Miye Mihe Kɛjɛ Oblahiiaŋ Nijiaŋwujee He

Taakɛ Eusebio Morcillo Gba

Yɛ September afi 1993 lɛ mli lɛ, miyasara tsuŋwoohe ko ni mɛi ni yɔɔ jɛmɛ lɛ ayi fa ni hebuu ni akɛhaa yɛ jɛmɛ lɛ mli wa. Mitee jɛmɛ yɛ gboklɛfonyo lɛ eko baptisimɔ hewɔ, lɛ ji minyɛmiyoo fioo Mariví. Beni mihaa baptisimɔ wiemɔ lɛ gboklɛfoi lɛ kɛ nɔkwɛlɔi ni yɔɔ jɛmɛ lɛ ateŋ mɛi komɛi jɛ bulɛ mli amɛkwɛ nɔ ni yaa nɔ lɛ. Shi dani matsɔɔ bɔ ni fee ni mikɛ lɛ fɛɛ yaje jɛmɛ lɛ mli lɛ, ha magba bo tsutsu shihilɛ mli ni wɔhi.

A FƆ́ mi yɛ Spain yɛ May 5, afi 1954, ni miji kromɔ yɛ bii kpaanyɔ ateŋ. Mariví ji bi ni ji etɛ nɔ. Wɔnaa tsɔse wɔ akɛ Katolikbii ni kɛ amɛjamɔ shwɛɛɛ kwraa, ni mikaiɔ miishɛɛ nibii komɛi yɛ migbekɛbiiashi ni ha minu he akɛ mituu mihe fɛɛ miha Nyɔŋmɔ, beni mikɛ minaa yɔɔ lɛ. Shi nakai beaŋ lɛ shihilɛ ni yɔɔ mifɔlɔi ashĩa lɛ etsɔɔɔ Nyɔŋmɔ gbeyeishemɔ kpojiemɔ. Ataa yiɔ Awo kɛ wɔgbekɛbii lɛ be fɛɛ be. Gbeyeishemɔ bafee wɔshihilɛ lɛ fã, ni edɔɔ mi waa akɛ mana ni Awo miipiŋ.

Mikɛ nijiaŋwujee shihilɛi krokomɛi hu kpe yɛ skul. Tsɔɔlɔi lɛ ateŋ mɔ kome ni ji osɔfo lɛ kɛ wɔyitsei shilɛɔ gbogbo lɛ kɛ́ wɔhaaa sane ko hetoo jogbaŋŋ. Osɔfo kroko hu feɔ skulbii lɛ bɔlɛnamɔ mli niseniianii kɛ́ ekɛ amɛmiikwɛ nifeemɔ ni ekɛha amɛ koni amɛyafee yɛ shĩa lɛ mli lɛ. Kɛfata he lɛ, Katolik tsɔɔmɔi komɛi tamɔ nɔ ni kɔɔ hɛl la he lɛ futuɔ miyiŋ ni ewoɔ mihe gbeyei. Etsɛɛɛ ni enɛɛmɛi fɛɛ ha miŋmɛɛ mihe ni mituu miha Nyɔŋmɔ lɛ he.

Mikɛ Mihe Wo Shihilɛ ko ni Esaaa Mli

Akɛni mináaa gbɛtsɔɔmɔ ni baaye abua mi koni maba mijeŋ yɛ gbɛ ni Nyɔŋmɔ kpɛlɛɔ nɔ lɛ nɔ hewɔ lɛ, mikɛ nyenyeŋtswibɔlɔi kɛ basabasafeelɔi bɔi bɔɔ yɛ diskoi ashishi. Bei pii lɛ, nɔmɔ baa yɛ hei nɛɛ, ni akɛ kaklai, kɔsɔŋkɔsɔi, glasei, kɛ sɛ̃i fɛɛ feɔ nɔmɔ nibii. Eyɛ mli akɛ mikɛ mihe wooo nɔmɔ nɛɛ eko mli moŋ, shi gbi lɛ eko lɛ akɛ nɔ ko tswa mi, ni nɔ̃ nyɔ minɔ.

Yɛ naagbee lɛ, mikpa jɛmɛ yaa ni miyatao diskoi krokomɛi ni jɛmɛ yɔɔ kpoo. Hei ni miná nɛɛ hu, tsofai fɔji kɛ nitsumɔ ebu yɛ jɛmɛ. Shi yɛ nɔ̃ najiaŋ ni tsofai fɔji lɛ kɛ nitsumɔ baaha maná miishɛɛ kɛ jwɛŋmɔŋ toiŋjɔlɛ lɛ,  ehaa misusuɔ yaka susumɔi moŋ, ni mifeɔ yeyeeye.

