Go Imologa Manyaming a Bofsa

Ka ge go anega Eusebio Morcillo

Ka September 1993, ke ile ka etela kgolego yeo e šireleditšwego kudu. E be e le tiragalo ya go kolobetšwa ga mogolegwa, kgaetšedi ya-ka yo monyenyane e lego Mariví. Bagolegwa ba bangwe gotee le bahlankedi ba kgolego ba ile ba bogela ka tlhompho ge ke be ke mo kolobetša. Pele ke hlalosa gore go tlile bjang gore nna le yena re ikhwetše re le moo, anke ke hlalose bophelo bja rena bja ge re sa gola.

KE BELEGETŠWE kua Sepania ka May 5, 1954, ke le wa mathomo go bana ba seswai. Mariví e be e le wa boraro. Makgolo o re godišitše re le Makatholika a ineetšego gomme ke sa gopola gabotse ge ke be ke ikwa ke ineetše go Modimo nakong ya ge ke be ke sa dula le makgolo. Eupša boemo ka lapeng la batswadi ba-ka e be e se bja moya. Ka mehla tate o be a re betha e bile a betha le mma. Re be re dula re tšhogile gomme ke be ke e-kwa bohloko kudu ge ke bona mma a tlaišega.

Ke ile ka lebeletšana le maemo a mangwe gape a nyamišago sekolong. Yo mongwe wa barutiši ba rena, yo e bego e le moruti, o be a re thudiša mabota ka dihlogo ge e ba re fošitše karabo. Moruti yo mongwe o be a goboša barutwana ka tša botona le botshadi ge a be a hlahloba mošomo wa gae wa sekolo le bona. Go oketša moo, ke be ke gakantšhwa le go boifišwa ke dithuto tša Katholika tše bjalo ka mollo wa dihele. Go se go ye kae, go ineela ga-ka go Modimo go ile gwa hwelela.

Go Kgakgelwa Bophelong bjo bo se Nago Morero

Ka ge ke be ke hloka tlhahlo ya moya, ke ile ka thoma go fetša nako ke e-na le batho ba gobogilego le ba šoro mafelong a go tantsha (disco). Gantši go be go lwewa gomme dithipa, diketane, mapotlelo le ditulo di be di dirišwa e le dibetša. Gaešita le ge ke be ke sa tšee karolo dintweng tšeo, ka nako e nngwe ke ile ka bethwa go fihlela ke idibala.

Mafelelong ke ile ka tenwa ke lefelo leo gomme ka nyaka mafelo a mangwe a go tantsha ao a bego a se na dintwa. Gaešita le wona mafelong ao go be go dirišwa dihlare-tagi. Eupša go e na le gore ke thabe le go ba le khutšo ya monagano, dihlare-tagi di ile tša mpontšha dilo tšeo di sego gona le go ntlišetša dipelaelo.

Gaešita le ge ke be ke sa thaba, ke ile ka goketša yo mongwe wa baratho ba-ka José Luis le mogwera wa  gagwe wa paala e lego Miguel gore ba diriše dihlare-tagi. Re be re kgakgetšwe lefaseng le le gobogilego gotee le bafsa ba bangwe ba bantši ka nako yeo kua Sepania. Ke be ke dira selo le ge e le sefe gore ke hwetše tšhelete ya go reka dihlare-tagi. Ke ile ka lahlegelwa ke seriti.

Jehofa o a Ntlhakodiša

Ka nako ye, ke ile ka boledišana gantši le bagwera ba-ka ka go ba gona ga Modimo le morero wa bophelo. Ke ile ka thoma go tsoma Modimo ka go nyaka motho yo ke bego nka mo tšhollela sa mafahleng. Ke be ke lemogile gore Francisco, e lego yo mongwe wa bašomi-gotee le nna, o be a sa swane le ba bangwe. O be a bonagala a thabile, a botega e bile a le botho, ka gona ke ile ka dira phetho ya go mo tšhollela sa mafahleng. Francisco e be e le yo mongwe wa Dihlatse tša Jehofa, gomme o ile a nnea tokollo ya Morokami yeo e bego e e-na le sehlogo seo se bego se bolela ka dihlare-tagi.

Ka morago ga go bala sehlogo seo, ke ile ka rapelela thušo ya Modimo ka re: “Morena, ke a tseba gore o gona, gomme ke nyaka go go tseba le go dira thato ya gago. Hle nthuše!” Francisco le Dihlatse tše dingwe ba ile ba diriša Beibele go nkgothatša gomme ba nnea dikgatišo tše di theilwego Beibeleng gore ke di bale. Ke ile ka lemoga gore ba be ba nnea thušo yeo ke bego ke e kgopetše go Modimo. Go se go ye kae ke ile ka thoma go boledišana le bagwera ba-ka le José Luis ka dilo tšeo ke bego ke ithuta tšona.

