ДАВИД машинӕйы бадгӕйӕ йӕ бинойнагмӕ ӕнхъӕлмӕ каст ӕмӕ йӕ сахатмӕ ӕркӕс-ӕркӕс кодта. Афтӕ йӕм каст, цыма рӕстӕг размӕ нал цӕуы, ӕмӕ тынгӕй-тынгдӕр мӕсты кӕнын райдыдта. Уалынмӕ, йӕ ус Дианӕ дӕр хӕдзарӕй рахызт, фӕлӕ Давид йӕхи нал баурӕдта.

«Цас дӕм хъӕуы ӕнхъӕлмӕ кӕсын?– ныхъхъӕр кодта лӕг.– Ӕппынӕдзух дӕр ӕрӕджы фӕкӕныс! Иухатт дӕ бон нӕу афоныл рацӕуын?»

Дианӕ цы загътаид, уый нал зыдта. Йӕ цӕссыг фемӕхст ӕмӕ фӕстӕмӕ хӕдзармӕ балыгъд. Давид уайтагъд йӕ рӕдыд бамбӕрста. Йӕхиуыл кӕй нӕ фӕхӕцыд, уымӕй хъуыддаг фыддӕр цы фӕкодта, ӕндӕр ницы. Ныр куыд бакӕна? Йӕ машинӕ ахуыссын кодта, арф ныуулӕфыд ӕмӕ йӕ бинойнаджы фӕдыл мидӕмӕ сабыргай араст.

Ахӕм хабӕрттӕ арӕх ӕрцӕуы, афтӕ нӕу? Цымӕ ды дӕ ныхӕстыл никуы фӕфӕсмон кодтай? Ӕнӕрхъуыды ныхас куы фӕзӕгъӕм, уӕд нӕхи фӕстӕдӕр фӕсмонӕй фӕхӕрӕм. Уӕдӕ Библийы цы фыст ис, уый раст у: «Рӕстгӕнӕг дзуапп раттыны размӕ ахъуыды кӕны» (Ӕмбисӕндтӕ 15:28).

Раст зӕгъгӕйӕ, ӕнцон нӕ вӕййы исты зӕгъыны размӕ хорз ахъуыды кӕнын, уӕлдайдӕр та мӕсты куы вӕййӕм, истӕмӕй куы фӕтӕрсӕм кӕнӕ нӕ исчи куы фӕхъыг кӕны, уӕд. Адӕймаджы йӕ хъуыды зӕгъын куы фӕфӕнды, уӕлдайдӕр йӕ бинонтӕй искӕмӕн, уӕд арӕх иннӕты аххосджын кӕнын кӕнӕ ӕфхӕрын райдайы. Уый та ӕркӕны зӕрдӕрыст ӕмӕ хылтӕм.

Уӕдӕ цы бакӕнӕм, цӕмӕй хъуыддаг афтӕ ма рауайа? Нӕ бон куыд у нӕхиуыл хӕцын? Уый фӕдыл хорз уынаффӕтӕ радта Библийы фысджытӕй иу – Соломон.

Цы зӕгъдзынӕ ӕмӕ куыд зӕгъдзынӕ, ууыл-иу ахъуыды кӕн

Соломон йӕ чиныг Екклесиасты равдыста, цард куыд афтид ӕмӕ куыд дзӕгъӕлы у. Бӕрӕг у, уыцы хъуыддаг ын ӕнцой кӕй нӕ лӕвӕрдта. Соломон загъта: «Цард мын сӕнад». Иухатт та афтӕ дӕр бакодта: «Алцыдӕр бынтон дзӕгъӕлы у» (Екклесиаст 2:17; 12:8). Фӕлӕ Екклесиасты чиныджы, Соломоны цы тыхсын кодта, ӕрмӕст уыдӕттыл нӕ цӕуы дзырд. Уый афтӕ нӕ хъуыды кодта, ӕмӕ царды цы зындзинӕдтӕ ис, ӕрмӕст уый тыххӕй фыссын хъӕуы. Йӕ чиныджы кӕрон Соломон загъта, кӕй «архайдта фӕлмӕн ӕмӕ раст ныхӕстӕ ссарыныл» (Екклесиаст 12:10).

Ӕвӕццӕгӕн, Соломон ӕмбӕрста, йӕхиуыл кӕй хъуамӕ хӕца, уый. Цыма-иу йӕхи бафарста: «Цы зӕгъынмӕ хъавын, уый ӕцӕгдӕр раст у? Мӕ ныхӕстӕ иннӕты зӕрдӕмӕ фӕцӕудзысты?» «Фӕлмӕн ныхӕстӕ»  кӕй агуырдта, уый фӕрцы йыл йӕ зӕрдӕ нӕ тых кодта, фӕлӕ архайдта уӕззау зондӕй.