Eyɛ mli akɛ shihilɛ nɛɛ haaa mitsui anyɔ mimli moŋ, shi milaka minyɛmimɛi bibii lɛ ateŋ mɔ kome ni ji José Luis, kɛ Miguel ni ji minaanyo kpaakpa lɛ miwo nakai shihilɛ lɛ nɔŋŋ mli. Oblahiiaŋbii krokomɛi babaoo ni yɔɔ Spain yɛ nakai beaŋ lɛ hu kɛ amɛhe wo shihilɛ fɔŋ nɛɛ mli. Mifeɔ nɔ fɛɛ nɔ ni manyɛ koni maná shika kɛhé tsofai fɔji. Enɛ ha milaaje bulɛ ni miyɔɔ lɛ fɛɛ.

Yehowa Ye Ebua Mi

Yɛ nɛkɛ bei nɛɛ amli lɛ, miwie shihilɛ mli ni Nyɔŋmɔ yɔɔ kɛ nɔ̃ hewɔ ni wɔyɔɔ wala mli lɛ he shii abɔ mitsɔɔ minanemɛi lɛ. Mitao mɔ ko ni manyɛ magba lɛ bɔ ni minuɔ nii ahe mihaa, ni mitsɔ no feemɔ nɔ mibɔi Nyɔŋmɔ sɛɛ gbɛ taomɔ. No mli lɛ, mina akɛ Francisco, ni ji minanemɛi nitsulɔi lɛ ateŋ mɔ kome lɛ yɛ srɔto kwraa yɛ mɛi krokomɛi lɛ ahe. Eyɛ miishɛɛ, eyeɔ anɔkwa, ni emli jɔ, no hewɔ lɛ, mikpɛ miyiŋ akɛ magba lɛ mitsui mli saji fɛɛ. Francisco ji Yehowa Odasefoi lɛ ateŋ mɔ kome, ni eha mi Buu-Mɔɔ lɛ eko ní wieɔ tsofai fɔji ni akɛtsuɔ nii lɛ he.

Beni mikane wolo lɛ migbe naa lɛ, misɔle miha Nyɔŋmɔ koni eye ebua mi, misɔle akɛ: “Nuŋtsɔ, mile akɛ oyɛ shihilɛ mli, ni miisumɔ akɛ male bo koni mafee osuɔmɔnaa nii. Ofainɛ ye obua mi!” Francisco kɛ Odasefoi krokomɛi tsɔ Biblia lɛ nɔ amɛwo mi hewalɛ ni amɛha mi Biblia kasemɔ woji koni makane. Mibayɔse akɛ yelikɛbuamɔ ni mibi kɛjɛ Nyɔŋmɔ ŋɔɔ lɛ ji nɔ ni amɛkɛhaa mi lɛ. Etsɛɛɛ ni mibɔi minanemɛi lɛ kɛ José Luis nibii ni mikaseɔ lɛ gbaa.

Gbi lɛ eko beni mikɛ minanemɛi lɛ ekomɛi eshi he ko ni akɛ rɔk lalai jieɔ mɛi ahiɛtserɛ yɛ ni wɔbaa lɛ, mitsi mihe kɛjɛ kuu lɛ he. Mifee mihe tamɔ mɔ ko ni fataaa amɛhe, ni beni mikwɛɔ amɛ lɛ, mina bɔ ni wɔjeŋba ekpɔtɔ eha yɛ hewalɛ ni tsofai fɔji lɛ ená yɛ wɔnɔ lɛ hewɔ. Mikpɛ miyiŋ yɛ nakai ŋmɛlɛtswaa lɛ nɔŋŋ mli akɛ makpa nakai shihilɛ lɛ koni matsɔ Yehowa Odasefoi lɛ ateŋ mɔ kome.

