Anateleli Kutambwila Wanta

‘Diyi nsañu yakumwekesha nachu kusompesha kwaNzambi kwaloña, kulonda ayimonaña kutelela wanta waNzambi.’—2 ATESALONIKA 1:5.

1, 2. Indi Nzambi wukweti nkeñelwinyi kutalisha kukusompesha, nawa hinyi wakasompeshaña?

 KUKAMWIHI nachaaka cha 50 C.E., kapostolu Pawulu wadiñi muAtenisi. Watachikili kushimwina nsañu yayiwahi chikupu muloña waluwankeni nakupesha kwamweniyi kwaswejeli kutanda. Wakunkulwili mpanji yindi nakushimuna nsañu yatela yashikili hanyichima yawasenji atiyileña chadiña nakuhoshayi. Wahosheli nindi: “Katataka [Nzambi] naleji antu ejima kwejima, nindi abalumuki munyichima. Muloña nashumu dehi ifuku damba kasompeshayi matuña mwaloña, neyala anafuukuliyi dehi. Mwenomu nakoleshumu dehi kudi antu ejima, nanochu chanamusañuliyi mudi afu.”—Yililu 17:30, 31.

² Dichi twatela kutoñojokaña hawalala wakwila nawu Nzambi naloñeshi ifuku dakusompesha muchidi wamuntu kumbidi. Iwu wunsompeshi akawihana kudi muntu wabulili kutenawu kudi Pawulu mumpanji yindi muAtenisi ilaña muntu yeniwu diyi Yesu Kristu wutweluka wasañwiluwu. Hampinji yakasompeshañayi Yesu amakwawu akahanda amakwawu akafwa.

3. Muloñadi Yehova chatiyañeniyi naAbarahama chitiyañenu, nawa hinyi wekala namudimu walema wakushikija chitiyañenu chenichi?

³ Idi Ifuku daKusompesha dikekala dayaaka 1,000. Yesu diyi wakalombola ifuku denidi kuhitila mwijina daYehova hamu neyi Mwanta waWanta waNzambi, ilaña hakekala nkawinduku. Yehova watondaña antu amakwawu mukachi kawantu akayula hamu naYesu nawa akasompesha hefuku dadilehi dekombakaji danyaka. (Esekejenu Luka 22:29, 30.) Kukamwihi nayaaka 4,000 yinahituhu, Yehova walili chikuku Chefuku daKusompesha hampinji yatiyañeniyi chitiyañenu nakambuñindi washinshika Abarahama. (Tañenu Kutachika 22:17, 18.) Hekwawu, chitiyañenu chenichi chatachikili kuzatika mu 1943 B.C.E. Ilaña, Abarahama helukili chikupu ochu chitiyañenu chichikakoñela muchidi wamuntuku. Anetu makonu, tuneluki netu kuhitila muchitiyañenu chaAbarahama, mbutu yaAbarahama yikweti mudimu walema nankashi mukushikijewa kwankeñelu yaNzambi yakusompesha muchidi wamuntu.

4, 5. (a) Hinyi wadiñi chibalu chatachi chambutu yaAbarahama, nawa nsañwinyi yaWanta yahosheliyi? (b) Indi kuchiñeja kwakwikala kukabadi kawaWanta akwenzunwini mpinjinyi?

⁴ Chibalu chatachi chambutu yaAbarahama wekalili Yesu, wawayishiluwu naspiritu yajila  mu 29 C.E. nawa wekalili Mesiya wakaninuwu hela Kristu. (Aŋalija 3:16) Yesu wateleleli kushimwina nsañu yayiwahi yaWanta kumuza wawaYudeya hadi yaaka yisatu nachikunku. Hanyima yakumukasa Yowanu Mpapatishu, Yesu wahosheli nindi, antu amakwawu anateli kukuhwelela kwikala antu amuWanta weniwu hakuhosha nindi: “Kufumisha kumafuku aYowanu Mpapatishu nakushika kumafuku anu akatataka, wanta wamwiwulu adi nakuwukwata nañovu nankashi, awukwataña nañovu kudi akwañovu.”—Matewu 11:12.

