Matamata Negana Ena Hekwakwanai Lau Hanaia

Eusebio Morcillo Ese Ia Sivaraialaia

September 1993 ai, dibura rumana mai ena sekuriti auka gabuna lau vadivadi henia. Egu taihuna Marivíí ena bapatiso totona, unai gabu dekenai lau lao. Dibura taudia haida bona ofesa hahinedia be mai edia hemataurai ida bapatiso herevana idia kamonai. Lau bona Marivíí be dibura ruma lalonai ai hedavari sivaraina lau do gwauraia lasi neganai, lau ura ai maragi negana lau sivarailaia.

LAU be May 5, 1954 ai Spain dekenai lau vara. Emai famili lalonai ai ibounai be 8 bona lau be roboana. Marivíí be namba 3. Emai tubuna hahine ese Katolik dubu dekenai ai ia abia lao, bona lau maragi neganai egu tubuna ida Dirava lau tomadiho henia karana lau moalelaia. To, emai ruma bese ena mauri be ia namo lasi. Hanaihanai egu Tamana ese emai Sinana bona ai ia botaia. Nega momo ai gari, bona egu Tamana ese egu Sinana ia botaia momo dainai, lau lalohisihisi bada.

Sikuli gabudiai, hekwakwanai ma haida lau davaria danu. Emai tisa ta be pris tauna, bona bema ia henia henanadai dekenai haere kererena ai gwauraia, haba dekenai emai kwarana ia bampaia. Pris ma ta be stiuden edia homwek ia itaia neganai, ia sihari henidia. Danu, Katolik taudia edia hahediba herevana​​—⁠hel lahina⁠​—⁠​dainai lau gari bona lau daradara. Bona daudau lasi murinai dubu lao henia karana lau hadokoa.

Egu Mauri be Anina Lasi

Dirava hamoalea dalana lau diba lasi dainai, disko gabudia dekenai matabodaga bona dagedage taudia lau bamoa matamaia. Idia heatu negadiai, nega momo kaia, seini, galasi, bona sea idia gaukaralaia danu. Ena be lau be heatu lalodiai lau vareai lasi, to nega ta lau idia botaia bona lau maserea.

Gabeai unai disko gabudia lau hesikulaia dainai, heai momo lasi gabudia lau tahua. To, unai gabu dekenai lau lao neganai, momo be drag idia ania. To, drag ania karana amo moale bona lalomaino lau davaria lasi, to matahanai dikadia lau abia bona lau lalometau.

 Ena be lau moale lasi, to egu tadina, José Luis, bona egu turana namona, Miguel, lau veria egu mauri dalana idia badinaia totona. Unai negai, Spain dekenai ai noho matamata taudia momo be inai tanobada ena mauri dikana ai badinaia. Lau be gau idauidau lau karaia, unai amo moni lau abia bona drag lau hoia diba. Egu mauri dalana be ia dika momokani.

Iehova ese Lau Ia Durua

Unai nega ai, egu turadia dekenai Dirava ia mauri noho sivaraina bona mauri ena anina lau kikilaia momo. Lau ura Dirava lau dibaia dainai, egu lalohadai ia abia dae tauna ta lau tahua. Lau itaia egu gaukara turana ta, Francisco, ena kara be idau. Ia moale, ia koikoi lasi, bona ia be hebogahisi tauna dainai, ia dekenai egu lalohadai lau gwauraia hedinarai. Francisco be Iehova ena Witnes tauna ta, bona drag ia herevalaia Watchtower ta be lau dekenai ia henia.

Unai magasin lau duahia murinai, Dirava dekenai heduru totona lau guriguri: “Lohiabada e, lau diba oi noho, bona lau ura oi lau dibaia bona emu ura lau karaia. Mani lau oi durua!” Francisco bona Witnes taudia ma haida ese Baibel amo lau idia hagoadaia bona Baibel bukadia ma haida idia henia lau duahia totona. Lau laloparara edia heduru be Dirava amo lau noia gauna. Lau dibaia gaudia be José Luis bona egu turadia dekenai lau gwauraia.

Dina ta ai, lau bona egu turadia be rok miusiki gabuna ai rakatania neganai, lau be idia amo lau raka siri. Gabu daudau amo idia lau raraia, bona lau itaia drag ai ania dainai, aiemai mauri dalana be ia dika momokani. Unai nega amo, unai mauri dalana lau dadaraia bona Iehova ena Witnes tauna ta ai lau lao.

Francisco dekenai Baibel ta lau noia, bona ia ese Baibel bona Mauri Ia Lao Henia Hereva Momokanina * bukana ia henia. Dirava ese matana ranu ibounai do ia dahua bona mase do ia haorea gwauhamatana lau duahia neganai, lau diba momokani lau be taunimanima ia ruhaia hereva momokanina lau davaria unai. (Ioane 8:​32; Apokalupo 21:⁠4) Unai murinai, Iehova ena Witnes taudia edia Kingdom Hall dekenai lau lao. Bona edia heabidae bona hetura karadia ese egu lalona ia veria.

