Babadibue bakumbane bua kuangata Bukalenge

‘Malu aa adi tshimanyinu tshia dilumbulula diakane dia Nzambi; bua nuenu nubadibue bakanangane ne bukalenge bua Nzambi.’​—2 TES. 1:5.

1, 2. Nzambi mmulongolole tshinyi bua dilumbuluisha ne nnganyi walumbuluisha bantu?

PABUIPI ne tshidimu tshia 50 kunyima kua Yezu, mupostolo Paulo uvua mu Atena. Bu muvuabi bimutonda bua kumona muvua ditendelela dia mpingu ditangalake, biakamusaka bua kuyisha ne dikima dionso. Wakajikija muyuki wende ne mêyi avua ne bua kuikala makoke ntema ya batendeledi ba mpingu bavua bamuteleja. Wakamba ne: ‘Katataka Nzambi udi wela mukenji ne: Bantu bonso badi kuonso bakudimune mitshima yabu; bua yeye wakasungula dituku didiye ulumbuluisha ba pa buloba mu buakane kudi muntu wakasungulaye. Yeye kabidi wakapa bantu bonso ditabuja dia bualu ebu, bua yeye wakamubisha ku lufu.’​—Bien. 17:30, 31.

² Bidi ne mushinga bua kuela meji ku bualu ebu ne: Nzambi mmulongolole dituku dia kulumbuluisha bantu. Paulo kavua mutele muntu walua kulumbuluisha bantu mu muyuki wakenzaye mu Atena to, kadi tuetu tudi bamanye ne: muntu au n’Yezu Kristo wakabishabu ku lufu. Dilumbuluisha dia Yezu nedipeteshe bantu muoyo anyi lufu.

3. Bua tshinyi Yehowa uvua mudie tshipungidi ne Abalahama ne nnganyi udi ne mudimu wa pa buawu wa kutshikumbaja?

³ Dituku dia dilumbuluisha adi nedikale dia bidimu 1 000. Bu mudi Yezu muikale Mukalenge wa Bukalenge bua Nzambi, yeye ke walombola dilumbuluisha adi mu dîna dia Yehowa, kadi kakuikala nkayende to. Yehowa mmusungule bantu bakuabu bua kukokesha nende ne kulumbuluisha bantu munkatshi mua bidimu tshinunu. (Tangila Luka 22:29, 30.) Kukadi bidimu bitue ku 4 000, Yehowa wakasa tshishimikidi tshia Dituku dia Dilumbuluisha pakadiaye tshipungidi ne musadidi wende wa lulamatu Abalahama. (Bala Genese 22:17, 18.) Tshipungidi atshi tshiakatuadija mu 1943 kumpala kua Yezu. Bushuwa, Abalahama kavua mumvue bimpe tshivua tshipungidi atshi mua kuenzela bantu to. Kadi tuetu lelu, tudi bamanye ne: mu tshipungidi atshi, kankanunuina ka Abalahama kadi ne mudimu wa pa buawu wa kukumbaja disua dia Nzambi dia kulumbuluisha bantu.

4, 5. (a) Nnganyi udi tshitupa tshia kumpala tshia kankanunuina ka Abalahama? Uvua muambe tshinyi bua Bukalenge? (b) Ndîba kayi diakunzuluilabu bantu njila wa kupeta ditekemena dia kubuela mu Bukalenge?

⁴ Yezu ke uvua tshitupa tshia kumpala tshia kankanunuina ka Abalama ne mu tshidimu  tshia 29 Nzambi wakamuela manyi a nyuma muimpe ne Yezu kuluaye Masiya anyi Kristo uvuabu balaye. (Gal. 3:16) Yezu wakenza bidimu bisatu ne tshitupa wenda uyisha bena Yuda lumu luimpe lua Bukalenge bua Nzambi. Panyima pa bamane kukuata Yone Mubatiji, Yezu wakaleja ne: bantu bakuabu bavua mua kubuela pabu mu Bukalenge abu pakambaye ne: ‘Kubangila ku matuku a Yone Mubatiji too ne mpindieu bukalenge bua mu diulu ke tshintu tshidi bantu bipatshila, ne aba badi babuipatshila badi babukuata.’​—Mat. 11:12, NW.

