Ram Mi Ni Tlâka Ruat

“Chûng chu Pathian rama mi ni tlâka ruat in ni thei dâwn tih, Pathian rorêl fel tak chhinchhiahna fiah tak a ni.”​—⁠2 THES. 1:⁠5.

1, 2. Rorêlna chungchânga Pathian thiltum chu eng nge ni a, tuin nge rorêl ang?

KAN Vântlâng Kum Chhiar 50-na vêlah chuan, tirhkoh Paula chu Atheni khuaah a awm a. Chuta milem biakna hluar tak awm chu a ngaihmawh avângin, thu ṭha deuh sawi ngai niin a hria a ni. A thusawi tihtâwpnaah a thu ngaithlatu milem biate ngaihsakna latu chu a sawi a ni. Ani chuan: “Pathianin . . . tûnah hian ram tina mi zawng zawng sim tûr thu a pe ta a ni, nî a tiam avângin; chu mi niah chuan a mi ruata chu, leia mite fel takin a ngaihtuahtîr ang; chu chu Pathianin amah chu mitthi zîng ata kai thovin, mi zawng zawng hnênah a hriattîr tawh a ni,” tih a sawi a ni.​—⁠Tirh. 17:​30, 31.

² Pathianin mihringte chunga a rorêl hun tûr a ruat chungchâng ngaihtuah chu a va pawimawh tak êm! Chuta rorêltu tûr chu Paula’n Atheni khuaa a thusawia a hming a sawi lan loh; tholeh Isua Krista chu a ni tih kan hria. Isua rorêlna chuan nunna emaw, thihna emaw a thlen ang.

3. Engvângin nge Jehova’n Abrahama nêna thuthlung a siam a, chu mi thleng famkimnaah tuin nge hmun pawimawh tak chang?

³ Chu Rorêlna Nî chuan kum 1,000 chhûng a awh ang a. Isua chuan Jehova hmingin Pathian Rama Lalber niin chu rorêlna nî chu a ho vang a; mahse, amah chauh chuan a ho lo vang. Jehova chuan mihring zîng ata Isua nêna kum sâng chhûng rorêltu tûr a thlang a. (Luka 22:​29, 30 nên khaikhin rawh.) Kum 4,000 dâwn lai kal taah khân, Jehova chuan a chhiahhlawh rinawm Abrahama nêna thutlung siamin, chu Rorêl Nî atân chuan hma a la ṭan a ni. (Genesis 22:​17, 18 chhiar rawh.) Chu thuthlung chu B.C.E. 1943 khân a inṭan niin a lang. Abrahama khân mihringte tâna chu thuthlungin awmzia a neih chin tûr chu a hre kim vek lo ngei a. Mahse, tûnah chuan chu thuthlung hnuaiah Abrahama thlahin mihringte rorêl tûra Pathian thiltum thlen famkimnaah hmun pawimawh tak a chang tih chu kan hre thei a ni.

4, 5. (a) Abrahama thlah bul pui ber chu tunge ni a, Lalram chungchâng eng nge a sawi? (b) Engtik khân nge Ram mi nih theih beiseina chu a chian?

⁴ Chu Abrahama thlah bul ber chu Isua a lo ni a, ani chu C.E. 29-a thlarau thianghlima hriak thih a nih khân thutiam Messia, a nih loh leh Krista chu a lo ni ta a ni. (Gal. 3:16) Isua chuan Juda hnamte hnêna Lalram chanchin ṭha hrilin, kum thum leh a chanve chhûng chu a hmang ang a. Baptistu Johana man a nih hnu khân, Isua chuan: “Baptistu Johana awm achin tûn thlengin vân ram chuan bei vakna a tâwk ṭhîn a, a bei vakte chuan an pâwng lâk ṭhîn,” tia sawiin chu Lalramah chuan mi  dangte pawh an tel dâwn tih a târ lang a ni.​—⁠Mt. 11:⁠12.

⁵ Isua chuan vân Ram ‘pâwng lâktute’ chungchâng a sawi hma lâwkin: “Tih tak meuhvin ka ti a che u, Hmeichhe hrin zîngah Baptistu Johana aia ropui zâwk an la chhuak ngai lo; nimahsela vân rama mi tê deuh pawh ani ai chuan an ropui zâwk si a,” tia a sawi hi ngaihvenawm tak a ni. (Mt. 11:11) Engvângin nge chutianga sawi theih a nih? Ram mi nih theih beiseina chu C.E. 33, Pentikost-a mi rinawmte chunga thlarau thianghlim leih a nih hma chuan tihchian a la nih loh vâng a ni. Thlarau thianghlim an dawn meuh chuan Baptistu Johana chu a thi dêr tawh a ni.​—⁠Tirh. 2:​1-4.

