Karangaia e kua Tau kia Rauka te Patireia

“Ei akakite anga i te tuatua-tau tikai a te Atua, e kia karangaia kotou e aronga tau i te basileia o te Atua.”​—2 TESA. 1:5.

1, 2. Eaa to te Atua akakoroanga no runga i te akavaanga e koai te ka rave i te akavaanga?

MEI te mataiti 50 o to tatou nei Tuatau Noa, tei Atene te apotetoro ko Paulo. No te mareka kore i te tu totoa ua o te akamori itoro tana i kite i reira, kua akakeuia aia kia rave i tetai akakiteanga karape tikai. Kua taopenga aia i tana tuatuaanga ki tetai akakiteanga tei riro ei akatukia i te au tangata peikani e akarongo maira iaia. Kua tuatua aia e: “E teianei ra, te akaue mai nei [te Atua] i te tangata ravarai e tataraara, auraka ei ngai toe: No te mea kua akonoia e ia te ra e akava mai ei aia i to te ao katoa nei ma te tuatua-tika, na te tangata i akonoia e ia ra; ko tana i akakite ua mai ki te tangata katoatoa nei, koia i akatu akaou mai iaia mei te mate maira.”​—Anga. 17:30, 31.

² E mea puapinga tikai kia akamanako meitaki no runga i te tika e kua akono te Atua i tetai ra akavaanga no te tangata a te tuatau ki mua! Ka riro te rave anga i taua akavaanga ra na te tangata kare a Paulo i taiku mai ana i te ingoa i roto i tana tuatuaanga i Atene inara ko ta tatou i kite e, ko Iesu Karaiti, tei akatuia mai. Ko ta Iesu akavaanga e ora me kore e mate te ka tupu.

3. Eaa a Iehova i papau ei i tetai koreromotu kia Aberahama, e koai tei riro iaia te tuanga puapinga i roto i te akatupuanga i te reira?

³ E 1,000 mataiti te roa i taua Ra Akavaanga ra. Ka akaaere a Iesu i te reira i roto i te ingoa o Iehova ei Ariki no te Patireia o te Atua, kare ra e koia anake ua. Ka iki a Iehova i tetai aronga ke mei roto atu i te tangata kia tutara e kia akava kapiti ma Iesu a taua ra okotai tauatini mataiti te roa. (E akaaite ia Luka 22:29, 30.) Vaitata rai e e 4,000 mataiti i topa akenei, i akanoo ei a Iehova i te tango no taua Ra Akavaanga ra, i tona papau anga i tetai koreromotu ki tona tavini akarongo mou ko Aberahama. (E tatau ia Genese 22:17, 18.) Te taka meitaki ra e kua akatupuia taua koreromotu ra i te mataiti 1943 M.T.N. E tika, e kare a Aberahama i marama pu tika ana i te aiteanga o taua koreromotu ra no te tangata nei. Te kite nei ra tatou i teia tuatau, e i raro ake i ta te reira au turanga, e tuanga puapinga tikai ta te uanga o Aberahama ka rave i roto i te akatupuanga i to te Atua akakoroanga kia akava i te tangata nei.

4, 5. (a) Koai te tuanga maata o te uanga a Aberahama, e eaa tana i tuatua no runga i te Patireia? (e) I naea te manakonakoanga kia riro ei tuanga no te akanoonooanga o te Patireia i akatueraia ai?

⁴ Kua kitea mai e ko Iesu te tuanga maata o te uanga a Aberahama, tei akatainuia e te vaerua tapu i te mataiti 29 T.N. e tei riro mai ko te Mesia tei taputouia mai, me kore ko Karaiti. (Gala. 3:16) I te toru e te apa mataiti tei aru mai kua akapou a Iesu i te reira i te tutu aere anga i te tuatua  meitaki o te Patireia ki te iti tangata ngati Iuda. I muri ake i te opuia anga a Ioane Papetito, kua akaari mai a Iesu e e aronga ke atu tetai e manakonako ra kia piri ki roto i taua Patireia ra i tona tuatua anga e: “Mei ia Ioane bapetizo mairai e teia noaʼi, te āruia nei te basileia o te ao ra, e tei riro nei oki i te aronga i āru i te maroiroi.”​—Mata. 11:12.

