Ikuzunda Manjezyeezya Mabi

Akaluulwa aba Eusebio Marcillo

Mu September 1993, ndakaakuswaya kuntolongo mpati. Ncondakaunkila okuya, ndakali kwaakubbapatizya mwaange, musyoonto wangu musimbi Marivi. Baange abasikulangilila ntolongo bakali kulangilila nondakali kumubbapatizya. Kanditana pandulula, mbotwakalijana okuya, amuleke ndimwaambile buumi bwesu.

NDAKAZYALILWA ku Spain mu May 5, 1954. Ndime wakutaanguna mumukwasyi wabana bali lusele. Mariví wakali watatu. Bakaapa bakatukomezya mu Katolika alimwi ndakalilyaabide kuli Leza nondakali kukkala ambabo. Pele bazyali bangu tiibakali kuzibikkila maano zintu zyakumuuya. Bataata lyoonse bakali kubauma Bamaama andiswe tobana. Ndakali kuyoowa alimwi cakali kundicima kubona Bamaama kabapenga.

Kucikolo ndakajana buyumuyumu abumwi. Mwiiyi umwi wakali mupaizi, wakali kutupwaizya mitwe kubwaanda ikuti twaingula buteelede. Aumwi mupaizi wakali koona bana bacikolo naakali kulanga-langa nzyobalemba. Kunze lyaboobo, njiisyo zyaba Katolika mbuli mulilo wahelo, zyakali kundinyonganya akundiyoosya. Muciindi buyo cisyoonto ndakacileka kubikkila maano kukulyaaba kwangu kuli Leza.

Buumi Butajisi Mpindu

Akaambo kakuti taku wakali kukonzya kundigwasya munzila yakumuuya, ndakatalika kukkala abantu batalilemeki, basinkondo bakali kujanika kunkosaadi. Kanji-kanji kwakali kubuka nkondo, kulwana azipeni, nketani, magilazi atuuno. Nokuba kuti tiindakali kulwana, bumwi buzuba ndakaumwa akundisiya kandinetukide.

Mukuya kwaciindi ndakacileka kuunka kubusena ooko ndakayandaula busena bumwi kwakali luumuno. Nokuba kumasena aayo, misamu iikola yakali kubelesyegwa. Pele muciindi cakukkomana akuliiba, misamu iikola yakandipa kubona zintu zitako akutalika kulibilika.

Nokuba kuti tiindakali kkomene, ndakamuyunga musyoonto wangu José Luis  amweenzinyina Miguel mubukkale mbweena oobu. Abamwi bakubusi banji mu Spain kuciindi eeco twakali mubukkale bwamunyika bubi. Ndakali kucita kufwumbwa ncindakali kukonzya kutegwa ndijane mali aakuulila misamu iikola. Bantu tiibakali kundilemeka.

Jehova Wakandivuna

Ciindi coonse eeci, ndakali kubandika abeenzuma kujatikizya kubako kwa Leza ancotuponena. Ndakatalika kumuyandaula Leza kwiinda mukuyandaula muntu ngondikonzya kwaambila mbondilimvwa. Ndakabona kuti Francisco ngondakali kubeleka limwi wakaliindene abeenzinyina. Wakali kulibonya kukkomana, kusyomeka alimwi wakali kulibonya kuba sibuuya, aboobo ndakayanda kumwaambila zyakali kumoyo wangu. Francisco wakali umwi wa Bakamboni ba Jehova alimwi wakandipa Ngazi Yamulindizi yakajisi cibalo caamba zyamisamu iikola.

Nondakamana kucibala cibalo, ndakapaila kuli Leza kutegwa andigwasye, ndakati: “Mwami, ndilizyi kuti nkoli alimwi ndiyanda kukuzyiba akucita kuyanda kwako. Kondigwasya!” Francisco abamwi Bakamboni bakabelesya Bbaibbele kundikulwaizya akundipa mabbuku aapandulula Bbaibbele kutegwa ndibale. Ndakazyiba kuti bakali kundipa lugwasyo ndondakalomba kuli Leza. Tiikwainda aciindi cilamfwu, ndakatalika kubaambila beenzuma a José Luis kujatikizya zintu nzyondakali kwiiya.

Buzuba bumwi notwakali kuzwa kunkosaadi abeenzuma, ndakalizandula kubeenzuma. Ndakatalika kubalanga mpobakabede ndakabona kuti bukkale bwesu bwakali bubi akaambo kakubelesya misamu iikola. Kuzwa ciindi eeco, ndakasala kuba umwi wa Bakamboni ba Jehova aboobo ndakacileka kupona munzila eeyo.

Nindakamulomba Bbaibbele Francisco wakandipa, amane wakabikkilizya abbuku lyakuti, The Truth That Leads to Eternal Life. * Nondakabala cisyomezyo ca Leza cakuti uyakusindula misozi yoonse akugusya lufwu, ndakasyoma kuti aaka nkakasimpe kakonzya kufwutula bantu. (Johane 8:32; Ciyubunuzyo 21:4) Kumane ndakajanika kumuswaangano ku Ŋanda ya Bwami ya Bakamboni ba Jehova. Ikumvwana akundibikkila maano nzyakandikkomanisya kapati.