Abrahama Thlah Chu Fela Ruat A Ni

6, 7. (a) Eng kawngin nge Abrahama thlah chu “vâna arsi zât” a lo nih? (b) Abrahama’n eng malsâwmna nge a dawn a, a thlahte chuan chutiang bawk malsâwmna eng nge an dawn?

⁶ Abrahama hnênah chuan a thlah chu “vâna arsi zât” leh tuifinriat kama ṭiau vaivut zâtin an la pung dâwn tih hrilh a ni a. (Gen. 13:16; 22:17) Kawng danga sawi chuan, Abrahama dam lai chuan mihringte tân chu thlahah mi engzât nge tel dâwn tih hriat a la ni lo. Amaherawhchu, a tâwpah chuan a thlarau lam thlaha tel zât chiah chu hriat theih a ni ta. Isua bâkah, mi 1,44,000 an ni dâwn a ni.​—⁠Thup. 7:4; 14:⁠1.

⁷ Abrahama rinna chungchângah, Pathian Thu chuan: “[Abrahama] chuan LALPA chu a ring a; tichuan ani chuan chu chu a felnaah a ruatsak ta a,” tiin a sawi a. (Gen. 15:​5, 6) Mihring tumah hi an fel famkim lo ngei mai. (Jak. 3:⁠2) Amaherawhchu, Abrahama rinna neih langsâr tak avângin, Jehova chuan mi fel angin a cheibâwl a, a ṭhianah a vuah hial a ni. (Is. 41:⁠8) Abrahama thlarau lam thlah zînga telte pawh chu mi fela ruat an ni a, chu chuan Abrahama dawn malsâwmna aia ropui zâwk chu a dawntîr a ni.

8. Abrahama thlah zînga telte tân eng malsâwmna nge awm?

⁸ Hriak thih Kristiante chu Isua tlanna inthawinaa rinna an neih avângin mi fel nia ruat an ni a. (Rom 3:​24, 28) Jehova mit hmuhah sual laka chhuah an ni tawh a, Pathian thlarau lam fate leh Isua Krista unaute ni tûrin thlarau thianghlima hriak thih theih an ni. (Joh. 1:​12, 13) Thuthlung tharah lûtin, “Pathian Israelte” hnam thara din an ni bawk. (Gal. 6:16; Lk. 22:20) Chûng zawng zawng chu chanvo ropui a va ni êm! Anmahni tâna Pathianin hêng thilte a tih avângin, hriak thih Kristiante chuan leia chatuan nun beiseina an nei lo. Rorêl Nî hun chhûnga Isua nêna vâna rorêlhona aṭanga lo awm hlimna nasa tak atân chu lei lam beiseina chu an chân a ni.​—⁠Rom 8:17 chhiar rawh.

9, 10. (a) Engtik khân nge Kristiante chu hriak thih hmasa ber an nih a, eng hmabâk nge an neih? (b) Eng ṭanpuina nge hriak thih Kristiante’n an dawn?

⁹ Pentikost C.E. 33-ah mi rinawm ho khat chu Rorêlna Nî chhûnga Isua nêna rorêl tûrte zînga mi nih theihna chanvo chu pêk an ni a. Isua zirtîr mi 120 vêl chu thlarau thianghlima baptis an ni a, hriak thih Kristian hmasa berte an lo ni. Mahse, an tân chu chu bul inṭanna chauh a ni. Chuta ṭang chuan an chunga Setana’n a thlentîr fiahna zawng zawngah Jehova chunga rinawmna an lantîr a ngai a. Vân lam nunna lallukhum chang tûr chuan an  thih thlenga an rinawm a ngai dâwn a ni.​—⁠Thup. 2:⁠10.

¹⁰ Chutianga rinawm thei tûr chuan, Jehova’n a Thu leh Kristian kohhran kal tlangin hriak thih Kristiante mamawh fuihna chu a pe a. Entîr nân, Thessalonika khuaa hriak thih Kristiante hnênah tirhkoh Paula chuan: “Ama ram leh ropuinaa ko lûttu che u Pathian mi ni tlâka in awm theihna tûrin, pain ama fate chunga a tih angin, fuih leh thlamuan leh hriattîr che uin, in chung ṭheuhva kan tihzia kha in hre si a,” tiin a ziak a ni.​—⁠1 Thes. 2:​11, 12.

11. “Pathian Israelte” tân Jehova chuan eng thuziak nge a siam?

