Abi bribi neleki den

A opo taki gi a tru anbegi

ELIA ben e luku fa a pipel ben e kren Karmel-bergi kon na loktu safrisafri. Aladi a ben de frukufruku mamanten èn a leti fu a dei no ben e skèin krin ete, toku a ben de krin fu si taki a pipel ben e pina. Den ben e pina srefisrefi, fu di a dreiten ben tan dri nanga afu yari langa.

Den 450 profeiti fu Bâal di ben abi heimemre, ben e waka na mindri a pipel aladi den ben e hei den borsu nanga den skowru. Den profeiti disi ben e tegu srefisrefi gi Elia, a profeiti fu Yehovah. Umakownu Iseibel ben kiri furu futuboi fu Yehovah, ma a man disi ben e kakafutu ete gi na anbegi fu Bâal. Iya, ma o langa a ben o man du dati? Kande den priester ben e denki taki wán man nomo noiti no ben o man wini den alamala (1 Kownu 18:3, 19, 20). Kownu Akab ben kon drape tu na ini en asiwagi. En srefi no ben lobi Elia.

A profeiti disi di ben de a wan-enkri sma drape di ben e horibaka gi a tru anbegi, ben o si tumusi moi sani a dei dati. Elia ben e luku fa sani ben e seti gi wan fu den moro bigi strei di oiti ben de na mindri bun nanga ogri. Fa a ben e firi di a leti fu a dei ben e skèin krin moro nanga moro? A ben musu fu frede pikinso, fu di a ben de „wan man di ben abi den srefi firi leki wi” (Yakobus 5:17). Awinsi fa a no fa, wi kan de seiker fu wán sani: Elia ben sabi heri bun taki a ben de en wawan, fu di a ben de na mindri sma di no ben abi bribi. Boiti dati, a kownu fu den di ben fadon komoto na bribi, èn den ogri-ati priester ben de drape tu.—1 Kownu 18:22.

Ma fa a du kon taki den Israelsma kon de na ini a muilek situwâsi disi? Èn san yu kan leri fu a tori disi? Bijbel e gi wi a deki-ati fu luku bun san wi kan leri fu den eksempre fu getrow futuboi fu Gado, èn fu „waka baka a bribi fu den” (Hebrewsma 13:7). Meki wi go luku na eksempre fu Elia.

Wan langa strei e doro wan heimarki

Pikinmoro en heri libi langa, Elia ben musu luku nomo fa sma ben e wisiwasi na anbegi fu Yehovah, èn dati ben de a moro bun sani di a kondre èn a pipel fu en ben abi. A ben de so taki furu yari langa, wan strei ben de na ini Israel, namku, wan strei na mindri a tru bribi nanga falsi bribi, iya, na mindri na anbegi fu Yehovah Gado nanga den falsi gado fu den kondre na ini a kontren drape. Na ini a ten fu Elia, a situwâsi dati ben kon moro ogri srefisrefi.

Kownu Akab ben trow nanga Iseibel, na umapikin fu a kownu fu Sidon. Iseibel ben de nomonomo fu panya na anbegi fu Bâal na ini a heri kondre fu Israel, èn a ben wani tyari wan kaba kon na a anbegi fu Yehovah. A no ben teki langa fosi Akab bigin horibaka gi en wefi. Akab bow wan tempel nanga wan altari gi Bâal èn a ben e teki fesi fu anbegi a heiden gado disi. A meki Yehovah kisi bigi atibron.—1 Kownu 16:30-33. *

Fu san ede na anbegi fu Bâal ben de so wan tegu sani? Fu di na anbegi disi ben e kori den Israelsma fu drai baka gi a tru Gado. Boiti dati, den anbegiman fu Bâal ben lobi du tegu sani nanga ogri-ati sani. Na ini na anbegi disi, man nanga uma ben e seri den skin na ini a tempel, grupu sma ben e abi seks nanga makandra, èn den ben e tyari pikin-nengre srefi leki srakti-ofrandi. Dati meki Yehovah seni Elia fu go taigi Akab taki wan dreiten ben o kon, èn taki a dreiten disi ben o tan teleki a profeiti fu Gado ben o taki dati a ben kon na wan kaba (1 Kownu 17:1). Wan tu yari pasa fosi Elia go baka na Akab, fu taigi en taki a ben musu tyari a  pipel nanga den profeiti fu Bâal kon na wan na tapu Karmel-bergi.

