Diosan Apnaqäwip katuqañatak askit uñtʼat jaqinaka

“Akax uñachtʼayistuwa Diosan chiqapätapa uñjäwipanxa, jumanakaru Diosan markapar [jan ukax apnaqäwipar, NM] mantayañataki askit uñtʼasina, ukatarakwa tʼaqhisisipktaxa.” (2 TES. 1:5.)

1, 2. ¿Kuna taripäwsa Diosax amti, ukat khitirus taripañapatakix uttʼayi?

 ATENAS markaruw apóstol Pablox niya 50 mara jakʼaxa visittʼäna. Uka markan sarnaqkasaxa, walja lurat diosanak uñjatayna, ukanak uñjasawa wal chuym ustʼayasïna, ukatarakwa Atenasankir jaqinakarux Diosat yatiyäna. Ukat wali suma arstʼäwipa tukuyxañatakixa Diosar jan uñtʼir jaqinakan chuymapar purtʼkir suma arunakampiw tukuyxäna, akham sasa: “Jichhasti [Diosax] taqiniruw taqi tuqin yatiyi, uka jan wali sarnaqäwinak apanukupxañapataki. Diosasti mä uru wakichi, uküruw chiqa kankañampi akapacharux taripani kawkïr jaqtix jupax ajlliski uka tuqi. Uka jaqin chiqätapxa, jupar jiwatat jaktayasaw taqi jaqinakar qhanpach yatiyi” sasa (Hech. 17:30, 31).

² Ukham Diosax jaqinakaru mä uru taripañataki amtatapxa janiw ukhamak uñjañasäkiti. Ukat Jehová Diosaxa yaqha jaqiruw taripañapatakix uttʼayi. ¿Khitirus uttʼayi? Janis Pablox sutipat siskchïnxa, jiwasax yatxtanwa, jaktanit Jesusawa. Uka taripäwirjamaxa, yaqhipanakaxa jakäw jikxatapxaspa ukat yaqhipanakasti jiwañanwa uñjasipxarakispa.

3. ¿Kunatakisa Jehová Diosax Abrahamampi mä arustʼäwiru mantäna, ukat khitis uka aski amtäwxa phuqasiyani?

³ Uka Taripäw Uruxa waranq maräniwa, ukat Diosan Apnaqäwipan Apnaqirit uttʼayat Jesusawa Awkipan sutipxarux taripani. Ukampis Jesusax janiw sapaki taripkaniti. Jehová Diosaxa uka waranq maran Jesusampi apnaqapxañapataki ukat taripapxañapatakixa jiwasjam jaqinakaruw ajlli (uñxattʼarakismawa Lucas 22:29, 30). Kunapachatï Jehová Diosax taqi chuyma yupaychir Abrahamampi mä arustʼäwir mantapkäna ukhawa, khitinakas Taripäw Urun taripapxani uk Jehová Diosax uttʼayäna, niya 1943 nayrïr pach marana, uka marat jichhakamax niya pusi waranq maranakäxaniwa (Génesis 22:16-18 liytʼasiñapawa). Ukampisa, uka arustʼäwix jaqinakatakix kunatsa wali askïna ukxa janiw Abrahamax sum amuykänti. Ukampisa jiwasanakaxa jichhürunakan uka arunakapxa sum amuyxtanxa, kunattix Abrahamat jutir wawawa jaqinakar taripani, ukhamatwa Diosan amtapax phuqasini.

4, 5. 1) ¿Khitis Abrahamat jutir wawan jilïr wawapaxa, ukat jupax kamsänsa Apnaqäw tuqitxa? 2) ¿Kunapachas alaxpach Apnaqäwin apnaqapxañapatakix jawsasïna?

⁴ Abrahamat jutir wawan jilïr wawapaxa Jesusawa, 29 maran qullan ajayumpi ajllitäsinwa  jutaniw sat Mesiasaru jan ukax Cristor tukxäna (Gál. 3:16). Ukat kimsa mar chikaniwa Jesucristox judío jaqinakaruxa Diosan Apnaqäwipat suma yatiyäwinak yatiyäna. Ukat kunapachatï Bautisir Juanax katuntatäxäna uka qhipatxa, yaqhanakaw alaxpach apnaqäwinxa apnaqapxaspa sasaw Jesusax akham säna: ‘Bautisiri Juanan urunakapat jichhürkamaxa, alaxpach apnaqäwix chʼamampi katutawa jan axsaririnakarakiw katuntapxi’ sasa (Mat. 11:12, MT).