⁵ Te mea umere ra, i mua ua ake i te tuatua anga no runga i te aronga ka “āru” i te Patireia o te ao, kua tuatua a Iesu e: “E tuatua-mou taku e tuatua kia kotou nei, Ta te vaine i anau nei, kare atu ïa e maata atu ia Ioane bapetizo nei: ko te iti rava ra i te basileia o te ao ra, e maata atu ïa iaia.” (Mata. 11:11) Eaa ra te tumu i akapera ai? No te mea kare te manakonakoanga kia riro ei tuanga no te akanoonooanga o te Patireia i akatueraia ake ki te katoatoa rava o te aronga akarongo mou e tae ua atu ki te riringiia mai anga te vaerua tapu i te Penetekote o te mataiti 33 T.N. Kia tae taua taime ra, kua mate a Ioane Papetito.​—Anga. 2:1-4.

Akatikaia te Uanga a Aberahama ei Aronga Tuatua Tika

6, 7. (a) Na roto i teea au mataara e riro mai ei to Aberahama uanga “mei te etu o te rangi ra”? (e) Eaa te akameitakianga tei rauka ia Aberahama, e eaa te au akameitakianga mei te reira rai ka rauka i tona uanga?

⁶ Kua akakiteia kia Aberahama e ka maata tona uanga e ka riro ratou “mei te etu o te rangi ra” e te onetea i taatai. (Gene. 13:16; 22:17) Tera ra i to Aberahama tuatau kare i rauka ana i te tangata kia kite e eaa te maata ka o atu ki roto i teia uanga. Inara i te openga kua akakiteia mai te numero tikai o tona uanga pae vaerua. Kapiti atu kia Iesu, ko te numero i reira e 144,000.​—Apo. 7:4; 14:1.

⁷ No runga i to Aberahama akarongo, te akakite ra te Tuatua a te Atua e: “Kua akarongo atura [Aberahama] ia Iehova; e kua akono atura aia i te reira ei tuatua-tika nana.” (Gene. 15:5, 6) E tika, e kare e tangata i ope takiri iaia te tu tuatua tika. (Iako. 3:2) Noatu ra, no te mea e e akarongo mou tikai to Aberahama, kua iki iora Iehova iaia mei te tangata tuatua tika ra e kua kapiki katoa atura iaia ei oa nona. (Isa. 41:8) Te aronga pouroa i roto i te uanga pae vaerua o Aberahama tei kapiti mai ia Iesu kua akatikaia ratou ei aronga tuatua tika katoa, e kua apai mai teia i te au akameitakianga maata rava atu no ratou i tei rauka ia Aberahama.

8. Eaa te au akameitakianga tei akatueraia mai no te au mema o to Aberahama uanga?

⁸ Kua akatikaia te au Kerititiano akatainuia ei aronga tuatua tika no te mea te akaari ra ratou i te akarongo i roto i te atinga oko a Iesu. (Roma 3:24, 28) I roto i te mata o Iehova, kua matara ta ratou ara e ka tau kia akatainuia ki te vaerua tapu ei au tamariki vaerua na te Atua, ei au taeake no Iesu Karaiti. (Ioa. 1:12, 13) Ka o i reira ratou ki roto i te koreromotu ou e ka riro ei iti tangata ou, koia oki “te Iseraela o te Atua.” (Gala. 6:16; Luka 22:20) E turanga ngateitei tikai ta te reira pouroa e akatutu maira! Tei tupu mai no teia au angaanga ta te Atua i rave no ratou, kare o te au Kerititiano akatainuia manakonakoanga kia noo e tuatau ua atu i runga nei i te enua. Kua akaatinga ratou i taua manakonakoanga ra no te rekareka aite koreia o te piri atu anga kia Iesu a te Ra Akavaanga e te tutara anga e ia i te rangi.​—E tatau ia Roma 8:17.

9, 10. (a) I naea te au Kerititiano i akatainu mua ia ai ki te vaerua tapu, e eaa te vai maira i mua ia ratou? (e) Eaa te tauturu tei rauka mai i te au Kerititiano akatainuia?

