Maua Le Mapusaga Mai Mafatiaga a o Talavou

Ua Faamatalaina e Eusebio Morcillo

Iā Setema i le 1993, na ou asiasi ai i se falepuipui mo ē faia solitulafono matuiā. O le māfuaaga o loʻu asiasi atu ona o le papatisoga o loʻu tuafafine laʻitiiti o Mariví, o loo avea ma pagota i inā. A o oʻu faia le sauniga o le papatisoga, sa matamata ma le lē gasē nisi pagota ma ē faigaluega o le falepuipui. A o leʻi oʻu faamatalaina atu pe na faapefea ona ma iai i inā, seʻi oʻu faamatala atu le amataga o ma olaga.

NA OU fanau i Sepania iā Me 5, 1954, o le ulumatua o le fanau e toʻavalu, ae lona tolu Mariví. Sa tausia aʻe i matou o ni Katoliko mapolotu e le tinā o lo matou tinā, ma sa ou lagonaina le fiafia e mafuta atu i le Atua a o faatasi ma ia. Peitaʻi sa lē lelei le tulaga faaleagaga o lo matou aiga. E fasi e tamā lo matou tinā ma sasa i matou le fanau i taimi uma. Na matou lagona le fefe i taimi uma, ma sa ou matuā faanoanoa pe a vaai atu o mafatia tinā.

Sa ou fesagaʻi foʻi ma nisi tulaga faavaivailoto i le aʻoga. Sa faafetoʻai e se tasi o faiaʻoga, o se faifeʻau, matou ulu i le puipui o le fale pe a sesē matou tali i se fesili. O le isi faifeʻau sa ia faileagaina tamaiti aʻoga, a o fesoasoani i a latou meaaʻoga. E lē gata i lea, sa ou lē mautonu ma fefe tele ona o aʻoaʻoga a le Katoliko e pei o le afi i seoli. E leʻi umi ae mou atu loʻu naunau i le Atua.

Na Taaʻina i se Olaga Leaga

Ona e leʻi iai ni taʻiala ina ia ou ola ai i se auala e faafiafia ai le Atua, o lea na amata ai loa ona ou faatasitasi i falesiva ma tagata amio lē mamā ma sauā. E masani ona fai ai misa e faaaogā ai naifi, o filifili uʻamea, o atigi fagu mataʻetaʻe, ma nofoa e fai ma auupega. E ui lava e leʻi faia ai saʻu vaega i na fusuaga, ae i se tasi taimi, na ou lavea ma matapogia ai.

Na mulimuli ane ou fiu i lenā siʻomaga, ma na ou saʻili mo ni falesiva e faalēvevesi tele. Ae sa faaaogā ai foʻi fualaau faasāina i inā. Peitaʻi, nai lo le aumaia e fualaau faasāina o le faamalieina ma le filemu i loʻu mafaufau, sa na o le faasesēina ai ma aumai ai popolega.

 E ui e leʻi faamalieina aʻu, ae na ou tataʻi José Luis, o se tasi o oʻu uso laʻitiiti, ma laʻu uō mamae o Miguel, i le olaga lava lea e tasi. Sa taaʻina i matou i lenā taimi i se lalolagi leaga, faatasi ma le tele o isi talavou i Sepania. Sa ou faia so o se mea ina ia maua ai se tupe e faatau ai fualaau faasāina. Na mou atu loʻu fiafia iā te aʻu lava.

Laveaʻiina e Ieova

O le taimi lea, sa masani ona matou talanoa ai ma aʻu uō e faatatau i le iai o le Atua ma le uiga o le olaga. Na amata ona ou saʻili i le Atua e ala i le suʻe o se tasi e faamatala i ai oʻu lagona. Na ou mātauina le ese o Francisco mai isi, o se tasi ma te faigaluega faatasi. Na foliga mai e fiafia o ia, e faamaoni ma e agalelei, o lea na ou filifili ai loa e faailoa atu oʻu manatu iā te ia. O Francisco o se Molimau a Ieova, ma na ia tuu mai iā te aʻu se kopi o Le Olomatamata lea na iai se mataupu e faatatau i fualaau faasāina.