Mibi Francisco koni ebaha mi Biblia, ni ebaha mi eko ni ekɛ wolo ni ji Anɔkwale ni Kɛ Mɔ Yaa Naanɔ Wala Mli Lɛ eko hu fata he kɛba. * Beni mikane shiwoo ni Nyɔŋmɔ kɛha akɛ ebaatsumɔ hiɛaŋ fɛɛ yaafonui ni ebaajie gbele tete po kɛya lɛ, miyiŋ efeee mi kɔshikɔshi kɔkɔɔkɔ akɛ mina nɔ ni ji anɔkwale ni baanyɛ aha adesai aye amɛhe lɛ. (Yohane 8:32; Kpojiemɔ 21:4) No sɛɛ lɛ, mitee kpee ko yɛ Yehowa Odasefoi a-Maŋtsɛyeli Asa lɛ nɔ. Mihiɛ sɔ miishɛɛ kɛ naanyobɔɔ su ni mina yɛ jɛmɛ lɛ waa.

Akɛni miyɛ he miishɛɛ akɛ magba mɛi krokomɛi niiashikpamɔ ni miyaná yɛ Maŋtsɛyeli Asa lɛ nɔ lɛ hewɔ lɛ, amrɔ nɔŋŋ ni mibua José Luis kɛ minanemɛi lɛ anaa ni migba amɛ nɔ fɛɛ nɔ. Gbii komɛi asɛɛ lɛ, wɔ fɛɛ wɔtee kpee lɛ eko. Oblayoo fioo ko ni ta wɔhiɛ gbɛ sɛi lɛ nɔ lɛ kwɛ wɔ gãa. Ekã shi faŋŋ akɛ enaa kpɛ ehe ni eshe gbeyei fioo beni ena kuu nɛɛ ni amɛŋmɛ amɛyi kusuu lɛ, ni ebɔ mɔdɛŋ koni ekatsɔ eyitso dɔŋŋ. Ŋwanejee ko bɛ he akɛ enaa kpɛ ehe beni enɔ otsi lɛ wɔku sɛɛ wɔba Maŋtsɛyeli Asa lɛ nɔ ekoŋŋ lɛ, ejaakɛ yɛ nɛkɛ be nɛɛ mli lɛ wɔwo kootu ni wɔŋmɔ tai.

Sɛɛ mli etsɛɛɛ lɛ, mi kɛ Miguel hu tee Yehowa Odasefoi akpokpaa nɔ kpee ko. Wɔnako nɔ ko ni tamɔ nakai pɛŋ—gbekɛbii kɛ onukpai fɛɛ ni efeee  ekome diɛŋtsɛ. Ni nɔ ni yɔɔ naakpɛɛ ji akɛ, afee kpokpaa nɔ kpee lɛ yɛ shwɛmɔhe ni etsɛko tsɔ lɛ wɔyabo rɔk lalai ni akɛjieɔ mɛi ahiɛtserɛ toi yɛ lɛ nɔŋŋ. Shi yɛ nɛkɛ be nɛɛ mli lɛ, nibii ni tee nɔ lɛ kɛ lala ni wɔnu lɛ ji nibii ni woɔ mɔ hewalɛ.

Wɔkuu lɛ mli bii lɛ fɛɛ bɔi Biblia lɛ kasemɔ. Nyɔji kpaanyɔ sɛɛ, yɛ July 26, afi 1974 lɛ, abaptisi mi kɛ Miguel. Nakai beaŋ lɛ, wɔyi enyɔ lɛ fɛɛ wɔye afii 20. No sɛɛ yɛ nyɔji fioo komɛi amli lɛ, abaptisi kuu lɛ mli bii ejwɛ krokomɛi hu. Biblia mli tsɔsemɔ ni miná lɛ wo mi hewalɛ koni maye mabua mimami ni kɛ be saŋŋ etsɔ shihilɛ ni mli wawai amli lɛ kɛ shĩa nifeemɔi, ni magba lɛ hemɔkɛyeli hee ni miná lɛ he sane. Enɛ ha wɔba bɛŋkɛ wɔhe kpaakpa. Mihé be babaoo koni mikɛye mabua minyɛmimɛi hii kɛ yei bibii lɛ.

Yɛ be ni sa mli lɛ, mimami kɛ minyɛmimɛi lɛ fɛɛ kase Biblia mli anɔkwalei lɛ ni abaptisi amɛ akɛ Yehowa Odasefoi, amɛteŋ mɔ kome pɛ ni ebafeee Odasefonyo. Mikɛ Soledad bote gbalashihilɛ mli yɛ afi 1977 mli. Soledad ji oblayoo fioo ni naa kpɛ ehe beni wɔtee Maŋtsɛyeli Asa lɛ nɔ klɛŋklɛŋ kwraa lɛ. Yɛ nyɔji fioo komɛi asɛɛ lɛ, wɔyi enyɔ lɛ fɛɛ wɔbatsɔmɔ daa gbɛgbalɔi, taakɛ atsɛɔ Yehowa Odasefoi abe-fɛɛ sanekpakpa shiɛlɔi lɛ.