Уымӕ гӕсгӕ Соломон ӕнӕуи цыдӕр диссаджы чиныг нӕ ныффыста, фӕлӕ Хуыцауӕй чи цӕуы, уыцы зонд кӕм ис ӕмӕ адӕймаг цӕмӕн цӕры, уый чи ӕмбарын кӕны, ахӕм чиныг (2 Тимофеймӕ 3:16, 17). Соломоны цы тыхсын кодта, уый куыд бамбарын кодта, уый нын куыд баххуыс кӕндзӕн, цӕмӕй, нӕ удӕн зынаргъ чи у, уыдонимӕ кӕрӕдзийы хуыздӕр ӕмбарӕм? Ӕркӕсӕм иу цӕвиттонмӕ.

Ахуыр кӕн хиуыл хӕцын

Зӕгъӕм, лӕппу скъолайӕ ӕнкъардӕй ӕрбацыд. Йӕ фыд ын йӕ боныгмӕ (дневникмӕ) ӕркаст ӕмӕ дзы ӕвзӕр бӕрӕггӕнӕн федта. Фыд уайтагъд амӕсты. Йӕ зӕрдыл ӕрлӕууыд, лӕппу-иу йӕ уроктӕ скӕныныл кӕй нӕ тагъд кодта, уый ӕмӕ йӕ хъӕры бын фӕкодта: «Магуса! Афтӕмӕй дӕ никуы ницы рауайдзӕн!»

Мӕстыйӕ дзурыны бӕсты, хуыздӕр уаид, фыд куы ахъуыды кӕнид: «Хабар, ӕз куыд ӕнхъӕл дӕн, ӕцӕгдӕр афтӕ у?» Ацы фарст ын баххуыс кӕндзӕн хъуыддагмӕ раст цӕстӕй кӕсын (Ӕмбисӕндтӕ 17:27). Цымӕ ӕцӕгдӕр йӕ фыртӕй ницы рауайдзӕн, иу предмет хорз кӕй нӕ зоны, уый тыххӕй? Ӕцӕгӕйдӕр магуса у, ӕви йӕ уроктӕ афоныл уый тыххӕй не скӕны, ӕмӕ дзы цыдӕр не ’мбары? Библи арӕх дзуры, куыд ахсджиаг у ӕмбаргӕдзинад ӕмӕ хъуыддӕгтӕм раст цӕстӕй кӕсын (Титмӕ 3:2; Иаковы 3:17). Цӕмӕй ныййарджытӕ сӕ сывӕллоны зӕрдӕйы ныфс уадзой, уый тыххӕй сын хъуамӕ «раст ныхӕстӕ» дзурой.

Агур раст ныхӕстӕ

Фыд исты зӕгъынмӕ куы хъава, уӕд йӕ бон у ахъуыды кӕнӕн: «Мӕ ныхас афтӕ фӕлмӕнӕй куыд зӕгъон, цӕмӕй мӕм мӕ лӕппу байхъуса?» Кӕй зӕгъын ӕй хъӕуы, раст ныхӕстӕ ссарын ӕнцон нӕ вӕййы. Фӕлӕ ныййарджытӕ хъуамӕ сӕ зӕрдыл дарой, ӕрыгӕттӕ афтӕ кӕй фӕхъуыды кӕнынц, зӕгъгӕ, кӕд мын цыдӕр хорз нӕ уайы, уӕд мӕ бынтондӕр ницы рауайдзӕн. Ӕрыгӕттӕн цыдӕр куы нӕ рауайы, кӕнӕ куы фӕрӕдийынц, уӕд ӕй ныддиссаг кӕнынц ӕмӕ уый фӕстӕ сӕ ныфс ницӕмӕуал фӕхӕссынц. Ныййарджытӕ алцӕуылдӕр куы мӕсты кӕной кӕнӕ ӕгӕр карз куы уой, уӕд сӕ сывӕллоны ӕцӕгдӕр бауырндзӕн, кӕй дзы ницы рауайдзӕн, уый. Колоссӕгтӕм 3:21 фыст ис: «Уӕ сывӕллӕтты ма мӕсты кӕнут, цӕмӕй сӕхимӕ ма ныхъхъусой».