Ma san wi na ini a ten disi kan leri fu a muilek ten dati? Kande son sma feni taki wan tori di abi fu du nanga na anbegi fu Bâal no prenspari gi wi, fu di wi no e si tempel nanga altari fu Bâal na wi lontu. Ma wi no musu si a tori disi leki wan fositen tori nomo (Romesma 15:4). A wortu „Bâal” wani taki „eiginari” noso „masra”. Yehovah ben taigi a pipel taki den ben musu teki en leki a „bâal” fu den, noso a masra fu den (Yesaya 54:5). Yu no e agri taki sma na ini a ten disi e dini difrenti masra ete, na presi taki den e dini na Almakti Gado? Iya, efu sma e libi soso fu meki moni, fu kisi wan hei posisi, fu meki prisiri, fu plisi den sekslostu fu den, noso fu dini iniwan fu den someni gado di sma e anbegi na presi fu Yehovah, dan fu taki en leti, den e teki a sani dati leki den masra (Mateyus 6:24; Romesma 6:16). Sobun, wi kan si taki sma na ini a ten disi e hori densrefi fayafaya ete na den gwenti fu a Bâal anbegi. A strei di ben de na mindri Yehovah nanga Bâal na ini owruten, kan yepi wi fu teki wan koni bosroiti te a abi fu du nanga sortu Gado wi sa dini.

Den ben e „draidrai”—Fa so?

Te yu ben o tanapu na tapusei fu Karmel-bergi pe a winti e wai tranga, dan yu ben o man si wan heri bigi pisi fu Israel. Fu drape yu ben o man si a heri kontren fu a lagipresi fu Kison te go miti a Bigi Se (Mindrikondre Se) krosibei fu a bergi, te go miti den bergi fu Libanon te na a noordsei. * Ma o moro a son ben e opo na a tumusi prenspari dei disi, o moro a ben e kon krin fu si taki sani no ben e go bun na ini a kondre. Fosi, sani ben e gro bun na ini a kondre disi di Yehovah ben gi den bakapikin fu Abraham, ma now noti no ben e gro drape. A gron ben kon drei fu di a son ben faya srefisrefi, èn dati ben kon fu di Gado en eigi pipel ben trangayesi en! Di a bigi grupu sma kon makandra, dan Elia waka miti den, èn a taki: „O langa unu o draidrai fu teki wan bosroiti? Efu Yehovah na a tru Gado, go dini en. Ma efu na Bâal, go dini en.”—1 Kownu 18:21.

San Elia ben wani sori a pipel di a taki dati den ben e „draidrai fu teki wan bosroiti”? We, a pipel no ben e frustan taki den ben musu bosroiti efu den ben o anbegi Yehovah noso Bâal. Den ben denki taki den ben kan korikori Bâal nanga den tegu seremonia fu den, aladi den ben e tan aksi Yehovah Gado fu du bun gi den. Kande den ben e denki taki Bâal ben o blesi den gron nanga den meti fu den, aladi „Yehovah fu den legre” ben o kibri den na ini feti (1 Samuel 17:45). Den ben frigiti wan prenspari tru tori di furu sma na ini a ten disi no man frustan ete. Den ben frigiti taki Yehovah no wani taki sma moksi na anbegi fu En nanga na anbegi fu nowan enkri tra gado. A wani taki wi musu anbegi en wawan, èn a e frudini dati tu. Boiti taki a no feni en bun taki sma e moksi na anbegi fu en nanga tra fasi fu anbegi, a e tegu tu gi a sani dati!—Exodus 20:5.

Sobun, den Israelsma ben e „draidrai”, neleki wan man di no man bosroiti sortu pasi a musu teki. Furu sma na ini a ten disi gwenti fu meki a srefi fowtu disi, fu di safrisafri den e bigin dini tra „bâal”, aladi den e drai baka gi na anbegi fu Gado! A krin èn seryusu rai di Elia ben gi den Israelsma fu no draidrai moro langa, kan yepi wi fu luku baka sortu sani de na a fosi presi na ini wi libi, èn efu wi e anbegi Gado na a yoisti fasi.

Wan bigi tesi

Now Elia aksi den anbegiman fu Bâal fu du wan sani. A sani dati no ben muilek srefisrefi. Den priester fu Bâal ben musu meki wan altari, èn den ben musu poti wan meti na tapu. Baka dati, den ben musu begi a gado fu den fu leti faya gi na altari. Elia ben o du a srefi sani. A taki: „A Gado di e seni faya komoto fu hemel, na en na a tru Gado.” Elia ben sabi heri bun suma ben de a tru Gado. A ben abi so wan tranga bribi, taki a ben de klariklari fu meki den profeiti fu Bâal bigin fosi. A meki en makriki gi den gensman fu en, fu di a meki den srefi bosroiti sortu mankaw  den ben o tyari leki ofrandi, èn a meki den fosi begi Bâal. *—1 Kownu 18:24, 25.