Ina ua uma ona faitauina le mataupu, sa ou tatalo i le Atua mo se fesoasoani, e faapea: “Le Alii e, ou te talitonu e iai moni lau afio, ma ou te fia iloa oe ma fai lou finagalo. Faamolemole fesoasoani mai iā te aʻu!” Sa faaaogā e Francisco ma isi Molimau le Tusi Paia e faalaeiau ai aʻu, ma aumai ni lomiga faale-Tusi Paia e faitau. Na oo ina ou iloa o loo latou aumai iā te aʻu le fesoasoani lea sa ou ōle atu ai i le Atua. E leʻi umi ae amata ona ou talanoa i aʻu uō ma José Luis e faatatau i mea na ou aʻoaʻoina.

I se tasi aso, ina ua uma se koneseti faamusika na matou auai ai ma nisi o aʻu uō, sa ou savali ese mai le matou vaega. Sa ou mātauina le tulaga leaga ua oo i ai a matou amio ona o le faaaogāina o fualaau faasāina. I lenā taimi, na ou filifili ai loa e teena lenā olaga ae avea o se Molimau a Ieova.

Sa ou fai iā Francisco e aumai saʻu Tusi Paia, ma na ia aumai iā te aʻu se Tusi Paia faatasi ma le tusi O Le Upu Moni E Taʻitaʻia Ai I Le Ola Faavavau. * Ina ua ou faitau e faatatau i le folafolaga a le Atua e faapea o le a soloiesea loimata uma, ma e oo lava i le oti o le a aveesea, na ou mautinoa ai, ua ou maua le upu moni lea e mafai ona faasaʻoloto ai tagata. (Ioane 8:32; Faaaliga 21:4) Mulimuli ane, na ou auai i se sauniga i le Maota mo Sauniga a Molimau a Ieova. Na matuā faagaeetia aʻu i uiga faaleuō ma le māfana na latou faaalia mai iā te aʻu.

Ona o le naunau e taʻu atu i isi mea na tupu iā te aʻu i le Maota mo Sauniga, o lea na ou alu ai loa faapotopoto faatasi José Luis ma aʻu uō, ma faamatala iā i latou mea uma. Ina ua tuanaʻi ni nai aso, sa matou ō uma loa i se sauniga. Sa tepa mai se tasi o teine na nofo i o matou luma, e foliga ua teʻi i le vaai mai i le matou vaega lauulu uumi, ma e leʻi toe fia tepa mai i tua. E mautinoa na faateʻia o ia ina ua matou toe foʻi ane i le Maota mo Sauniga i le vaiaso na sosoo ai, o le taimi lea ua fai o matou suti ma fusiua.

E leʻi leva lava talu mai le taimi lea, ae ma auai loa foʻi ma Miguel i se fonotaga matagaluega a Molimau a Ieova. E leʻi oo muamua iā i maʻua se mea faapea, o se aufaatasiga moni a uso, o tagata e eseese o latou matutua. Ma o le mea e matuā ofo ai, sa faia le fonotaga i le fale faafiafia lea sa fai ai le koneseti faamusika lea foʻi sa matou ō ai. Peitaʻi i le taimi lea, na faalaeiauina i matou i musika ma mea sa faia ai.

 Na amata ona suʻesuʻe e le matou vaega atoa le Tusi Paia. I le pe ā ma le valu masina mulimuli ane, na ma papatiso ai ma Miguel iā Iulai 26, 1974. O le taimi lenā ua taʻi lua sefulu uma o ma tausaga. O le isi toʻafā o le matou vaega na papatiso i ni nai masina mulimuli ane. Sa uunaʻia aʻu e aʻoaʻoga a le Tusi Paia na ou maua, ina ia amata ona ou fesoasoani i loʻu tinā i feʻau i le fale, ma faamatala i ai oʻu talitonuga. O ia o se tinā onosaʻi, ma sa māfana le ma mafutaga. Sa tele foʻi le taimi na alu e fesoasoani ai i oʻu uso ma tuafafine laiti.

