Kporom hen Aôndo

Ter u Hemban Doon Cii

Mateu 3:16, 17

KA ASEMBER kpuaa tseegh a hembe kôron ior ken ishima a ishember i “Ter” la ye. Ter u ônov mba nan ve doo nan ishima kpishi yô, nan eren kwagh u una wase ve u vesen tsembelee yô. Ka nahan ve, Bibilo i yer Yehova Aôndo ér “Ter” ye. (Mateu 6:9) Yehova ngu Ter u fan kwagh kpa? Se time nen sha mkaanem ma Yehova ôr a Yesu zum u i er un batisema la tsô se zua a mlumun sha mpin ne. Gbenda u ter nan lamen a ônov mba nan la ka u pase imba ormaren u nan lu yô.

Yesu yange mough za shin Ifi u Yordan ken inyom i 29, er ken uwer u Oktoba nahan, ér i er un batisema. Bibilo pase se kwagh u yange za hemen yô, ér: “Tsô er i er Yesu batisema kera yô, A due shin mnger fese, maa i bugh Sha man A nenge a Jijingi u Aôndo lu senen er ikungugh nahan, va tema sha a Na. Imo due Sha, kaa er: Ngun ka Wan Wam u ishima ishima, u i doom a Na yum yô.” * (Mateu 3:16, 17) Ka Yehova iyolna yange ôr mkaanem man ye, nahan ma wase se u fan Ter u Yehova a lu yô. Nenge ase akaa atar a Yehova ôr a Wan na ne.

Hiihii yô, Yehova kaa wener, “ngun ka Wan Wam.” Inja na yô Yehova lu tan ave vanger ér ka wan na je ne. Ter u kaven kwagh nan er kwagh a ônov mba nan sha gbenda u vea fa ér ve gba kwagh yô. Doo u a ôron kwagh a mbayev sha u tesen ve ér ve gba kwagh hen tsombor. Shin er Yesu lu organden nahan kpa, yange a doon un tsung zum u Ter na ôr kwagh a na u tesen ér un gba kwagh la!

Kwagh u sha uhar yô, Yehova pase ken igbar er Yesu a doo un ishima yô; a kaa ér Wan na ne ka “u ishima ishima.” Nahan yô, Ter lu kaan a Wan na ér, ‘U doom ishima.’ Ter u dedoo nan pasen ônov mba nan er ve doo nan ishima kpishi yô. Mkaanem man, kua aeren a vough a sha dooshima nga a wase ônov ve vese doo doo. Yange a saan Yesu iyol kpishi zum u a ungwa Ter na lu pasen er un doo un ishima yô!

Kwagh u sha utar yô, Yehova kaa ér “u i doom a Na yum yô.” Mkaanem man tese ér Yehova lumun Yesu. Inja na yô, Yehova lu kaan wener, ‘Wan wama, u er kwagh sha ishima yam vough.’ Ter u lun a dooshima nan ngôôr pasen ônov mba nan er akaa a dedoo a ve eren shi ve ôron la á lu sha ishima i nan ga. Mbamaren ka vea lumun ônov vev sha kwaghôron ve nahan ishima i taver ve kpen kpen. Sha kpôô yô, ishima yange ia taver Yesu kpishi zum u Ter na lumun un la!

Sha mimi yô, Yehova ngu Ter u hemban cii. Ka imba ter u ú soo nee? Aluer ka nahan yô, a doo u ú fan er ú fatyô u yan ikyar a Yehova yô. Aluer u hen kwagh na sha jighjigh shi ú nôngo wer u er ishima na sha mimi yô, una lumun we. Bibilo kaa ér: “Kporom nen hen Aôndo, Un kpaa, Una kporom her a ven.” (Yakobu 4:8) Kwagh môm u una hemba nan we mkpeyol a u lun kôôsôô a Yehova Aôndo, Ter u hemban doon cii la je kpa ngu ga.

[Footnote]