Ua Fesili Mai le ʻAufaitau

Po o i Lou Loto le Malo o le Atua?

E toʻatele ua talitonu, o loo i totonu o o latou loto le Malo o le Atua. O loo taʻua e se tasi o lomifefiloi e faapea: “O le uiga o le Malo o le Atua, o loo pulea e le Atua o tatou loto.” O le manatu lenā o loo aʻoaʻo e faifeʻau. Ae po o le aʻoaʻoga moni lenā a le Tusi Paia?

Ua manatu nisi, o Iesu na amataina le talitonuga e faapea o loo i loto o tagata le Malo o le Atua. Ona na ia fetalai: “O loo outou faatasi i inei ma le malo o le Atua.” (Luka 17:21) O nisi Tusi Paia ua faapea mai: “O loo iā te outou le Malo o le Atua.” Po o saʻo le faaliliuina o le fetalaiga a Iesu? Pe na uiga moni o ia o loo i loto o tagata le Malo o le Atua?

Muamua, seʻi iloilo po o le ā le loto o le tagata. Ina ua taʻua e le Tusi Paia le loto, o lona uiga o loo faasino i le tagata lilo i totonu, o le mea e puna mai ai mafaufauga, o uiga, ma faalogona o se tagata. Atonu e logoleleia i tagata le manatu e faapea, o le Malo o le Atua o se mea e mamalu, o loo faamautū i le loto o le tagata ma faaleleia ai o ia, ae pe e saʻo lenā aʻoaʻoga?

O loo taʻua e le Tusi Paia: “E sili le faaʻoleʻole o le loto i mea uma, ma ua matuā leaga lava.” (Ieremia 17:9) O Iesu lava ia na fetalai: “Auā e sau mai i le loto o le tagata mafaufauga leaga: o le faitaaga, o le gaoi, o le fasioti tagata, o le mulilua, o le tuʻinanau i mea a isi, o le amioleaga.” (Mareko 7:20-22) Seʻi manatu foʻi: O le tele o puapuaga o loo tatou vaaia i aso nei, e māfua mai ona o loto lē lelei o tagata. E faapefea la ona puna mai le Malo lelei atoatoa o le Atua i se loto lē lelei atoatoa? Ioe, e lē mafai ona faavae mai le Malo o le Atua i le loto o le tagata, e pei ona lē mafai ona fua mai ni mati i se vao talatala.—Mataio 7:16.

Lona lua, i le Luka 17:21, o ai na fetalai i ai Iesu? O loo faapea mai le fuaiupu e 20: “Ina ua fesili mai le ʻau Faresaio iā te ia, po o afea e oo mai ai le malo o le Atua, ua ia tali atu iā i latou.” (Luka 17:20) Na fetalai o ia i le ʻau Faresaio, ae manatua foʻi o i latou o fili o Iesu. Na taʻu manino mai e Iesu e lē ulu atu i latou i le Malo o le Atua. (Mataio 23:13) Pe mafai ona iai i o latou loto le Malo o le Atua, pe afai e latou te lē ulu atu i ai? E lē taitai ona mafai! O le ā la le uiga o upu a Iesu?

Ina ua taʻua nei upu a Iesu, o loo faaaogā e le tele o faaliliuga o le Tusi Paia faaupuga e tutusa ma Le Tusi Paia o le Lalolagi Fou. Ua faapea mai nisi, o loo “iā te outou” le Malo po o “o loo faatasi ma outou.” Na faapefea ona iai le Malo o le Atua i na tagata i lenā taimi, e aofia ai ma le ʻau Faresaio? Ona sa latou faatasi ma Iesu le Tupu Tofia, po o lē ua filifilia e Ieova e avea ma Tupu o le Malo. Sa ia aʻoaʻo le Malo o le Atua ma faia vavega e faaalia ai mea o le a faatinoina e le Malo. O le uiga moni lenā o le iai o le Malo iā i latou.

E mautinoa la, e lē lagolagoina e le Tusi Paia le manatu e faapea o loo i loto o tagata le Malo o le Atua. Nai lo lea, o loo taʻua ai, o lenā malo o se pulega moni, lea o le a toeitiiti aumaia suiga tetele i le lalolagi, e pei ona valoia mai e le ʻauperofeta.—Isaia 9:6, 7; Tanielu 2:44.