Дзырдтӕ «алыхатт дӕр» ӕмӕ «никуы», хъуыддаг ӕцӕгдӕр куыд у, афтӕ нӕ равдисынц. Мад кӕнӕ фыд йӕ сывӕллонӕн афтӕ куы зӕгъа: «Дӕуӕй никуы ницы рауайдзӕн», уӕд ма сывӕллон йӕхицӕн аргъ кӕндзӕн? Сывӕллон ахӕм ныхӕстӕ арӕх куы хъуса, уӕд ӕцӕгдӕр райдайдзӕн хъуыды кӕнын, ницӕйаг дӕн, зӕгъгӕ. Ахӕм ныхӕстӕ йын ӕрмӕст йӕ ныфс нӕ асӕттынц, фӕлӕ ма раст дӕр не сты.

Хуыздӕр вӕййы, алы хъуыддаджы дӕр хорз цы у, ууыл дзурын. Уӕлдӕр цы цӕвиттон ӕрхастам, уым фыдӕн йӕ бон уыди афтӕ зӕгъын: «Мӕ хъӕбул, цыдӕр ӕнкъард дӕ. Мыййаг, скъолайы ӕвзӕр бӕрӕггӕнӕн райстай? Зонын ӕй, дӕ уроктыл зӕрдиагӕй кӕй фӕархайыс. Уӕд та иумӕ ӕркӕсиккам, цы не ’мбарыс, уымӕ». Цӕмӕй фыд йӕ фыртӕн баххуыс кӕна, уый тыххӕй ма йӕ бон у ахӕм фарстытӕ раттын, цӕмӕй хъуыддаг ӕцӕгдӕр цӕй мидӕг ис, уый хуыздӕр бамбара.

Маст скалынӕй бирӕ хуыздӕр у, хӕларзӕрдӕ ӕмӕ ӕмбаргӕ куы уӕм, уый. Библийы фыст ис: «Ӕхсызгон ныхӕстӕ – зӕрдӕйӕн адджын ӕмӕ сджытӕн ӕнӕнизы хос» (Ӕмбисӕндтӕ 16:24). Сывӕллӕттӕ, стӕй бинонтӕ иууылдӕр, амондджын уыдзысты, хӕдзары фарн ӕмӕ уарзондзинад куы уа, уӕд.

«Зӕрдӕйы цы ис», уый

Нӕ зӕрдыл ма ӕрлӕууын кӕнӕм, статьяйы райдиан цы лӕджы кой кодтам, уый. Цымӕ хуыздӕр нӕ уыдаид, йӕ бинойнагыл хъӕр кӕныны бӕсты «фӕлмӕн ныхӕстӕ» куы бацагуырдтаид, уӕд? Ахӕм рӕстӕг лӕгӕн йӕ бон у ахъуыды кӕнын: «Кӕд мӕ цардӕмбалы ӕцӕгӕйдӕр бацархайын хъӕуы,  цӕмӕй ма ’рӕджы кӕна, уӕддӕр цымӕ афтӕ зӕгъӕн ис, ӕмӕ алы хатт дӕр рӕджы фӕкӕны? Йӕ хъӕндзинады тыххӕй зӕгъынӕн хорз рӕстӕг равзӕрстон? Мӕсты ӕмӕ ӕфхӕрӕн ныхӕсты фӕстӕ ма йӕ бафӕнддзӕн уыцы хъуыддаг фӕхуыздӕр кӕнын?» Ахӕм фарстатыл куы ахъуыды кӕнӕм, уӕд не ’нӕрхъуыды ныхӕстӕй, кӕй уарзӕм, уыдоны нӕ фӕхъыг кӕндзыстӕм (Ӕмбисӕндтӕ 29:11).

Фӕлӕ зӕгъӕм, нӕ бинонты ’хсӕн нӕ ныхас арӕх хылӕй ахицӕн вӕййы, уӕд та? Уӕд хъуамӕ ахъуыды кӕнӕм, афтӕ цӕмӕн рауайы, ууыл. Нӕ ныхӕстӕй рабӕрӕг вӕййы, нӕ зӕрдӕйы цы ис, уый, уӕлдайдӕр зын уавӕры куы бахауӕм кӕнӕ истӕмӕй куы фӕтыхсӕм, уӕд. Йесо загъта: «Адӕймагӕн йӕ зӕрдӕйы цы вӕййы, дзургӕ дӕр уый фӕкӕны» (Матф. 12:34). Иу дзырдӕй, нӕ ныхӕстӕй бӕрӕг вӕййынц нӕ хъуыдытӕ, нӕ фӕндтӕ ӕмӕ иннӕтӕм цы цӕстӕй кӕсӕм, уый.