⁵ Henohu kanda yahoshi hadi antu ‘akakwata nañovu’ Wanta wamwiwulu, Yesu wahosheli nindi: “Nakuyileja chalala nami, hadi antu anavwaliki kudi ambanda, hikunamwekani nabadiki Yowanu Mpapatishuku; hela chochu, nakehi muwanta wamwiwulu namubadiki yena.” (Matewu 11:11) Muloñadi Yesu chahosheleliyi mwenimu? Muloña kuchiñeja kwakwikala kukabadi kaWanta waNzambi hikwadiña hadi antu ashinshikaku sampu nimpinji yayichililuwu spiritu yajila haPentekosta mu 33 C.E. Hayina mpinji, Yowanu Mpapatishu wadiñi wafwa dehi.—Yililu 2:1-4.

Mbutu yaAbarahama Ayishimuna Nawu Yaloña

6, 7. (a) Munjilanyi mbutu yaAbarahama muyekalilili “neyi tutumbwa twamwiwulu”? (b) Nkiswinyi yatambwililiyi Abarahama, nawa mbutu yindi yatambwilaña nkisu yamuchidinyi?

⁶ Abarahama amulejeli nawu mbutu yindi yakavula nawa yakekala “neyi tutumbwa twamwiwulu” nawa neyi wusekulula wekala kuchikumu chakaluñalwiji. (Kutachika 13:16; 22:17) Dikwila nawu, antu adiña mumafuku aAbarahama akañenyi kwiluka kuvula kwawantu akekala muniyi mbutu. Nkumininaku, kuvula kwambutu yindi yakuspiritu ayimwekesheli. Kubombela hadi Yesu, kuvula kwambutu yakuspiritu yashikili ku 144,000.—Chimwekeshu 7:4; 14:1.

⁷ Izu daNzambi dahosha hachikuhwelelu chaAbarahama nawu: “[Abarahama] wamwitiyili Yehova; Yehova wamufuukwililichu nindi hikuloña.” (Kutachika 15:5, 6) Chalala, kwosi muntu waloña chikupuku. (Yakoba 3:2) Hela chochu, hamuloña wachikuhwelelu chaAbarahama chabadika, Yehova wamuzatishili hamu neyi muntu waloña nawa wamuteneni nindi ibwambu dindi. (Isaya 41:8) Antu atuña chibalu chambutu yaAbarahama yakuspiritu hamu naYesu ayishimuna kwikala aloña, nawa chumichi chayiletelaña nkisu jajivulu kubadika jatambwililiyi Abarahama.

8. Nkiswinyi yikwetuwu antu adi kukabadi kambutu yaAbarahama?

⁸ EniKristu awayishewa ayishimuna kwikala aloña muloña wakukuhwelela mwifutu damuloña daYesu. (Aroma 3:24, 28) Yehova wayimonaña neyi hiyantu abula nshidi nawa anateli kuwayishewa naspiritu yajila kulonda ekali anyana kaNzambi akuspiritu, amana kwaYesu Kristu. (Yowanu 1:12, 13) Enzaña muchitiyañenu chachiha nakwilisha muza wamwiha, ‘Isarela wambala waNzambi.’ (Aŋalija 6:16; Luka 22:20) Kwenoku kukooleka kukwetuwu! Hamuloña wayuma yinayikoñeliyi Nzambi, eniKristu awayishewa hiyakweti kuchiñeja kwakushakama hamaseki chahaya nyakaku. Alambulaña iku kuchiñeja hamuloña wakusweja kwikala namuzañalu wakwikala hamu naYesu Hefuku daKusompesha nikuyula nindi mwiwulu.—Tañenu Aroma 8:17.