¹¹ Kristian hriak thih kohhran zînga mi ni tûrte thlan an nih hnu kum sâwmbi-ahte chuan, Jehova chuan Isua lei lam rawngbâwlna leh kum zabi khatnaa hriak thih Kristiante a dâwr dân leh a fuihna chanchinte chhinchhiah ṭha a ti a. Chuti chuan Jehova chuan thâwkkhum Hebrai Pathian Lehkha Thu awmsaah chuan thâwkkhum Kristian Grik Pathian Lehkha Thu chu a belh ta a ni. Hebrai Pathian Lehkha Thute chu atîrah chuan Pathian nêna inlaichînna bîk nei tisa lam Israel hnamte tâna ziak a ni. Kristian Grik Pathian Lehkha Thu chu Krista unaute leh Pathian thlarau lam fate anga hriak thih “Pathian Israelte” tâna ziah a ni bîk bawk. Mahse, Israel mi ni lote’n Hebrai Pathian Lehkha Thu zirna chu an hlâwkpui dâwn lo tihna erawh a ni lo. Chutiang bawkin, thlarau thianghlima hriak thih ni lo Kristiante chuan Kristian Grik Pathian Lehkha Thu zirna leh a zilhna thute nunpui chu an hlâwkpui tak zet a ni.​—⁠2 Timothea 3:​14-17 chhiar rawh.

12. Eng hriattîrna nge Paula’n hriak thih Kristiante chu a pêk?

¹² Kum zabi khatnaa Kristiante chu vân lam ro an chan theih nâna fela ruat leh thlarau thianghlima hriak thih an ni. Hriak thih an nihna chuan anni chu leia an awm laia an Kristian hriak thihpuite chungah a dah sâng chuang lo. Kristian hmasa ṭhenkhatte chuan chu chu theihnghilhin, kohhrana an unaute chunga lansâr duhna an lo nei a. Chuvâng chuan Paula chu: “Tûn apangin in tlai ta a, tûn apangin in hausa ta a, kan tel lovin ro in rêl ta a nih hi le; a ni, rorêl tak tak ula chu ka duh a ni, keini pawhin nangmahni nêna ro kan rêl theih nân,” tia sawi tûra chêttîr a ni. (1 Kor. 4:⁠8) Chuvângin, Paula chuan a hun laia hriak thihte chu: “In rinna chungah lalna kan nei, ka ti lo va, in lâwmna ṭanpuitu kan ni, ka ti zâwk a ni,” tiin a hriattîr a ni.​—⁠2 Kor. 1:⁠24.

Number Sawi Lâwk Zât Chu Tlingin

13. Engtin nge hriak thite kohna chu C.E. 33 hnu aṭangin a kal chhoh zêl?

¹³ Hriak thih Kristian 1,44,000 zawng zawng chu kum zabi khatnaa thlan zawh vek an ni lo. Kristian hriak thihte kohna chu tirhkohte hun chhûng zawng khân chhun zawm zêl a ni a, tichuan a khât leh deuh niin a lang. Amaherawhchu, a hnu lam kum zabi-ahte leh kan hun lai thlengin chu kohna chu chhunzawm zêl a ni. (Mt. 28:20) A tâwpah, kum 1914-a Isua a lal ṭan aṭangin, chu kohna chu chak taka kalpui a ni.

14, 15. Hriak thihte kohna chungchângah kan hun lai hian eng thil nge thleng?

¹⁴ A hmasain, Isua chuan vâna Pathian rorêlna dodâltu zawng zawng chu a thianfai a. (Thu Puan 12:​10, 12 chhiar rawh.) Tichuan, mi 1,44,000 an tlin nân, a Lalram sawrkâr mi leh sa tûr a la bângte lâk khâwmna chu a ngaihven a ni. Kum 1935 vêlah chuan, chu kohna chu a zo ṭêp tawh a, thu hrilhna chhâng lêttu tam tak chuan vâna kal châkna an nei ta lo. Pathian fate an ni tih thlarauva hriattîrna an dawng lo a ni. (Rom 8:16 nên khaikhin rawh.) Chu aimah chuan, lei paradis-a chatuana nun beiseitu “berâm dang” an ni tih an inhria a. (Joh. 10:16) Chuvângin, kum 1935 hnuah chuan thu hrilhna chuan Johana’n a inlârnaa hmuh ‘hrehawm nasa taka’ dam khawchhuak tûr “mipui tam tak” lâkkhâwmna chu a ngaihven bîk a ni.​—⁠Thup. 7:​9, 10, 14.