Ka letšatši le lengwe ge re be re e-tšwa khonsateng ya mmino wa rock le bagwera ba-ka, ke ile ka ikarola go bona. Ke ile ka ba lebeledišiša bjalo ka mmogedi yo a sa tšeego karolo, gomme ke ile ka bona kamoo boitshwaro bja rena bo bego bo gobogile ka gona ka baka la tutuetšo ya dihlare-tagi. Ka yona nako yeo, ke ile ka dira phetho ya go lahla tsela yeo ya bophelo le gore ke be yo mongwe wa Dihlatse tša Jehofa.

Ke ile ka kgopela Francisco gore a nnee Beibele, gomme o ile a nnea yona gotee le puku yeo e nago le sehlogo se se rego Therešo ye Išago Bophelong bjo bo sa Felego. * Ge ke be ke bala ka kholofetšo ya Modimo ya gore o tla phumola megokgo ka moka gaešita le go fediša lehu, ga se ka ka ka belaela gore ke hweditše therešo yeo e ka lokollago batho. (Johane 8:32; Kutollo 21:4) Ka morago, ke ile ka ya sebokeng Holong ya Mmušo ya Dihlatse tša Jehofa. Ke ile ka kgahlwa kudu ke bogwera le lerato tšeo ke ilego ka di hwetša moo.

Ka ge ke be ke fagahletše go botša ba bangwe ka seo ke se bonego ge ke be ke le Holong ya Mmušo, gatee-tee ke ile ka bitša José Luis le bagwera ba-ka gomme ka ba botša. Matšatši a sego kae ka morago, ka moka ga rena re ile ra ba gona sebokeng. Ngwanenyana yo mongwe yo a bego a dutše ditulong tša ka pele ga rena o ile a re utswa ka leihlo. Go molaleng gore o be a makaditšwe ke sehlopha se sa masogana a meriri e metelele sa mahiphi gomme o ile a kgonthišetša gore ga a sa hlwa a lebelela morago gape. O swanetše go ba a ile a makala ge a re bona gape re tlile Holong ya Mmušo bekeng e latelago, gomme ka nako yeo re apere disutu e bile re tlemile dithai.

Kapejana ka morago ga moo, nna le Miguel re ile ra ya kopanong ya tikologo ya Dihlatse tša Jehofa. Re be re se ra ka ra bona selo se se swanago le seo pele—borwarre bja kgonthe bja batho ba nywaga ka moka. Le gona, se se makatšago le go feta ke gore kopano e be e swaretšwe holong yeo re bego re sa tšwa go ba le khonsate ya mmino wa rock go yona. Eupša nakong ye, boemo bjo bo bego bo le moo le mmino woo re o kwelego di ile tša re kgothatša.

 Sehlopha sa rena ka moka se ile sa thoma go ithuta Beibele. Ka July 26, 1974, mo e ka bago dikgwedi tše sewai ka morago, nna le Miguel re ile ra kolobetšwa. Re be re e-na le nywaga e 20 bobedi bja rena. Ba bangwe ba bane sehlopheng sa rena ba ile ba kolobetšwa dikgwedi tše sego kae ka morago. Tlwaetšo ya Beibele yeo ke bego ke e hweditše e ile ya ntutueletša go thuša mma, yo a bego a sa fele pelo, ka mediro ya ka gae le go boledišana le yena ka tumelo ya-ka yeo ke sa tšwago go e hwetša. Re ile ra ba monwana le lenala. Le gona, ke ile ka beela nako e ntši ka thoko e le gore ke thuše baratho ba-ka ba bašemane le ba banenyana.

Ge nako e dutše e e-ya, mma gotee le bana bešo ka moka, ka ntle le o tee wa bona, ba ile ba ithuta therešo ya Beibele gomme ba kolobetšwa e le Dihlatse tša Jehofa. Ka 1977, ke ile ka nyala Soledad. E be e le ngwanenyana yola a ilego a makala ge a be a re bona re tlile Holong ya Mmušo ka lekga la pele. Ka morago ga dikgwedi tše sego kae, bobedi bja rena re ile ra ba babulamadibogo, e lego tsela yeo ka yona Dihlatse tša Jehofa di bitšago baboledi ba nako e tletšego ba ditaba tše dibotse.

