Itre Ka Ijij Troa Kapa La Baselaia
Sabath drai 9 Maac
Nyima 8 me 17
Itre Ka Ijij Troa Kapa La Baselaia
“Celë hi hatene ihnyingë ka meköti Akötesie, mate qaja ijiji nyipunie kowe la baselaia i Akötesie.”—2 THESALONIKA 1:5.
1, 2. Nemene la aja i Akötresie göne la iameköti, nge drei la atre amekötin?
AME lo macatre 50 M.K., tre, Paulo aposetolo e Athenai. Kola wesitre hnei nyidrë hnene laka hna haöthe la nöj hnene la itre idrola, ene pe kola upi nyidrëti ju troa catre cainöj kowe la itre atr ne la nöj. Hnei nyidrëti hna nyipune la cainöje i nyidrë me qaja la ketre mekun hna xölehuj hnene la itre ka drei nyidrë, itre wanaithihlë. Hnei nyidrëti hna qaja ka hape: “Kola upe enehila [hnei Akötresie] la nöjei ate asë e cailo troa ietra. Qa ngöne la hnei nyidëti hna sa la drai ne troa hnyingën’ amekötine la fene hnene la ate hnei nyidëti hna acil; nge hna anyipicine hnei nyidë kowe la nöjei ate asë, ngöne la hna amele nyidëti hmaca jë qa hna mec.”—Ite Huliwa 17:30, 31.
2 Ka nyipi ewekë catre tro sa mekune hnyawa laka, ase hë Akötresieti amë la drai ne amekötine la fene hnengödrai asë ! Thaa hnei Paulo kö hna qaja mekötine la atr ka troa amekötin, ngo atre hi së laka, kola qeje Iesu Keriso hna amelene hmaca. Ame la aliene la iameköti Iesu cili, tre, mele maine mec.
3. Pine nemene matre Iehova a isisinyikeu me Aberahama, nge drei la ka cilëne la hnëqa ka ketre pengöne ngöne la kola eatrëne ej?
3 Caa thauzane lao macatre la eqeane la Drai ne Amekötin. Ngöne la ëje i Iehova, Iesu la ka troa cilën’ej, ke, nyidrëti la Joxu ne la Baselaia i Akötresie, ngo thaa nyidrëti hmekuje kö. Hnei Iehova hna iëne la itre xaa atr qa celë fen matre ce musi me Iesu me amekötine ngöne la Drai cili ka caa thauzane lao macatre la ehoean. (Aceitunëne jë me Luka 22:29, 30.) Traqa hë koi 4 000 lao macatre qaane lo kola ami trepene hnei Iehova la Drai ne Amekötin, ngöne lo Nyidrëti a isisinyikeu memine la ketre hlue ka mele nyipici koi Nyidrë, ene Aberahama. (E jë la Genese 22:17, 18.) Hna nyiqaane melëne la isisinyikeu ngöne lo macatre 1943 M.K. Eje hi, thaa atrepengöne hnyawa petre kö Aberahama la aliene la isisinyikeu cili kowe la nöjei atr asë. Ngo ame pe së enehila, tre, trotrohnine hnyawa hi së la aliene la itre hnëewekë ne la isisinyikeu, laka tro la matra i Aberahama a cilëne la ketre hnëqa ka sisitria ngöne la kola eatrëne la mekuana i Akötresie, ene la troa amekötine la fene hnengödrai asë.
4, 5. (a) Drei la pane wene ne la matra i Aberahama, nge nemene la hnei nyidrëti hna qaja göne la Baselaia? (b) Hna qaane eu matre fe pi la mejiune troa hane sine la Baselaia i Akötresie?
4 Ame la pane wene ne la matra i Aberahama, tre, mama hnyawa ha laka Iesu ngöne lo kola sië nyidrë hnene lo Uati Hmitrötr, matre Mesia maine Keriso, tune lo hna thingehnaean ekö. (Gal. 3:16) Thupene la kola sië Iesu, hnei nyidrë hna cainöjëne trootro la maca ka loi ne la Baselaia kowe la lapa i angetre Iudra, ngöne la köni macatre nge sin. Thupene la hna othi Ioane Bapataiso, hnei Iesu hna amamane laka ijiji itre xane fe troa hane sine la Baselaia, ke, öni nyidrë, ka hape: “Nge qane ngöne la nöjei drai Ioane bapataiso uti hë enehila kola nyenyape ithepene la baselaia ne hnengödrai, nge ame hna thapapi hnene la itete cat.”—Mat. 11:12.