¹⁵ Kum 1930 chho bâwr vêlah pawh khân, mi tlêm tê chu vân lam beiseina nei tûra  thlan an la ni. Engvângin nge? Ṭhenkhatah chuan, kohna chang rinawm ta lote aiawhtu atân a ni thei a. (Thu Puan 3:16 nên khaikhin rawh.) Paula pawhin thutak kalsan ta a mi hriatte chungchâng chu a sawi a ni. (Phil. 3:​17-19) Chutiang mite aiawhtu tûrin Jehova chuan tute nge a koh vang? Chu chu ama thutâwp siam tûr a ni a. Chuti chung pawh chuan, inlet tharte ni lo​—⁠Isua’n Hriatrengna hunserh a hman ṭan laia a biak zirtîrte ang​—⁠an rinawmzia lantîr tawhte a ko ang tih rin chu a âwm hle a ni. *​—⁠Lk. 22:⁠28.

16. Hriak thihte chungchângah, engvângin nge kan lâwm a, eng nge kan rin tlat theih?

¹⁶ Amaherawhchu, kum 1930 chho bâwr vêl aṭanga vân lam beiseina neia koh zawng zawngte chu hriak thih tlu lehte aiawhtu an ni vek lo niin a lang. Jehova chuan he kal hmang tâwpna huna “Babulon Khaw Ropui” tihboral a nih thlengin, hriak thih Kristiante chu kan zînga awmtîr ngei a tum tih a tichiang a ni. * (Thup. 17:⁠5) Tin, Jehova hun ruatah chuan mi 1,44,000 chu a famkimin, a tâwpah chuan Lalram sawrkârah chuan an hmun tûr ṭheuh an chelh dâwn tih kan chiang thei a ni. Mipui tam tak pung reng chuan rinawmna an lantîr dâwn tih hrilh lâwk Thu pawh kan ring thei bawk. Setana khawvêla thlentîr ‘hrehawm nasa tak ata chhuakin,’ Pathian khawvêl tharah hlim takin an lût thuai ang.

Pathian Vân Sawrkâr Chu A Famkim Ṭêp Tawh!

17. Thessalonika thawn khat 4:​15-17 leh Thu Puan 6:​9-11-a sawi angin, hriak thih Kristian rinawm taka thite chungah eng thil nge thleng?

¹⁷ C.E. 33 aṭang khân hriak thih Kristian a sîng têlte chuan an rinna nghet tak lantîrin, thih thlengin rinawm takin an tuar a. Hêng mite hi Ram mi ni tlâka ruat an ni tawhin, Krista lo awm lehna ṭantirh aṭangin an vân lam lâwmman chu an dawng tawh niin a lang.​—⁠1 Thessalonika 4:​15-17; Thu Puan 6:​9-11 chhiar rawh.

18. (a) Hriak thih a la bângte chuan eng nge an rin tlat? (b) Engtin nge berâm dang chuan an unau hriak thih Kristiante chu an thlîr?

 ¹⁸ Leia hriak thih a la bângte chuan an rinawm reng phawt chuan an vân lam lâwmman an dawng ve thuai dâwn tih an ring thlap a. Berâm dang mi maktaduai têlte chuan, an unau hriak thihte rinna an ngaihtuah hian, Thessalonika khuaa hriak thih unaute hnêna tirhkoh Paula thusawi: “Mi tihduhdahna che u zawng zawngah leh hrehawm in tuarnaahte chuan in chhelzia leh in rinzia avângin Pathian kohhran pâwlte zîngah chuan keinin kan chuang ṭhîn che u a ni; chûng chu Pathian rama mi ni tlâka ruat in ni thei dâwn tih, Pathian rorêl fel tak chhinchhiahna fiah tak a ni, chu mi ram avânga tuar in nih hi,” tih chu an ṭâwmpui ve a ni. (2 Thes. 1:​3-5) Leia hriak thihte chu an kiam zêl a, an vaia an boral hunah chuan Pathian vân lam sawrkâr chu a famkim ang. Chu chu vân leh leia hlim nachhan tûr a va ni êm! (w08 1/15)

[Footnote-te]

I Hrilhfiah Thei Em?

• Rorêlna Nî nêna inkûngkaih eng thu nge Pathianin Abrahama hnênah a hrilh?

• Engvângin nge Abrahama chu mi fela ruat a nih?

• Abrahama thlahte tân mi fela ruat nihna chuan engah nge a hruai thlen?

• Kristian zawng zawngte chuan eng rin tlatna nge an neih?

[Zirlai Atâna Zawhnate]

[Phêk 21-naa milem]

Isua’n a hnungzuitute chu alram zawng tûrin a fuih

[Phêk 22-naa milem]

C.E. 33 Pentikost-ah Jehova chuan Abrahama thlah zawmpuitu tûrte a thlang ṭan

[Phêk 24-naa milemte]

Berâm dang chu hriak thih Kristiante’n hun hnuhnûnga an awmpui avângin an lâwm hle