Nagawan-nagawa so Impasakbay nen Jehova

“SIAK so Dios, et anggapo la so sananey; Dios ak, et anggapo so mipara ed siak; ya ipaliwawak so panganggaan a manlapu ed gapo, tan nanlapu nen inmuna a panaon ipaliwawak so saray bengatla ya agni agawa.” (Isaias 46:9, 10) Ontan so inkuan nen Jehova a Dios, samay makayarin mangipasakbay na nagawa ed arapen ya agbalot onsaew.

Amta tayo la ya agsarag na toon ipasakbay iray eksakton nagawa’d arapen. Natan ta libro na propesiya so Biblia, napakiwas to sirin iray manaanap na katuaan a paneknekan da’d inkasikara so ibabaga na satan a say Dios so autor to. Imanoen tayo pa sirin so pigaran propesiya ed Biblia ya asumpal la.

Kadaanan Iran Sibilisasyon

Impasakbay na Dios a say Edom, Moab, tan Amon so natawtaw odino sigpot lan naandi. (Jeremias 48:42; 49:17, 18; 51:24-26; Abdias 8, 18; Sofonias 2:8, 9) Papaneknekan na impakabalang na saratan a nasyon pati la iray totoo to a susto so propesiya na Salita na Dios.

Siempre, ompan ikatunongan na sakey a nayarian na siopaman ya ipasakbay so pakaandi na sakey a nasyon anggan panon lay kabiskeg na satan. Ingen, ibuburi na satan ya argumento so importantin katuaan a wala niray indetalye na Biblia. Singa bilang, indetalye to no panon so kaderal na Babilonia. Impasakbay na Biblia a say syudad et deralen na saray onlulusob a Medo, a saray sundalo et idauloan nen Ciro, tan saray pinagkadepensan ilog na syudad so naekatan.​—Isaias 13:17-19; 44:27–45:1.

Say Biblia et aglawas mangipapasakbay a say tinalon nasyon pati ed totoo to so sigpot lan naandi. Diad kasunian to, sanen impasakbay na Dios a deralen na saray taga Babilonia so Jerusalem, imbaga ton satan a syudad et ombangon lamet ta nipawil iray totoo anggaman ed ley na Babilonia ya agbalot nibulos iray narel da. (Jeremias 24:4-7; 29:10; 30:18, 19) Saya so tinmua, tan wala ni angga ni’d natan iray kapolian na Judio.

Kaaruman ni, impasakbay nen Jehova so kageba na Ehipto bilang sankamundoan a pakayari balet “kayari to [et] sikato naani natooan, singa saray agew nen inmuna.” Diad saginonor,  sayan pakayari nensaman so magmaliw “naani [ya] abeba a panarian.” (Jeremias 46:25, 26; Ezequiel 29:14, 15) Tinmua met iya. Niarum ni, impasakbay met nen Jehova so kaderal na Gresya bilang sankamundoan a pakayari balet agton balot imbaga a sayan nasyon et sigpot lan naandi. Anto so naaralan tayo ed panamasakbay nen Jehova no nipaakar ed kadederal na saray sibilisasyon, a say arum et nabalang balet ta say arum et mansiansia ni? Lugan sirin na Salita na Dios so tua tan napanmatalkan a propesiya.

Makapadinayew ya Inkidetalye

A singa naimano la, dakel iray inter nen Jehova a detalye no panoy kaderal na Babilonia. Ontan met kadetalye so impangipasakbay to’d kaderal na Tiro, ya inkuan na libron Ezequiel a saray bato, kiew, tan dabok so nipasen “ed pegley na dayat.” (Ezequiel 26:4, 5, 12) Asumpal iyan propesiya nen 332 B.C.E. sanen impausar nen Alejandro a Baleg ed saray sundalo to iratan a nanggerayan manlapud kabalgan na syudad na Tiro pian makapanggawa na dike a mamaarap ed isla na satan, a diad saginonor et dineral met lanlamang itan ya isla.

