Jun totil ti stuk xa noʼox jeche
Nopajan ta stojolal Dios
Jun totil ti stuk xa noʼox jeche
«TOTIL.» ¿Mi mu jechuk ti to jutuk li kʼopetik ti lek tajek chkʼot ta oʼontonale? Yuʼun kʼalal skʼanoj ta melel xnichʼon li totile tskolta sventa lek chchʼi batel. Jaʼ yuʼun, oy ep srasonaltak ti chal Vivlia ti jaʼ «Jtotic» li Jeovae (Mateo 6:9). Pe, ¿kʼusi jtosukal Totil jaʼ li Jeovae? Sventa chichʼ takʼel li stakʼobil taje, jkʼelbetik smelolal li kʼopetik la stunes Jeova ti kʼalal laj yichʼ voʼ li Jesuse. Yuʼun onoʼox, ti kʼalal chkiltik kʼuyelan tskʼopon xnichʼnabtak jun totile jaʼ jech onoʼox ta xkakʼtik venta kʼusi jtosukal totil.
Te van ta oktubre ta sjabilal 29 ta jkʼakʼaliltike, li Jesuse bat yichʼ voʼ ta ukʼum Jordán. Li Vivliae ta xchap li kʼusi kʼot ta pasele: «Cʼalal laj yichʼ voʼ li Jesuse ilocʼ ta ucʼum; ta ora ijam li vinajele. Laj yil iyal tal ta sba li Espíritu yuʼun Diose, xcoʼlaj xchiʼuc stsumut yilel. Ta ora ivinaj cʼop ta vinajel, jech laj yal: “Liʼi jaʼ Jnichʼon; lec jcʼanoj lec jpatoj coʼnton yuʼun”», xi (Mateo 3:16, 17). * Jaʼ stuk Jeova ti laj yal li alakʼik sba kʼopetik taje, ti jaʼ chi yakʼbutik kiltik kʼusi jtosukal Totil jaʼ li stuke. Kakʼtik venta ti oy oxtos kʼusi laj yalbe li xNichʼone.
Ta baʼyele, kʼalal laj yal «Liʼi jaʼ Jnichʼon», xie, xkoʼolaj ti xiuk laj yale: «Xi muyubaj ti voʼon aTotune». Jech onoʼox, li nichʼnabiletike tskʼanik ti xichʼik albel ti lek jpatoj koʼontontik yuʼunike xchiʼuk skʼelel li kʼusi tskʼanike, jech noxtok skʼan snaʼik ti oy sbalilik li ta utsʼ-alalile. Jaʼ yuʼun li totiletik ti lek pʼijike skʼan me jech spasik kʼuchaʼal taje. ¿Mi xnop xa onoʼox avuʼun kʼuyelan laj yaʼi sba Jesús, akʼo mi mukʼta krixchano xaʼox, kʼalal albat yuʼun sTot ti kʼanbile?
Ta xchibale, kʼalal laj yal «lec jcʼanoj» xi ta sventa xNichʼone, li Jeovae jamal laj yal ta melel ti kʼuyelan chile. Ta melel, xkoʼolaj ti xi laj yalbe: «Jkʼanojot tajek», xut. Jaʼ yuʼun chaʼa, jun lekil totile tskolta ti lekuk xchʼi batel xnichʼon kʼalal chalbe xchiʼuk chakʼ ta ilel ti skʼanoj tajmeke. Mu ta naʼeteluk, ti solel kʼot ta yoʼonton Jesús kʼalal laj yaʼibe skʼop sTot ti kʼanbile.
Ta slajebale, kʼalal laj yal «lec jpatoj coʼnton yuʼun», ti xie, li Jeovae laj yal ti lek chile. Ta melel, xkoʼolaj kʼuchaʼal xi laj yal yaʼeluke: «Kuni nichʼon, xi muyubaj avuʼun ti kʼusi la apase». Jaʼ jech ek, jun totil ti chkʼanvane ta skotol ora o ta buyuk noʼox ta xalbe li xnichʼnabtak ti xmuyubaj ta sventa ti oy kʼusi lek la spasike o kʼusi lek laj yalike. Kʼalal jech ta xichʼik albel taje ta xpatbat yoʼontonik li nichʼnabiletike. Ta melel, ti Jesuse xmuyubaj van laj yaʼi ti kʼalal laj yal sTot ti spatoj yoʼonton ta stojolale.
Melel onoʼox, li Jeovae jaʼ jun Totil ti stuk xa noʼox jeche. ¿Mi cha kʼan ti oyuk jech atot kʼuchaʼal li Jeovae? Xuʼ xa muyubaj, yuʼun xuʼ lek xavil aba xchiʼuk li Diose. Mi cha chan ta sventa Jeova, mi cha pat avoʼonton ta stojolal xchiʼuk mi chavakʼ persa ta spasel li kʼusi tskʼan yoʼontone, li stuke ta stakʼbot. Li Vivliae ta xi yalbutik ta melel: «Nopajanic ta stojol li Diose, jech chnopaj ta atojolic ec», xi (Santiago 4:8). Mu kʼusi xkoʼlaj-o chavaʼi ta spʼejel balumil ti lek chavil aba xchiʼuk li Jeova Diose, li lekil Totil ti muʼyuk buchʼu jech xkoʼolaj-oe.
[Tsʼibetik ta yok vun]
^ Jech kʼuchaʼal ta xi xchapbutik li ta Evanjelio yuʼun Lucas ta sventa li loʼil taje, li Jeovae la stunes li pronompre «voʼot» kʼalal laj yal: «Voʼot jnichʼonot, lec jcʼanojot, lec jpatoj coʼnton avuʼun», xie (Lucas 3:22).