⁵ Janïr alaxpach Apnaqäw ‘katurinakat’ parlkasaxa, akham sasaw Jesusax qhanañchäna: ‘Chiqpachwa sapxsma, warmita nacirinak taypinxa janiw Bautisiri Juanat yaqha jukʼampi jilïrix sartkiti; ukampisa khititï alaxpach apnaqäwina jukʼampi jiskʼäkixa, jupatsa jukʼampi jilïriwa’ (Mat. 11:11, MT). ¿Kunatsa ukham säna? Kunattix taqi chuyma yupaychirinakaruxa, qullan ajayu 33 maran katuqapkäna uka Pentecostés urut aksarukiwa alaxpach Apnaqäwir sarapxañapatakix jawsasïna, ukürkamax Bautisir Juanax jiwatäxänwa (Hech. 2:1-4).

Abrahaman wawapat jutirinakaxa askit uñtʼatapxiwa

6, 7. 1) ¿Kunatsa Abrahaman wawapaxa ‘alaxpach warawaranakjamäniw’ sasixa? 2) ¿Kuna bendicionsa Abrahamax katuqäna, ukat ‘wawapax’ niya ukar uñtasit kuna bendicionsa katuqaraki?

⁶ Abrahamaruxa wawamxa waljaniruw tukuyäxa “alaxpach warawaranakjama” ukat “quta thiyankir chʼallanakar uñtata” sasaw säna (Gén. 13:16; 22:17). Uka ‘wawax’ qhawqha jaqinakänis ukxa Abrahaman urunakapanxa janiw khitis yatkänti. Ukampis tiempompiw qhawqhanïnis ukax yatisxäna: 144.000 jaqinakampi ukat Jesusampïnwa (Apo. 7:4; 14:1).

⁷ Diosan Arupaxa siwa: “Abramasti [Jehová] Tatiturux iyawsänwa, ukatwa Tatitux juparux aski jaqit katuqäna” (Gén. 15:5, 6). Chiqanxa, janipuniw jan pantjasiri aski jaqix utjkaspati (Sant. 3:2). Ukampisa Abrahamarux iyawsäwinïtapatwa, Jehová Diosax aski jaqit uñtʼäna, ukat munatajaw jan ukax amigojaw sarakïnwa (Isa. 41:8). Khitinakatï Jesusamp chika Abrahaman wawapjam uñtʼatäpki ukanakaxa aski jaqinakat uñtʼatäpxarakiwa, ukat Abrahamat sipansa jukʼampi bendicionanakwa katuqapxi.

8. ¿Kuna bendicionanaksa katuqapxi Abrahaman wawapat jutirinakaxa?

⁸ Ajllit cristianonakaxa Jesucriston luqtasïwiparuw iyawsapxi ukatwa Diosan aski jaqit uñtʼatäpxi (Rom. 3:24, 28). Jehová Dios nayraqatapanxa juchanakapatsa pampachatäxapxiwa, ukhamatwa, Diosan wawanakapäpxañapataki ukat Jesucriston jilat kullakanakapäpxañapataki qullan ajayumpi ajllitäpxaspa (Juan 1:12, 13). Ukat machaq arustäwirus mantapxarakiwa, ukat ‘Diosan Israelapjam’ machaq markapäpxarakiwa (Gál. 6:16, MT; Luc. 22:20). ¡Wali kusiskañapuniw jupanakatakixa! Ukham Diosax jupanak layku luratapatxa uka ajllit jilat kullakanakaxa janiw aka uraqin wiñay jakañ suytʼäwinïpkiti. Aka Uraqin jakañxa jaytawayxapxiwa, ukat wali kusisitawa Taripañ Urun Jesucristoru taripañ yanapapxani ukat alaxpachanwa jupampi apnaqapxarakini (Romanos 8:17 liytʼasiñapawa).

9, 10. 1) ¿Kunapachatsa qullan ajayumpi cristianonakarux ajllisïna, ukat kunarus jupanakax saykatapxañapäna? 2) ¿Kuna yanaptʼanaksa ajllit cristianonakax katuqapxäna?