Цымӕ цардмӕ раст цӕстӕй, зӕрдӕрухсӕй ӕмӕ ныфсджынӕй кӕсӕм? Уӕд уый нӕ хъӕлӕсы уаг ӕмӕ цӕуыл дзурӕм, уымӕй дӕр бӕрӕг уыдзӕн. Мыййаг, тызмӕг стӕм, нӕ зӕрдӕ ницӕмӕй фӕрухс кӕны, йе та алцӕмӕдӕр фаутӕ фӕхӕссӕм? Кӕд афтӕ у, уӕд, цы дзурӕм кӕнӕ куыд дзурӕм, уымӕй иннӕты ныфс дӕр сӕтдзыстӕм. Чи зоны йӕ ӕмбаргӕ дӕр нӕ кӕнӕм, нӕ зондахаст кӕнӕ нӕ ныхасыхъӕд иннӕтыл ӕвзӕрырдӕм куыд фӕзыны, уый. Кӕнӕ афтӕ дӕр хъуыды кӕнӕм, ӕмӕ алцӕмӕдӕр раст цӕстӕй кӕсӕм. Фӕлӕ хъуамӕ нӕхи сайгӕ ма кӕнӕм (Ӕмбисӕндтӕ 14:12).

Куыд хорз у, Хуыцауы Ныхас нӕм кӕй ис. Библи нын ӕххуыс кӕны, цӕмӕй базонӕм, цавӕр зондахаст нын ис ӕмӕ нӕ дзы цы фӕивын хъӕуы, уый дӕр (Дзуттӕгтӕм 4:12; Иаковы 1:25). Нӕ зондахаст фӕивын нӕ ницы бакъуылымпы кӕндзӕн, нӕдӕр нӕ туджы цы миниуджытӕ рахастам, нӕдӕр нӕ куыд схъомыл кодтой, уый, фӕндгӕ нӕ кӕна, ӕндӕр (Ефесӕгтӕм 4:23, 24).

Стӕй ма Библийы руаджы нӕ бон у базонын, иннӕтимӕ куыд ныхас кӕнӕм, уый дӕр. Дӕ бон у бафӕрсын дӕ цардӕмбалы кӕнӕ дӕ сывӕллоны, ацы хъуыддаджы дӕ фӕхуыздӕр кӕнын цы хъӕуы, уымӕй. Аныхас кӕн, хорз дӕ чи зоны, ахӕм ӕмбалимӕ. Сӕрныллӕгӕй байхъус, цы дын зӕгъынц, уымӕ, ӕмӕ цы хъӕуа, уый фӕив.

Исты зӕгъыны размӕ-иу ахъуыды кӕн!

Ӕппынфӕстаг, кӕд нӕ нӕ фӕнды иннӕты нӕ ныхасӕй хъыг кӕнын, уӕд хъуамӕ архайӕм, Ӕмбисӕндты 16:23 куыд фыст ис, афтӕ: «Зондджын адӕймагӕн йӕ ныхӕстӕ вӕййынц ӕмбаргӕ ӕмӕ сӕ вӕййы уӕз». Чи зоны, алы хатт ӕнцон нӕ вӕййы хиуыл хӕцын. Иннӕты аххосджын кӕнын ӕмӕ ӕфхӕрыны бӕсты архай, цӕмӕй сӕ бамбарай ӕмӕ дын уӕд раст ныхӕстӕ ссарын уыдзӕн ӕнцондӕр.

Кӕй зӕгъын ӕй хъӕуы, не ’ппӕт дӕр ӕнӕххӕст стӕм (Иаковы 3:2). Ӕмӕ хатт кӕрӕдзийы ныхасӕй фӕхъыг кӕнӕм (Ӕмбисӕндтӕ 12:18). Фӕлӕ Хуыцауы Ныхасы фӕрцы нӕ бон у ахуыр кӕнын, цӕмӕй-иу исты зӕгъыны размӕ ахъуыды кӕнӕм ӕмӕ иннӕтӕн куыд хуыздӕр уа, ууыл архайӕм (Филиппӕгтӕм 2:4). Цӕй уӕдӕ, «фӕлмӕн ныхӕстӕ» агурӕм, уӕлдайдӕр нӕ бинонтимӕ куы фӕныхас кӕнӕм, уӕд. Афтӕмӕй кӕй уарзӕм, уыдоны нӕ ныхасӕй нӕ хъыг кӕндзыстӕм ӕмӕ сӕ не ’фхӕрдзыстӕм, фӕлӕ сын сӕ ныфсыл ныфс ӕфтаудзыстӕм (Ромӕгтӕм 14:19).

[Ныв 12 фарсыл]

Цы саразӕн ис, цӕмӕй нӕ ныхӕстыл ма фӕсмон кӕнӕм?