M Zua A Msurshima Ken Mbamzeyol Av Mba Uye

Kwaghôron u Eusebio Morcillo

Ken uwer u Setemba, 1993 la, m za hen purusu ugen u i kuran un hanma shighe yô. M za u za eren anmgbian wam u kwase Mariví, u i wuhe un ken purusu la batisema. Mbakwarev mbagenev man uwada tile ving lu kenger er m lu nan kwaghôron u batisema yô. Kpa cii man m pase er a nyôr purusu shi mo kpa m za u eren un batisema ker yô, de me vande ôron ne kwagh u uma wam u uye la.

I MAREM ken tar u Ishpania, ken uwer u Mei 5, 1954. I mar se anigheni, ka mo m lu waniunda ye. Mariví ngu u sha utar. Ngô wase u tamen yange yese se. Se zaan adua u Fada kpoghuloo, man m umbur er shighe u m lu vea na la m lu eren kwaghaôndo sha gbashima henen mer m ngu civir Aôndo sha mimi yô. Kpa gema hen ya u mbamaren av yô, kwaghaôndo gba or môm ishima ga. Terem gbidyen ngôm hanma shighe kua se mbayev nav kpaa. Nahan se cian kwagh kpishi shi mea nenge er ngôm a lu yan ican nahan i vihim kpishi.

Ken makeranta kpa m tagher a akaa a vihin mo tsung. Yange a pine se mpin ken klase man sea na mlumun sha mi ga yô, tica wase ugen u lu fada yô a kôr se ityough a kema ken kpekpe. Fada ugen di yange una nengen ityom i a ne mbayevmakeranta ér ve za er ken ya yô, a kighir ve a yav a ve. Heela tseegh ga, atesen a Mbafada agen, er igyamusu nahan cimin mo kpishi shi cier mo iyol kpaa. Tsô kwagh u Aôndo hii u duen mo ishima kure kure.

Dang Ya Tor ken a Mo

Er m lu a or u tesen mo er me er ishima i Aôndo ga yô, m gba zenden a udangmbaiorov mba wan ipila sha ajiir a kuhwan kwagh. Ashighe kpishi i nôngo num hen ajiir ne sha ahô man mshirim man akpe kua mkônom ma teman. Er m faan gbidyen iyol ga nahan kpa, i nôngo num iyange igen i gbidyem kwagh sha ityou m hume.

Tsô m de u zan sha ajiir angera nahan, m gema zan sha ajiir a kuhwan kwagh a ipila lu her kpishi ga la tseegh. Sha ajiir angan je kpa, mba man mcimbim ma bov ngee her kpishi. Mcimbim ma bov nam msaanyol man bemshima ga, ma nzughul a nzughul a mo.

 Er uma u m lu eren ne duem ishima nahan kpa, m mee anngôm u kiriki, José Luis kua ijende yam ishima ishima, Miguel, m nyôr a ve ken mcimbim ma man. Se lu eren dang kpoghuloo vea agumaior agen a ken tar u Ishpania hen shighe la. M eren hanma kwagh u m fetyô cii sha er me zua a inyaregh ki yamen mcimbim ma bov yô. M saa ishe cica cii.

Yehova Yimam

Shighe u m lu eren dang zenden ne, m lu pasen azende am mer Aôndo ngu shi m lu ôron a kwagh u uma u dedoo kpaa. Tsô m gba nôngon mer me fa Aôndo, nahan m hii u keren or u me pase nan mbamzeyol av yô. Orgen u yange se eren tom imôngo yô, iti na ér Francisco, lu inja kposo a mbatomov mbagenev cii. Saan un iyol shi lu or u eren kwagh sha mimi, u fan kwagh kpaa, nahan m za kohol un, m pase un mbamzeyol av cii. Francisco lu Orshiada u Yehova, nahan a nam Iyoukura i í er kwagh u mcimbim ma bov yô.

M ôr Iyoukura shon, m been yô m er msen hen Aôndo mer a wasem. M kaa mer: “Tere, m fa u ngu uma, m soo u fan we shi eren ishima you kpaa. Yô shi wasem!” Francisco man Mbashiada mbagenev taver mo ishima ken Bibilo shi nam ityakerada igen i pasen Bibilo ér m ôr. Nahan m mase kaven er ve lu nam mo iwasen i m sen hen Aôndo la yô. Fese je maa m hii u ôron azende am man José Luis akaa a m lu henen la.

Iyange igen la, er m za kpingi vea azende am agen se lu hiden yô, m undu ve m hide ken hua kpuaa. M gba kenger ve, nahan m mase nengen er mcimbim ma bov ma nzughul a vese se saa ishe cica cii yô. Hii iyange la je, m de uma la, maa m hingir Orshiada u Yehova.

M sôn Francisco Bibilo, nahan a nam Bibilo môm kua takerada u i yer ér The Truth That Leads to Eternal Life la. * Er m ôr kwagh u ityendezwa i Aôndo a er wener una ese se mliam sha ashe kera shi ku je kpa una kar a mi kera la yô, m fa je mer m zua a mimi u una pase uumace una tuhwa la ve. (Yohane 8:32; Mpase 21:4) Ayange nga kar yô, m za mkombo ken Iyou i Tartor i Mbashiada mba Yehova. I ngohol mo saan saan, nahan kwagh ne doom je zua ga.

