Nos Lektornan Ta Puntra

E Reino di Dios Ta den Bo Kurason?

Awendia, hopi hende ta kere ku e kontesta riba e pregunta menshoná ariba ta sí. Por ehèmpel, The Catholic Encyclopedia ta deklará: “E reino di Dios ta nifiká . . . e manera ku Dios ta goberná nos kurason.” Miembronan di klero generalmente ta siña hende e idea aki. Beibel ta siña realmente ku e Reino di Dios ta den kurason di hende?

Algun hende ta kere ku ta Hesus ta esun ku a kuminsá ku e idea ku e Reino di Dios ta den kurason di hende. Hesus a bisa: “Ata e reino di Dios ta meimei di boso.” (Lukas 17:21) Algun tradukshon ta bisa na e versíkulo aki: “E reino di Dios ta den boso” òf asta “parti paden di boso.” Eseinan ta e maneranan eksakto pa tradusí loke Hesus a bisa? E tabata ke men realmente ku e Reino di Dios ta den kurason di hende?

Na promé lugá, laga nos konsiderá kiko Beibel ke men ora e ta papia di kurason di hende. Den sentido figurativo, e ta referí na e persona di paden, e fuente di un persona su aktitut, pensamentu- i sintimentunan. E idea ku algu asina elevá manera e Reino di Dios ta den kurason di hende—den e sentido ku, por ehèmpel, e ta kambia i elevá hende—por parse atraktivo. Pero e ta rasonabel?

Beibel ta bisa nos: “E kurason ta mas engañoso ku tur kos i ta totalmente korupto.” (Jeremias 17:9) Hesus mes a bisa: “For di paden, for di kurason di hende, ta sali mal pensamentu, fornikashon, ladronisia, matamentu, adulterio, echonan di kudishi i maldat.” (Marko 7:20-22) Pensa riba esaki: Akaso hopi di e miseria ku nos ta mira den mundu awe no a originá den e kurason pekaminoso di hende? Pues, kon por ta posibel ku e Reino perfekto di Dios ta bin for di e mesun fuente ei? En realidat, meskos ku bringamosa no por produsí figu, kurason di hende tampoko no por produsí e Reino di Dios.—Mateo 7:16.

Na di dos lugá, pensa riba e personanan ku Hesus tabata papiando kuné ora el a ekspresá e palabranan registrá na Lukas 17:21. E versíkulo promé ku esei ta bisa: “Ora ku e fariseonan a puntr’é tokante di ki tempu e reino di Dios lo a bin, el a kontestá nan.” (Lukas 17:20) E fariseonan tabata enemigu di Hesus. Hesus a deklará ku e personanan hipókrita ei lo no a drenta e Reino di Dios. (Mateo 23:13) Awor siendo ku e fariseonan lo no por a drenta e Reino di Dios, e Reino lo por tabata den nan kurason? Imposibel! Kiko Hesus tabata ke men anto?

Vários vershon di Beibel ku a tradusí e palabranan aki di Hesus ku eksaktitut ta usa palabranan similar na esnan den Beibel Santu. Algun ta bisa ku e Reino ta “entre boso” òf “meimei di boso.” Den ki sentido e Reino di Dios tabata entre e hendenan di e tempu ei, inkluso e fariseonan? Wèl, Hesus tabata esun ku Yehova Dios a nombra pa bira Rei di e Reino. Komo e Rei Designá, Hesus tabata meimei di e hendenan ei. El a siña nan tokante e Reino di Dios i asta a hasi milager, dunando nan un bista adelantá di loke e Reino ei lo bai logra. Pues anto, den e sentido ei, e Reino tabata meimei di nan.

Ta bisto anto ku ningun kaminda Beibel no ta apoyá e idea di ku e Reino di Dios ta den kurason di hende. Mas bien, manera e profetanan a predisí, e ta un berdadero gobièrnu ku lo trese kambionan dramátiko riba tera.—Isaias 9:6, 7; Daniel 2:44.