Ẹbat ke Ẹdot Ndida Obio Ubọn̄ Nnyene
Ẹbat ke Ẹdot Ndida Obio Ubọn̄ Nnyene
“Emi edi uyarade edinen ubiereikpe Abasi, adade ekesịm edidi se ẹbatde ẹte mbufo ẹmedot ndinyene obio ubọn̄ Abasi.”—2 THESS. 1:5.
1, 2. Nso idi uduak Abasi kaban̄a edikpe ikpe, ndien anie edidi Ebiereikpe emi?
APOSTLE PAUL ama aka Athens ke n̄kpọ nte isua 50 Eyo Nnyịn. Enye ama ọnọ ata eti ikọ ntiense sia mîkokopke inemesịt iban̄a nte ndem ọkọyọhọde obio oro. Enye ama ada ikọ esie ekeberi ke nditịn̄ n̄kpọ oro etiede nte ama edemede udọn̄ mme okpono ndem oro ẹkekpan̄de utọn̄ ẹnọ enye. Enye ọkọdọhọ ete: “Ke emi [Abasi] ọdọhọ ubonowo ete kpukpru mmọ ke kpukpru ebiet ẹkabade esịt. Koro enye emenịm usen eke enye aduakde ndikpe ikpe nnọ isọn̄ ke edinen ido ebe ke owo emi enye emekde, ndien enye ọnọ kpukpru owo nsọn̄ọ ke emi enye akanamde owo oro eset ke n̄kpa.”—Utom 17:30, 31.
2 Edi akpan n̄kpọ didie ntem ndifiọk ke Abasi enịm usen oro enye edikpepde ikpe ọnọ ubonowo! Paul ikasiakke owo emi edikpede ikpe oro ke utịn̄ikọ esie ke Athens, edi nnyịn imọfiọk ke enye edi Jesus Christ emi ẹkenamde eset ke n̄kpa. Ubiereikpe Jesus ediwọrọ n̄kpa m̀mê uwem.
3. Ntak emi Jehovah akanamde ediomi ye Abraham, ndien anie enyene akpan udeme ndisu ediomi emi?
3 Usen Ikpe oro edidi isua 1,000. Jesus edidi Ebiereikpe ke enyịn̄ Jehovah nte Edidem Obio Ubọn̄ Abasi, edi enye iditiehe ikpọn̄. Jehovah emek mme ebiereikpe eken ke otu ubonowo man ẹkara ye Jesus ẹnyụn̄ ẹbiere ikpe ke tọsịn isua. (Men Luke 22:29, 30 domo.) Ke n̄kpọ nte isua 4,000 emi ẹkebede, Jehovah ama anam ndutịm ọnọ Usen Ikpe oro ke ini enye akanamde ediomi ye Abraham, anam-akpanikọ asan̄autom esie. (Kot Genesis 22:17, 18.) Etie nte ediomi oro ọkọtọn̄ọ ke isua 1943 M.E.N. Nte ededi, Abraham ikenen̄ekede ifiọk se ediomi oro ediwọrọde inọ ubonowo. Edi mfịn, nnyịn imọfiọk ke ediomi emi anam mfri Abraham enyene akpan udeme ndisu uduak Abasi emi edide ndibiere ikpe nnọ ofụri ubonowo.
4, 5. (a) Anie edi akpan mfri Abraham, ndien nso ke enye eketịn̄ aban̄a Obio Ubọn̄? (b) Ini ewe ke ẹkenọ mme owo idotenyịn nditiene mbuana ke Obio Ubọn̄?
4 Jesus edi akpan mfri Abraham, ndien ke isua 29 E.N, ẹma ẹyet enye aran ke edisana spirit; enye ama onyụn̄ akabade edi Messiah oro ẹken̄wọn̄ọde, m̀mê Christ. (Gal. 3:16) Jesus ama ada isua ita ye ubak oro ẹketienede ọkwọrọ eti mbụk Obio Ubọn̄ ọnọ mme Jew. Ke ẹma ẹkemụm John Andinịm Owo Baptism, Jesus ama owụt ke mbon en̄wen ẹkeme ndinyene idotenyịn nditiene mbuana ke Obio Ubọn̄ oro ke ini enye ọkọdọhọde ete: “Ọtọn̄ọde ke usen John Andinịm owo baptism tutu esịm emi obio ubọn̄ heaven edi utịtmbuba emi mme owo ẹnyanarede ẹbịne, ndien mbon emi ẹnyanarede ẹbịne ẹda enye ke odudu ẹnyene.”—Matt. 11:12.