5 Qëmekene troa qaja la itre ka troa ‘thapa’ la Baselaia ne hnengödrai, öni Iesu, ka hape: “Nyipici ini a qaja koi nyipunie, ka hape, Pëkö ka mama ngöne la hnaho ite föe la ka sisitia hui Ioane bapataiso; loi pe ame la ka co e angate hnine la baselaia ne hnengödrai, te, sisitia hui angeic.” (Mat. 11:11) Pine nemene matre kola qaja tune hnei Iesu? Pine laka qëmekene la troa nenge la uati hmitrötr ngöne lo Penetekos 33 M.K., ame la mejiune troa hane sine la Baselaia i Akötresie, tre, thaa hna fe petre kö kowe la itre hlue i Nyidrë ka mele nyipici. Nge, ame ngöne la ijine cili, tre, meci hë Ioane Bapataiso.—Ite Huliwa 2:1-4.
Hna Jele Mekötine La Matra i Aberahama
6, 7. (a) Nemene la aliene la kola hape, tro la matra i Aberahama a “tune lo itre wëtresiji ne hnengödrai”? (b) Nemene manathith hna kapa hnei Aberahama, nge nemene manathithi fe ka ceitun hna troa kapa hnene la matra i nyidrë?
6 Hna qaja koi Aberahama, ka hape, tro ha mana la matra i nyidrë me nyimutre “tune la ite wëtesiji e hnengödrai” nge tune la ngöni ne ngöne gejë. (Gen. 13:16; 22:17) Kolo lai ka hape, ame ngöne lo hneijine i Aberahama, tre, thaa ijije kö kowe la itre atr troa atre la etrune la itre ka troa sine la matrane cili. Ngo, ame la etrune la matrane ngöne la ua, tre, hna amamane thupene pë hë. Ala 144 000 la etrune la itre ka troa ce me Iesu.—Hna Ama. 7:4; 14:1.
7 Hnene la Wesi Ula i Akötresie hna qaja göne la lapaune i Aberahama, ka hape: “[Hnei Aberahama] hna lapaune koi Iehova; nge hnei Nyidrëti hna qaja eje koi angeice nyine thina ka meköt.” (Gen. 15:5, 6) Nyipici, pëkö atr ka meköti hnyawa e celë fen. (Iako. 3:2) Ngo pine laka atraqatre la lapaune i Aberahama, haawe, hnei Iehova hna imelekeu me nyidrë ceitu me ketre atr ka meköt uti fe la hë Aberahama hnei Nyidrë, ka hape, enehmu i Nyidrë. (Is. 41:8) Ame la itre ka ce me Iesu ka sine la matra i Aberahama ngöne la ua, tre, hna hane jele mekötine angatr fe, nge sisitria catre kö la itre manathithi hnei angatre hna kapa hune la itre hna kapa hnei Aberahama.
8. Nemene la itre manathithi hna hna kapa hnene la itre ka troa sine la matra i Aberahama?
8 Hna jele mekötine la itre keresiano hna iën pine laka, angatr a lapaune kowe la mele hna huujëne hnei Iesu. (Rom. 3:24, 28) Ame xajawa i Iehova, tre, ase hë köle triji la itre ngazo i angatr, nge ijije troa ië angatr hnei uati hmitrötr matre itre nekö i Akötresie ngöne la götrane la ua, ene lo itre trejine me Iesu Keriso. (Ioane 1:12, 13) Angatre hë a lö hnine la isisinyikeu ka hnyipixe nge angatre hi lai nöje ka hnyipixe, “la Isaraela i Akötesie.” (Gal. 6:16; Luka 22:20) Thaa itre manathithi ka tru kö lai ? Celë hi itre kepine matre thaa mejiune kö la itre keresiano hna siën troa mele pine palua e celë fen. Angatr a huujëne la mejiune troa mele e celë fen matre troa kapa la madrine ka tru, ene la troa ce me Iesu ngöne la Drai ne Amekötin me ce musi me nyidrë e koho hnengödrai.—E jë la tusi Roma 8:17.
