Стъалыдӕснытӕ Йесомӕ кӕд ӕрбацыдысты?

Матфейы Евангелийы фыст ис, гыццыл Йесомӕ скӕсӕнӕй лӕвӕрттимӕ кӕй «ӕрцыдысты стъалыдӕснытӕ», ома астрологтӕ (Матфейы 2:1–12). Цал уыдысты, уый бӕрӕг нӕу. Ӕмӕ кӕд бирӕтӕ фӕзӕгъынц, зӕгъгӕ, ӕртӕйӕ уыдысты, уӕддӕр уымӕн бӕлвырдгӕнӕнтӕ нӕй. Стӕй сӕ нӕмттӕ дӕр Библийы никуы сты фыст.

Библийы тӕлмацтӕй иуы, Матфейы 2:11 стихмӕ фиппаинаджы, фыст ис: «Адӕм куыд дзурынц, хабар ӕцӕгӕй афтӕ нӕ уыд. Йесо цы ’хсӕв райгуырд, стъалыдӕснытӕ йӕм уыцы ’хсӕв не ’рбацыдысты, ӕрбацыдысты йӕм ӕрмӕст фыййӕуттӕ ӕмӕ йӕ ӕрбаййӕфтой кӕвдӕсы. Стъалыдӕснытӕ ӕрбацыдысты, сывӕллоны райгуырдыл дзӕвгар куы рацыд ӕмӕ йӕ хӕдзары куы уыд, уӕд» («New International Version Study Bible»). Уый базонӕн ис уымӕй дӕр, ӕмӕ Ирод сывӕллоны амарынмӕ куы хъавыд, уӕд бардзырд радта, цӕмӕй, Вифлеемы ӕмӕ йӕ алфамбылай рӕтты дыууӕ азы ӕмӕ уымӕй къаддӕр цы лӕппутыл цыд, уыдоны се ’ппӕты дӕр ныццагътаиккой. Ирод ахӕм бардзырд уымӕн радта, ӕмӕ «стъалыдӕснытӕй цы рӕстӕг базыдта, уымӕ гӕсгӕ сывӕллон уыцы карӕн уыди» (Матфейы 2:16).

Стъалыдӕснытӕ, Йесо куы райгуырд, уыцы ’хсӕв куы ӕрбацыдаиккой сызгъӕринтимӕ ӕмӕ ӕндӕр зынаргъ лӕвӕрттимӕ, уӕд, ӕвӕццӕгӕн, Марийӕ нывондӕн дыууӕ бӕлоны не ’рхастаид, 40 боны фӕстӕ Йесойы Иерусалимы кувӕндонмӕ куы бахаста, уӕд (Лукайы 2:22–24). Моисейы Закъонмӕ гӕсгӕ ахӕм нывонд хастой мӕгуыр адӕм, йӕ бон фыркъа ӕрхӕссын кӕмӕн нӕ уыд, уыдон (Левит 12:8). Фӕлӕ, ӕвӕццӕгӕн, уыцы зынаргъ лӕвӕрттӕ уыдысты сӕ тӕккӕ афоныл ӕмӕ стыр ӕххуыс фесты Йесойы бинонтӕн Египеты (Матфейы 2:13–15).

Йесо Лазӕры зӕппадзмӕ цыппар боны фӕстӕ цӕмӕн ӕрцыд?

Ӕвӕццӕгӕн, Йесо барӕй бакодта афтӕ. Цӕмӕн ис афтӕ зӕгъӕн? Ӕркӕсӕм, Иоанны 11 сӕры цы фыст ис, уымӕ.

Лазӕр уыд Йесойы ӕмбал ӕмӕ цард Вифанийы. Ӕмӕ тынг куы фӕрынчын, уӕд йӕ хотӕ Йесойӕн уый тыххӕй фӕхабар кодтой (1–3 стихтӕ). Уыцы рӕстӕг Йесо цы ран уыди, уырдыгӕй Вифанимӕ хъуыд дыууӕ боны цӕуын (Иоанны 10:40). Лазӕр, ӕвӕццӕгӕн, амард, рынчын кӕй у, уыцы хабар Йесомӕ куы бахӕццӕ, уӕд. Цы бакодта Йесо? «Дыууӕ боны ма баззад, кӕм уыди, уым», ӕмӕ стӕй ацыд Вифанимӕ (6, 7 стихтӕ). Уӕдӕ Йесо уым баззад дыууӕ боны, стӕй дыууӕ боны та фӕндагыл уыд, ӕмӕ зӕппадзмӕ ӕрхӕццӕ, Лазӕр куы амард, уымӕй цыппар боны фӕстӕ (17 стих).

Уый размӕ Йесо райгас кодта дыууӕ адӕймаджы. Иуы райгас кодта, куыддӕр амард, афтӕ, иннӕйы та – куы амард, уыцы бон гыццыл фӕстӕдӕр (Лукайы 7:11–17; 8:49–55). Цымӕ ныр та йӕ бон бауыдзӕн, цыппар боны мард чи у ӕмӕ ӕмбийын чи райдыдта, уыцы адӕймаджы райгас кӕнын? (39 стих). Библи чи ӕмбарын кӕны, иу ахӕм чиныджы фыст ис, зӕгъгӕ, дзуттӕгтӕ афтӕ хъуыды кодтой, ӕмӕ «цыппар боны мард чи уыд, уыцы адӕймагӕн ницӕмӕйуал уыди баххуыс кӕнӕн; уӕдмӕ ӕмбийын райдыдта, йӕ уд та, дам, ӕртӕ боны йӕ сӕрмӕ ратӕх-батӕх кодта ӕмӕ уый фӕстӕ атахт».

Кӕд, Лазӕры зӕппадзы раз чи ӕрӕмбырд, уыдонӕй чидӕртӕ дызӕрдыг кодтой, уӕддӕр ныр хъуамӕ сӕхи цӕстӕй федтаиккой, Йесойӕн мӕлӕтыл йӕ бар кӕй цӕуы. Зӕппадзы раз лӕугӕйӕ, Йесо хъӕрӕй загъта: «Лазӕр, ӕддӕмӕ рацу!» Ӕмӕ «мард рацыд» (43, 44 стихтӕ). Уӕдӕ, адӕймаг куы амӕлы, уӕд йӕ уд никуы фӕцӕры, кӕд бирӕтӕ афтӕ хъуыды кӕнынц, уӕддӕр. Чи амард, уыдонӕн ис иунӕг ныфс – райгас уыдзысты (Иезекил 18:4; Иоанны 11:25).