5 Odot ẹfiọk ke esisịt ini mbemiso Jesus eketịn̄de aban̄a mbon oro ẹdidade Obio Ubọn̄ Abasi ‘ke odudu’ ẹnyene, enye ama ọdọhọ ete: “Ke akpanikọ ke ndọhọ mbufo nte, Ke otu mmọ eke iban ẹmande, akananam owo idahake ida emi okponde akan John Andinịm owo baptism; edi owo emi ekpride akan ke obio ubọn̄ heaven okpon akan enye.” (Matt. 11:11) Ntak emi ekedide ntre? Koro owo ikenen̄ekede inọ mbon oro ẹnamde akpanikọ idotenyịn editiene mbuana ke Obio Ubọn̄ tutu esịm usen emi ẹken̄wan̄ade edisana spirit ẹduọk mme owo ke Pentecost isua 33 E.N. Etisịm ini oro, John Andinịm Owo Baptism ama akpa.—Utom 2:1-4.
Ẹbat Mfri Abraham ke Edinen
6, 7. (a) Didie ke mfri Abraham ẹkebiet “ntantaọfiọn̄ enyọn̄”? (b) Didie ke ẹkediọn̄ Abraham, ndien didie ke ẹdiọn̄ mfri esie n̄ko?
6 Ẹma ẹsian Abraham ke mfri esie ọyọtọt onyụn̄ awak nte “ntantafiọn̄ enyọn̄” ye nte ntan mbeninyan̄. (Gen. 13:16; 22:17) Ke nditịn̄ ke usụn̄ en̄wen, ke eyo Abraham, owo ikọfiọkke m̀mê owo ifan̄ ẹdinam mfri emi. Edi nte ini akakade, ẹma ẹyarade nnennen ibat mbon oro ẹdinamde mfri esie eke spirit. Mmọ ẹkenyene ndidi owo 144,000, ọkọrọ ye Jesus.—Edi. 7:4; 14:1.
7 Ikọ Abasi etịn̄ ntem aban̄a mbuọtidem Abraham: “[Abraham] ọbuọt idem ye Jehovah; ndien enye abat oro ọnọ enye ke edinen ido.” (Gen. 15:5, 6) Edi akpanikọ ke idụhe owo emi ọfọnde ama. (Jas. 3:2) Edi, ke ntak n̄wọrọnda mbuọtidem Abraham, Jehovah akada enye nte edinen owo, tutu akam okot enye ufan esie. (Isa. 41:8) Ẹbat mbon oro ẹnamde mfri Abraham eke spirit ọkọrọ ye Jesus nte ndinen owo, ndien emi anam mmọ ẹnen̄ede ẹnyene edidiọn̄ ẹkan Abraham.
8. Didie ke ẹdidiọn̄ mfri Abraham?
8 Ẹbat mme Christian oro ẹyetde aran ke edinen ke ntak emi mmọ ẹbuọtde idem ke uwa ufak Jesus. (Rome 3:24, 28) Ke enyịn Jehovah, ikpe etebe mmọ, ndien ẹkeme ndiyet mmọ aran ke edisana spirit nte nditọ Abasi eke spirit, kpa nditọete Jesus Christ. (John 1:12, 13) Mmọ ẹdụk obufa ediomi ẹnyụn̄ ẹnam obufa idụt, kpa “Israel Abasi.” (Gal. 6:16; Luke 22:20) Nso akwa ifet ke mmọ ẹnyene ntem! Ke ntak kpukpru se Abasi anamde ọnọ mmọ, mme Christian oro ẹyetde aran inyeneke idotenyịn nsinsi uwem ke isọn̄. Mmọ ẹyak idotenyịn uwem ke isọn̄ atak mmọ ke ntak anana-mbiet idatesịt oro mmọ ẹnyenede nte mbon oro ẹditienede Jesus ẹkpe ikpe ke Usen Ikpe ẹnyụn̄ ẹkara ye enye ke heaven.—Kot Rome 8:17.
9, 10. (a) Ini ewe ke ẹkeda edisana spirit ẹyet mme Christian aran ke akpa ini, ndien nso ke mmọ ẹkenyene ndisobo? (b) Nso un̄wam ke ẹkenọ mme Christian oro ẹyetde aran?