9, 10. (a) Eue la hna pane iëne la itre keresiano hnene la uati hmitrötr, nge nemene la hnëqa i angatr? (b) Nemene ixatua hna kapa hnene la itre keresiano hna iën?
9 Ame ngöne lo Penetekos 33 M.K., hna aijijëne la caa gurup ne lo itretre lapaun matre tro angatr a hane ce musi me Iesu ngöne la Drai ne Amekötin. Traqa koi ala 120 lao atre drei Iesu hna bapataisone hnei uati hmitrötr, ene pe angatre la itretre pane keresiano hna iën. Ngo, ame la kola sië angatr, tre, angatre hi lai a nyiqaane nyenyape matre troa kapa la mele ka epine palua e hnengödrai. Qaane ju hi la ijine cili, qa i angatre pë hë troa amamane la inyipicikeu i angatre me Iehova ngacama, tiqa ju hë la nöjei itupathi hnei Satana hna atë hui angatr. Maine angatr a ajane troa kapa la korona ne mel e koho hnengödrai, nyipi ewekë tro angatr a mele nyipici uti hë la mec.—Hna Ama. 2:10.
10 Hnei Iehova hna aijijë angatr troa kapa la manathithi cili; hnei Nyidrëti hna hamëne kowe la itre Keresiano hna iën la itre ithuecatr me itre eamo ka nyipi ewekë e hnine la Wesi Ula i Nyidrë me jëne la ekalesia. Drei la ceitun, hnei Paulo hna cinyihane kowe la itre keresiano hna iën e Thesalonika: “Ate hë nyipunie la hne huni hna isa eamo nyipunie, me akeukawan, me hajin, tune la keme kowe la ite nekö i angeic mate tro pala hi nyipunie a ijije koi Akötesie, ate hë nyipunie kowe la baselaia memine la lolo i nyidë.”—1 Thes. 2:11, 12.
11. Nemene la itre hna cinyihane hna hamëne hnei Iehova göne lo itretre sine la “Isaraela i Akötresie”?
11 Kola e la 60 lao macatre thupene la hna iëne la itre pane keresiano ne la ekalesia, hnei Iehova hna öhne laka loi e troa cinyanyine la hnei Nyidrëti hna kuca koi angatr, memine lo itre eamo, me itre ini hnei Nyidrëti hna qaja koi angatr, memine fe la huliwa ne cainöje i Iesu e celë fen. Hnei Iehova hna xome la itre hna cinyihane qene Heleni matre troa nyi xane la itre hna cinyihane qene heberu. Ame la itre hna cinyihane qene Heberu, tre, hna cinyihane panën’ ekö thatraqane la nöje Isaraela ne ngönetrei, ngöne lo ijine imelekeu i angatre ka ketre pengön me Akötresie. Ame la itre tusi keresiano qene Heleni, tre, hna pane cinyihane kowe “la Isaraela i Akötesie,” angatre lo itre hna iën matre itre nekö i Nyidrë ngöne la ua, me itre trejine me Keriso. Eje hi, thaa kolo kö a hape, itretre Isaraela hmekuje hi la ka kepe thangane la itre hna cinyihane qene Heberu, ngo itre xane mina fe laka thaa angetre Isaraela kö. Tune fe la itre keresiano thaa hna iëne kö hnei uati hmitrötr, laka, angatr a hane kapa la itre manathithi ka tru qa ngöne la hna inine la itre hna cinyihane qene Heleni, me trongëne e nöjei drai la itre eamo hnine itre ej.—E jë la 2 Timoteo 3:15-17.
12. Nemene la hnei Paulo hna amekunëne kowe la itre keresiano hna iën?
12 Hna jele mekötine la itre Keresiano ne la hneijine i Iesu, nge hna sië angatre hnei uati hmitrötr matre tro angatr a kapa la trengamo i angatr e koho hnengödrai. Ame petre kö lo angatr e celë fen, thaa hna nue angatre kö troa musi hune la itre trejine me angatr, ene lo itre xaa Keresiano hna iën. Kola mama laka, hnene la itre xaa pane keresiano hna thëthëhmine la götrane cili me nyiqaane thele troa draië hune la itre trejine me angatre hnine la ekalesia. Celë hi matre kola upi Paulo troa hnyinge ka hape: “Meji hë nyipunie enehila, tena mo hë nyipunie enehila, hnei nyipunie hna nyi joxu, nge pate kö hun ; epi nyipici la nyi joxu i nyipunie mate tro fe huni a hane joxu thei nyipunie.” (1 Kor. 4:8) Ene pe, hnei Paulo hna amekunëne la itre keresiano hna iën ne la hneijine i angeic, ka hape: “Ke tha eëhuni kö a musinëne la lapaune i nyipunie, ngo eëhuni a xatuane la madine i nyipunie.”—2 Kor. 1:24.