Lau ura bada Kingdom Hall dekenai lau dibaia gaudia be ma haida dekenai lau herevalaia, unai dainai José Luis bona egu turadia dekenai lau gwauraia. Dina haida murinai, ai ibounai be hebou dekenai ai lao. Emai vairana dekenai ia helai kekenina ta be ai ia raraia. Bona ia hoa bada, badina ai ibounai emai huina be lata herea, unai dainai ia gari bona ai ia raraia lou lasi. To, reana ia hoa bada, badina wiki ta murinai Kingdom Hall dekenai ai giroa lou neganai, dabua namodia bona neketai ai hahedokilaia.

Daudau lasi murinai, lau bona Miguel be Iehova ena Witnes taudia edia sekit hebouhebou ta dekenai ai lao. Tadikaka bona taihu​​—⁠mauri lagani idauidau taudia​​—⁠be lalotamona ai idia hebou be guna ai itaia lasi. Bona hoa gauna be, guna ai lao henia rok miusiki koneseti gabuna dekenai unai hebouhebou ai abia. To, unai hebouhebou dekenai, taunimanima edia kara bona idia gadaralaia miusiki namona ai moalelaia.

Ai ibounai be Baibel ai stadilaia matamaia. Hua 8 bamona murinai, July 26, 1974 ai, lau  bona Miguel be bapatiso ai abia. Unai negai ai ruaosi emai mauri lagani be 20. Hua haida murinai, emai turadia foa be bapatiso idia abia. Baibel amo lau dibaia gaudia ese lau ia doria egu sinana lau durua, ruma gaukara haida lau karaia bona lau dibaia hereva momokanina be ia dekenai lau hadibaia. Ai ruaosi be tura namodia ai ai lao. Danu, nega bada lau henia egu tadidia lau durua totona.

Gabeai, egu sinana bona egu tadina iboudiai be Baibel ena hereva momokani idia dibaia, idia bapatiso bona Iehova ena Witnes taudia ai idia lao. To, egu tadina mero ta be hereva momokani ia abia dae lasi. Lagani 1977 ai, lau bona Soledad ai headava. Soledad be Kingdom Hall dekenai ai ia raraia kekenina. Hua haida murinai, ai ruaosi be painia gaukara ai hamatamaia, unai be Iehova ena Witnes taudia edia ful-taim sivarai namona harorolaia gaukarana.

Egu Tadina Ena Mauri Ia Haidaua

Marivíí be ia maragi neganai, ta ese ia kara bodaga henia bona unai ese ena mauri ia hadikaia. Unai dainai ia matamata neganai, mauri dikana ia noholaia, hegeregere drag ia ania, ia henaohenao, bona matabodaga karadia ia karaia. Ena mauri lagani be 23 neganai, dibura dekenai idia atoa to ena mauri ia haidaua lasi.

Unai negai, lau be Iehova ena Witnes taudia edia sekit gaukara lau karaia. Lagani 1989 ai, lau bona Soledad idia siaia lao Marivíí ia noho dibura rumana ena taoni dekenai. Gavamani ese Marivíí ena natuna mero idia abia dainai, ia lalohisihisi bada herea bona ia ura sibona ia hamasea. Dina ta, ia lau vadivadi henia bona lau hamaoroa Baibel do ai stadilaia hebou, bona ia abia dae. Hua ta ai stadi murinai, drag bona kuku ania karana ia rakatania. Lau moale bada, badina lau itaia Iehova ena heduru amo iena mauri ia haidaua.​​—⁠Heberu 4:​12.

Marivíí be Baibel ia stadilaia matamaia bena daudau lasi murinai, dibura taudia bona ofesa hahinedia dekenai ia dibaia gaudia ia herevalaia. Ena be dibura ruma idauidau dekenai idia abia lao, to haroro gaukara ia hadokoa lasi. Dibura rumana ta lalonai daiutu ta ta dekenai ia haroro. Oibe, Marivíí be dibura ruma idauidau dekenai ia noho neganai, dibura taudia momo ida Baibel stadi ia karaia.

Nega ta Marivíí be lau ia hamaoroa, ia ura Iehova dekenai ena mauri ia gwauhamatalaia bona bapatiso ia abia. To, gwaumaoro idia henia lasi Marivíí be dibura ruma do ia rakatania, eiava ta do ia vareai lasi ia bapatiso henia totona. Lagani foa lalonai mai haheauka ida unai dibura rumana dikana lalona ia noho. To, dahaka ese Marivíí ia durua ena abidadama karana ia dogoatao auka totona? Kongrigeisen be edia hebou idia karaia negadiai, Marivíí be dibura ruma lalonai ena hebou gaudia ia itaia danu. Bona hanaihanai sibona ena stadi ia karaia bona ia guriguri.

Gabeai, Marivíí be dibura ruma ma ta dekenai ia lao neganai, unai gabu be mai ena nahu gabuna. Marivíí ia laloa unai gabu be mai ena nahu gabuna dainai, reana bapatiso do ia abia diba. Oibe, Marivíí dekenai gwaumaoro idia henia unai gabu dekenai bapatiso ia abia totona, bona lau ese iena bapatiso tok lau karaia. Marivíí ena mauri lalonai unai be mai anina bada dinana ta, bona lau moale badina unai negai lau be ia ida lau noho.

