Li jkʼel vunetike tskʼan snaʼik

Li Ajvalilal yuʼun Diose, ¿mi te ichʼbil bal ta oʼontonal?

Te, ep buchʼu xuʼ xi tstakʼike. Yuʼun li ta Enciclopedia Católica xi chal eke: «Li ajvalilal yuʼun Diose jaʼ skʼan xal [...] li ajvalilal tspas Dios ta koʼontontike», xi. Jech noxtok ep chʼulnaetik jech chchanubtasvanik kʼuchaʼal taje. Pe, ¿mi jech van ta melel chchanubtasvan Vivlia ti te oy ta yoʼonton krixchano li Ajvalilal yuʼun Diose?

Oy buchʼu tsnopik ti jaʼ stuk Jesús la slikes talel li snopbenal ti oy ta yoʼonton krixchanoetik li Ajvalilal yuʼun Diose. Yikʼal van ta xalik ti xi laj yale: «Yuʼun li ventainel yuʼun Diose liʼ xa oy ta atojoli[ke]», xi (Lucas 17:21). Ta yan Vivliaetike xi tsjelubtasik li kʼusi laj yal Jesuse: «Ti Diose jaʼ ch-abtej ta yoʼntonic crixchanoetic» o, «tiquʼil ta tojolalic», xi. Pe ti kʼu yelan chal li Vivliaetik taje, ¿mi jaʼ van jech la skʼan laj yal li Jesuse? ¿Mi yuʼun van jech ta melel la skʼan laj yal ti ichʼbil batel ta oʼontonal li Ajvalilal yuʼun Diose?

Baʼyel jnoptik, ¿kʼusi jaʼ li oʼontonale? Li ta Vivliae, kʼalal chalbe skʼoplal oʼontonale, jaʼ chalbe skʼoplal li jtalelaltike, li bu chlik talel li jnopbentike, li kʼusitik ta jpastike xchiʼuk li kʼuyelan chkaʼitik li kʼusitike. Jech oxal ep krixchanoetik kʼupil chaʼiik ti oy ta oʼontonal li Ajvalil yuʼun Diose —ti jaʼ jun kʼusi ti yan yutsile— yoʼ xjelbat xkuxlejalik xchiʼuk xlekubtasatik. Ti vaʼ yelan taje, ¿mi jaʼ van jech ta melel?

Li Vivliae chalbutik, ti «oʼntonale toj chopol, jaʼ noʼox ven jloʼlavanej ta scotol» (Jeremías 17:9). Li Jesuse xi laj yal stuk xtoke: «Ta yut yoʼnton cristiano ta xlocʼ tal li cʼusi chopol ta snopique, me ta xmulivaj, me ta xʼelcʼaj, me ta xmilvan, me cʼusiuc noʼox ta scʼupin, me ven chopol cʼusi tspas» (Marcos 7:20-22). Jakʼbo aba: ¿Kʼu yuʼun oy choplejal li ta balumile? ¿Mi mu teuk ta xlik talel li ta xchopol oʼonton krixchanoe? Mi jeche, ¿kʼuxi xa noʼox ta xlik talel te li Ajvalilal yuʼun Diose? Ta melel, jech kʼuchaʼal mu xakʼ igo jtekʼ chʼixe, li Ajvalilal yuʼun Diose mu xuʼ xlokʼ ta yoʼonton jun krixchano (Mateo 7:16).

Jech xtok skʼan jnoptik, li Jesuse ¿buchʼutik van laj yalbe li kʼusi chal ta Lucas 17:21? Li ta versikulo 20 chal: «Li fariseoetique la sjacʼbeic Jesús cʼusi ora chtal ventainvanuc li Diose. Itacʼov» (Lucas 17:20). Li fariseoetike jaʼ toʼox yajkontratak li Jesuse xchiʼuk laj yal xtok ti vaʼ jchanubtasvanejetik ta smantal Dios ti jaʼ noʼox chloʼlavanike muʼyuk bu ch-ochik li ta Ajvalilal yuʼun Diose (Mateo 23:13, Ti Achʼ Rextomento yuʼun ti Jesucristoe, ta skʼop Chamula). Jech oxal, ¿kʼuxi van xuʼ xichʼ bal ta yoʼontonik li Ajvalilal yuʼun Diose ti mi jaʼuk x-akʼe ochikuk tee? ¿Mi mu jechuk ti mu xkʼot-oe? Jkʼeltik un chaʼa, li kʼusi la skʼan laj yal li Jesuse.

Epal Vivliaetik ti sjelubtasojik li kʼusi laj yal ta melel li Jesuse jech yelan chal li ta jlom Vivliaetik ta tsotsile. Junantike chal li Ajvalilal yuʼun Diose te «achiʼukik» o te «ta atojolik». Li krixchanoetik taje, kʼalal albatik ti oy ta stojolik li Ajvalilal yuʼun Diose, ti oy ta stojolal li fariseoetik eke, ¿kʼusi la skʼan laj yal ta melel li Jesuse? Li Jeovae stʼujoj xa onoʼox Jesús sventa tsvaʼan kʼuchaʼal Ajvalil li ta Ajvalil yuʼune. Vaʼun, li Jesuse jech kʼuchaʼal jun tʼujbil Ajvalil sventa ta mas tsʼakale te toʼox vaʼal ta stojolal li krixchanoetik taje sventa chchanubtasanan ep kʼusitik ta sventa li Ajvalilal taje xchiʼuk la spas skʼelobiltak juʼelal sventa chakʼ ta ilel li kʼusitik tspas li Ajvalilale. Jech oxal un chaʼa, xkoʼolajuk ta melel, li Ajvalilal o ventainel yuʼun Diose te xaʼox oy ta stojolalik.

Kʼuchaʼal chkiltike, ti chichʼ nopel ti oy ta oʼontonal li Ajvalilal yuʼun Diose mu xkʼot-o kʼuchaʼal chal li Vivliae. Li kʼusi xkʼot-oe, jaʼ ti jech kʼuchaʼal laj yalik li j-alkʼopetike, jaʼ jun melel ajvalil ti ep kʼusitik labalik sba ta sjel li ta Balumile (Isaías 9:6, 7; Daniel 2:44).