Ang Gitagna ni Jehova Matuman Gayod

“AKO ang Diyos ug wala nay laing Diyos, ni adunay sama kanako; ang Usa nga nagsulti sa kataposan sukad sa sinugdan, ug sa mga butang nga wala mahimo sukad sa kanhing panahon.” (Isaias 46:9, 10) Pamulong kana ni Jehova, ang usa nga tukmang makatag-an sa umaabot.

Kita nahibalo nga ang tawo dili gayod makatag-an kon unsay anaa sa umaabot. Sanglit ang Bibliya usa man ka basahon sa mga tagna, ang mga tawo nga nangita sa kamatuoran madasig gayod sa pagsusi kon tinuod ba nga kini gikan sa Diyos. Hisgotan nato ang pipila ka tagna sa Bibliya nga natuman na.

Karaang mga Sibilisasyon

Ang Diyos nagtagna nga malaglag sa dayon ang Babilonya, mao man usab ang Edom, Moab, Ammon, ug Tiro. (Jeremias 48:42; 49:17, 18; 51:24-26; Abdias 8, 18; Sofonias 2:8, 9) Kining mga nasora wala na maglungtad karon, nga nagpamatuod nga natuman gayod ang mga tagna sa Bibliya.

Apan, mangatarongan tingali ang usa nga makahimo si bisan kinsa sa pagtagna nga ang usa ka nasod, bisan unsa pa ka gamhanan, mapukan gayod sa ngadtongadto. Apan, kon ingon niana ang pangatarongan sa usa, wala niya tagda ang ubang hinungdanong detalye nga gihisgotan sa Bibliya. Pananglitan, gihisgotan niini kon sa unsang paagi malaglag ang Babilonya. Ang Bibliya nagtagna nga ang siyudad pukanon sa mga Midianhon, nga ang lider sa misulong nga mga sundalo mao si Ciro, ug ang suba nga nagsilbing depensa niini pahubsan.—Isaias 13:17-19; 44:27–45:1.

Apan dili dili sa tanang higayon nga ang Bibliya nagtagna nga ang usa ka napukan nga nasod o katawhan malaglag sa dayon. Pananglitan, sa dihang gitagna sa Diyos nga laglagon sa mga taga-Babilonya ang Jerusalem, siya miingon nga kini ipasig-uli, bisan pag ang Babilonya adunay balaod nga dili gayod buhian ang mga binihag niini. (Jeremias 24:4-7; 29:10; 30:18, 19) Kini natuman, ug ang kaliwat sa mga Hudiyo naglungtad pa gihapon hangtod karon.

Dugang pa, si Jehova nagtagna nga ang Ehipto mapukan ingong gamhanang nasod apan “human niini siya pagapuy-an ingon sa kanhing  mga adlaw.” Paglabay sa panahon, kining nasora, nga gamhanan kaayo kaniadto, “mahimong usa ka gingharian nga ubos.” (Jeremias 46:25, 26; Ezequiel 29:14, 15) Kining tagnaa natuman usab. Dugang pa, si Jehova nagtagna nga ang Gresya mapukan usab ingong gamhanang nasod sa kalibotan, apan wala magsulti ang Diyos nga kini dili na molungtad pa. Unsay atong makat-onan sa pagkahanaw sa katawhan nga gitagna ni Jehova nga mapuo ug sa padayong paglungtad sa katawhan nga wala niya itagna nga mapuo? Atong makat-onan nga ang Pulong sa Diyos naundan ug tinuod ug kasaligan nga mga tagna.

Talagsaong Detalye

Sama sa nahisgotan na, si Jehova nagtaganag daghang detalye bahin sa pagkalaglag sa Babilonya. Sa samang paagi, kon bahin sa tagna sa pagkalaglag sa Tiro, ang basahon ni Ezequiel nag-ingon nga ang mga bato, mga butang nga hinimo sa kahoy, ug ang abog niini itambog “sa taliwala sa dagat.” (Ezequiel 26:4, 5, 12) Kining tagnaa natuman sa 332 W.K.P. sa dihang si Alejandrong Bantogan ug ang iyang kasundalohan naggamit sa mga ginun-ob sa siyudad sa Tiro aron himoong agianan paingon sa isla nga bahin sa maong siyudad aron kini pukanon.