Akpɔ̃ Minyɛmi ko ni Misumɔɔ Esane Waa

Beni minyɛmi yoo fioo Mariví ji gbekɛ lɛ ato lɛ kaabonaa, ni nakai shihilɛ fɔŋ ni etsɔ mli lɛ ná enɔ hewalɛ waa. Beni eji oblayoo fioo lɛ, ekɛ ehe yawo jeŋba shara mli, ni nibii ni fata enɛɛmɛi ahe hu ji tsofai fɔji kɛ nitsumɔ, juu, kɛ ahoshwibɔɔ. Ayawo lɛ tsuŋ beni ená afii 23 lɛ, ni jɛmɛ hu etee nɔ ekɛ ehe wo ejeŋba shara shihilɛ lɛ mli.

Nakai beaŋ lɛ miisɔmɔ akɛ kpokpaa nɔkwɛlɔ, ni ji Yehowa Odasefoi asɔɔlɔ gbɛfalɔ. Yɛ afi 1989 mli lɛ, aha mi kɛ Soledad nitsumɔ yɛ heni awo Mariví tsuŋ yɛ lɛ niiaŋ. No mli lɛ onukpai ni kwɛɔ tsuŋwoohe lɛ nɔ lɛ ehé ebinuu lɛ yɛ edɛŋ etsɛko; enɛ eha efee basaa aahu akɛ esumɔɔɔ akɛ ehiɔ wala mli dɔŋŋ. Miyasara lɛ gbi lɛ eko ni mibi lɛ koni eha wɔfee ekome kɛkase Biblia lɛ, ni ekpɛlɛ nɔ. Beni ekase nii lɛ nyɔŋ kome lɛ ekpa tsofai fɔji lɛ kɛ nitsumɔ ni ekpa tawa shɛremɔ. Mimii shɛ mihe waa akɛ Yehowa duro lɛ hewalɛ ni enyɛ ekɛfee tsakemɔi nɛɛ yɛ shihilɛ mli.—Hebribii 4:12.

Beni Mariví bɔi nikasemɔ lɛ sɛɛ etsɛɛɛ lɛ, ekɛ mɛi krokomɛi ni ekɛyɔɔ tsuŋwoohe lɛ kɛ tsuŋwoohe nɔkwɛlɔi lɛ bɔi Biblia mli anɔkwalei lɛ ahe susumɔ. Eyɛ mli akɛ ajie lɛ kɛjɛ tsuŋwoohe kome kɛtee ekrokomɛi amli moŋ, shi etee nɔ eshiɛ eha mɛi. Eshiɛ kɛjɛ tsũ kome mli kɛtee ekroko mli yɛ tsuŋwoohe lɛ po. Yɛ afii ni eho lɛ amli lɛ, Mariví kɛ tsuŋwoohe lɛ mli bii babaoo je Biblia mli nikasemɔi ashishi yɛ tsuŋwoohei srɔtoi amli.

Mariví ha mile gbi lɛ eko akɛ ebaasumɔ ni ejɔɔ ewala nɔ eha Yehowa koni abaptisi lɛ. Shi aŋmɛɛɛ lɛ gbɛ ni eshi tsuŋwoohe lɛ, ni aŋmɛɛɛ mɔ ko hu gbɛ ni eba tsuŋwoohe lɛ ni ebabaptisi lɛ. Ekɛ afii ejwɛ sɔŋŋ tee nɔ eŋmɛ etsui shi yɛ shihilɛ ni ekpɔtɔ ni yaa nɔ yɛ tsuŋwoohe lɛ mli. Mɛni ha enyɛ ehiɛ ehemɔkɛyeli lɛ mli? Be mli ni asafo ni yɔɔ jɛmɛ niiaŋ lɛ ekpe ni amɛmiifee kpee lɛ, belɛ lɛ hu eekase nɔ ni amɛkaseɔ lɛ nɔŋŋ eko yɛ tsuŋwoohe lɛ. Eto gbɛjianɔ kɛha Biblia lɛ kasemɔ daa ni esɔleɔ hu.

