Akakan Ete
San̄a Kpere Abasi
Akakan Ete
“ETE MI.” Iwakke ikọ oro enen̄erede otụk owo nte ikọ emi. Ete oro enen̄erede ama nditọ esie esin̄wam mmọ ẹkọri. Ntak edi oro Bible okotde Jehovah Abasi, “Ete.” (Matthew 6:9) Nso orụk Ete ke Jehovah edi? Man ibọrọ mbụme emi, ẹyak idụn̄ọde se Jehovah eketịn̄de ye Jesus ke ini enye akanade baptism. Nte ete esitịn̄de ikọ ye nditọ esie esinam ẹfiọk orụk ete oro enye edide.
Jesus ama aka Akpa Jordan ke n̄kpọ nte October isua 29 E.N. man akana baptism. Bible obụk se iketịbede ete: “Ke Jesus ama akana baptism kpa idaha oro enye ọwọrọ ke mmọn̄ ọdọk; ndien, sese! enyọn̄ eberede, ndien enye okụt spirit Abasi osụhọrede nte ibiom edidoro enye ke idem. Sese! N̄ko, uyo oto ke enyọn̄ ọdọhọ ete: ‘Emi edi edima Eyen mi, emi ami nnyịmede.’” * (Matthew 3:16, 17) Utọ ndinem ikọ emi Jehovah ke idemesie eketịn̄de mi ẹwụt nnyịn orụk Ete oro enye edide. Kop n̄kpọ ita oro Jehovah ọkọdọhọde eyen esie mi.
Akpa, Jehovah ndidọhọ, “Emi edi edima Eyen mi” ọwọrọ ke enye ọkọdọhọ ete, ‘Mmenem esịt ndidi Ete fo.’ Eti ete esima nditọ esie onyụn̄ ọnọ mmọ ntịn̄enyịn oro mmọ ẹyomde. Nditọwọn̄ ẹsiyom ẹwụt ke ẹma mmimọ ke ubon. Kere nte eketiede Jesus ke idem ke ini Ete esie eketịn̄de utọ ndinem ikọ emi ye enye—okposụkedi enye ekedide akwa owo!
Ọyọhọ iba, Jehovah ndikokot Jesus “edima,” ama owụt kpukpru owo nte imọ imade Eyen imọ. Ikọ Jehovah ọkọwọrọ, ‘mmama fi.’ Eti ete esidọhọ nditọ esie ke imọ imenen̄ede ima mmọ. Utọ ndinem ikọ emi—ọkọrọ ye edinen̄ede mma nditọwọn̄—ẹyen̄wam mmọ ẹkọri. Ama enen̄ede enem Jesus ndikop Ete esie ọdọhọde ke imọ imama enye!
Ọyọhọ ita, ndidọhọ “emi ami nnyịmede,” Jehovah okowụt ke imenyịme Eyen imọ. Eketie nte n̄kpọ eke Jehovah ọdọhọde ete, ‘Eyen mi, mmokop inemesịt mban̄a se afo anamde.’ Ete oro amade nditọ esie esiyom ifet ndisian nditọ esie ke imenem esịt iban̄a nti n̄kpọ oro mmọ ẹtịn̄de m̀mê ẹnamde. Nditọwọn̄ ẹsinyene odudu ke ini mme ete ye eka mmọ ẹwụtde ke imenyịme mmọ. Ke akpanikọ, anaedi Jesus ndikokop Ete esie ọdọhọde ke imenyịme enye ama ọnọ enye odudu!
Jehovah enen̄ede edi akakan Ete. Ndi ọdọn̄ fi ndinyene orụk ete oro? Ke edide ntre, fiọk ete ke idisọn̄ke fi ikaha ndisan̄a n̄kpere Jehovah. Edieke afo enen̄erede ekpep n̄kpọ aban̄a enye onyụn̄ enen̄erede oyom ndinam uduak esie, enye ayama fi. Bible ọdọhọ ete: “Ẹsan̄a ẹkpere Abasi, ndien enye ayasan̄a ekpere mbufo.” (James 4:8) Nso efen ikpanam fi odu ke ifụre akan edinen̄ede nsan̄a n̄kpere Jehovah Abasi, kpa mfọnn̄kan Ete oro akanam odude?
[Ikọ Idakisọn̄]
^ ikp. 5 Luke emi ekewetde ukem mbụk emi ọkọdọhọ ke Jehovah ama esịn ikọ oro, “afo.” Enye ọkọdọhọ ete: “Afo edi edima Eyen mi; mmenyịme fi.”—Luke 3:22.