Kola Apexejene La Etrune La Itre Hna Iën
13. Tune kaa la aqane kökötre la ihë ne la itre hna iën qaane lo macatre 33 M.K.?
13 Thaa hna apexejen’ asë ju kö la ala 144 000 lao keresiano hna iën ngöne lo hneijine i Iesu. Hna sisedrëne pe la ihë cili, uti hë lo hneijine i angaposetolo, nge thupene lai kola nango co trootro la ihë. Ngo thaa hna cile kö la ihë, hna sisedrëne pala hi ngöne lo itre hadredre lao macatre uti hë enehila hneijine së. (Mat. 28:20) Nge thupene la hna nyiqaane musi hnei Iesu ngöne lo macatre 1914, ene pe kolo ha traqa nyimenyime la itre ewekë.
14, 15. Nemene la ka traqa ngöne la hneijine së göne lo ihë ne lo itre hna iën?
14 Ame la ewekë hnapan, tre, hnei Iesu hna pane ahmitrötren e koho hnengödrai me apaatrene la nöjei ka icilekeu memine la Musi nyidrë. (E jë la Hna Amamane 12:10, 12.) Thupene lai, hnei nyidrëti hna xawane pena la itre ka troa ce musi me Iesu ngöne la Baselaia, göne matre pexeje pi lo lai ala 144 000. Nyipine lo itre macatre 1930, mama ha laka easenyi hë matre fenesi pi la ihë cili, nge ame thene la itre ka kapa la huliwa ne cainöj, tre, nyimutre la itre ka thaa mejiune kö troa mele e koho hnengödrai. Thaa anyipicine kö koi angatr hnene la ua laka itre neköi Akötresie angatr. (Pane aceitunëne ju me Roma 8:16.) Ngo, kola mama, laka angatre hi lo itre “xa mamoe,” ene, lo itre ka mejiune troa mele palua ngöne la paradraiso e celë fen. (Ioane 10:16) Celë hi matre, thupene lo macatre 1935, ame la aliene ka tru ne la huliwa ne cainöj, tre, ngöne pena la troa xawane la “ka ala nyimu atraqat,” angatre lo itre hnei Ioane aposetolo hna meköle goeën nge itre thelene pe la “aköt atraqat.”—Hna Ama. 7:9, 10, 14.
15 Ngo thupene la itre macatre 1930, hetrenyi pala kö la itre xaa atr hna iëne matre troa mele e koho hnengödrai. Pine nemen? Pine laka, angatr a nyi hnane lo itre atr hna iëne hë ekö, ngo thaa ka mele nyipici kö. (Aceitunëne ju me Hna Amamane 3:16.) Paulo mina fe a qaja la itre xaa atr hnei nyidrëti hna atre nge ka nuetrije la nyipici. (Fil. 3:17-19) Nge, drei la itre hnei Iehova hna iëne matre troa inyihnai? Atre hi së laka, Iehova hmekuje hi la ka axeciën la itre mekun. Nge loi me meköti e tro sa mekune laka, thaa hnei Iehova kö hna hëne lo itre ka xötrei saen, ngo hnei Nyidrëti pe hna iëne lo itre ka catre mele nyipici hë koi Nyidrë, tune lo itretre dreng, lo itre hnei Iesu hna ithanata kow ngöne la Drai ne Amekunën. a—Luka 22:28.