Marivíí be guna ia noholaia maurina amo, AIDS gorerena ia abia. Ena kara namodia dainai, March 1994 ai dibura ruma amo idia ruhaia. Ia be aiemai Sinana ida ia noho bona Keristani mauri dalana ia badinaia ela bona lagani rua murinai ia mase.

Lalohadai Kereredia Lau Koua

Egu mauri gunana dainai, hekwakwanai haida lau do davaria noho. Egu tamana ese lau ia botaia bona lau matamata neganai lau karaia karadia ese egu mauri idia hadikaia. Lau  headava, to nega momo guna lau karaia karadia dainai egu mamina ia dika bona lau laloa lau be anina lasi. Nega haida lau lalohisihisi bada. To, Dirava ena Hereva ese lau ia durua bada unai bamona lalohadai kereredia lau koua totona. Lagani momo lalodiai, Isaia 1:​18 bona Salamo 103:​8-​13 laloa dobu karana ese lau ia durua egu kara dika gunadia lau laloa lasi totona.

Guriguri karana ese lau ia durua, lau be anina lasi lalohadaina lau koua totona. Nega momo mai tai ida Iehova lau guriguri henia. To, 1 Ioane 3:​19, 20 lalonai idia noho herevadia ese lau idia hagoadaia, ia gwau: “Iseda lalokau kara dekena amo, be do ita diba ita be momokani taudia. Vadaeni unai dainai, iseda kudouna be mai maino danu, Dirava ena vairana dekenai. Bona bema iseda kudouna ese ita idia kota henia noho neganai, Dirava ena vairanai do ita laloa hekwarahi lasi. Badina Dirava ese gau ibounai ia diba, bona iena diba ese iseda kudouna ena diba ia hereaia momokani.”

Lau be “lalohisihisi momokani” ida Dirava lau guriguri henia dainai, lau laloparara Iehova ese egu kara dika ia gwauatao vadaeni. Momokani, Iehova idia tahua taudia ibounai be Baibel ese ia hagoadadia, edia kara dika gunadia idia rakatania bona Iena ura idia karaia neganai, idia do ia dadaraia lasi.​​—⁠Salamo 51:⁠17.

Nega haida daradara lalohadaina lau abia neganai, Filipi 4:⁠8 ena hereva namodia lau laloa. Salamo 23 ena hereva bona Ororo Harorona dekenai Iesu ese ia gwauraia herevadia lau laloatao. Lalohadai kereredia lau abia neganai, unai siri idauidau lau laloa lou. Hanuaboi ai lau mahuta diba lasi negadiai, unai hereva namodia lau laloa dobu karana ese lau ia durua egu lalona dekenai lalohadai kereredia lau koua totona.

Danu, egu adavana bona lo Keristani taudia ma haida amo lau abia hanamoa herevadia ese lau idia durua. Ena be matamanai edia hagoadaia herevadia lau abia dae be auka, to Baibel ena heduru amo lau laloparara lalokau be ‘nega ibounai ia abidadama goada.’ (1 Korinto 13:⁠7) Gabeai, lau laloparara unai be egu manoka gauna bona mai manau ida lau haheauka noho.

Lau hekwarahi lalohadai kereredia lau koua totona. Bona unai ese lau ia durua, sekit gaukara lau karaia lalonai unai bamona hekwakwanai idia davaria taudia ma haida lau durua totona. Lau bona egu adavana be kahirakahira lagani 30 lalonai ful-taim hesiai gaukara ai karaia. Ma haida durua karana lau moalelaia dainai, unai ese lau ia durua lalohadai kereredia lau koua bona guna lau karaia kara dikadia lau laloa lasi totona.

Nega gunadia lau laloa lou bona Iehova ese lau dekenai ia henia hahenamo lau laloa neganai, egu hemami be salamo torea tauna bamona, ia gwau: “Lohiabada do oi hanamoa, . . . Ia ese egu kara dika ibounai ia gwauatao noho. Ia ese egu gorere ibounai dekena amo lau ia hamauria noho. Lauegu mauri be mase ena guri dekena amo, Lohiabada ese ia hamauria noho. Ia ese lalokau bona bogahisihisi lau dekenai ia henia noho.”​​—⁠Salamo 103:​1-4.

[Footnote]

[Blurb on page 30]

Nega momo, guna lau karaia karadia dainai lau lalohisihisi bona lau laloa lau be anina lasi. To, Dirava ena Hereva ese lau ia durua bada unai bamona lalohadai kereredia lau koua totona

[Pictures on page 27]

Egu tadina José Luis bona egu turana Miguel ese egu haheitalai dikana bona haheitalai namona idia tohotohoa

[Picture on page 28, 29]

Morcillo famili, 1973

[Picture on page 29]

Marivíí, dibura dekenai

[Picture on page 30]

Lau bona Soledad