⁹ Khä 33 maran kunapachatï Pentecostés sat urunkasipkäna ukhawa, 120 taqi chuyma yupaychirinakax Taripäwi Urun Jesusamp chika apnaqapxañapatakix ajllitapxäna. Jesusan taqi arkirinakapawa, sañäni, chachanaka  warminakawa qullan ajayumpi bautisatapxäna, ukhamatwa nayrïr ajllit cristianonakjam tukxapxäna. Ukampisa, alaxpachar sarapxañapatakixa janiw ajllitäñakix munaskänti. Jan ukasti ukapachat aksaruxa, Supayax walja sipitanakampiw yantʼañapäna, ukampis jupanakax Jehová Diosatxa janiw jithiqtapxañapäkänti. Ukat jakañ corona katuqañatakixa, jiwañkamawa Diosat jan jithiqtasa yupaychasipkakiñapäna (Apo. 2:10).

¹⁰ Jehová Diosaxa uka ajllit jilat kullakanakaruxa jan jithiqtasa arkasipkakiñapatakixa cristian tamampi ukat Qullan Arupampiw iwxtʼäna ukhamarak chʼamañchtʼäna. Sañäni, apóstol Pabloxa Tesalonicankir ajllit jilat kullakanakaparuxa akham sasaw qillqäna: “Yatipxaraktawa kunjämtix chʼamañchapxäyäsma, chuymachapxarakïyäsma sapa mayni jumanakaru, kunjämtix mä awkixa wawanakapampi lurki ukhama. Iwxtʼapxarakïyäsmawa Diosankirinakjama sarnaqapxañamataki, kawkïritix markapataki, kʼajkir kankañapataki jawsapktama ukaru” sasa (1 Tes. 2:11, 12).

11. ¿Kuna qillqatanaksa ‘Diosan Israelaparux’ Jehová Diosax churi?

¹¹ Kunapachatï Jehová Diosax alaxpachar sarapxañapataki nayrïr cristianonakar ajllkäna uka marat aksaruwa, Jesucriston sarnaqäwipat qillqasiñap Diosax amtäna. Ukat kunjamsa nayrïr ajllit jilat kullakanakarux Diosax yanapäna ukat iwxtʼäna ukanak yatisiñapatakiw qillqayarakïna. Ukatwa Hebreo Arut Qullan Qillqatanakaruxa Griego Arut Qullan Qillqatanakampi yaptʼasiñapatakix qullan ajayupamp amuytʼayäna. Chiqanxa, kunapachatï israelitanakax Diosampi sumankasipkäna ukapachawa aka Hebreo Arut Qullan Qillqatanakaxa jupanakataki qillqasïna. Ukampis Griego Arut Qullan Qillqatanakaxa ‘Diosan Israelapjam’ uñtʼat ajllit cristianonakataki qillqatawa, jupanakax Criston jilat kullakanakapjam ukat Diosan wawanakapjam uñtʼatäpxarakiwa. Nayra tiemponakanxa, jan israelitapkäna uka jaqinakax Hebreo Arut Qullan Qillqatanakat yatxatasaxa wali askinakwa apsupxirïna, ukhamarakiw khitinakatï alaxpachar sarañatak jan ajllitäpki uka cristianonakaxa Griego Arut Qullan Qillqatanakatxa yatxatapxi, ukat suma iwxtʼa arunakaparjam sarnaqasasa wali askinakwa apsupxaraki (2 Timoteo 3:15-17 liytʼasiñapawa).

12. ¿Kuns Pablox ajllit cristianonakarux amtayäna?

¹² Nayra patak maranakankir cristianonakarux Diosax aski jaqinakat uñtʼäna ukat alaxpachar sarapxañapatakiw qullan ajayump ajllirakïna, ukampis ukham ajllitäkasinxa janiw aka Uraqinkkasax apnaqirjam tukupxañapäkänti. Ukampis amuyataxa, yaqhipanakax janiw sum amuyapkänti, ukatwa ajllit jilat kullakanakap taypinxa jachʼachasipxäna, jupanak taypin apnaqirinakäpkaspas ukhamaw tukupxäna. Ukatwa Pablox akham säna: ‘Jumanakax niya qamir tukutjamakïxapxtawa, taqi kunansa phuqtʼatjamäxapxaraktawa, reyinakaw tukupxarakta, nanakarusti mä tuqiruw apanukupxarakista. ¡Ojalá chiqpachansa reyïpxasma ukhamata nanakax jumanakamp chikäpxarakirista uka reinomanxa!’ sasa (1 Cor. 4:8). Uka tiempo ajllit cristiano masinakaparux apóstol Pablox akham sasaw amtayäna: “Janiw nanakax iyawsäwimxaruti munañanïpktxa, jan ukasti jumanakan kusisiñamaru yanapirïpxtwa” sasa (2 Cor. 1:24, MT).

