Pakaginhawa sa Kadaihan nin Paglaom kan Hoben Pa

Isinaysay ni Eusebio Morcillo

Kan Setyembre 1993, nagdalaw ako sa sarong bilanggoan na biyong guardiado. An okasyon iyo an pagbautismo sa sarong bilanggo, an nguhod kong tugang na si Marivi. Magalang na nagmasid an nagkapirang bilanggo asin opisyal kan bilanggoan mantang isinasagibo ko an seremonya sa bautismo. Bago ko ipaliwanag kun paano sia asin ako napaduman, ilaladawan ko nguna an enot na mga taon kan samong buhay.

NAMUNDAG ako sa España kan Mayo 5, 1954, an enot sa walong aki. Si Marivi an ikatolo. Pinadakula kami kan samong lola bilang debotong mga Katoliko, asin nagkaigwa ako nin nakakaogmang mga eksperyensia bilang aki na makamate nin pagkadeboto sa Dios mientras na kaiba ko sia. Alagad an kamugtakan sa harong kan samong mga magurang bako nanggad na marahay. Pirmeng binubugbog ni Tatay si Nanay asin kaming mga aki. An takot kabtang na kan samong buhay, asin nakokolgan na gayo an sakong boot na maheling si Nanay na nagsasakit.

Sa eskuelahan, napaatubang ako sa iba pang nakakapanluya sa boot na mga kamugtakan. An saro sa mga paratokdo, sarong padi, ipinupungka an samong payo sa lanob kun sala an samong simbag. An saro pang padi inaabuso sa seksuwal na paagi an mga eskuela mientras na rinerepaso kaini sa sainda an leksion na pag-aadalan. Apuera kaini, an Katolikong mga katokdoan na siring baga nin kalayo sa impierno nagin dahelan na ako maribong asin matakot. Dai nahaloy nagpoon na mawara an sakong debosyon sa Dios.

Nalaom sa Daing Saysay na Buhay

Huling mayo nin ano man na espirituwal na paggiya, nagpoon akong makiiba sa imoral asin madahas na mga tawo na yaon sa mga diskohan. Sa parate nagkakaigwa nin iriwal, na dian ginagamit an mga kutsilyo, kadena, baso, asin bangkito bilang mga armas. Minsan ngani dai ko man gusto na maimbuelto sa siring na iriwal, sarong beses ako natamaan asin nadismayo.

Pag-abot nin panahon ako nagsawa na sa lugar na iyan asin naghanap nin mas matoninong na mga diskohan. Dawa sa mga lugar na iyan, an droga ordinaryo na sana. Alagad imbes na makontento asin magin matoninong an isip huli sa paggamit nin droga, nagkaigwa ako nin mga imahinasyon asin kahaditan.

 Minsan ngani dai ako kontento, inengganyar ko sa iyo man sanang estilo nin pamumuhay an saro sa nguhod kong mga tugang, si Jose Luis, asin an saro kong haraning amigo, si Miguel. Siring kan dakol na iba pang hoben sa España kan panahon na idto, nalaom kami sa sarong maraot na kinaban. Ginigibo ko an haros gabos na paagi tanganing makakua nin kuartang pambakal nin droga. Nawara nin biyo an sakong dignidad.

Suminukoro si Jehova

Durante kan panahon na ini, nagkapirang beses akong nakipag-olay sa sakong mga amigo manongod sa pag-eksister nin Dios asin sa kahulogan nin buhay. Pinonan kong hanapon an Dios paagi sa paghanap nin sarong tawo na masasabihan ko kan sakong mga saboot. Nariparo ko na an saro sa sakong mga katrabaho na an ngaran Francisco napapalaen sa iba. Sia garo baga maogma, sadiosan, asin maboot, kaya nagdesisyon akong isabi sa saiya an sakong mga saboot. Si Francisco saro sa Mga Saksi ni Jehova, asin tinawan nia ako nin sarong isyu kan An Torrengbantayan na may artikulo dapit sa droga.