Na maua uma e loʻu tinā ma nai oʻu tei le upu moni o le Tusi Paia, ma papatiso o ni Molimau a Ieova, seʻi vaganā ai se tasi o oʻu uso. I le 1977, na ou faaipoipo ai iā Soledad, le teine talavou lea na faateʻia ina ua vaai mai iā matou i le aso muamua na matou ō atu ai i le sauniga. I ni nai masina, na ma paeonia uma ai loa, e pei ona taʻua ai tagata talaʻi faataimi atoa o le tala lelei a Molimau a Ieova.

Ua Faasaʻolotoina se Tasi e Pele

Sa faileagaina i faiga tau feusuaʻiga loʻu tuafafine o Mariví a o laʻitiiti, ma na aafia ai o ia. A o talavou, sa amata ona ia ola i se olaga na aafia i le faaaogāina o fualaau faasāina, gaoi, ma faiga faatalitane. I le 23 o ona tausaga, na loka ai o ia i le falepuipui, lea sa faaauau ai pea lona olaga lē mamā.

O le taimi lenā o loo oʻu galue o se ovasia matagaluega, o se tagata talaʻi femalagaaʻi a Molimau a Ieova. I le 1989, na tofia ai i maʻua ma Soledad i le vaipanoa lea na faafalepuipui ai Mariví. E leʻi leva talu ona aveesea e le malo lana tama tama; sa matuā mafatia ai, ma sa ia manatu e sili pe a oti. Sa ou asiasi atu iā te ia i se tasi aso, ma fai i ai e ma te suʻesuʻe faatasi le Tusi Paia, ma na ia talia fiafia lea tulaga. Ina ua mavae se masina talu ona suʻesuʻe, sa ia taofia loa le faaaogāina o fualaau faasāina ma le tapaa. Sa matuā faafiafiaina aʻu i le vaai atu o loo faamalosia o ia e Ieova e faia ia suiga i lona olaga.—Eperu 4:12.

E leʻi leva talu ona suʻesuʻe Mariví, ae amata loa ona talaʻi i isi pagota ma leoleo o le falepuipui. Na faaauau pea lana talaʻiga e ui na siitia mai lea falepuipui i lea falepuipui. I se tasi foʻi o falepuipui, sa ia talaʻi mai lea sela i lea sela. A o faagasolo tausaga, sa amata ona suʻesuʻe e Mariví ma le tele o pagota le Tusi Paia, i falepuipui eseese.

I se tasi aso na fai mai ai Mariví iā te aʻu ua fia tuuina atu lona ola iā Ieova ma ua fia papatiso. Ae sa faasā ona ia tuua le falepuipui, pe alu atu foʻi se isi e papatisoina o ia i inā. E fā tausaga o ia onosaia pea lenā tulaga leaga i le falepuipui. O le ā sa mafai ai ona malosi lona faatuatua? I taimi e fai ai sauniga a le faapotopotoga, sa ia autaluina le polokalame lava lea e tasi i le falepuipui. Sa iai foʻi sana faasologa o le suʻesuʻeina o le Tusi Paia ma le tatalo e lē aunoa.

I se taimi mulimuli ane, na ave ai Mariví i se falepuipui e iai se vai taʻele. Sa ia manatu, atonu e mafai ona papatisoina o ia i lea falepuipui. Ma o le tulaga lenā na oo i ai, na faatagaina Mariví e papatiso. O le māfuaaga lea o loʻu oo atu, ina ia faia le lauga o lona papatisoga, ma sa ou faatasi ma ia i le taimi e sili ona tāua o lona olaga.

Na maua Mariví i le AIDS, ona o le olaga sa ola muamua ai. Ae e ui i lea, na vave ona magalo o ia iā Mati 1994 ona o lona amiolelei. Sa la nonofo faatasi ma tinā, ma sa alu lona taimi i meafai faa-Kerisiano seʻia oo ina maliu, i le lua tausaga mulimuli ane ai.

Manumalo i Lagona Vaivai

E leʻi mafai foʻi ona ou sao mai aafiaga o le olaga sa ou iai muamua. Na aafia oʻu uiga ona  o le sauā o loʻu tamā ma le olaga sa ou iai a o talavou. Ina ua ou matua, na ou mafatia pea i lagona nofosala ma le lē taulau. O nisi taimi na ou matuā lotovaivai ai lava. Peitaʻi, na matuā aogā le Afioga a le Atua iā te aʻu e tauivi ai ma nei faalogona lē lelei. Sa fesoasoani iā te aʻu le manatunatu loloto pea i mau e pei o le Isaia 1:18 ma le Salamo 103:8-13, e faaitiitia ai nei lagona nofosala a o faagasolo tausaga.