Moratiwa o a Lopollwa

Kgaetšedi ya-ka yo monyenyane e lego Mariví o ile a gobošwa ka tša botona le botshadi ge e be e sa le yo monyenyane gomme tiragalo yeo e tšhošago e ile ya mo kgoma o šoro. Ge a be a le mahlalagading, o ile a thoma go phela bophelo bjo bo gobogilego bjoo bo bego bo akaretša go diriša dihlare-tagi, go utswa le go gweba ka mmele. Ge a e-na le nywaga e 23, o ile a išwa kgolegong moo a ilego a tšwetša pele bophelo bja gagwe bja go se kwe.

Ka nako yeo, ke be ke hlankela bjalo ka molebeledi wa tikologo, e lego modiredi wa mosepedi wa Dihlatse tša Jehofa. Ka 1989, nna le Soledad re ile ra abelwa go šoma tikologong yeo go bego go e-na le kgolego yeo Mariví a bego a le go yona. Bahlankedi ba mmušo ba be ba sa tšwa go mo amoga ngwana wa gagwe wa mošemane; o be a kwele bohloko kudu gomme a se sa hlwa a kganyoga go phela. Ka letšatši le lengwe ke ile ka mo etela gomme ka šišinya gore re ithute Beibele gotee gomme a dumela. Ka morago ga go ithuta Beibele ka kgwedi e tee, o ile a kgaotša go diriša dihlare-tagi le go kgoga. Ke ile ka thabišwa kudu ke go bona gore Jehofa o mo neile matla a go dira diphetogo tše bophelong bja gagwe.—Baheberu 4:12.

Kapejana ka morago ga ge a thomile go ithuta, Mariví o ile a thoma go boledišana le bagolegwa-gotee le yena le bahlankedi ba kgolego ka ditherešo tša Beibele. Gaešita le ge a ile a išwa dikgolegong tše di fapa-fapanego, o ile a tšwela pele a bolela le ba bangwe ka Beibele. Kgolegong e nngwe o ile a ba a tsena diseleng ka moka a bolela le bagolegwa ka Beibele. Go theoša le nywaga, Mariví o ile a thoma dithuto tša Beibele le bagolegwa ba bantši dikgolegong tše di fapa-fapanego.

Ka letšatši le lengwe, Mariví o ile a mpotša gore o kganyoga go neela bophelo bja gagwe go Jehofa le go kolobetšwa. Eupša o be a sa dumelelwa go tloga kgolegong goba gore motho yo mongwe a tsene go tlo mo kolobetša. O ile a kgotlelela nywaga e mengwe e mene kgolegong yeo e gobogilego. Ke’ng seo se mo thušitšego go boloka tumelo ya gagwe e le matla? Ka nako e swanago tlwaa le yeo phuthego ya lefelong leo e bego e swara diboka ka yona, o be a bala dikgatišo tše di bego di ithutwa dibokeng a le ka seleng. Le gona o be a e-na le lenaneo la ka mehla la go ithuta Beibele le go rapela.

Ge nako e dutše e e-ya, Mariví o ile a išwa kgolegong e šireleditšwego kudu yeo e bego e e-na le letangwana la go rutha. O ile a nagana gore maemo a a mafsa a ka dira gore go kgonege gore a kolobetšwe. Mafelelong Mariví o ile a newa tumelelo ya gore a kolobetšwe. Ke kamoo ke ilego ka ikhwetša ke nea polelo ya kolobetšo ya gagwe. Ke be ke e-na le yena tiragalong ya bohlokwa kudu bophelong bja gagwe.

Ka baka la tsela yeo a bego a phela ka yona pele, Mariví o ile a swarwa ke AIDS. Go sa šetšwe seo, boitshwaro bja gagwe bjo bobotse bo ile bja dira gore a lokollwe kgolegong pele ga nako ka March 1994. O ile a dula gae le mma gomme a phela bophelo bja go dula a swaregile bjalo ka Mokriste go fihlela ge a e-hwa nywaga e mebedi ka morago.

 Go Fenya Maikwelo a Gobatšago

Le nna ga se ka tšhabela ka mo go feletšego ditla-morago tša bophelo bja-ka bja pele. Tsela yeo tate a nkgobošitšego ka yona gotee le tsela yeo ke bego ke phela ka yona ge ke be ke sa le mahlalagading, di kgomile semelo sa-ka. Ge ke šetše ke godile, ke be ke hlaselwa gantši ke maikwelo a go ba molato le go ipona ke se na mohola. Ka dinako tše dingwe ke ile ka ikwa ke gateletšegile kudu. Lega go le bjalo, Lentšu la Modimo le nthušitše kudu go lwantšha maikwelo a ao a sa kgahlišego. Go theoša le nywaga, go naganišiša leboelela ka mangwalo a bjalo ka Jesaya 1:18 le Psalme 103:8-13 go nthušitše go fokotša maikwelo a sa kgaotšego a go ikwa ke le molato.