Pagkatapos kong mabasa an artikulong iyan, namibi ako sa Dios na logod tabangan ako: “Kagurangnan, aram ko na nag-eeksister ka, asin gusto kong mamidbid ka asin gibohon an saimong kabotan. Tabangan mo tabi ako!” Ginamit ni Francisco asin kan iba pang Saksi an Biblia tanganing parigonon an sakong boot asin tinawan ninda ako nin mga publikasyon na basado sa Biblia tanganing basahon ko. Napag-isip-isip ko na itinatao ninda sa sako an tabang na hinagad ko sa Dios. Dai nahaloy pinonan kong sabihon sa sakong mga amigo asin ki Jose Luis an manongod sa mga nanonodan ko.

Sarong aldaw, mantang ako asin an sakong nagkapirang amigo pahale na sa sarong konsiertong rock, isiniblag ko an sakong sadiri sa sainda. Minasdan ko sinda, asin napag-isip-isip ko kun gurano man nanggad nagin nakakaongis an samong gawe-gawe huli sa impluwensia nin droga. Kan oras na iyan, nagdesisyon ako na isikwal an siring na estilo nin pamumuhay asin magin saro sa Mga Saksi ni Jehova.

Naghagad ako nin Biblia ki Francisco, asin tinawan nia ako kaiyan kaiba an librong An Katotoohan na Minagiya Pasiring sa Buhay na Daing Sagkod. * Kan mabasa ko an manongod sa panuga nin Dios na papahidon nia an gabos na luha asin hahaleon nia dawa an kagadanan, dai ako nagduda na nanompongan ko na an katotoohan na makakapatalingkas sa katawohan. (Juan 8:32; Kapahayagan 21:4) Paghaloyhaloy, nag-atender ako sa sarong pagtiripon sa Kingdom Hall kan Mga Saksi ni Jehova. Hinangaan ko nanggad an pagigin makikatood asin an mainit na pakikiiba kan mga yaon duman.

Huling gustong-gusto kong sabihon sa iba an sakong naeksperyensiahan sa Kingdom Hall, tiniripon ko tolos an sakong mga amigo asin si Jose Luis dangan sinabi ko sa sainda an gabos manongod dian. Pakalihis nin nagkapirang aldaw, kami gabos nag-atender sa sarong pagtiripon. Nagkiling sa samo an sarong babae na nakatukaw sa raya na nasa enotan niamo. Malinaw na nabigla sia na maheling an grupong ini nin mga hippie na haralaba an buhok, asin nag-ingat sia na dai na magsalingoy liwat. Siertong nasorpresa sia kan magbalik kami sa Kingdom Hall kan suminunod na semana, huli ta kami nakaamerikana asin nakakorbata na.

Dai nahaloy pagkatapos kaiyan, kami ni Miguel nag-atender sa pansirkitong asamblea kan Mga Saksi ni Jehova. Dai pa kami noarin man nakaeksperyensia nin ano man na arog kaiyan kaidto—sarong tunay  na kasararoan nin magturugang na laen-laen an edad. Asin pambihira nanggad, an asamblea ginibo sa iyo man sanang teatro na dian kami nagdalan pa sana nin konsiertong rock. Alagad sa okasyon na ini, an kamugtakan asin an musika na nadangog niamo nakapaogma sa samo.

An bilog niamong grupo nagpoon na mag-adal sa Biblia. Pakalihis nin mga walong bulan, kan Hulyo 26, 1974, kami ni Miguel nabautismohan. Pareho kaming 20 anyos. An apat pa sa samong grupo nabautismohan pakalihis nin pira sanang bulan. An pagsasanay sa Biblia na inako ko nagmotibar sa sako na magpoon na tabangan an sakong mapasensiang ina sa mga gibohon sa harong asin na isabi sa saiya an sakong bago pa sanang makuang pagtubod. Nagin dayupot kami. Nagdusay man ako nin dakol na panahon tanganing tabangan an nguhod kong mga tugang.

Pag-abot nin panahon, an sakong ina asin an gabos kong tugang, apuera sa saro, nakanood kan katotoohan sa Biblia asin sinda nabautismohan bilang mga Saksi ni Jehova. Kan 1977, pinakasalan ko si Soledad. Sia idtong hoben na babae na nabigla kan maheling nia kami durante kan enot niamong pagbisita sa Kingdom Hall. Sa laog nin pira sanang bulan, pareho kami nagin payunir, an apod kan Mga Saksi ni Jehova sa bilog na panahon na mga parahulit kan maogmang bareta.