O le tatalo o le isi lea fesoasoani faaleagaga na foaʻi mai e Ieova iā te aʻu, e tetee atu ai i nei faalogona lē aogā. E masani foʻi ona ou tatalo ma loimata iā Ieova. E ui i lea, na faamalosia aʻu i upu o loo i le 1 Ioane 3:19, 20 e faapea: “O le mea lenei tatou te iloa ai ua tupuga mai i tatou i le upu moni, ma ua tatou mautinoa i o tatou loto e alofa o ia iā i tatou e tusa lava po o ā mea e faasala ai i tatou e o tatou loto, auā e sili atu le Atua i o tatou loto, e na te silafia foʻi mea uma lava.”

Ina ua ou faalatalata atu i le Atua ma se loto “momomo ma le nutimomoia,” na ou iloa ai, e lē o aʻu o se tagata leaga e pei ona ou manatu ai. Ua faamautinoa mai e le Tusi Paia i ē uma e saʻili iā Ieova, e na te lē inosia i latou o ē salamō mai a latou amio tuai ae liliu atu e fai lona finagalo.—Salamo 51:17.

O so o se taimi e oso aʻe ai lagona lē lelei, ou te taumafai pea e mafaufau i manatu lelei, o mea faaleagaga lea o loo taʻua i le Filipi 4:8. Sa ou taulotoina foʻi le Salamo 23 ma le Lauga a Iesu i le Mauga. Pe a oso aʻe manatu lē lelei, ou te nofo ma tauloto lemū ifo iā te aʻu nei mau. Na aogā iā te aʻu le faia faapea pe a oso aʻe manatu vaivai, aemaise lava i taimi e faigatā ai ona maua se moe.

O se isi fesoasoani, na ala mai i faalaeiauga a laʻu avā ma isi Kerisiano taʻumatuaina. I le taimi muamua, na faigatā ona ou talitonu i a latou upu, ae na fesoasoani le Tusi Paia ia ou iloa ai, o le alofa e “talitonu i mea uma.” (1 Korinito 13:7) Ma e mautinoa na oo lava ina ou malamalama, e iai oʻu vaivaiga ma mea e gata ai loʻu mafai.

O se tasi o aogā o loʻu tauivi pea ma oʻu lagona vaivai, ua mafai ai ona avea aʻu ma tagata talaʻi femalagaaʻi e malamalama i faalogona o isi. Ua toeitiiti nei 30 tausaga o ma galulue ma laʻu avā o ni tagata talaʻi faataimi atoa o le tala lelei. Ua fesoasoani iā te aʻu le olioli e maua mai le auauna i isi, e aveesea ai faalogona lē lelei ma loʻu toe manatua o mea leaga sa ou faia.

A ou toe mafaufau nei la ma manatunatu i faamanuiaga uma ua foaʻi mai e Ieova iā te aʻu, e uunaʻia aʻu e faapea atu e pei o le faisalamo: “Ia e faamanū atu iā Ieova, . . . o lē faamagaloina au amio leaga uma lava; o lē faamālōlōina ou maʻi atoa uma; o lē faaolaina mai lou ola ai le tuugamau; o lē faapaleina oe i le alofa ma le alofa mutimuti vale.”—Salamo 103:1-4.

[Faaopoopoga i lalo]

[Faamatalaga faaopoopo i le itulau 30]

Na ou mafatia pea i lagona nofosala ma le lē taulau. Peitaʻi, na matuā aogā le Afioga a le Atua iā te aʻu e tauivi ai ma nei faalogona lē lelei

[Ata i le itulau 27]

Na mulimuli loʻu uso o José Luis ma laʻu uō o Miguel i aʻu faaaʻoaʻoga lelei ma leaga

[Ata i le itulau 28, 29]

Le aiga o Morcillo i le 1973

[Ata i le itulau 29]

Le taimi a o falepuipui Mariví

[Ata i le itulau 30]

O maʻua ma laʻu avā o Soledad