Na ini a ten disi Yehovah no e du wondru. Ma Yehovah no kenki. Wi kan frutrow na En tapu dorodoro, neleki fa Elia ben e du dati. Fu eksempre, te trawan no e agri nanga den leri fu Bijbel, dan a bun fu meki den taki fa den e denki. Neleki Elia, wi kan aksi a tru Gado fu lusu a problema. Iya, wi no musu denki taki wi srefi sa man lusu a problema, ma wi musu frutrow tapu a Wortu fu En di skrifi „fu poti sani kon reti”.—2 Timoteyus 3:16.

Den profeiti fu Bâal bigin seti na ofrandi fu den èn den bigin kari a gado fu den. Den ben e bari ibri tron baka: „Bâal, piki wi!” Den tan du disi omeni yuru langa. „Ma nowan sten ben de fu yere, èn nowan sma ben e piki den”, na so Bijbel e taki. Di bakadina doro, dan Elia bigin spotu den. A taigi den taki a ben musu de so taki Bâal ben abi tumusi furu fu du, taki a ben e pupe na ini a kumakoisi, noso taki a ben e sribi èn wan sma ben musu wiki en. Elia taigi den falsi profeiti: „Kari bun tranga.” A de krin fu si taki a ben e si na anbegi fu Bâal leki wan dondon sani, èn a ben wani taki a pipel fu Gado ben musu si taki Bâal na wan falsi gado.—1 Kownu 18:26, 27.

Di den priester fu Bâal si taki noti no ben e pasa, dan den bigin rigeri moro. Den bigin ’kari bun tranga, èn den koti den skin nanga nefi èn nanga lansri, soleki fa den ben gwenti du. Den du disi teleki den heri skin ben lai nanga brudu’. Ma ala den sani dati ben de fu soso! „Nowan sten ben de fu yere. Nowan sma ben e piki den èn nowan sma ben e poti prakseri na den” (1 Kownu 18:28, 29). Fu tru, nowan Bâal ben de. Na Satan ben e kori sma nanga a denki dati, soso fu meki den drai baka gi Yehovah. Neleki fa a ben de na ini a ten dati, na so a de tu now, taki te sma e dini wan tra masra na presi fu Yehovah, dan den sa kisi takru bakapisi, iya, den sa kisi syen srefi.—Psalm 25:3; 115:4-8.

A e kon na krin suma na a tru Gado

Moro lati bakadina, a ten doro gi Elia fu seti en altari èn fu begi a Gado fu en. Wan altari ben de drape di den Israelsma ben e gebroiki fu tyari ofrandi gi Yehovah, ma den feanti fu a tru anbegi ben broko en. Elia seti na altari dati baka. A gebroiki 12 ston, kande fu memre furu sma fu a tin kownukondre fu Israel taki den ben musu hori densrefi ete na a Wet di Gado ben gi ala den 12 lo. Baka dati, Elia poti a meti na tapu na altari èn a nati a heri altari dorodoro nanga watra. Kande a watra disi ben komoto fu a Mindrikondre Se di ben de krosibei. A meki sma diki wan gotro srefi lontu na altari, èn a meki den furu en nanga watra. Elia meki en makriki trutru gi den profeiti fu Bâal, ma a du difrenti sani fu meki den denki taki Yehovah no ben o man piki a begi fu en. Na so furu frutrow a ben abi na ini a Gado fu en.—1 Kownu 18:30-35.

Di ala sani ben seti, dan Elia begi Yehovah. Fu di Elia no gebroiki hebi wortu, meki den sma drape ben kan frustan krin san ben de den moro prenspari sani gi en. A moro prenspari sani gi en, ben de taki a ben wani a pipel fu sabi taki a no a Bâal di den ben e anbegi ben de „Gado na ini Israel”, ma na Yehovah. Wan tra sani di ben de prenspari gi en, na taki a ben wani ala sma fu sabi taki a ben de wan futuboi nomo fu Yehovah, èn taki na Yehovah ben musu kisi ala glori. Leki lasti, a sori a pipel fu en taki a ben e broko en ede ete nanga den, fu di a trutru ben wani taki Yehovah ben e ’meki den go dini En baka’ (1 Kownu 18:36, 37). Aladi a pipel ben ondrofeni furu takru bakapisi fu di den no ben abi bribi, toku Elia ben lobi den. Te wi e begi Gado, dan a bun fu sori tu taki wi e broko wi ede nanga a nen fu en. A bun tu fu sori taki wi abi sakafasi èn taki wi abi sari-ati nanga trawan di abi yepi fanowdu.