⁵ Bualu budi busankisha mbua ne: kumpala kua Yezu kuakulaye bua bantu badi ‘bakuata’ Bukalenge bua mu diulu, wakamba ne: ‘Bulelela, ndi nuambila ne: Munkatshi mua bakalelabu kudi bakaji kamuakubika mukuabu mutambe Yone Mubatiji; kadi udi mutambe bonso bukese mu bukalenge bua mu diulu udi mumutambe yeye.’ (Mat. 11:11) Bua tshinyi wakamba nanku? Bualu bakunzuluila bantu njila wa kupeta ditekemena dia kubuela mu Bukalenge mu Pentekoste wa mu 33 pavua bayidi ba lulamatu bapete nyuma muimpe. Kadi mu tshikondo atshi, Yone Mubatiji ukavua mufue.​—Bien. 2:1-4.

Nzambi udi ubala kankanunuina ka Abalahama bu kakane

6, 7. (a) Mmu mushindu kayi muvua kankanunuina ka Abalahama ne bua kulua bu “mitoto ya mu diulu”? (b) Ndibenesha kayi diakapeta Abalahama? Ndibenesha kayi dia muomumue didi kankanunuina kende kapeta?

⁶ Nzambi wakambila Abalahama ne: kankanunuina kende kavua ne bua kuvulangana ne kulua anu bu “mitoto ya mu diulu” ne bu nsenga ya kumpenga kua mâyi manene. (Gen. 13:16; 22:17) Mbuena kuamba ne: mu tshikondo tshia Abalahama kakuvua muntu uvua mumanye bungi bua bantu bavua ne bua kuenza kankanunuina aku to. Kadi Nzambi wakalua kumanyisha bungi bujalame pashishe. Pa kumbusha Yezu, bavua ne bua kuikala 144 000.​—Buak. 7:4; 14:1.

⁷ Dîyi dia Nzambi didi diamba bua ditabuja dia Abalahama ne: ‘Abalahama wakitabuja Yehowa, ne Yehowa wakabala kuitabuja kuende ne: Mbuakane buende.’ (Gen. 15:5, 6) Bulelela, kakuena muntu nansha umue udi muakane tshishiki to. (Yak. 3:2) Kadi bua ditabuja dia dikema divua Abalahama nadi, Yehowa wakamuenzela malu bienze anu bu ne: uvua muntu muakane, kufikaye too ne ku dimubikila ne: mulunda wende. (Yesh. 41:8) Nzambi udi ubala bantu bonso badi benza kankanunuina ka Abalahama pamue ne Yezu ne: mbakane, ne bua bualu ebu badi bapeta mabenesha mapite too ne avua Abalahama mupete.

8. Mmasanka kayi adi mmindile badi benza kankanunuina ka Abalahama?

⁸ Nzambi udi wangata bena Kristo bela manyi bu bakane bualu badi bitabuja mulambu wa Yezu. (Lomo 3:24, 28) Ku mêsu kua Yehowa, mbabingishibue ku mibi yabu ne badi mua kupeta nyuma muimpe bua kulua bana ba mu nyuma ba Nzambi, bana babu ne Yezu Kristo. (Yone 1:12, 13) Badi badia tshipungidi tshipiatshipia ne badi benza tshisamba tshipiatshipia tshia “bena Isalele ba Nzambi.” (Gal. 6:16; Luka 22:20) Malu onso aa adi aleja mudibu ne diakalenga dinene be! Bua malu adi Nzambi muenzele bela manyi aa, kabena ne ditekemena dia kushala ne muoyo wa tshiendelele pa buloba to. Badi bitaba bua kujimija ditekemena edi bua kupetabu disanka dipite bunene dia kulumbuluisha pamue ne Yezu mu Dituku dia  Dilumbuluisha ne kukokesha nende mu diulu.​—Bala Lomo 8:17.