Nasalbar an Sarong Namomotan

An nguhod kong tugang na si Marivi inabuso sa seksuwal na paagi kan aki pa, asin an makatatakot na pangyayaring iyan nakaapektar na gayo sa saiya. Kan tinedyer na, nagin imoral an saiyang estilo nin pamumuhay na may kaibang pagdodroga, paghabon, asin prostitusyon. Sa edad na 23, sia dinara sa bilanggoan, na dian nia ipinagpadagos an saiyang lagalag na pamumuhay.

Kan panahon na idto, ako naglilingkod bilang paraataman sa sirkito, sarong nagbibiaheng ministro kan Mga Saksi ni Jehova. Kan 1989, kami ni Soledad idinestino sa lugar na dian nakabilanggo si Marivi. Kasuarin pa sana, an saiyang aki kinua sa saiya kan mga autoridad; sia nalunosan asin habo nang mabuhay pa. Sarong aldaw binisita ko sia asin nagsuherir ako na mag-adal kami sa Biblia, asin inako nia an sakong alok. Pakalihis nin sarong bulan na pag-adal sa Biblia, ipinondo nia an paggamit nin droga asin tabako. Ogmahon ako na maheling na tinawan sia ni Jehova nin kosog tanganing gibohon an mga pagbabagong ini sa saiyang buhay.—Hebreo 4:12.

Dai nahaloy poon kan mag-adal si Marivi sa Biblia, pinonan niang sabihon an mga katotoohan sa Biblia sa mga kapwa bilanggo asin mga opisyal kan bilanggoan. Minsan ngani sia ibinabarobalyo nin bilanggoan, ipinadagos nia an saiyang paghuhulit. Sa sarong bilanggoan nagpatotoo pa ngani sia sa lambang selda. Sa nag-aging mga taon, si Marivi nakapoon nin mga pag-adal sa Biblia sa dakol na bilanggo sa laen-laen na bilibid.

Sarong aldaw ipinaaram sa sako ni Marivi an saiyang kamawotan na idusay an saiyang buhay ki Jehova asin magpabautismo. Alagad dai sia tinawan nin permiso na lumuwas sa bilanggoan, asin dai man tinogotan an siisay man na lumaog tanganing bautismohan sia. Nagtagal sia nin apat pang taon sa maraot na kamugtakan kan bilanggoan na iyan. Ano an nakatabang sa saiya na papagdanayon an saiyang pagtubod? Sa eksaktong oras na nagtitiripon an lokal na kongregasyon, rinerepaso nia an iyo man sanang programa mantang sia yaon sa selda. Igwa man sia nin regular na programa nin personal na pag-adal sa Biblia asin pamimibi.

Pag-abot nin panahon, si Marivi ibinalyo sa sarong guardiadong marhay na bilanggoan na igwa nin swimming pool. Naisip nia na tibaad magin posible an pagbautismo sa saiya huli sa bagong mga kamugtakan na ini. Asin talaga man nanggad, sa katapustapusi si Marivi tinawan nin permiso. Sa siring ako napaduman tanganing itao sa saiya an pahayag dapit sa bautismo. Kaibanan nia ako durante kan pinakamahalagang oras sa saiyang buhay.

Huli sa saiyang dating estilo nin pamumuhay, si Marivi nagka-AIDS. Minsan siring, huli sa saiyang marahay na gawe-gawe, sia amay na pinaluwas sa bilanggoan kan Marso 1994. Nag-istar sia sa harong kaiba ni Nanay asin namuhay sia na aktibo bilang Kristiano sagkod kan saiyang kagadanan pakalihis nin duwang taon.

 Pakapanggana sa Nakakaraot na mga Pagmate

Ako man dai biyong nakalibre sa mga epekto kan dati kong pamumuhay. An pag-abuso sa sako kan sakong ama saka an estilo ko nin pamumuhay kan tinedyer pa ako nakaapektar sa sakong personalidad. Sa sakong buhay bilang adulto, parate akong nakakamate nin kasalan asin kadaihan nin pagpahalaga sa sadiri. Kun beses ako pinanluluyahan na gayo nin boot. Pero, an Tataramon nin Dios nakatabang na marhay sa sako na malabanan an nakakapurisaw na mga pagmateng ini. An paorootrong paghorophorop sa mga teksto na siring baga kan Isaias 1:18 asin Salmo 103:8-13 nakatabang sa sako sa nag-aging mga taon na mainaan an paorootrong pakamate nin kasalan.

