Taata Wiinda Boonse Kubota
Amube Acilongwe a Leza
Taata Wiinda Boonse Kubota
“TAATA.” Mabala aaya masyoonto apa bantu kulimvwa kabotu. Usyi uubayanda ncobeni bana bakwe ulabagwasya kukomena kabotu. Nkakaambo kaako, Ibbaibbele lyaamba Jehova Leza kuti ngu “Taateesu.” (Matayo 6:9) Ino Jehova ngu Taata uuli buti? Kutegwa twiingule mubuzyo ooyu, atulange-lange majwi Jehova ngaakaamba kuli Jesu naakali kubbapatizyigwa. Kayi usyi mbwaambaula abana bakwe kutondezya bwini mbwabede.
Cakuma October mu 29 C.E., Jesu wakaunka Kumulonga wa Jordano kwaakubbapatizyigwa. Ibbaibbele lilaamba cakacitika: “Lino Jesu naakamana kubapatizigwa, mpawo wakazwa mumaanzi. Nkabela kujulu kwakajaluka, elyo wakabona Muuya wa-Leza, ulaseluka mbuli inziba, uleza kulinguwe. Lino kwakazwa ijwi kujulu, lyakati, Ngooyu mwanaangu uuyandika ngunkondelwa.” * (Matayo 3:16, 17) Majwi aaya mabotu aakaambwa a Jehova kumugama, atwaambila zinji kujatikizya mbwabede mbwali Taata. Amubone zintu zyotatwe Jehova zyaakaamba ku Mwanaakwe.
Kusaanguna, kwiinda mukwaamba majwi aakuti “Nduwe Mwanaangu,” Jehova wakali kwaamba kuti, ‘Ndilikkomene kuba Swaanu.’ Usyi uuzi nzyobayandika bana bakwe ulabalumbaizya akubabikkila maano. Bana bayandika kubona kuti balayandika mumukwasyi. Amweezyeezye buyo mbwaakalimvwa Jesu—nokuba kuti wakali mupati—ikwaambilwa boobu aba Bausyi.
Cabili, kwiinda mukwaambila Mwanaakwe kuti “ooyandwa,” Jehova caatangalala wakatondezya luyando ndwaakajisi kuli Jesu. Mubwini Bausyi bakali kwaamba kuti ‘Ndilakuyanda.’ Usyi uuli kabotu ulabaambila bana bakwe kuti ulabayanda kapati. Majwi mbuli bwayaaya akubayanda ncobeni alabagwasya bana kukomena kabotu. Eelo akamunjila mumoyo Jesu majwi ngaakamvwa kuli Bausyi kabatondezya luyando ndobajisi kuli nguwe!
Catatu, kwiinda mukwaamba majwi aakuti “ndakondwa anduwe,” Jehova wakatondezya kuti wakamukkomanina Mwanaakwe. Cakali mbuli kuti Jehova wakali kwaamba kuti, ‘Mwanaangu, Ndilikkomene azintu nzyoocita.’ Usyi siluyando ulalangaula nzila zyakwaambila bana bakwe kuti ulazikkomanina zintu nzyobaamba naa kucita. Bana balakulwaizyigwa akuba basicamba bazyali babo nobabaambila kuti balabakkomanina. Cakutadooneka, Jesu wakakulwaizyigwa ikumvwa kuti Bausyi bakali kumukkomanina.
Masimpe, Jehova ngu Taata wiinda boonse kubota. Sena muyanda muntu uuli boobu kuba swaanu? Ikuti naa mboobo, mulakonzya kukkalwa moyo ikuzyiba kuti mulakonzya kuba acilongwe a Jehova. Ikuti akaambo kalusyomo mwayiya kujatikizya nguwe alimwi camoyo woonse musola kucita kuyanda kwakwe, uyoomukkomanina. Ibbaibbele lyaamba kuti: “Amuswenenene kuli-Leza, elyo alakwe ulamuswenenena.” (Jakobo 4:8) Masimpe mulakonzya kuliiba kwiinda mukuba acilongwe a Jehova Leza Taata uulibedelede.
Bupanduluzi buyungizidwe
^ munc. 5 Kweelana acibalo cikozyenyi mu Makani Mabotu aa Luka, Jehova wakabelesya bbala lyakuti “Nduwe,” kaamba kuti: “Nduwe Mwanaangu ooyandwa, ndakondwa anduwe.”—Luka 3:22.