⁹ I te Penetekote o te mataiti 33 T.N., kua orongaia tetai tikaanga no tetai pupu tangata akarongo mou kia o atu ki roto i te aronga ka  tutara ma Iesu a te Ra Akavaanga. Mei te 120 pipi a Iesu tei papetitoia ki te vaerua tapu e kua riro maira ko te au Kerititiano mua tei akatainuia. Inara, ko te akamataanga ua ia, no ratou. Mei reira mai e aere ua atu, ka anoanoia ratou kia akatutu mai i to ratou tu tiratiratu kia Iehova noatu eaa te au timataanga ta Satani ka apai mai ki runga ia ratou. Ka anoanoia ratou kia vai akarongo mou ua e tae ua atu ki te mate e rauka ai ia ratou te korona ora i te rangi.​—Apo. 2:10.

¹⁰ No teia akakoroanga kia tae ki te openga, kua oronga mai a Iehova na roto i tana Tuatua e na roto i te putuputuanga Kerititiano i te akoanga no te au Kerititiano akatainuia e te akamaroiroianga tei anoanoia no ratou. Ei akaraanga, kua tata te apotetoro ko Paulo ki te au Kerititiano akatainuia i Tesalonia e: “Mei te metua i tana tamariki, Kia tau to kotou aerenga i te Atua ra, i tei kapiki ia kotou no tona basileia e no te ao.”​—1 Tesa. 2:11, 12.

11. Eaa te rekoti tei tataia, ta Iehova i oronga mai na te au mema o “te Iseraela o te Atua”?

¹¹ I te au raungauru mataiti i muri ake i te ikiia anga te au mema mua o te putuputuanga o te au Kerititiano akatainuia, kua manako a Iehova e e mea tau kia maaniia tetai rekoti tinamou no te angaanga orometua a Iesu i te enua nei e pera katoa no Tana au raveanga e te akoanga ki te au Kerititiano akatainuia i te anere mataiti mua. No reira kua kapiti atu a Iehova i te au Tuatua Tapu Ereni Kerititiano i akauruia, ki te au Tuatua Tapu Epera akauruia e vai ra. I tataia te au Tuatua Tapu Epera na mua no te iti tangata o te Iseraela kopapa i te tuatau e vai ra rai to ratou pirianga takake ma te Atua. I tataia tikai te au Tuatua Tapu Kerititiano Ereni no “te Iseraela o te Atua,” te au taeake akatainuia o Karaiti e te au tamariki vaerua a te Atua. Tera ra, kare te reira e karanga maira e kare te aronga kare i te ngati Iseraela e puapingaia mei te apii anga i te au Tuatua Tapu Epera. Pera katoa rai te au Kerititiano kare i akatainuia e te vaerua tapu, e maata ua atu te au puapinga ka rauka ia ratou mei te apii anga e mei te akaau anga i to ratou oraanga kia tau ki te akoanga tei kiteaia i roto i te au Tuatua Tapu Ereni Kerititiano.​—E tatau ia 2 Timoteo 3:15-17.

12. Eaa te akamaaraanga ta Paulo i oronga atu ki te au Kerititiano akatainuia?

¹² Kua akatikaia te au Kerititiano o te anere mataiti mua ei aronga tuatua tika e kua akatainuia ki te vaerua tapu tei akakoroia ei tauturu ia ratou kia rauka ta ratou tuanga i te rangi. Kare ra to ratou akatainuanga i akateitei ia ratou ki te taoonga ariki i rungao i to ratou au taeake Kerititiano i te taime i runga nei rai te enua. Te taka ua ra e, kua ngaropoina taua tika ra i tetai au Kerititiano i mua ana e kua akamata atura i te umuumu i te turanga teitei kare i tau ia ratou i rotopu i to ratou au taeake i roto i te putuputuanga. Tei tupu, kua akakeuia a Paulo kia tuatua e: “Kua ki kotou i tenana; te maata na to kotou meitaki i tenana; e au akenei to kotou mei te ui ariki ra, kare ra matou: te inangaro nei rai au, ei au rai to kotou, e ei au katoa to matou ma kotou na.” (1 Kori. 4:8) No reira, kua akamaara atu a Paulo i te aronga akatainuia i tona tuatau e: “Kare ra mei te mea e ko matou te atu o to kotou akarongo, ei tauturu ra matou i to kotou rekareka.”​—2 Kori. 1:24.