An pamimibi an saro pang paagi na ginigibo ko tanganing malabanan an pakamate nin kadaihan nin halaga. Parate akong napapaluha mantang namimibi ki Jehova. Minsan siring, pinakosog ako kan mga tataramon na nakarekord sa 1 Juan 3:19, 20: “Paagi kaini makakaaram kita na kita nasa katotoohan, asin tatawan niato nin kasiertohan an satong puso sa atubangan nia kun mapadapit sa kun sa ano man kita kondenaron kan satong puso, huli ta an Dios orog kadakula kisa sa satong puso asin nakakaaram kan gabos na bagay.”

Huling ako nagdodolok sa Dios sa sinserong paagi na may pusong “nalugadan asin ronot,” napag-iisip-isip ko na bako man ako siring karaot kan paghona ko kaidto. Sinisierto kan Biblia sa gabos na naghahanap ki Jehova na dai nia dinuduhagi an mga sinserong nagbasol na sa saindang nakaaging gawe-gawe asin na naggibo na kan saiyang kabotan.—Salmo 51:17.

Kun nakakamate ako nin pagduda sa sadiri, pinagmamaigotan kong panoon an sakong isip nin positibong mga kaisipan, arog kan espirituwal na mga bagay na nasambitan sa Filipos 4:8. Tinuom ko an Salmo 23 asin an Sermon sa Bukid. Kun naglalaog sa sakong isip an nakakaraot na mga kaisipan, sinasambit ko sa sakong sadiri an mga kabtang na ini kan Kasuratan. An paaging ini nin paghale sa siring na nakakaraot na mga kaisipan nakatabang na marhay sa sako durante nin mga banggi na dai ako napapatorog.

An saro pang nakatabang iyo an komendasyon na inaako ko sa sakong agom asin sa iba pang maygurang na mga Kristiano. Minsan ngani kan enot nadepisilan akong akoon an saindang nakakaparigon sa boot na mga tataramon, natabangan ako kan Biblia na masabotan na an pagkamoot “nagtutubod kan gabos na bagay.” (1 Corinto 13:7) Asin siempre, luway-luway asin mapakumbaba kong nanodan na akoon an sakong mga kaluyahan saka limitasyon.

An positibong epekto kaini iyo na an sako mismong pakikipaglaban sa nakakaraot na mga pagmate nakatabang sa sako na magin may pakikidamay na nagbibiaheng paraataman. Kaming mag-agom parehong haros 30 taon na bilang bilog na panahon na mga ministro kan maogmang bareta. An kagayagayahan na nakakamtan ko sa paglilingkod sa iba nakakatabang sa sako na dai na gayong mapurisaw kan sakong nakakaraot na mga pagmate asin nakakaongis na mga eksperyensia.

Ngonyan kun ginigirumdom asin hinohorophorop ko an gabos na bendisyon na itinatao sa sako ni Jehova, napapahiro ako na sabihon an siring sa sinabi kan salmista: “Omawa si Jehova, . . . sia na nagpapatawad kan gabos mong sala, na nagpapaomay kan gabos mong kamatean, na nagpapabalik kan saimong buhay hale sa mismong kotkot, na nagkokorona saimo nin mamomoton na kabootan asin mga pagkaherak.”—Salmo 103:1-4.

[Nota sa Ibaba]

[Blurb sa pahina 30]

Parate akong nakakamate nin kasalan asin kadaihan nin pagpahalaga sa sadiri. Pero, an Tataramon nin Dios nakatabang na marhay sa sako na malabanan an nakakapurisaw na mga pagmateng ini

[Mga ritrato sa pahina 27]

An sakong tugang na si Jose Luis asin an sakong amigo na si Miguel nagsunod sa sakong maraot sagkod marahay na halimbawa

[Ritrato sa pahina 28, 29]

An pamilyang Morcillo kan 1973

[Ritrato sa pahina 29]

Si Marivi kan sia bilanggo

[Ritrato sa pahina 30]

Kaiba ko an sakong agom na si Soledad