Akaambo kakuti ndakali kuyandisya kubaambila nzyondakayiya ku Ŋanda ya Bwami, cakutasowa ciindi ndakabaita boonse ba José Luis abeenzuma akubaambila nzyondakabona. Nokwakainda mazuba, toonse twakajanika kumuswaangano. Musimbi umwi wakakkede kumbele lyesu wakatulanga. Kuboneka kuti wakagambwa kubona kakamu kabalombwana bajisi masusu malamfwu alimwi kunyina naakatulanga kabili. Weelede kuti wakagambwa naakatubona alimwi ku Ŋanda ya Bwami insondo yakaccilila, nkaambo twakasamide masuuti amatayi.

Nokwakainda ciindi, Miguel andime twakajanika kumuswaangano wabbazu wa Bakamboni ba Jehova. Kunyina notwakalilimvwide mbuli mbotwakalimvwa—bunyina bwini-bwini bwabantu bamisela yoonse. Alimwi cikkomanisya  ncakuti, muswaangano wakacitilwa kubusena kwakali kunkosaadi. Pele aciindi aawa, bukkale anyimbo nzyotwakali kuswiilila zyakali kukulwaizya.

Kakamu kesu koonse kakatalika kwiiya Bbaibbele. Nokwakainda myezi iili lusele, mu July 26, 1974, Miguel andime twakabbapatizyigwa. Toonse twakajisi myaka yakuzyalwa iili 20. Abamwi bone mukakamu kesu bakabbapatizyigwa nokwakainda myezi misyoonto. Luzibo lwa Bbaibbele ndondakajana lwakandikulwaizya kutalika kugwasya bamaama bakandikkazikila moyo kwaciindi cilamfwu. Ndakatalika kubagwasya milimo yaaŋanda akubaambila nzyondakatalika kusyoma. Twakali kumvwana kapati. Alimwi ciindi cinji ndakali kugwasya basyoonto bangu basankwa abasimbi.

Nokwakainda ciindi, bamaama aboonse bace bangu kusiya buyo omwe muce wangu bakayiya kasimpe kamu Bbaibbele alimwi bakabbapatizyigwa akuba Bakamboni ba Jehova. Mu 1977, ndakakwata Soledad. Ooyu ngomusimbi wakali kulibonya kugambwa naakatubona ciindi cakusaanguna ku Ŋanda ya Bwami. Mumyezi buyo misyoonto, toonse twakaba bapainiya kweelana a Bakamboni ba Jehova mbobabaita bakambausi bamakani mabotu baciindi coonse.

Muyandwa Wanununwa

Musyoonto wangu musimbi Mariví wakali koonwa naakali mwana, aboobo cakamukatazya kapati. Naakaba mukubusi tanaakali kulilemeka, wakali kubelesya misamu iikola, kubba abuvuule. Naakaba amyaka iili 23 wakaangwa pele wakazumanana abuumi butali kabotu kali muntolongo.

Aciindi aawo, ndakali mulangizi wabbazu, mubelesi weendeenda wa Bakamboni ba Jehova. Mu 1989, mebo a Soledad twakatumwa kwaakubelekela kubusena Mariví nkwaakaangidwe. Balupati-pati bakamubweza mwanaakwe aboobo wakanyongana kapati alimwi kunyina naakali kuyanda kupona. Buzuba bumwi, ndakamuswaya akumwaambila kuti katwiiya limwi Bbaibbele, wakazumina. Notwakayiya kwamwezi omwe, wakacileka kubelesya misamu iikola akufweba. Ndakakkomana kubona kuti Jehova wakamupa nguzu zyakucinca mubuumi bwakwe.—Ba-Hebrayo 4:12.

Nokwakainda mazuba masyoonto kuzwa naakatalika kwiiya, Mariví wakatalika kwaambila baangenyina abakali kulanganya ntolongo kasimpe kamu Bbaibbele. Nokuba kuti wakali kulonzyegwa kuzwa muntolongo imwi akuya kumwi, wakazumanana amulimo wakwe wakukambauka. Muntolongo imwi wakali kukambauka kucitolokesi cimwi acimwi. Nokwakainda myaka, Mariví wakatalisya ziiyo zya Bbaibbele kuli basintolongonyina muzitolokesi ziindene-indene.

Buzuba bumwi Mariví wakandaambila makanze aakwe akuyanda kulyaaba kuli Jehova akubbapatizyigwa. Pele bakamukasya kuzwa muntolongo alimwi kunyina nobakali kuzumizya muntu uuli woonse kunjila kutegwa amubbapatizye. Wakaliyumya kwamyaka aimwi yone mubukkale bubi bwamuntolongo. Ncinzi cakamugwasya kuzumanana kusyomeka? Aciindi ceelede mbungano noyakajisi muswaangano, wakali kwiinduluka pulogilamu njoona muntolongo. Alimwi wakalijisi bubambe bwakuliyiisya Bbaibbele amupailo.