9, 10. (a) Ndîba kayi divua bena Kristo bapete nyuma muimpe musangu wa kumpala ne ntshinyi tshivua tshibindile? (b) Ndiambuluisha kayi diakapeta bela manyi?

⁹ Mu Pentekoste wa mu tshidimu tshia 33, tshisumbu tshia bantu ba lulamatu tshiakapeta mushindu wa kuikala munkatshi mua bantu bakokesha ne Yezu mu Dituku dia Dilumbuluisha. Bayidi ba Yezu batue ku 120 bakatambula mu nyuma muimpe ne kuluabu bela manyi ba kumpala. Kadi buabu bobu, ditambula adi divua anu ntuadijilu. Katshia anu pinapu, bavua ne bua kuleja muvuabu balamate Yehowa nansha mu ntatu yonso ivua Satana ne bua kubakebela. Bavua ne bua kushala ne lulamatu too ne ku lufu bua bobu kupeta tshifulu tshia butumbi tshia muoyo wa mu diulu.​—Buak. 2:10.

¹⁰ Bua kubambuluisha, Yehowa wakabapesha bukole ne mibelu ivua ikengedibua ku diambuluisha dia Dîyi diende ne dia tshisumbu tshia bena Kristo. Tshilejilu, mupostolo Paulo wakafundila bena Kristo bela manyi ba mu Tesalonike ne: ‘Bu mudi tatu wenza ne bana bende balela, patuakanusengelela, patuakanukolesha mitshima, patuakanuambila dîyi, bua nuenu nuende bakanangane ne Nzambi, udi unubikila bua nuenu kubuela mu bukalenge buende ne mu butumbi buende.’​—1 Tes. 2:11, 12.

11. Ntshinyi tshivua Yehowa mufundishe bua “bena Isalele ba Nzambi”?

¹¹ Mu bidimu bipite pa 60 biakalonda panyima pa disungula bena Kristo bela manyi ba kumpala, Yehowa wakamona ne: bivua bimpe bua kufundisha malu avua Yezu muenze pavuaye pa buloba pamue ne mushindu uvua Nzambi muenzele bela manyi ba kumpala malu ne mubapeshe mibelu. Ke bualu kayi Yehowa wakasakidila Mifundu ya tshiena Greke ku Mifundu ya tshiena Ebelu ikavuaku. Mifundu ya tshiena Ebelu ivua mifundila kumpala bena Isalele ba ku mubidi tshikondo tshivuabu mu malanda a pa buawu ne Nzambi. Mifundu ya tshiena Greke ivua mifundila nangananga “bena Isalele ba Nzambi” bavua bapete nyuma muimpe bua kuikala bana babu ne Kristo ne bana ba mu nyuma ba Nzambi. Kadi abi kabiena biumvuija ne: bantu bavua kabayi bena Isalele kabavua mua kupeta dikuatshisha mu dibala Mifundu ya tshiena Ebelu nansha. Bia muomumue, bena Kristo badi kabayi bela manyi badi bapeta diambuluisha padibu babala mibelu idi mu Mifundu ya tshiena Greke ne bayitumikila.​—Bala 2 Timote 3:15-17.

12. Ntshinyi tshivua Paulo muvuluije bela manyi?

¹² Nzambi wakangata bena Kristo ba kumpala bu bakane ne kubapeshaye nyuma wende bua bapete bupianyi buabu mu diulu. Dibela bela manyi kadivua dibavuija bakalenge ba bena Kristo nabu bela manyi to. Bidi bimueneka ne: bamue bena Kristo ba kumpala bakapua bualu abu muoyo ne kutuadijabu kukeba lumu luvua kaluyi lukumbane mu tshisumbu. Ke bualu kayi Paulo wakabafundila ne: ‘Nuakumana kukuta, nuakumana kulua babanji, nuakulua bakokeshi kanuyi netu. Bulelela, ngakadi musue bua nuenu nuikale bakokeshi, bua tuetu tuikale bakokeshi nenu.’ (1 Kol. 4:8) Nunku Paulo wakavuluija bela manyi ba tshikondo tshiende ne: ‘Ki mbua tudi ne bukokeshi ku ditabuja dienu, kadi tudi bakuatshishanganyi nenu mu disanka dienu.’​—2 Kol. 1:24.