Thapelo ke thušo e nngwe ya moya yeo ke e dirišago go fenya maikwelo a go ikwa ke se na mohola. Gantši ke be ke ikhwetša ke rapela Jehofa ke sekišitše megokgo. Lega go le bjalo, ke matlafatšwa ke mantšu a ngwadilwego go 1 Johane 3:19, 20 ao a rego: “Ka se re tla tseba gore re theilwe therešong, gomme re tla kgonthiša dipelo tša rena pele ga gagwe ge e le mabapi le eng le eng yeo dipelo tša rena di re ahlolago go yona, gobane Modimo ke yo mogolo go feta dipelo tša rena gomme o tseba dilo tšohle.”

Ka ge ke batamela Modimo ka pelo e ‘robegilego le e setlegilego,’ ke lemoga gore ga ke motho yo mobe go swana le kamoo ke bego ke nagana ka gona. Beibele e kgonthišetša bohle bao ba nyakago Jehofa gore ga a nyatše bao ba itsholelago boitshwaro bja bona bja nakong e fetilego go tšwa pelong gomme ba dira thato ya gagwe.—Psalme 51:17.

Nako le nako ge ke e-ba le maikwelo a go se ikholofele, ke leka go tlatša monagano wa-ka ka dikgopolo tše di swanetšego, mohuta wa dilo tša moya tšeo di hlalositšwego go Bafilipi 4:8. Ke swere mantšu a Psalme 23 le Thuto ya Thabeng ka hlogo. Ge dikgopolo tše di fošagetšego di tšwelela mogopolong wa-ka, ke boeletša ditemana tše tša Beibele ka hlogo. Go lwantšha dikgopolo tše di fošagetšego ka tsela ye go nthuša kudu ge ke hlorega boroko.

Mothopo o mongwe wa thušo ke theto yeo ke e newago ke mosadi wa-ka le Bakriste ba bangwe bao ba godilego ka tsebo. Gaešita le ge mathomong ke be ke thatafalelwa ke go amogela dikgothatšo tša bona, Beibele e nthušitše go kwešiša gore lerato “le dumela tšohle.” (1 Bakorinthe 13:7) Le gona ganyenyane-ganyenyane ke ithutile go amogela mafokodi a-ka ka boikokobetšo.

Se se kgahlišago ke gore go lwantšhana ga-ka le maikwelo a fošagetšego go nthušitše go ba molebeledi wa mosepedi yo a nago le kwelobohloko. Nna le mosadi wa-ka re feditše mo e ka bago nywaga e 30 re le baboledi ba nako e tletšego ba ditaba tše dibotse. Lethabo leo ke le hwetšago ge ke hlankela ba bangwe le nthuša go lebala maikwelo a fošagetšego le dilo tše di nyamišago tše di diregilego bophelong bja-ka.

Ga bjale ge ke lebelela morago gomme ke nagana kamoo Jehofa a ntšhegofaditšego ka gona, ke ikwa ke tutueletšega go bolela go etša mopsaleme ge a be a re: “Rêta Morêna! . . . A Xo lebalêla melato ya xaxo yohle; a Xo fodiša malwetši a xaxo ka moka, A hlakodiša ’phelô by’axo moleteng, a Xo apeša botho le dikxauxêlô.”—Psalme 103:1-4.

[Mongwalo wa tlase]

[Mantšu a ipiletšago a tsopotšwego go letlakala 30]

Ke be ke hlaselwa gantši ke maikwelo a go ba molato le go ipona ke se na mohola. Lega go le bjalo, Lentšu la Modimo le nthušitše kudu go lwantšha maikwelo a ao a sa kgahlišego

[Diswantšho go letlakala 27]

Moratho wa-ka José Luis le mogwera wa gagwe Miguel ba ile ba latela mohlala wa-ka o mobe le o mobotse

[Seswantšho go letlakala 28, 29]

Lapa la ga-Morcillo ka 1973

[Seswantšho go letlakala 29]

Ge Mariví e be e le mogolegwa

[Seswantšho go letlakala 30]

Ke e-na le mosadi wa-ka, Soledad