Mukuya kwaciindi, Mariví wakalonzyelwa kuntolongo mpati imwi yakajisi busena bwakusaila. Wakabona kuti bukkale oobu bupya bulakonzya kupa kuti abbapatizyigwe. Oobo mbocakaba, Mariví wakazumizyigwa kuti abbapatizyigwe. Oobo mbondakajana coolwe cakukanana makani alubbapatizyo. Ndakali anguwe aciindi ciyandika kapati mubuumi bwakwe.

Akaambo kabuumi mbwaakali kupona kaindi, Mariví wakalijisi bulwazi bwa Sikalileke  (AIDS). Nokuba boobo, bukkale bwakwe bubotu bwakapa kuti azwe muntolongo mu March 1994. Wakali kukkala Abamaama alimwi wakali muyumu mumilimo ya Bunakristo kusikila naakafwa nokwakainda myaka yobilo.

Ikuzunda Mizeezo Mibyaabi

Andime ndilapenga akaambo kabuumi mbondakali kupona kaindi. Kuumwa nkondakali kuumwa abataata kubikkilizya abuumi mbondakali kupona nondakali mukubusi zyakabujatikizya bube bwangu. Mazuba aano, manjezeezya alandikatazya. Ziindi zimwi ndilatyompwa kapati. Pele, Ijwi lya Leza lyandigwasya kuzunda mizeezo mibi. Ikukkala ansi kuyeeya magwalo mbuli Isaya 1:18 a Intembauzyo 103:8-13 kwandigwasya kwamyaka minji kugusya mizeezo mibi ilaakuboola.

Mupailo ncibelesyo acimbi cakumuuya ncondibelesya kuzunda mizeezo mibi. Kanji-kanji ndilapaila kuli Jehova kumwi kandilila. Nokuba boobo, majwi aalembedwe ku 1 Johane 3:19, 20 alandiyumya-yumya: “Mbuboobu mbutuzi kuti tuli basilusinizyo, alimwi tuzootontozya myoyo yesu kunembo lyakwe, kufumbwa kumakani ngiitupa mulandu myoyo yesu. Nkaambo Leza mupati kwiinda myoyo yesu, alimwi ulizi zintu zyoonse.”

Mbwaanga ndilapaila kuli Leza amoyo “uupengede,” ndilizyi kuti tandili mubi mbuli mbondali kuyeeya. Ibbaibbele lisyomezya boonse aabo bayandaula Jehova kuti, ikuti naa beempwa ncobeni kuzintu nzyobakali kucita kaindi alimwi akutalika kucita kuyanda kwakwe, Leza takonzyi kubasampaula.—Intembauzyo 51:17.

Ndatalika kulitenga, ndilasola kuyeeya zintu zigwasya, zintu zyakumuuya zyaambwa ku Ba Filipi 4:8. Intembauzyo 23 a Mulumbe waa Cilundu ndakazibikka mumizeezo. Ndatalika kuyeeya zintu zibi, ndilaliyeezya Magwalo aaya. Ikugusya mizeezo mibi kulagwasya ikapati nondilaacilabila.

Acimbi cindigwasya nkulumbaizyigwa amukaintu wangu a Banakristo basimide. Nokuba kuti kumatalikilo cakali kundiyumina kwaatambula majwi aabo aakulwaizya, Ibbaibbele lyandigwasya kumvwisya kuti luyando ‘lulasyoma zintu zyoonse.’ (1 Ba-Korinto 13:7) Mumyaka eeyi yainda, ndaiya kulicesya akubona kuti ndilalezya.

Kulubazu lumwi, ikuzunda mizeezo mibi kwandigwasya kuba mulangizi weendeenda ulaaluse. Mebo amukaintu wangu twabeleka mumulimo waciindi coonse wakukambauka makani mabotu kwamyaka iitandila ku 30. Lukkomano ndondijana mukugwasya bamwi kwandigwasya kugusya mizeezo mibi iiboola akaambo kabukkale mbondakajisi kaindi.

Lino ndayeeya zilongezyo Jehova nzyaandipa, cindipa kwaamba bwakaamba sintembauzyo kuti: “Kolumba Jehova, . . . nguwe uukulekelela insendami zyako zyoonse, akuponya malwazi aako oonse. Nguwe uuvuna buumi bwako kuzwa kukabanda, akukusamika munsini waluzalo abuuya.”—Intembauzyo 103:1-4.

Bupanduluzi buyungizidwe

Majwi aakwelelezya sikubala aali apeeji 30]

Kanji-kanji manjezyeezya alandikatazya, pele Ijwi lya Leza lyandigwasya kugusya mizeezo mibi eeyi iinyonganya

[Zifwanikiso izili apeeji 27]

Muce wangu José Luis amweenzuma Miguel bakayiya cikozyanyo cangu cibi acibotu

[Cifwanikiso icili apeeji 28]

Mukwasyi waba Morcillo mu 1973

[Cifwanikiso icili apeeji 29]

Mariví kali muntolongo

[Cifwanikiso icili apeeji 30]

Amukaintu wangu, Soledad