9, 10. (a) Mpinjinyi yayiwayishiluwu eniKristu katachi naspiritu yajila, nawa chumanyi chadiñi hambidi yawu? (b) Wukwashu wamuchidinyi watambwililuwu eniKristu awayishewa?

 ⁹ HaPentekosta 33 C.E., izanvu dawantu ashinshika ayinkeli kukooleka kwakwikala hakachi kawantu akayula hamu naYesu Hefuku daKusompesha. Atumbanji twaYesu kwakwihi na 120 ayipapatishili naspiritu yajila nawa diwu ekalili eniKristu atachi awayishewa. Hela chochu, kudi wena yadiñi njila yatachi yakutambwilamu wumi wahaya nyaka mwiwulu. Kufuma tuhu hayina mpinji, ateleleli kwikala ashinshika kudi Yehova hichidi namuloña nakweseka kudi kwejima kwadi kuyiletelayi Satanaku. Ateleleli kwikala ashinshika ndo-o nikukufwa hakwila nawu atambwili chibaaba chawumi wamwiwulu.—Chimwekeshu 2:10.

¹⁰ Chumichi chamuleñeleli Yehova kuyikolesha nikuyikonkomwena eniKristu awayishewa kuhitila Mwizu dindi nimuchipompelu chawiniKristu. Chakutalilahu, kapostolu Pawulu wasonekeleli eniKristu awayishewa amuTesalonika nindi: “Nakuyikundeja, nakuyileja, neyi chelañayi tata anyanindi; kulonda mwendi nakumutelela Nzambi, wayitambikili kwiñila muwanta windi yomweni nimukulema kwindi.”—1 Atesalonika 2:11, 12.

11. Nsañwinyi yasonekeluwu yayinkeluwu ‘aIsarela ambala aNzambi’ kudi Yehova?

¹¹ Chimwahitili yaaka yakubadika ha 60 kufuma hayitondeluwu antu atachi amuchipompelu chaweniKristu awayishewa, Yehova wachimweni nindi chachiwahi kwikala nawunsahu wahaya nyaka wamudimu waYesu waheseki nichazatileñayi nikufumba eniKristu awayishewa amunkulakaji yamwaka watachi. Dichi Yehova wabombeleluku Nyikanda yajila yaweniKristu yachiGriki kuNyikanda yajila yachiHeberu yadiñaku. Nyikanda yachiHeberu ayisonekeleli sweje-e muza wawaIsarela wakumujimba hampinji yadiñawu nawubwambu waweni naNzambi. Nyikanda yachiGriki yawiniKristu ayisonekeleli sweje-e ‘aIsarela ambala aNzambi,’ dikwila nawu awayishewa kwikala amana kwaKristu nawa anyana kaNzambi akuspiritu. Kafwampi, hichinayi mukwila nawu antu abula kwikala aIsarela hiyanateli kuhetela mukudiza Nyikanda yachiHeberuku. Munjila yoyimu, eniKristu abula kuwayishewa naspiritu yajila ahetelañamu chikupu kuhitila mukutaña nikuzatisha kufumba kwekala muNyikanda yawiniKristu yachiGriki.—Tañenu 2 Timotewu 3:15-17.

12. Nsañwinyi Pawulu yayanukishiliyi eniKristu awayishewa?

¹² EniKristu amunkulakaji yamwaka wakusambila ayishimwini kwikala aloña nawa awayishewa naspiritu yajila yayikwashileñaku kutambula wuswana wakwiwulu. Hakwikala awayishewa, hichayileñeleli kwikala anyanta hakachi kawakwawu eniKristu awayishewa henohu achidi hamasekuku. Chakubula nikujinooka, eniKristu akusambila amakwawu ajimbeli nsañu yeniyi nawa atachikili kudilemesha hakachi kawamana kwawu muchipompelu. Chumichi, chamuleñeleli Pawulu kuhosha nindi: “Munekuti dehi, muneli dehi  akwakuheta, munadyi dehi wanta chakubula etu. Eñañi, nakeñi nami muyuli, kulonda ninetu tuyuli hamu nanenu.” (1 Akorinda 4:8) Dichi Pawulu wayanukishili awayishewa amumafuku indi nindi: “Hituyanyanta akukuhwelela kwenuku, tuyankwashi amuzañalu wenu.”—2 Akorinda 1:24.