Badi bakumbaja bungi bua bantu bukavuabu bambe

13. Mmunyi muvua disungula dia bela manyi ditungunuke panyima pa tshidimu tshia 33?

¹³ Kabakasungula bela manyi bonso 144 000 mu bidimu lukama bia kumpala to. Dibasungula diakatungunuka mu tshikondo tshionso tshia bapostolo ne bidi bimueneka ne: diakakepela pashishe. Tshidibi, diakatungunuka mu bidimu bionso biakalonda too ne mu matuku etu aa. (Mat. 28:20) Kadi panyima pa Yezu mumane kutuadija kukokesha mu 1914, malu akaya ne lukasa lua bungi.

14, 15. Ntshinyi tshidi tshienzeke mu tshikondo tshietu etshi bua dibikila dia bela manyi?

¹⁴ Tshia kumpala, Yezu wakanji kumbusha bonso bavua baluisha bukokeshi bua Nzambi mu diulu. (Bala Buakabuluibua 12:10, 12.) Pashishe wakatuadija kusangisha bena mu Bukalenge bua Nzambi bavua bashale bua kukumbaja bungi bua 144 000. Mu bidimu bia pabuipi  ne 1935, biakamueneka ne: mudimu au ukavua pabuipi ne ku ndekelu ne bantu ba bungi bavua bitaba bulelela kabavua ne dijinga dia kuya mu diulu to. Nyuma kavua umanyishangana nabu ne: bavua bana ba Nzambi to. (Tangila Lomo 8:16.) Kadi bavua badimanyisha bu “mikoko mikuabo” idi ne ditekemena dia kusomba kashidi mu mparadizu pa buloba. (Yone 10:16) Nunku, panyima pa 1935, mudimu wa kuyisha wakatamba kuimanyina pa disangisha dia “tshisumbu tshinene” tshia bantu bavua mupostolo Yone mumone mu tshikena-kumona ne bavua ne bua kupanduka ku “dikenga dinene.”​—Buak. 7:9, 10, 14.

¹⁵ Kadi katshia mu bidimu bia 1930, mbasungule bantu bakese bua kuya mu diulu. Bua tshinyi? Imue misangu, bidi mua kuikala bua kupingana pa muaba wa bantu bavuabu babikile kadi kuluabu kupanga lulamatu. (Tangila Buakabuluibua 3:16.) Nansha Paulo wakakula bua bantu bavuaye mumanye bavua balekele bulelela. (Filip. 3:17-19) Mbanganyi badi Yehowa mua kubikila bua kupingana miaba ya nunku? Bushuwa, yeye nkayende ke udi usungula. Kadi bidi bimueneka ne: kêna mua kubikila bantu bapiabapia badi bakudimune mitshima, kadi udi ubikila bantu bakadi baleje mudibu ne lulamatu mu mushindu kampanda anu bu bayidi bavua Yezu muakule nabu dîba divuaye mubanjije Tshivulukilu tshia lufu luende. *​—Luka 22:28.

16. Pa bidi bitangila bela manyi, tudi ne bua kuikala ne dianyisha bua tshinyi? Ntshinyi tshitudi ne bua kuitaba ne dishindika dionso?