Akaoti Anga i te Numero i Totouia

13. Akapeea te ikianga o te aronga akatainuia i te tupu anga i muri ake i te mataiti 33 T.N.?

¹³ Kare te katoatoa o te 144,000 o te au Kerititiano akatainuia i iki pouroaia ana i te anere mataiti mua. Kua raveia atu rai to ratou ikianga e tae ua atu ki te tuatau o te au apotetoro e oti kua akaaere marie ua i reira. Inara, kua aere ua atu rai te ikianga o te aronga akatainuia i te au anere mataiti tei aru mai e tae ua mai ki teia tuatau. (Mata. 28:20) Te taka ua ra, e i muri ake i to Iesu akamata anga i te tutara i te mataiti 1914, e mea viviki tikai te tupuanga o te au mea tei aru mai.

14, 15. Eaa tei tupu i to tatou nei tuatau no runga i te ikianga o te aronga akatainuia?

¹⁴ Te mea mua, kua tama mai a Iesu i te au rangi kia pou mai te au tuanga patoianga katoatoa i te tutara a te Atua. (E tatau ia Apokalupo 12:10, 12.) I reira kua tanga mai aia i te akaputuputu mai i te toenga o te au mema tei tau i tona kavamani Patireia ei akaoti i te numero 144,000. Kia tae ki rotopu i te au mataiti 1930, te taka ua ra e kua vaitata taua numero ra i te oti e  kare te manganui o te aronga e ariu maira e manako ana i te aere ki te rangi. Kare te vaerua e akakite ana kia ratou e e tamariki ratou na te Atua. (E akaaite ia Roma 8:16.) Mari ra, te kite ra ratou e no te pupu ratou o te “mamoe ke atu,” tei rauka te manakonakoanga kia noo e tuatau ua atu i runga nei i te enua parataito. (Ioa. 10:16) No reira i muri ake i te mataiti 1935, kua akamou ua te akakoroanga maata o te angaanga tutu aere ki runga i te akaputuputu mai anga i te “aronga maata rava,” te aronga ta te apotetoro ko Ioane i kite i roto i te orama e ko te ka ora mai mei roto “i te mate maata.”​—Apo. 7:9, 10, 14.

¹⁵ Noatu ra, i te au mataiti i aereia mei te au mataiti mai o te 1930, e au aronga tokoiti ua tetai tei ikiia no te manakonakoanga i te rangi. No teaa ra? Tetai tu, penei te mono ra ratou i te aronga tei ikiia ana i muao inara kare i vai akarongo mou ua. (E akaaite ia Apokalupo 3:16.) Kua taiku katoa mai a Paulo i tetai aronga kua kite aia inara kua akaruke i te tuatua mou. (Phili. 3:17-19) Koai ma ra ta Iehova ka iki kia riro ei au aronga mono? E tika e, nana rai e rave i te reira ikianga. Noatu ra, i te akara anga e mea tau rai e ka iki aia, eiaa ei aronga akaariu ou uaia, mari ra ei aronga​—mei te au apotetoro rai ta Iesu i tuatua atu ei i tona akamata anga i te akonoanga i te Akamaaraanga​—tei akapapu ke ana i te tu ngaueue kore o to ratou tu tiratiratu. *​—Luka 22:28.