Ang tagna nga nasulat sa Daniel 8:5-8, 21, 22 ug sa 11:3, 4 naghatag usab ug talagsaong detalye maylabot sa gamhanan kaayo nga “hari sa Gresya.” Ang magmamando niini mamatay sa dihang siya anaa sa tayuktok sa iyang gahom, ug ang iyang gingharian mabahin sa upat apan ang mga manununod niini dili niya kaliwat. Paglabay sa 200 ka tuig, kining tagnaa natuman diha kang Alejandrong Bantogan. Gihisgotan sa kasaysayan nga siya nakaagom ug ahat nga kamatayon ug sa ngadtongadto nabahin ang iyang gingharian, dili ngadto sa iyang kaliwat, kondili ngadto sa iyang upat ka heneral.

Ang mga kritiko nag-ingon nga gisulat kono kining tagnaa human kini mahitabo. Apan basaha pag-usab ang maong tagna diha sa basahon ni Daniel. Kon kini gisulat sa wala pa ang  panghitabo, ikaingon nga talagsaon gayod ang detalye niini. Apan kon kini gisulat human sa panghitabo, dili ba kulang kaayo kini sa detalye? Gawas pa, kon kini gisulat sa usa ka impostor human mamatay si Alejandro ug dayon gipresentar niya kini nga usa ka tagna aron makadayeg ang mga magbabasa niini, nganong wala man niya hisgoti nga human mamatay si Alejandro, duha sa iyang mga anak nga lalaki milihok dayon aron mahimong hari apan sila gipamatay? Nganong wala niya hisgoti nga dangtan pag daghang katuigan usa nahimong hari ang upat ka heneral ni Alejandro diha sa lainlaing bahin sa iyang imperyo? Labaw sa tanan, nganong wala man niya hisgoti ang ngalan nianang gamhanan nga hari ug sa iyang upat ka heneral?

Ang pangangkon nga ang mga tagna sa Bibliya gisulat human sa panghitabo dugay nang naglungtad apan wala kana mapamatud-i ug ang maong mga pangangkon naggikan sa mga tawo nga daan nang naghimog konklusyon nga imposible ang pagtagna sa umaabot bisag wala pa nila masusi ang mga ebidensiya. Kay dili man sila modawat nga Pulong sa Diyos ang Bibliya, mapugos sila sa pagpatin-aw niining tanan sumala sa tawhanong panglantaw. Apan, ang Diyos, sa kamaalamon, naghatag ug igo lang nga detalye aron pamatud-an nga siya ang tinubdan sa maong tagna. a

Ang mga tagna sa Bibliya makatabang nga molig-on ang imong pagtuo kon maggahin kag panahon sa pagpalandong sa espesipikong mga tagna sa Bibliya ug sa katumanan niini. Nganong dili nimo sulayan ang pagsusi niana? Ang mga tsart sa panid 343 hangtod sa 346 sa librong “Ang Tibuok Kasulatan Dinasig sa Diyos ug Mapuslanon” makatabang gayod kanimo. b Kon imong buhaton kini nga sugyot, himoang tumong nga malig-on ang imong pagtuo. Ayaw dali-dalia pagkobre ang materyal. Hinunoa, palandonga pag-ayo ang kamatuoran nga bisan unsay itagna ni Jehova matuman gayod.

[Mga footnote]

[Kahon/Hulagway sa panid 24]

MGA PRINSIPYO NGA MAKATABANG KANIMO

[Hulagway sa panid 24]

Ania pay laing butang nga angayng palandongon. Ang Diyos nga tukmang nagtagna sa pagkatukod ug pagkapukan sa gamhanang mga nasod sa kalibotan mao usab ang Tuboran sa mga prinsipyo sa Bibliya nga makatabang sa imong pagkinabuhi. Ang pipila niini mao:

Kon unsay imong gipugas mao usab ang imong anihon.—Galacia 6:7.

Adunay labaw nga kalipay sa paghatag kay sa pagdawat.—Buhat 20:35.

Ang kalipay nagdepende sa pagtagbaw sa espirituwal nga panginahanglan.—Mateo 5:3.

Kon imong ipadapat kining mga prinsipyoha diha sa imong kinabuhi, imong makita mismo nga tinuod gayod kini.

[Mga hulagway sa panid 22, 23]

Ang Pulong sa Diyos nagtagna nga malaglag sa dayon kining mga nasora  . . .

EDOM

BABILONYA

. . . gawas sa

GRESYA

EHIPTO

[Credit Lines]

Pictorial Archive (Near Eastern History) Est.

WHO photo by Edouard Boubat

[Hulagway sa panid 23]

Alejandrong Bantogan