9 Ke Pentecost isua 33 E.N., ẹma ẹmek mbon oro ẹnamde akpanikọ ẹsịn ke otu mbon oro ẹdikarade ye Jesus ke Usen Ikpe. Ẹma ẹda edisana spirit ẹnịm n̄kpọ nte mme mbet Jesus 120 baptism, ndien ke ntre, mmọ ẹma ẹkabade ẹdi akpa mme Christian oro ẹkeyetde aran. Edi ntọn̄ọ akakam edi oro. Toto ke ini oro, mmọ ẹkenyene ndinam akpanikọ nnọ Jehovah kpa ye ubiọn̄ọ oro Satan ekenyenede ndida ntiene mmọ. Mmọ ẹkenyene ndinam akpanikọ tutu esịm n̄kpa, man ẹbọ anyanya uwem ke heaven.—Edi. 2:10.
10 Emi akanam Jehovah ada Ikọ ye esop esie ọnọ mme Christian oro ẹyetde aran item ye nsịnudọn̄ oro mmọ ẹkeyomde. Ke uwụtn̄kpọ, apostle Paul ekewet ntem ọnọ mme Christian oro ẹyetde aran ke Thessalonica: “Ukem nte ete anamde ye nditọ esie, adan̄a nte nnyịn ikakade iso iteme mbufo owo kiet kiet, inyụn̄ isọn̄ọ mbufo esịt inyụn̄ itie ntiense iban̄a mbufo, man mbufo ẹkpeka iso ẹsan̄a nte odotde Abasi emi okotde mbufo esịn ke obio ubọn̄ ye ubọn̄ esie.”—1 Thess. 2:11, 12.
11. Nso n̄wetnnịm n̄kpọ ke Jehovah ọkọnọ “Israel Abasi”?
11 Ke ediwak isua ẹma ẹkebe tọn̄ọ ẹkemek akpa mme andibuana ke esop Christian oro ẹyetde aran, Jehovah ama okụt ke odot ẹnyene n̄wetnnịm n̄kpọ oro aban̄ade utom ukwọrọikọ Jesus ọkọrọ ye mme n̄kpọ oro Enye akanamde ye item oro ẹkenọde mme Christian oro ẹkeyetde aran ke akpa isua ikie. Ntre, Jehovah ama anam ẹwet N̄wed Abasi Christian Usem Greek ẹdian ke N̄wed Abasi Usem Hebrew oro ama okododu. Ẹkenen̄ede ẹwet N̄wed Abasi Usem Hebrew ẹnọ ata nditọ Israel ke ini mmọ ẹkenyenede san̄asan̄a itie ebuana ye Abasi. Ẹkewet N̄wed Abasi Christian Usem Greek akpan akpan ẹnọ “Israel Abasi,” kpa mbon oro ẹyetde aran nte nditọete Christ ye nditọ Abasi eke spirit. Nte ededi, oro iwọrọke ke baba usụn̄ kiet ke mbon oro mîdịghe nditọ Israel ikemeke ndibọ akwa ufọn nto edikpep N̄wed Abasi Usem Hebrew. Kpasụk ntre n̄ko, mme Christian oro owo mîyetke aran ke spirit ẹbọ akwa ufọn ẹto edikpep ye edida item oro ẹnọde ke N̄wed Abasi Christian Usem Greek nsịn ke edinam.—Kot 2 Timothy 3:15-17.
12. Nso item ke Paul ọkọnọ mme Christian oro ẹkeyetde aran?
12 Ẹma ẹbat mme Christian ke akpa isua ikie nte ndinen ẹnyụn̄ ẹyet mmọ aran ke edisana spirit man ẹnam mmọ ẹnyene udeme ke heaven. Ndikeyet mmọ aran ikanamke mmọ ẹkabade ẹdi mme andikara ekemmọ mme Christian oro ẹyetde aran ke ini mmọ ẹkesụk ẹdude mi ke isọn̄. Etie nte ndusụk akpa mme Christian ẹma ẹfre emi, ndien oro ama anam mmọ ẹtọn̄ọ ndiyom usụn̄ nte ẹkpekarade nditọete mmọ ke esop. Ntre, Paul ama obụp mmọ ete: “Nte mbufo ẹmedadia ẹyụhọ? Nte mbufo ẹmededi mbon inyene ke emi? Nte mbufo ẹma ẹtọtọn̄ọ ndikara nte ndidem ke ini nnyịn mîdụhe? Ke akpanikọ mmoyom mbufo ẹkara nte ndidem, man nnyịn n̄ko ikpakara ye mbufo nte ndidem.” (1 Cor. 4:8) Ntre, Paul ama eti mbon oro ẹkeyetde aran ke eyo esie ete: “Idịghe nte ke nnyịn idi mme andikara mbuọtidem mbufo, edi nnyịn idi nsan̄autom ndinam mbufo ẹnyene idatesịt.”—2 Cor. 1:24.