Kuwanisha Naambala Yatenenuwu

13. Indi kutonda awayishewa, kwatwalekeluhu ñahi kufuma mu 33 C.E.?

¹³ Bayi neyi eniKristu awayishewa ejima 144,000 ayitondeli munkulakaji yayaaka yakusambilaku. Kutonda eniKristu awayishewa kwatwalekeluhu nimumpinji yawapostolu nawa mukuhita kwayaaka eniKristu awayishewa antesha ayitondeli. Hela chochu, kutonda awayishewa kwatwalekeluhu kufuma hayina mpinji kushika nikulelu. (Matewu 28:20) Nkumininaku, chelili Yesu yatachiki kuyula mu 1914, yuma yatachikili kuya hambidi mukunyakashana.

14, 15. Chumanyi chinamwekani mumafuku etu kutalisha hakutonda awayishewa?

¹⁴ Chatachi, Yesu watookesheli mawulu ayuma yakañeshaña chiyulu chaNzambi. (Tañenu Chimwekeshu 12:10, 12.) Kufumahu washili kashinshi kukupompesha ashalahu akekala munfulumendi yaWanta windi kulonda kuwanisha naambala ya 144,000. Hakachi kayaaka yamu 1930, mudimu weniwu wadiñi kukamwihi nakumana nawa antu amavulu adiñi nakukalakala mudimu wakushimwina hiyadiñi nampwila yakuya mwiwuluku. Spiritu hiyadiñi nakushimuna wunsahu wakwila nawu adiñi anyana kaNzambuku. (Esekejenu Aroma 8:16.) Ilaña, adilukili nawu adiñi “anyikoku acheñi,” akweti kuchiñeja kwakushakama haya nyaka muparadisa hamaseki. (Yowanu 10:16) Dichi, kufuma mu 1935 mudimu weneni wakushimwina wadiña wakupompesha ‘ezaza deneni,’ damweniyi kapostolu Yowanu muchimwenu nawa akapuluka “kuyihuñu yeneni.”—Chimwekeshu 7:9, 10, 14.

¹⁵ Hela chochu, yaaka yinahituhu kufuma mu 1930, awayishewa amakwawu anayitondi kulonda ekali nakuchiñeja kwamwiwulu. Muloñadi? Munjila yikwawu, hekwawu ahiñili hadi awayishewa atondeluwu hakusambila abulili kashinshi. (Esekejenu Chimwekeshu 3:16) Cheñi, Pawulu wahosheluhu nihadi antu elukiliyi afumini muchalala. (Afwilipi 3:17-19) Hiyanyi Yehova atondeliyi kulonda kuhiñisha hadi antu wenawa? Yomwenindi diyi watela kufuukulahu haniyi nsañu. Hela chochu, chadi kwikala chachiwahi kutonda antu anashimbuli bayi amaha anabalumuki munyichima yawuku, ilaña antu adi neyi atumbanji ateneniyi Yesu hampinji yatachikili Chanukishu—anamwekeshi dehi kashinshi kawu. *—Luka 22:28.