Arsutarjamax kunjamsa phuqachasi

13. ¿Kunjamsa jukʼampi 33 marat aksaruxa ajllit cristianonakax jilxattaskakïna?

¹³ 144.000 ajllit cristianonakaxa janiw nayrïr patak maranakan phuqachaskänti. Kunapachatï apostolanakax jakasipkäna uka tiemponxa machaq ajllitanakaruw jawsañ qalltasïna. Ukampis amuyataxa, qhipa maranakatxa ajllitanakax jukʼanikïxänwa. Ukat jichha tiempokamaw alaxpachar sarañatakix jawsasiskakïna (Mat. 28:20). Ukampis 1914 maran Jesucristox reyjam apnaqañ qalltkän uka qhipatxa kunayman luräwinakaw uñjasïna.

14, 15. ¿Kunjamsa jichhürunakan alaxpachar sarañatakix jawsasiski?

¹⁴ Jesusaxa Diosan apnaqäwipar uñisipki taqi ukanakaruwa nayraqatxa alaxpachat tukjäna (Apocalipsis 12:10, 12 liytʼasiñapawa). Ukatxa apnaqäwipan jupamp chika apnaqapkani uka 144.000 ajllitanak phuqachañatakiwa apthapiski. Amuyataxa, niya 1935 maranakanxa  uka apthapïwixa niyaw phuqachasxäna, kunattix khitinakatï yatiyäwinakar istʼapkäna ukanakaxa janiw alaxpachar sarañataki amtanïxapxänti. Qullan ajayuxa janiw jupanakatxa Diosan wawanakapäpxiw sasax qhanañchkänti (uñxattʼarakismawa Romanos 8:16). Antisasa, ‘yaqha uwijanaka’ siskis uka taypinkapxirïtapatwa amuyasipxäna, jupanakax aka Uraq paraison wiñay jakasiñatakiw suyasipki (Juan 10:16). Ukhamax 1935 marat aksaruxa, kunjamtï apóstol Juanax mä visionan uñjkänxa, “wali jachʼa llakinaka” pasapkani uka ‘walja jaqinakaruwa’ apthapisirakïna (Apo. 7:9, 10, 14).

¹⁵ 1930 marat aksaruxa mä qhawqha jaqinakakiw alaxpachar sarañatakix jawsatäxapxäna. ¿Kunatsa? Kunattix jithiqtasxapxi uka yaqhip ajllit cristianonak lantiw yaqhanakarux jawsasi (uñxattʼarakismawa Apocalipsis 3:16). Sañäni, Pabloxa, Diosat jithiqtat walja cristianonakaruw uñtʼäna (Fili. 3:17-19). Ukhamaxa, ¿khitinakarus Jehová Diosax ukanak lanti ajllispa? Ukxa jupakiw saspa. Chiqanxa, janiw jichhak cristianoptapki ukanakarux ajllkaspati, jan ukasti kawkïrinakatï Diosat jan jithiqtasa luqtasipki ukanakarukiw ajllispa. Jesucriston arkirinakapat parlkasaxa ukhamarakïnwa, kunapachatï Jesusax jiwäwipat amtañataki uttʼaykäna ukhaxa, Diosat jan jithiqtasa luqtasipkäna uka arkirinakapakiw ukankapxäna (Luc. 22:28). *

16. ¿Kunatsa ajllit cristianonak tuqit parlkasax, yuspärtanxa, ukat ‘walja jaqinakat’ kamssnasa?