Er gbam ishima u pasen mbagenev akaa a m hen ken Iyou i Tartor la yô, m yila José Luis man azende am agen ave ave je m ôr ve hanma kwagh cii. Ayange nga kar kpuaa yô, se cica cii se mough se za mkombo iyange igen. Wankwase ugen u tema se sha hemen yô gema kenger se fele. A̱ shi nan kpa, er nenge a mbaagboro mba umen ityough kpishi tema un shin ijime yô cier un iyol kpishi, nahan mayange kera gema ashe ijime ga. Alaghga yange a kpilighyol un iyol er shi se hulugh se za mkombo ken Iyou i Tartor kasua u dondon la yô, gadia kwa ne se wuha iyol tsembelee, se ta taya.

Ica i gba ga tsô, mo man Miguel se za mkohol u ningir u Mbashiada mba Yehova. Se lu a vande a nengen a imba kwagh u dedoo ngun nahan ga—se nenge ior kposo kposo lu ken mzough. Man kwagh ka a er yô, i nyôr mkohol ne hen ijiir i môm i se sember zan kpingi her la. Kpa kwa ne yô, mlu u hen ijiir ne man ityogholough  mbi se ungwa la taver se ishima kpen kpen.

Mo man azende am jimin cii se hii u henen Bibilo. Iwer ngi kar anigheni yô, mo man Miguel se er batisema ken uwer u Julai 26, 1974. Se lu anyom 20 hen shighe la. Shi iwer ngi kar kpuaa yô, azende ase agen anyiin kpa er batisema. Ityesen i m zua a mi ken Bibilo la wasem, nahan m hii u wasen ngôm u lu kwase u wan ishima kpishi la u eren ityom hen ya shi m pase un kwagh u jighjigh wam u nan u he ne kpaa. Nahan se hingir kôôsôô. Shi m gba wasen anmgbianev av mba kiriki kpoghuloo je.

Shighe kar yô, ngôm man anmgbianev av ataratar hen mimi u ken Bibilo, er batisema hingir Mbashiada mba Yehova, mase shin môm tseegh. Ken inyom i 1977 la, m vôso Soledad, gumkwase u yange nenge a vese ken Iyou i Tartor sha iyange i se hii zan mkombo ker ve cier un iyol la. Iwer ngi kar kpuaa yô, se tôô tom u pania, ka iti i Mbashiada mba Yehova ve yer mbapasen loho u dedoo hanma shighe je la.

I Yima Ingyôr Yam i Doon Mo Ishima

Shighe u anmgbian wam u kwase Mariví lu iyev la, i yav a na sha igyosough, nahan kwagh ne bende a na tsung. A hingir u eren dang, man mcimbim ma bov shi iin shi eren gbaga kpaa. Shighe u lu anyom 23 la, i wuhe un ken purusu, kpa za hemen u eren dang ker.

Hen shighe la m lu ortamen u zenden nengen atôônanongo a Mbashiada mba Yehova. Ken inyom i 1989 la, i tindim vea Soledad ér se za er tom hen haregh u i wuhe Mariví ken purusu la. Mbahemenev sember ngohol un wan lu a mi; ishima vihi un kpishi je uma kera sar un ga. Er m za un inya iyange igen yô, m kaa a na mer se hen Bibilo imôngo, tsô a lumun. Henen kwagh ka kom uwer môm yô maa a de u man mcimbim ma bov kua taav kpaa. Doom kpishi u nengen er Yehova na un agee a den akaa ne nahan.—Mbaheberu 4:12.

Mariví yange hii Bibilo i henen ica gba ga tsô maa hii u pasen mbakwarev mbagenev kua uwada akaa a ken Bibilo. Shin er i lu musan un, yemen a na ken upurusu kposo kposo nahan kpa, za hemen u pasen kwagh her. Ken purusu ugen la je yô lu zenden pasen mbakwarev kwagh sha ayou a i wuhe ve la. Mariví hen Bibilo a mbakwarev ken upurusu kposo kposo anyom imôngo.

Iyange igen yô, Mariví kaa a mo ér sar un u tseghan iyol na sha ci u Yehova shi eren batisema kpaa. Nahan kpa, i naan un ian i duen ken won ga, shi i lumun ér or nana nyôr ken iyaagh ki purusu nana er un batisema kpaa ga. Nahan a za hemen u wan ishima anyom anyiin ken purusu u ngee a aeren a hôngorough ker kpishi ne. Lu nyi i wase un gbihi jighjigh na ga. Tiônnongo u Mbashiada mba Yehova u hen haregh la yange una nyôr mkombo yô, un kpa a gba timen sha akaa a i lu henen la ken purusu. Shi yange henen Bibilo hanma shighe shi eren msen kpoghuloo kpaa.

