
Tûnah hian Pathian Lal thlan chuan a hmêlmate zîngah ro a rêl mêk a. (Sâm 110:2) He khawvêl bawlhhlawh Pathian lak ata inmihranah hian Messia chuan a Pa duhzâwng—Pathian nihna tak tak hre tûr leh “thlarau leh tih tak zeta” amah be tûra duhna nei zawng zawngte zawn chhuahna hna chu a thawk mêk a ni. (Johana 4:24) Pathian Ram rorêlna hnuaia chatuana nun beiseina chu hnam tinrênga mite, kum upat dân bithliah chin awm lovin, mi chi tinrêngte tân a ni. (Tirhkohte 10:34, 35) In hmaa hun remchâng ropui tak awm chu pawm tûrin kan fuih che u a. Tûnah hian Pathian Ram chanchin chu zir rawh u; tichuan, a rorêlna ṭha famkim hnuaiah chatuana nun in chên thei dâwn zu nia!—1 Johana 2:17. (w08 1/1)
[Footnote-te]
^ par. 3 Mizo Bible-in “lo kal lehna” tia a lehlin hi atîra ziak Grik ṭawngah chuan “pa·rou·siʹa” a ni a, a awmzia chu “lo awmna,” a nih loh leh “lo awm,” “heta lo awm” tihna a ni.
^ par. 10 Heta Isua thusawi hian Mizo ṭawng tiama Bible lehlin ṭhenkhatin “pa·rou·siʹa” tih thu mal an lehlin dik loh avânga ngaih dân dik lo a pêk chu tidik tûrin a ṭanpui a ni. Chu thu mal chu ṭawng lehlin ṭhenkhat chuan “lo kal,” “lo thlen hun,” a nih loh leh “lo kal lehna,” tiin a dah a, chûng chu hun rei lo tê sawina vek a ni. Mahse, Isua’n a lo kal lehna chu Nova dam laia Tuilêt nên a khaikhin lo va, hun pawimawh tak engemawti chhûng awh “Nova dam lai” nên a khaikhin zâwk tih chhhinchhiah ang che. “Nova dam lai” hian hun engemawti chhûng a awh ang bawkin, Krista lo kal lehna pawh chu hun engemawti chhûng awh a ni dâwn a, chu mi hun chhûng chuan mite chu vaukhânna pêk ngaihsak hman lo khawpin an nî tin thiltihah an buai ang.
[Phêk 6, 7-naa milemte]
Nî tina chanchin ṭha lo kan hriatte hian thil ṭha a lo thleng thuai dâwn tih a târ lang
[Milem Hawhtîrtu]
Thlawhna kah thlâkna laipui: U.S. Army photo