16. Nemene la madrine së göne lo itre hna iën, nge nemene la nyine tro sa mejiune me lapaune kow?
16 Ngo kola mama laka ame asë hi lo itre hna hëne troa mele e koho hnengödrai qaane lo itre macatre 1930, tre, thaa angatr asë kö la itre ka nyi hnane lo itre Keresiano hna iën ka nuetrije hë la nyipici. Hnei Iehova hna axeciëne laka, tro pala kö a ceme së hnene la itre xaa hna iën ngöne la itre drai tixenuë ne la fene ka ngazo celë, nge uti hë la kola lepe apaatrene elanyi la ithupëjia, ene “Babulona Atraqatr.” b (Hna Ama. 17:5) Nge ijije tro sa mejiune laka, tro kö a pexeje la etrune lao 144 000 ngöne la ijine hna amekötine hnei Iehova, nge tro hë angatr a xome la göhnë ne joxu ngöne la musi ne la Baselaia. Ijije tro fe sa lapaune kowe la hna perofetane hnene la Wesi Ula, laka, tro pala hi a kökötre catre la ka ala nyimu atraqatr, nge tro angatr a caasi pala hi matre troa mele nyipici koi Akötresie. Easenyi hë matre tro “pi [la itre atren] qa ngöne la aköt atraqat,” lo ewekë ka lepe la fene i Satana, nge tro pena angatr a lö cememine la madrine atraqatr e hnine la fene ka hnyipixe hna acile hnei Akötresie.
Easenyi Hë Matre Pexeje Pi Hë La Baselaia Ne Hnengödrai i Akötresie!
17. Thenge la hna cinyihane ngöne 1 Thesalonika 4:15-17 me Hna Amamane 6:9-11, nemene la ewekë ka traqa kowe la itre keresiano hna iën ka mele nyipici uti hë la mec?
17 Qaane lo macatre 33 M.K., alanyimu la itre Keresiano hna iën ka amamane la etrune la lapaune i angatr me xomihni ahoean uti hë la mec. Ase hë jele meköti angatre kösë itre ka ijije troa kapa la Baselaia, nge hnei angatre hna nyiqaane kapa la manathithi cili ngöne lo itre ijine kola xötrei mama la hlepëti Keriso.—E jë la 1 Thesalonika 4:15-17; Hna Amamane 6:9-11.
18. (a) Nemene la ewekë ka xecie hnyawa kowe la itre hna iën ka mele petre kö e celë fen? (b) Tune kaa la aqane goeëne hnene la itre xaa mamoe kö la itre trejin me angatr, itre keresiano hna iën?
18 Ame pë hë lo itre hna iën ka mele pala kö e celë fen, tre, angatr a mejiune laka, maine tro angatr a nyipici uti hë la pun, thaa hmiitre kö matre hane jë fe angatre kepe thangane la hnei angatre hna mele nyipici. Caasi hi la mekune ne la itre milio lao itre xaa mamoe me Paulo ngöne la angatr a goeëne la lapaune ne la itre trejine me angatr hna iën. Öni Paulo aposetolo kowe la itre trejine ne Thesalonika hna iëne tui nyidrë, ka hape: “Qâ huni troa olene pala hi koi Akötesie göi nyipunie ange tejin, ke ijij, ngöne laka cia atraqate la lapaune i nyipunie nge kola tru trootro la ihnimekeu i nyipunie asëjëihë ; celë hi mate madine jë huni göi nyipunie ngöne la nöjei ekalesia i Akötesie qa ngöne la xomi hni memine la lapaune i nyipunie ngöne la nöjei hna thaije nyipunie, me nöjei aköte asëjëihë hna traqa koi nyipunie.” (2 Thes. 1:3-5) E meci hë la Keresiano hna iën tixenuë e celë fen, haawe, kolo hi a hape, pexejë hë la itre atrene la Baselaia i Akötresie ne hnengödrai. Haawe, drei la madrin elanyi e koho hnengödrai me e celë fen !
[Ithueamacany]
a Wange ju lo zonal La Tour de Garde ne 1 Maac 1992, götrane 20, paragaraf 17.
b Wange ju lo “Questions des lecteurs” ngöne la zonal La Tour de Garde ne 1 Mei 2007.
Ijije Kö Tro Epuni a Qeje Pengön?
• Nemene la hnei Akötresieti hna amamane koi Aberahama, nge ka ce punikë memine la Drai ne Amekötin?
• Pine nemen matre hna jele meköti Aberahama?
• Nemene la itre thangane la hna jele mekötine la itre atrene la matra i Aberahama?
• Nemene la ewekë ka xecie hnyawa kowe la nöjei keresiano asë?
[Thying]