Fosi Elia begi, a kan taki den sma drape ben e tweifri efu Yehovah ben o piki a begi trutru, noso efu a ben o de wan falsi gado neleki Bâal. Ma baka a begi, den no ben abi fu tweifri moro. Bijbel e taki: „Ne a faya fu Yehovah komoto kon fu hemel èn a bron a bron-ofrandi, den pisipisi udu, den ston, èn a doti fu gron. Dan a drei ala a watra na ini a gotro” (1 Kownu 18:38). Dati na trutru wan kefalek  moi fasi fa a kon na krin suma na a tru Gado! Èn san a pipel du baka dati?

Den alamala bari: „Yehovah na a tru Gado! Yehovah na a tru Gado!” (1 Kownu 18:39) Now fosi den ben frustan a tori. Ma den no ben sori ete taki den ben abi bribi. Fu taki en leti, te wan sma e taki dati Yehovah na a tru Gado, soso fu di a si fa faya komoto na hemel baka di wan tra sma begi, dan dati no e sori krin ete taki a abi trutru bribi. Dati meki Elia aksi den fu du ete wan sani. A aksi den fu du san den ben musu du omeni yari na fesi. Den ben musu gi yesi na a Wet fu Yehovah. A Wet fu Gado ben taki dati den ben musu kiri ala falsi profeiti èn sosrefi ala sma di ben e anbegi falsi gado (Deuteronomium 13:5-9). Den priester disi fu Bâal ben de bigi feanti fu Yehovah Gado èn den ben e gens En fu espresi. Den ben warti fu sma sori sari-ati gi den? We, yu feni taki den priester disi ben abi sari-ati nanga den pôtipôti pikin di den ben e bron libilibi na tapu na altari fu Bâal? (Odo 21:13; Yeremia 19:5) Nôno, den no ben warti srefisrefi fu sma sori sari-ati gi den. Sobun, Elia gi den sma a komando fu kiri den Bâal priester, èn na dati den du tu.—1 Kownu 18:40.

Son sma e krutu a sani disi di pasa na Karmel-bergi. Kande son sma e broko den ede taki sma di e horibaka fayafaya gi a bribi fu den kan gebroiki a tori disi fu sori taki den abi leti fu du ogri nanga sma fu tra bribi. Èn a de wan sari sani taki na ini a ten disi bun furu fu den ogri-ati sma disi de di e horibaka fayafaya gi a bribi fu den. Ma Elia no ben de leki den sma disi. A kiri den falsi anbegiman, soleki fa Yehovah ben wani, èn dati ben de wan regtfardiki sani. Boiti dati, tru Kresten sabi taki den no mag kiri ogrisma, neleki fa Elia ben du dati. Sensi di a Mesias kon na grontapu, ibri disipel fu Yesus musu hori ensrefi na a gronprakseri di Krestes ben gi Petrus. A ben taki: „Poti yu feti-owru na en presi baka, bika a sma di e teki a feti-owru, na a feti-owru o kiri en” (Mateyus 26:52). Na ini a ten di e kon, Yehovah sa meki en Manpikin krutu sma na wan fasi di A feni bun.

Tru Kresten abi a frantwortu fu libi na wan fasi di e sori taki den abi bribi (Yohanes 3:16). Wán fasi fa den kan du dati, na fu abi bribi neleki Elia. A ben e anbegi Yehovah wawan, èn a ben e gi trawan deki-ati fu du dati tu. Sondro fu frede, a sori sma taki na anbegi fu Bâal na wan falsi anbegi èn taki Satan ben e gebroiki na anbegi dati fu meki sma drai baka gi Yehovah. Èn Elia no ben pruberi fu lusu a problema en srefi, ma a ben frutrow tapu Yehovah. Iya, Elia trutru opo taki gi a tru anbegi. Meki ibriwan fu wi waka baka a bribi fu en!

[Futuwortu]

[Prenspari pisi na tapu bladzijde 20]

Te wi e dini wan tra masra na presi fu Yehovah, dan wi sa abi takru bakapisi

[Prenki na tapu bladzijde 21]

„Yehovah na a tru Gado!”