Yɛ be ni sa mli lɛ, ajie Mariví kɛtee tsuŋwoohe ko ni hebuu ni yɔɔ jɛmɛ lɛ mli wa, ni ayɛ nubu ni awuɔ yɛ jɛmɛ. Enu he akɛ abaanyɛ abaptisi lɛ yɛ shihilɛ hee nɛɛ mli. Ni nakai pɛpɛɛpɛ ji bɔ ni ebalɛ, yɛ naagbee mli lɛ aŋmɛ lɛ gbɛ. Ni enɛ ji nɔ ni gbele gbɛ kɛha mi ni miha ebaptisimɔ wiemɔ lɛ. Yɛ be ni he hiaa fe fɛɛ yɛ eshihilɛ mli nɛɛ, miyɛ emasɛi.

Yɛ tsutsu shihilɛ gbɛ ni Mariví kɔ lɛ hewɔ lɛ, ená AIDS. Kɛlɛ, yɛ jeŋba kpakpa ni ejie lɛ kpo lɛ hewɔ lɛ, yɛ March afi 1994 mli lɛ ajie lɛ kɛjɛ tsuŋwoohe lɛ ni ebe shɛko. Ekɛ Awo hi shĩa, ni ehi shi akɛ Kristofonyo ni yɔɔ ekãa kɛyashi egbo yɛ afii enyɔ sɛɛ.

 Miye Henumɔi ni Fiteɔ Nii lɛ Anɔ

No mli lɛ, mi hu miyeko mihe kwraa kɛjɛko nibii ni jɛ tsutsu shihilɛ gbɛ ni mikɔ lɛ mli kɛba lɛ ahe. Niseniianii ni mitsɛ fee mi lɛ kɛ shihilɛ gbɛ ni mikɔ akɛ oblanyo fioo lɛ ná minɔ hewalɛ waa. Amrɔ nɛɛ ni mihiɛ efã nɛɛ po lɛ, yɛ be kɛ beaŋ lɛ minuɔ he akɛ mifeee ni ahi, ni minuɔ he akɛ mihe bɛ sɛɛnamɔ ko. Bei komɛi lɛ minijiaŋ jeɔ wui waa. Shi kɛlɛ, Nyɔŋmɔ Wiemɔ lɛ eye ebua mi waa ni miwuu mishi henumɔi ni gbáa mɔ naa nɛɛ. Ŋmalɛi tamɔ Yesaia 1:18 kɛ Lala 103:8-13 lɛ anɔ ni mijwɛŋ shii abɔ yɛ afii ni eho lɛ amli lɛ eye ebua mi ni miba henumɔi ni mináa yɛ be kɛ beaŋ akɛ mifeee ni ahi lɛ shi.

Sɔlemɔ hu ji mumɔŋ tawuu nɔ ko ni mikɛtsu nii mishi henumɔi ni mináa akɛ misaaa lɛ. Bei pii lɛ, yaafonui tserɛɔ yɛ mihiŋmɛiiaŋ beni misɔleɔ mihaa Yehowa lɛ. Kɛlɛ, wiemɔi ni aŋma yɛ 1 Yohane 3:19, 20 lɛ woɔ mi hewalɛ. Ekɛɔ akɛ: “Ni no wɔkɛaale, akɛ anɔkwale lɛ mli wɔjɛ, ni wɔɔtsɛ wɔtsuii wɔŋmɛ wɔmli yɛ ehiɛ, akɛ, kɛji wɔtsuii buɔ wɔ fɔ lɛ, Nyɔŋmɔ da fe wɔtsui, ni ele nii fiaa.”

Akɛni mijɛ anɔkwayeli mli mikɛ “tsui ní werɛ eho ehe ní tswiaa shi kɛ dɔlɛ” bɛŋkɛ Nyɔŋmɔ hewɔ lɛ, miyɔse akɛ mijeee gbɔmɔ fɔŋ tamɔ bɔ ni misusuɔ akɛ miji be ko ni eho lɛ. Biblia lɛ maa nɔ mi ehaa mɛi fɛɛ ni taoɔ Yehowa sɛɛgbɛ lɛ akɛ, Yehowa kpoŋ mɛi ni jɛɔ anɔkwayeli mli amɛshwaa amɛhe yɛ amɛtsutsu jeŋbai lɛ ahe, ni amɛfeɔ esuɔmɔnaa nii lɛ.—Lala 51:19.