Ndisịm Ibat Oro Ẹkeyomde
13. Didie ke utom edimek mbon oro ẹyetde aran akaka iso ke isua 33 E.N. ama ekebe?
13 Owo ikemekke ofụri owo 144,000 ke akpa isua ikie. Ẹma ẹka iso ẹmek mmọ ke ofụri eyo mme apostle ndien ekem, etie nte ẹma ẹsụhọde ubọk. Nte ededi, ẹma ẹka iso ẹmek mmọ ke mme isua ikie oro ẹketienede tutu esịm emi. (Matt. 28:20) Ke Jesus ama ọkọtọn̄ọ ndikara ke 1914, mme n̄kpọ ẹma ẹtịbe usọp usọp.
14, 15. Didie ke ẹmek mbon oro ẹyetde aran ke eyo nnyịn?
14 Akpa, Jesus ama ebịn kpukpru se ikọbiọn̄ọde ukara Abasi osion̄o ke heaven. (Kot Ediyarade 12:10, 12.) Ekem, enye ama ọtọn̄ọ nditan̄ mbon oro ẹnyenede idotenyịn nditiene n̄kara ke Obio Ubọn̄ esie mbok, man ibat mmọ ekpekem 144,000. Etisịm n̄kpọ nte 1935, etie nte utom oro ama ekpere ndisịm utịt, ndien ediwak mbon oro ẹkenyịmede etop Obio Ubọn̄ ikenyeneke idotenyịn ndika heaven. Spirit iketiehe ntiense inọ mmọ ke mmọ ẹdi nditọ Abasi. (Men Rome 8:16 domo.) Utu ke oro, mmọ ẹma ẹfiọk ke mmimọ idi ubak “mme erọn̄ en̄wen,” emi ẹnyenede idotenyịn ndidu uwem ke nsinsi ke Paradise isọn̄. (John 10:16) Mmọdo, ke 1935 ama ekebe, ekese se ẹkenamde ke utom ukwọrọikọ ekedi nditan̄ “akwa otuowo” mbok, kpa mbon oro apostle John okokụtde ke n̄kukụt, emi ẹdinyụn̄ ẹbọhọde “akwa ukụt.”—Edi. 7:9, 10, 14.
15 Kpa ye oro, ke mme iduọk isua 1930 ẹma ẹkebe, ẹma ẹnọ ibat ibat owo idotenyịn uka heaven. Ntak-a? Ke ndusụk idaha, ekeme ndidi mmọ ẹda itie mbon oro ẹkenyenede ikot emi, edi oro mîkanamke akpanikọ. (Men Ediyarade 3:16 domo.) Paul ama akam etịn̄ aban̄a mbon oro enye ke idemesie ọkọfiọkde emi ẹkekpọn̄de akpanikọ. (Phil. 3:17-19) Mmanie ke Jehovah esimek esịn ke utọ itie oro? Ke nditịm ntịn̄, enye oro edi mbubehe esie. Edi, etie nte owụt ifiọk ndikere ke enye idimekke mbufa owo, edi ke edimek mbon oro ẹsọn̄ọde ẹda ẹnam akpanikọ, kpa nte mme mbet oro Jesus eketịn̄de aban̄a ke ini enye ọkọtọn̄ọde Editi. *—Luke 22:28.
16. Ke ikerede iban̄a mbon oro ẹyetde aran, ntak emi ikpowụtde esịtekọm, ndien nso ke ikpenen̄ede inịm?
16 Edi etie nte idịghe kpukpru mbon oro ẹnọde idotenyịn uka heaven toto ke iduọk isua 1930, ke ẹmek man ẹda itie mbon oro ẹma ẹkeduọn̄ọ. Jehovah anam nnyịn inyene mme Christian oro ẹyetde aran ke mme akpatre usen eke editịm n̄kpọ emi tutu ekem ini oro ẹdisobode “Akwa Babylon.” * (Edi. 17:5) Nnyịn imekeme ndinen̄ede nnịm ke ibat 144,000 ọyọyọhọ ke edikem ini Abasi ndien ke kpukpru mmọ ẹyeda itie mmọ ke ukara Obio Ubọn̄. Nnyịn imekeme n̄ko nditịm nnịm se ẹkebemde iso ẹtịn̄ ẹte ke akwa otuowo ẹyeka iso ẹnam akpanikọ nte otu. Ke mîbịghike, akwa otuowo ‘ẹyeto akwa ukụt’ oro edisịmde ererimbot Satan ẹwọn̄ọ, ẹnyụn̄ ẹdụk obufa ererimbot Abasi idara idara.