Say propesiyan nirekord ed Daniel 8:5-8, 21, 22 tan 11:3, 4 so mangiiter met na makapadinayew iran detalye no nipaakar ed nikadkaduman pakayari na “ari na Gresya.” Sayan ari et ompatey ed kapanpantokan na uley to, insan pankapaten so panarian balet ta agniiter ed saray kapolian to. Masulok a 200 taon kayari inkisulat na sayan propesiya, apaneknekan a satan a makapanyarin ari et si Alejandro a Baleg. Inkuan na saray historyador a biglaan so impatey to tan diad saginonor et say imperyo so nanapagan na apatiran heneral to ya aliwan saray kailalakan to.

Ibabaga na saray kritiko a sayan propesiya et nisulat kuno kayari na inkagawa na saratan. Imanoen pa lamet so salaysay ya inaon ed libro na Daniel. Sano moriaen itan bilang propesiya, saray detalye to so makapadindinayew.  Balet no moriaen itan bilang awaran a kunkunwarin propesiya, agta mapatpatnag a kulang so detalye? No walay impostor a nambilay kayari impatey nen Alejandro a Baleg a salien ton pandinayewen iray managbasa to ed im-imbenton propesiya, akin balet et agto inlaktip so punto a kayarin tuloy na impatey nen Alejandro et samay duaran anak to a manalin manamsam ed pakauley so impapatey? Akin ya agto tinukoy a pigara nin dekaday onlabas sakbay na panuley na apatiran heneral diad nanduruman kabiangan na empiryo nen Alejandro? On, akin ya agto sinalambit lay kangaranan na apatiran heneral tan say ari ra?

Say akusasyon dan say propesiya ed Biblia et insulat kayari inkagawa na saratan so abaybayag lan papanisiaan balet ta agnapaneknekan a padesir na saramay mankokonklusyon lan imposible so pakapangipasakbay na saray nagawa ed arapen anta agda ni inusisay ebidensya. Lapud agda awaten a say Biblia et Salita na Dios, apilitan iran mangisalaysay ed amin a bengatla unong ed panmoria na too. Anggaman ontan, makabat so Dios ed impangipuyan to na magenap labat a detalye na propesiya pian pruebaan a sikatoy autor na Biblia. *

Say propesiya na Biblia so mamabiskeg ed pananisiam no mangusar ka na panaon pian dalepdepen iray espisipikon propesiya tan say kasumpalan da. Akin ya agsalien ya aralen so propesiya na Biblia? Say tsart ed pahina 200 na libron Anto so Peteg ya Ibabangat na Biblia? so makatulong ed sika ed sayan pamaakaran. * No gawaen mo iyan proyekto, nodnonot mon say getmam et pian napabiskeg so pananisiam. Agmo aapuraen, a basta basaen labat so interon materyal. Imbes, isipen a maong so katuaan ya antokaman ya impasakbay nen Jehova et nagawan-nagawa.

[Saray paimano ed leksab]

[Kahon/Litrato ed pahina 24]

SARAY PRINSIPYO ED BILAY

Nia so sananey nin bengatlan kaukolan a nodnonoten. Say Dios ya ek-eksaktoy impangipasakbay to ed iyalagey tan kageba na saray sankamundoan a pakayari so Lapuan met na saray prinsipyo ed Biblia a makana ed bilay. Arum ed saraya et:

Anien mo so intanem mo.​—Galacia 6:7.

Lalo a mapalar so mangiter nen say mangawat.​—Gawa 20:35.

Mandedependi so liket diad pakapnek na saray pankaukolan ed espiritual.​—Mateo 5:3.

Sano ikanam irayan prinsipyo ed bilay mo, makaseguro kan magmaliw kan maliket tan matalona.

[Saray litrato ed pahina 22, 23]

Impasakbay na Salita na Dios so permanentin pangangga na sarayan sibilisasyon . . .

EDOM

BABILONIA

. . . saraya balet so mansiansia

GRESYA

EHIPTO

[Credit Lines]

Pictorial Archive (Near Eastern History) Est.

WHO nilitrato nen Edouard Boubat

[Litrato ed pahina 23]

Alejandro a Baleg