Be fɛɛ be ni miyiŋ baafee mi kɔshikɔshi lɛ, mibɔɔ mɔdɛŋ akɛ masusu nibii kpakpai ahe, tamɔ nibii ni yɔɔ krɔŋŋ ni atsĩ tã yɛ Filipibii 4:8 lɛ nɛkɛ. Mikase Lala 23 lɛ kɛ Gɔŋ nɔ Shiɛmɔ lɛ miwo mijwɛŋmɔ mli. Kɛ́ susumɔi ni ejaaa ba mijwɛŋmɔ mli lɛ, mikɛɔ Ŋmalɛ mli shɛɛ saji nɛɛ mihaa mihe. Susumɔi ni ejaaa nɛɛ ni mijieɔ yɛ mijwɛŋmɔŋ lɛ yeɔ ebua mi titri lɛ, kɛ́ je na ni minyɛɛɛ mawɔ lɛ.

Nɔ kroko hu ni ye ebua mi ji yijiemɔ ni mináa kɛjɛɔ miŋa kɛ Kristofoi krokomɛi ni edara yɛ mumɔŋ lɛ aŋɔɔ lɛ. Eyɛ mli akɛ yɛ shishijee mli lɛ ewa kɛha mi akɛ makpɛlɛ amɛhewalɛwoo wiemɔi lɛ anɔ moŋ, shi Biblia lɛ eye ebua mi ni minu shishi akɛ suɔmɔ ‘heɔ nii fɛɛ eyeɔ.’ (1 Korintobii 13:7) Ni yɛ anɔkwale mli lɛ, fiofio lɛ mikɛ heshibaa ekase bɔ ni akpɛlɛɔ gbɔjɔmɔi kɛ fatɔɔi anɔ.

Sɛɛnamɔ kome ni miná yɛ henumɔi ni fiteɔ nii ni miye nɔ kunim lɛ mli ji akɛ, eye ebua mi koni mafee nɔkwɛlɔ gbɛfalɔ ni nuɔ nii ahe ehaa mɛi. Mikɛ miŋa kɛ nɔ ni miihe ashɛ afii 30 esɔmɔ akɛ sanekpakpa lɛ he be-fɛɛ sɔɔlɔi. Miishɛɛ ni mináa yɛ mɛi krokomɛi asɔɔmɔ mli lɛ yeɔ ebuaa kɛjieɔ henumɔi ni ejaaa ni mináa lɛ kɛ shihilɛ gbɛ ni esaaa ni mikɔ be ko lɛ kɛyaa kwraa, ni egbaaa minaa dɔŋŋ.

Amrɔ nɛɛ, kɛ́ misusu be ni eho lɛ he ni mijwɛŋ jɔɔmɔi fɛɛ ni Yehowa kɛduro mi lɛ anɔ lɛ, etsirɛɔ mi koni majaje taakɛ lalatsɛ lɛ jaje lɛ nɔŋŋ akɛ: “Jiemɔ Yehowa yi, . . . lɛ ekɛ onishaianii fɛɛ faa, lɛ etsáa ohelai fiaa kwa; lɛ ehereɔ oyiwala kɛjɛɔ bu mli; lɛ ekɛ mlihilɛ kɛ musuŋtsɔlɛ fiɔo akekre.”—Lala 103:1-4.

[Shishigbɛ niŋmaa]

[Wiemɔ ni akɔ ni akɛmiitsu nii ni yɔɔ baafa 30]

Yɛ be kɛ beaŋ lɛ minuɔ he akɛ mifeee ni ahi, ni minuɔ he hu akɛ mihe bɛ sɛɛnamɔ. Shi Nyɔŋmɔ Wiemɔ lɛ eye ebua mi waa ni miwuu mishi henumɔi ni gbáa mɔ naa nɛɛ

[Mfonirii ni yɔɔ baafa 27]

Minyɛmi nuu José Luis kɛ minaanyo Miguel nyiɛ minɔkwɛmɔnɔ gbonyo kɛ ekpakpa lɛ fɛɛ sɛɛ

[Mfoniri ni yɔɔ baafa 28, 29]

Morcillo weku lɛ yɛ afi 1973 mli

[Mfoniri ni yɔɔ baafa 29]

Beni Mariví ji gboklɛfonyo

[Mfoniri ni yɔɔ baafa 30]

Mikɛ miŋa Soledad