Shighe kar yô, i yem a Mariví ken purusu ugen u i kuran un hanma shighe yô; purusu ne lu a ijiir i tungun iyol. Tsô Mariví nenge wener ian due i una er batisema ve. Man kape lu kpaa je la, gadia í na Mariví ian ér a er batisema. Kape yange hii ve hingir u me za na kwaghôron, me er un batisema je la. Nahan m lu a na imôngo sha shighe u hemban doon ken uma na ne.

Er Mariví vande eren dang kera kpishi yô, a tôô AIDS. Kpa er sôr inja kpishi yô, kera bee anyom a gba u una tsa ken purusu la ga; i pase un ken uwer u Maaci, 1994. Mariví hide lu vea ngô wase shi za hemen u eren a aeren a Mbakristu zan zan va mase kpen anyom ahar ken hemen.

 M Hemba Mbamhen mba Kpeegh

Mo iyol yam kpa m ngu yan ican hegen sha ci u uma u m er shighe u m lu iyev la. Ican i terem erem kua uma u m er zum u m lu hian a hia la bende a mo kpishi. Er m gande or ne kpa, ashighe kpishi ishima ngi i nam ibo shi i lum er m gba kwagh ga nahan. Ashighe agen je yô m ure kpishi. Nahan kpa Mkaanem ma Aôndo wasem u dughun mbamhen mba kpeegh mban ken a mo kera. Ka m shi henen sha avur a Bibilo, er Yesaia 1:18 man Pasalmi 103:8-13 nahan; kwagh ne wasem ken anyom a karen ne u panden ijungwen sha akaabo a m er iyev la.

Kwagh ugen u a wasem u hemban mbamhen mba kpeegh mban yô, ka msen. Ashighe kpishi m eren msen hen Yehova a mliam ashe. Heela tseegh ga, mkaanem ma ken 1 Yohane 3:19, 20 la kpa taver mo ishima, ma kaa ér: “Sha kwagh ne yô, sé fa er se lu ken mimi man sea pever asema ase sha ishigh Nagh, gadia aluer ishima ia na se ibo yô, Aôndo hemba ishima yase man A fa akaa cii kpaa.”

Er m eren msen hen Aôndo sha mimi man a ‘ishima i uren tsung yô,’ m mase kaven mer m vihi er m henen nahan la ga. Bibilo taver mba ve keren Yehova la cii asema ér una laha mba ve vaa afanyô sha mimi sha akaabo a yange ve vande eren shi ve gem eren ishima na la ga.—Pasalmi 51:17.

Hanma shighe u ishima ka ia hii u nan mo ibo yô, m hen sha akaa a injaa, er a i nger ken Mbafilipi 4:8 la nahan. M fa u ôron Upasalmi 23 jimin cii ken ityou kua Ityesen i Yesu i sha Uwo la kpaa. Nahan hanma shighe u mbamhen mba kpeegh ka vea vam ken ishima yô, m kimbir avur a Bibilo ne ken ishima yam. Gbenda u dughun mbamhen mban ken ishima yam kera ne wasem kpen kpen, hemban je yô, ashighe a m nyer tugh kpa m fetyô u yaven ga yô.

Kwagh ugen u a wasem yô, ka iwuese i kwase wam man i Mbakristu mbagenev mba ve civir Aôndo ica i gbe yô. Shin er sha hiihii la yange i taver mo u lumun iwuese ve la nahan kpa, Bibilo wasem m kav er dooshima a “ne jighjigh sha akaa cii” yô. (1 Mbakorinte 13:7) Shi m hen u hiden a iyol ijime lumun mer m ngu a mbamyen.

Nahan kpa iniôngon yam i dughun mbamhen mba kpeegh ken a mo kera ne gema wasem u lun ortamen u zenden nengen atôônanongo u lun a mhôônom ma zungwen kpishi. Mo man kwase wam se er tom u pasen loho u dedoo hanma shighe ne zurum anyom 30 hegen. Iember i m zough a mi sha u eren mbagenev tom ne na yô ishima kera shi nyian mo sha ci u mbamhen mba kpeegh man uma u hôngorough u m er iyev la ga.

Ka mea hide mea hen sha igbenda i Yehova a verem doo doo la nahan, ishima i mgbegham u kaan er orpasalmi nahan mer: “Wuese TER, . . . u A de u aferakaa a ou cii, A bee u angev ou cii, A dugh uma wou ken mtim kera; A kange u tsar u erdoo man mhôônom ma kôron sha ityou” la.—Pasalmi 103:1-4.

[Footnote]

[Blurb on page 30]

Ashighe kpishi ishima ngi i nam ibo shi i lum er m gba kwagh ga nahan. Kpa Mkaanem ma Aôndo wasem u dughun mbamhen mba kpeegh mban ken a mo kera

[Pictures on page 27]

Anngôm José Luis man ijende yam Miguel dondo ikyav yam i bo man i dedoo cii

[Picture on page 28, 29]

Tsombor u Morcillo ken inyom i 1973

[Picture on page 29]

Shighe u Mariví lu ken purusu la

[Picture on page 30]

Mo man kwase wam Soledad