¹⁶ Ukampis taqi khitinakatix 1930 maranakat aksar alaxpachar sarapxañapataki ajllitapkäna uka cristianonakaxa, janiw Diosat jithiqtirinak lanti uttʼayatäñatakikix ajllitapkpachänti. Jan ukasti amuyataxa, Jehová Diosawa aka jan waltʼäwi qhipa urunakan jiwasanak taypin ajllit cristianonakan utjañap munpachäna, aka uñisiri ‘Jachʼa Babilonian’ tukjasiñapkama (Apo. 17:5). * Kunapachaxay Diosax aka 144.000 ajllitanak phuqachañ amtchi ukhaw phuqachani, ukat taqi jupanakasti alaxpachatwa apnaqanxapxani. Ukatxa, Biblian profeciaparjamaxa, “walja jaqinaka” sat jachʼa tamaxa qhipakamaw Diosat jan jithiqtasa tamjamax aguantapxani sisnawa. Ukat jupanakax niyawa Supayan ñanqha pachapax tʼaqhiskani uka ‘wali jachʼa llakinakatxa’ mistxapxani, ukatxa wali kusisitawa Diosan jutïrpachaparu mantapxani.

¡Alaxpachan apnaqapkani ukanakax niyaw phuqachasiski!

17. 1Tesalonicenses 4:15-17 ukat Apocalipsis 6:9-11 uka qillqatanakarjamaxa, ¿kunas kamachatayna Diosat jan jithiqtasa jiwxapxi uka ajllit cristianonakaruxa?

¹⁷ 33 marat aksaruxa, waranq waranqa ajllit cristianonakaxa chʼullqi iyawsäwinipxatapwa uñachtʼayapxi ukat jiwañkamaw Diosat jan jithiqtasaxa arkapxaraki. Jupanakaxa alaxpachan apnaqapxañapataki askit uñtʼat jaqinakäpxiwa. Ukat amuyataxa, Cristox apnaqirjam jutkäna uka nayrïr maranakanwa alaxpacharux jaktasin  makatxapxäna. (1 Tesalonicenses 4:15-17; Apocalipsis 6:9-11 liytʼasiñapawa).

18. 1) ¿Kunsa aka uraqin jiltʼir ajllit cristianonakaxa yatipxi? 2) ¿Kamsapxisa yaqha uwijanaka sat cristianonakax ajllit jilat kullakanakapatxa?

¹⁸ Aka Uraqinkasipki uka ajllit cristianonakatï Diosat jan jithiqtasa yupaychapxanixa, alaxpachar sarañ suytʼäwxa katuqapxaniwa ukxa jupanakax sum yatipxi. Ukat millón millón yaqha uwijanaka sat tamankirinakaxa uka ajllit jilat kullakanakan iyawsäwip uñjasaxa, kunjamtï apóstol Pablox Tesalonicankir ajllit cristianonakarux siskäna ukhamarakiw jupanakax sapxaraki: “Diosan iglesianakapanxa [jan ukax tamanakapanxa] nanakpachaw kusisiñampi jumanakxata parlapxta, llampʼu chuymanïpxatanakamata, iyawsäwinakama taqi tʼaqhisiñ taypina uñachtʼayapxatamata ukhamarak llakisisina tʼaqhisipxatanakamatsa. Akax uñachtʼayistuwa Diosax chiqapätapa uñjäwipanxa, jumanakaru Diosan markapar [jan ukax apnaqäwipar] mantayañataki askit uñtʼasina, ukatarakwa tʼaqhisisipktaxa” sasa (2 Tes. 1:3-5). Kunapachatï qhip qhipa ajllit cristianox jiwxani ukhaxa —kunapachächiniy uk janiw sum yatktanti—, Diosan alaxpach apnaqäwipax phuqachatäxaniwa. Ukhax alaxpachansa aka Uraqinsa, ¡kunja kusiskañakïkani!

[Qhanañchäwinaka]

¿Yattati?

• Taripäwi urutxa, ¿kunsa Diosax Abrahamarux säna?

• ¿Kunatsa Abrahamarux Diosax aski jaqit uñtʼäna?

• ¿Kuna bendicionanaksa ukham aski jaqit uñtʼatäpxatapatxa Abrahaman wawapat jutirinakax katuqapxi?

• Taqpach cristianonakaxa, ¿“walja jaqinaka” sat jachʼa tamat kamssnasa?

[Jisktʼanaka]

[22 janan fotopa]

Jesusaxa arkirinakaparux Diosan Apnaqäwip chʼamampi katupxañapatakiw chʼamañchäna

[23 janan fotopa]

33 maran Pentecostés urunwa Jehová Diosaxa, Abraham ‘wawapan’ wawanakapar ajlliñ qalltäna

[25 janan fotonakapa]

Yaqha uwijanaka satäpkis ukanakaxa wal yuspärapxi aka ajllit jilat kullakanakax aka qhipa urunakan jupanakampïskatapatxa