Obio Ubọn̄ Heaven Ọmọn̄ Ọyọhọ!
17. Nte ẹtịn̄de ke 1 Thessalonica 4:15-17 ye Ediyarade 6:9-11, nso itịbe inọ mme Christian oro ẹyetde aran emi ẹkenamde akpanikọ tutu esịm n̄kpa?
17 Toto ke isua 33 E.N., ediwak tọsịn mme Christian oro ẹyetde aran ẹnen̄ede ẹnyene mbuọtidem ẹnyụn̄ ẹnam akpanikọ tutu esịm n̄kpa. Ẹmebabat mmọ emi nte mbon oro ẹdotde ndida Obio Ubọn̄ nnyene, ndien etie nte ọtọn̄ọde ke ntọn̄ọ ntọn̄ọ ini edidu Christ, ẹnọ mmọ utịp mmọ ke heaven.—Kot 1 Thessalonica 4:15-17; Ediyarade 6:9-11.
18. (a) Nso ke nsụhọ mbon oro ẹyetde aran ẹnen̄ede ẹnịm? (b) Didie ke mme erọn̄ en̄wen ẹse nditọete mmọ oro ẹyetde aran?
18 Mbon oro ẹyetde aran emi ẹsụk ẹdude ke isọn̄ ẹnen̄ede ẹfiọk ke edieke mmimọ ikade iso inam akpanikọ, ke ẹyenọ mmimọ utịp mmimọ ke mîbịghike. Ke ini ediwak miliọn mme erọn̄ en̄wen ẹkerede ẹban̄a mbuọtidem nditọete mmọ oro ẹyetde aran, mmọ ẹsinyịme ye mme ikọ oro Paul eketịn̄de mi aban̄a nditọete esie ke Thessalonica ete: “Nnyịn ke idem nnyịn imobụre mbụre iban̄a mbufo ke otu mme esop Abasi ke ntak ime ye mbuọtidem oro mbufo ẹnyenede ke ukọbọ ye ukụt oro mbufo ẹyọde. Emi edi uyarade edinen ubiereikpe Abasi, adade ekesịm edidi se ẹbatde ẹte mbufo ẹmedot ndinyene obio ubọn̄ Abasi, emi mbufo ke akpanikọ ẹkụtde ndutụhọ ẹban̄a.” (2 Thess. 1:3-5) Ini ekededi emi akpatre ke otu mbon oro ẹyetde aran edikpọn̄de isọn̄, Obio Ubọn̄ heaven ọyọyọhọ. Nso n̄kpọ inemesịt ke emi edidi ntem, ke heaven ye ke isọn̄!
[Mme Ikọ Idakisọn̄]
^ ikp. 15 Se nsiondi Enyọn̄-Ukpeme eke March 1, 1992, page 20, ikpehe ekikere 17.
^ ikp. 16 Se “Mme Mbụme Ẹtode Mme Andikot” ke nsiondi Enyọn̄-Ukpeme eke May 1, 2007.
Nte Afo Emekeme Ndinam An̄wan̄a?
• Nso ke Abasi akayarade ọnọ Abraham, emi ekenyenede ebuana ye Usen Ikpe?
• Ntak emi ẹkebatde Abraham ke edinen?
• Ndidi se ẹbatde ke edinen anam mfri Abraham ẹnyene nso ifet?
• Nso ke kpukpru mme Christian ẹnen̄ede ẹnịm?
[Mme Mbụme Ukpepn̄kpọ]
[Ndise ke page 20]
Jesus ama esịn udọn̄ ọnọ mme anditiene enye ete ẹnyanarede ẹbịne Obio Ubọn̄
[Ndise ke page 21]
Jehovah ama ọtọn̄ọ ndimek mme andinam udiana mfri Abraham ke Pentecost 33 E.N.
[Ndise ke page 23]
Mme erọn̄ en̄wen ẹdat esịt ndinyene mme Christian oro ẹyetde aran ke mme akpatre usen emi