¹⁶ Kadi bidi bimueneka ne: ki mbantu bonso badibu basungule bua kuya mu diulu katshia mu bidimu bia 1930 badi bapingane pa muaba wa bantu badi balekela bulelela to. Bidi bimueneka ne: Yehowa mmulongolole bua tuikale ne bena Kristo bela manyi munkatshi muetu mu matuku onso a ndekelu a tshikondo etshi too ne pabutulaye “Babulona Munene.” * (Buak. 17:5) Tudi ne bua kuikala bajadike ne: bungi busanga bua bantu 144 000 nebukumbane mu tshikondo tshidi Yehowa musungule ne ndekelu wa bionso, bantu bonso aba nebasombe pa miaba yabu mu Bukalenge buende. Tudi kabidi ne bua kuitaba Dîyi dia mulayi didi dileja ne: bantu ba mu tshisumbu tshinene tshidi tshienda anu tshidiunda nebatungunuke ne kuikala ne lulamatu mu tshibungi. Mu mutantshi mukese emu, ‘nebumuke mu dikenga dinene’ diakuata bulongolodi bua Satana ne nebabuele ne disanka mu bulongolodi bupiabupia bua Nzambi.

Bungi bua bakokesha mu Bukalenge bua Nzambi bukadi pa kukumbana

17. Bilondeshile 1 Tesalonike 4:15-17 ne Buakabuluibua 6:9-11, ntshinyi tshidi tshienzekele bela manyi badi bafue ne lulamatu?

¹⁷ Katshia anu mu tshidimu tshia 33, bena Kristo bela manyi ba bungi mbaleje ditabuja dikole ne mbashale ne lulamatu too ne ku lufu. Bela manyi aba bakadi babadibue bakane  bua kupeta Bukalenge, ne bidi bimueneka ne: katshia anu ku ntuadijilu kua dilua dia Kristo Mukalenge, bakadi bapete difutu diabu mu diulu.​—Bala 1 Tesalonike 4:15-17 ne Buakabuluibua 6:9-11.

18. (a) Bela manyi batshidi pa buloba badi ne dishindika kayi? (b) Bena mu tshisumbu tshia mikoko mikuabu badi bamona bena Kristo bela manyi bishi?

¹⁸ Bela manyi batshidi pa buloba mbashindike ne: bobu bashale ne lulamatu, nebapete pabu difutu diabu mu diulu mu mutantshi mukese emu. Padi mikoko mikuabu yela meji ku ditabuja dia bana babu bela manyi, idi itaba tshivua Paulo mufundile bena Kristo bela manyi ba mu Tesalonike ne: ‘Tudi tutumbila bua bualu buenu mu ekeleziya ya Nzambi bualu bua ditantamana dienu ne bua ditabuja dienu mu makenga enu onso ne mu matata onso anudi nuikala nawu. Malu aa adi tshimanyinu tshia dilumbulula diakane dia Nzambi; bua nuenu nubadibue bakanangane ne bukalenge bua Nzambi bunudi nukengela bualu buabu kabidi.’ (2 Tes. 1:3-5) Bungi bua bantu badi benza Bukalenge bua Nzambi bua mu diulu nebukumbane pafua muntu wa ndekelu wa mu bela manyi batshidi pa buloba, dîba dionso dienzeka bualu abu. Nebikale bualu bua disanka mu diulu ne pa buloba!

[Mêyi adi kuinshi]

Udi mua kumvuija anyi?

• Ntshinyi tshivua Nzambi muleje Abalahama tshidi tshitangila Dituku dia Dilumbuluisha?

• Bua tshinyi Nzambi wakangata Abalahama bu muntu muakane?

• Bu mudi Nzambi ubala badi benza kankanunuina ka Abalahama bu bakane, bidi bibafikisha ku tshinyi?

• Bena Kristo bonso badi ne dishindika kayi?

[Nkonko ya dilonga]

[Tshimfuanyi mu dibeji 20]

Yezu wakakankamija bayidi bende bua badienzeje bua kubuela mu Bukalenge bua Nzambi

[Tshimfuanyi mu dibeji 21]

Mu Pentekoste wa mu 33, Yehowa wakatuadija kusungula bantu bakuabu badi benza kankanunuina ka Abalahama

[Bimfuanyi mu dibeji 23]

Mikoko mikuabu idi ne dianyisha bua mudi bela manyi bikale nabu munkatshi mua matuku aa a ku ndekelu