Utu mumanye anyi?

Ndîba kayi divua bena meji balue kumona Yezu?

Badi batuambila mu mukanda wa Matayo ne: ‘Bena meji ba ku esete’ bakalua kumona Yezu, kumutuadilabu bintu bia bungi. (Matayo 2:1-12) Ki mbaleje bungi bua bena meji bavua balue kumona Yezu patshivuaye muana to, ne kakuena tshintu tshidi tshileja ne: bavua basatu to; ki mbatele kabidi mêna abu mu Bible to.

Bible mukuabu udi wamba bua Matayo 2:11 ne: “Bishilangane ne mutu bantu bela meji, bena meji kabavua balue kumona Yezu patshivuaye mu tshikumbi butuku buakamulelabu bu muvua balami ba mikoko benze to. Bakalua kunyima kua ngondo ndambu ne kumonabu ‘muana’ mu ‘nzubu’ muabu.” (New International Version Study Bible) Muanda eu mmulelela bualu tshikondo tshivua Helode ukeba kushipesha muana eu, wakatuma dîyi bua kushipabu bana bonso ba balume ba bidimu bibidi anyi bishadile ba mu Beteleheme ne ba mu misoko ivua kumpenga. Wakakula bua bana ba bidimu abi bualu uvua muenze makumi bilondeshile ‘tshikondo tshiakumanyinaye [bualu ebu] kudi bena meji.’​—Matayo 2:16.

Bu bena meji balue kumona Yezu butuku buvuabu bamulele ne bamutuadile ngolo ne bintu bikuabu bia mushinga, Mariya kavua mua kuikala mulambule anu nyunyi ibidi pavuaye muye ne Yezu ku ntempelo mu Yelushalema panyima pa matuku 40 to. (Luka 2:22-24) Wakafila nyunyi ayi bualu Mikenji ivua yamba ne: bantu bapele bavua kabayi mua kufila muana wa mukoko, bavua mua kufila nyunyi ibidi. (Lewitiki 12:6-8) Kadi bintu bia mushinga ebi bivua mua kuikala bifike pa dîba dilenga ne biambuluishe bena mu dîku dia ba Yezu bua kusombabu mu Ejipitu kakuyi bualu.​—Matayo 2:13-15.

Bua tshinyi Yezu wakenza matuku anayi kumpala kua kufika ku lukita lua Lazalo?

Bidi bimueneka ne: Yezu uvua mulongolole malu mushindu au. Bua tshinyi tudi tuamba nanku? Tukonkonone muyuki udi mu Yone nshapita wa 11.

Pavua Lazalo mulunda wa Yezu uvua musombele mu Betania mutuadije kusama, bana babu ba bakaji bakatumina Yezu mukenji. (Mvese 1-3) Dîba adi, Yezu uvua mutantshi wa luendu lua matuku abidi bua kufika ku Betania. (Yone 10:40) Bidi bimueneka ne: Lazalo wakafua dîba divua Yezu mupete mukenji au. Ntshinyi tshiakenza Yezu? ‘Wakasomba kuakadiye matuku abidi,’ pashishe kuasaye luendu mutangile ku Betania. (Mvese 6, 7) Nunku, bu muvuaye muindile matuku abidi ne mulue kuenda makuabu abidi, wakafika ku lukita matuku anayi panyima pa Lazalo mumane kufua.​—Mvese 17.

Yezu ukavua mubishe bantu babidi ku lufu kumpala, umue utshivua ufuma ku difua ne mukuabu ukavua mufue kukavua kupita mêba ndambu. (Luka 7:11-17; 8:49-55) Kadi uvuaku mua kujula muntu ukavua mufue matuku anayi ne ukavua mutuadije kubola anyi? (Mvese 39) Mukanda mukuabu udi wamba muvua bamue bena Yuda bamba ne: kakuvua ditekemena “bua muntu uvua mufue kukavua matuku anayi; dituku adi mubidi ukavua utuadija kubola, ne anyima uvuabu bela meji ne: uvua ujengelela pa mutu pa mubidi munkatshi mua matuku asatu ukavua muye.”

Bikala bantu bavua bunguile ku lukita bavua ne mpata, bakavua pa kumona bukole buvua Yezu nabu kumpala kua lufu. Yezu wakimana kumpala kua lukita lukavuabu bunzulule, kuelaye dîyi dikole ne: ‘Lazalo, lopoka.’ Dîba adi, muntu ‘ukavua mufue wakalopoka.’ (Mvese 43, 44) Dibika dia bantu ku lufu nedienzeke ne ndishilangane ne dilongesha dia dishima didi bantu ba bungi bitaba ne: anyima utu utungunuka ne kuikala ne muoyo padi muntu ufua.​—Yehezekele 18:4; Yone 11:25.