16. Chumanyi chitwahamekaña kutalisha hadi awayishewa nawa tunateli kukuhwelela chumanyi?

¹⁶ Hela chochu, bayi neyi antu ejima akweti kuchiñeja kwakuya mwiwulu kutachika mu 1930 ayihiñisha hadi antu adimbukili muchalalaku. Yehova natwileji hatooka nindi tukekala naweniKristu awayishewa mukachi ketu mumafuku akukuma kwayuma yampata yamudinu ituña ndo-o nikukujilumuka, ‘kwaBabiloni Muneni.’ * (Chimwekeshu 17:5) Nawa tunateli kukuhwelela netu naambala yashikila yawa 144,000 yikawanina mumpinji yaYehova yashikila nawa mukuhita kwampinji ejima akayula munfulumendi yaWanta waNzambi. Tunateli kukuhwelela cheñi Izu dawuprofwetu dakwila nawu izaza deneni dinakutohelaku mpinji yejima dikatwalekahu kwikala dashinshika. Katataka keña ‘difumi muyihuñu yeneni’ yinakuleta kaayi kaSatana nawa dikeñila namuzañalu mwituña daNzambi dadiha.

Nfulumendi yaNzambi yaMwiwulu Yidi Kwakwihi naKuwanina

17. Kwesekeja na 1 Atesalonika 4:15-17; Chimwekeshu 6:9-11, chumanyi chinazatiki kudi eniKristu awayishewa afwili nachikuhwelelu?

¹⁷ Kufuma mu 33 C.E., eniKristu amavulu awayishewa anamwekeshi chikuhwelelu chakola nawa anomiki nakashinshi sampu  nikukufwa. Wenawa anateleli kutambwila Wanta nawa chakubula nikujinooka, kutachika tuhu mumafuku akusambila amwekeniyi Kristu, awayishewa anatambwili wuloku wawu wamwiwulu.—Tañenu 1 Atesalonika 4:15-17; Chimwekeshu 6:9-11.

18. (a) Chikuhwelelwinyi chikwetuwu awayishewa achidi hamaseki? (b) Indi anyikoku acheñi ayimonaña ñahi amana kwawu eniKristu awayishewa?

¹⁸ Awayishewa achidi hamaseki akuhwelela chikupu nawu neyi atwalekahu kwikala nakashinshi, niwena keña atambwili wuloku wawu wamwiwulu. Yihita yanyikoku yacheñi, chatoñojokawu hachikuhwelelu chawamana kwawu awayishewa, etejaña mazu akapostolu Pawulu ahosheliyi hadi amana kwetu awayishewa amuTesalonika nindi: “Etu aweni twadisambaña hansañu yenwenu muyipompelu yaNzambi, nakutatakena kwenu, nikukuhwelela kwenu kumwakuhwelelaña mumakabishenu ejima, nimulukadi lumwamonaña. Diyi nsañu yakumwekesha nachu kusompesha kwaNzambi kwaloña, kulonda ayimonaña kutelela wanta waNzambi wumwamwenaña yihuñu.” (2 Atesalonika 1:3-5) Dichi nfulumendi yaNzambi yamwiwulu yikawanina hampinji yakafwayi wawayishewa wakukumishaku hampinji yidi yejima. Chumichi chikaleta muzañalu hama—mwiwulu nihamaseki.

[Tumazu twaheshina]

Munateli Kulumbulula?

• Chumanyi Nzambi chamumwekesheleliyi Abarahama kutalisha Hefuku daKusompesha?

• Muloñadi Abarahama chamutenenenuwu nawu waloña?

• Kukoolekanyi kukweti mbutu yaAbarahama yatenawu kuloña?

• Chikuhwelelwinyi chikwetuwu eniKristu ejima?

[Malwihu aKuzatisha haKudiza]

[Mwevulu wudi hefu 24]

Yesu wakolesheli atumbanji twindi kuyilaku hambidi munsañu jaWanta

[Mwevulu wudi hefu 25]

HaPentekosta 33 C.E., Yehova watachikili kutonda chibalu chamuchiyedi chawantu amumbutu yaAbarahama

[Nyevulu yidi hefu 26]

Anyikoku acheñi ahamekaña hamuloña wakwila eniKristu awayishewa adi nawu mumafuku akukuminina