16. No runga i te aronga akatainuia, eaa te mea ta tatou e rekareka nei, e eaa te ka rauka ia tatou kia irinaki tikai?

¹⁶ Inara i te akara anga, kare te katoatoa tei ikiia no te manakonakoanga o te rangi mei te au mataiti 1930 mai, i te au tangata mono i te aronga tei topa ke. Te taka ua ra e kua akapapu meitaki a Iehova e kia vai ua rai te au Kerititiano akatainuia ki rotopu ia tatou i te au ra openga pouroa o teia akatereanga o te au mea nei e tae ua atu ki te akapouanga o “Babulonia maata.” * (Apo. 17:5) E ka rauka ia tatou kia irinaki e ka akaotiia te numero 144,000 o te au mema katoatoa, i to Iehova uaorai tuatau tau e i te openga ka tu te katoatoa ki to ratou uaorai au ngai i roto i taua kavamani Patireia ra. Ka rauka katoa ia tatou kia irinaki i te Tuatua totou e ka vai akarongo mou ua rai te aronga maata rava ei iti tangata e tupu ua atura ki te maataanga. Kare e roa atu ka “aere mai [ratou] mei roto i te mate maata” tei tukuia mai ki rungao i te ao o Satani e ma te pereperekavana i te aerenga atu ki roto i te ao ou o te Atua.

Vaitata Roa i te Oti te Kavamani o te Atua i te Rangi!

17. Kia tau ki ta 1 Tesalonia 4:15-17 e Apokalupo 6:9-11, eaa ra tei tupu ki te au Kerititiano akatainuia tei mate ma te akarongo mou tikai?

¹⁷ Mei te mataiti 33 T.N. mai, e raungauru ua atu o te au tauatini Kerititiano akatainuia tei akaari i te akarongo ngaueue kore e tei akakoromaki ma te akarongo mou tikai e tae ua atu ki te mate. Kua oti takere teia aronga i te karangaia e  kua tau kia rauka te Patireia e​—te taka ua ra e akamata mai i te au ra mua o to Karaiti parutia—​i rauka ai to ratou tutaki tau.​—E tatau ia 1 Tesalonia 4:15-17; Apokalupo 6:9-11.

18. (a) Eaa ra te irinakianga o te aronga akatainuia e vai nei rai i te enua nei? (e) Eaa ra te manako o te au mamoe ke atu no runga i to ratou au taeake Kerititiano akatainuia?

¹⁸ Ko te aronga akatainuia te noo nei rai ki te enua nei kua papu tikai ia ratou e me vai tiratiratu ua ratou, kare e roa atu ka rauka to ratou tutaki no to ratou tu akarongo mou. E mirioni ua atu te au mamoe ke, i te akamanako anga i te akarongo o to ratou au taeake akatainuia, tei akatika ki te au tuatua a te apotetoro ko Paulo, tei tuatua no runga i te au taeake akatainuia i Tesalonia e: “Ko matou uaorai oki te paapaa ia kotou i te au ekalesia o te Atua, i to kotou akakoromaki, e te akarongo, i to kotou takinga-kino angaia mai, e te au mate oki tei tupu ia kotou na: Ei akakite anga i te tuatua-tau tikai a te Atua, e kia karangaia kotou e aronga tau i te basileia o te Atua, no reira kotou i mate ei.” (2 Tesa. 1:3-5) Me takake atu te mema openga o te aronga akatainuia mei te enua nei, a te tuatau ua atu ka tupu ei, ka oti meitaki i reira te kavamani o te Atua i te rangi. E tumuanga tau tikai te reira no te pereperekavana​—i te rangi e i te enua nei!

[Au Tataanga Rikiriki i Raro]

Ka Rauka Ainei ia Koe te Akataka?

• Eaa ta te Atua i akakite kia Aberahama tei piri atu ki te Ra Akavaanga?

• No teaa a Aberahama i akatikaia ai ei tangata tuatua tika?

• Eaa ta te akatikaia anga ei aronga tuatua tika ka taki atu no te uanga o Aberahama?

• Eaa te irinakianga o te au Kerititiano katoatoa?

[Au Uianga Apii]

[Tutu i te kapi 20]

Kua akamaroiroi a Iesu i tana au pipi kia tauta atu rai no te Patireia

[Tutu i te kapi 21]

I te Penetekote mataiti 33 T.N., i akamata ai a Iehova i te iki i te au mema o te aronga akatainuia o te uanga o Aberahama

[Au Tutu i te kapi 23]

Te rekareka maata nei te au mamoe ke atu e te vai ua nei rai te au Kerititiano akatainuia ki rotopu ia ratou i teia au ra openga