¿Kunatakis jaktanxa?

KUNATSA UKA TUQIT YATIÑAX WAKISI: Maynix janis kunatakïkaspa, inamayakïspasa ukham amuyasiñax qʼalwa jaqinakarux aynachtʼayi. Ukampis yaqhipanakaxa, kunatakis jakapxi uk amuyasisaxa, jan waltʼäwinakarusa sum saykatapxi. Alemania tuqin jiwañat qhispiri Viktor E. Frankl sat yatxattʼat chachax akham sasaw qillqäna: “Sinti jan waltʼäwinsa uñjasiskañäni, kunatakis jaktan uk yatiñaxa uka jan waltʼäwinakar saykatañasatakiw yanaptʼistu, janiw ukham yaqha yanaptʼax utjkiti siristwa” sasa.

Ukampis uka tuqit mayj mayja parlapxi. Sapa mayniw kunjamsa jakañ muntan ukxa amtañasa sasaw waljanix sapxi. Ukat ina chʼusat juttan jan ukax monot jaqiptatätan sirinakaxa, jakäwisax janiw kunatakïkisa sasaw yatichapxaraki.

Kunatakis akanktan uk yatxatañatakixa, jakäwi Churir Jehová Diosar jisktʼañaw wakisispa, jupaw sum qhanañchistaspa. Arupax kamsis ukanakat yatxattʼañäni.

¿Kamsis Bibliaxa?

Chachasa warmisa mä amtampi Diosan luratänwa sistuw Bibliaxa. Nayrïr awk taykasar Diosax kamsataynas uk uñxattʼañäni.

Génesis 1:28: “Jichhax wali mirantapxam, aka uraqirusti phuqhantapxarakim, apnaqapxarakim; taqi chawllanakarusa, jamachʼinakarusa apnaqapxam, ukhamaraki uraqinjam qatatnaqtir animalanakarusa”.

Ukhamasti, Adanamp Evampi ukat wawanakapampixa, aka Uraqxa mä paraisor tukuyapxañapänwa, ukham amtampiw Diosax jaqir luräna. Janiw chuymankipstasin jiwapxañap munkänti, janirakiw taqi kunatix aka Uraqin utjki ukanak qʼañuchasiñapsa munkänti. Ukampis nayrïr awk taykasan jan wali amtapxatapatwa, jiwasax wawanakapjamax juchsa jiwañsa katuqawaytanxa (Génesis 3:2-6; Romanos 5:12). Ukhamäkipansa, Jehová Diosan amtapax janiw mayjtʼkiti. Niyaw aka Uraqix paraisoptxani (Isaías 55:10, 11).

Jehová Diosax amtaparjam sarnaqañataki chʼamani ukat amuytʼasiri lurtʼawayistu. Janiw Luririsat jithiqtasin jakiritak luratäktanti. Kunatakis Diosax lurawayistu ukanak aka qillqatanakan uñxattʼañäni.

Eclesiastés 12:13: “Parlañax tukuyxiwa. Taqiwa parlatäxi. Diosar yupaycham, ukatsti mandamiento arunakapa phuqham, taqi ukanakax jaqitakïtap layku”.

Miqueas 6:8: “[Jehová] Tatitux sistamwa, kunatix askïki ukxa, ukhamarak kuntix jupax jumatxa suyki uksa; jumax chiqapäki uk luram, khuyapayasirirakïma, ukhamarak Tatit Diosamarus altʼat chuymamampirak jaysam”.

Mateo 22:37-39: “‘[Jehová] Diosamaruw munäta taqi chuymamampi, taqi almamampi, taqi amuyumampiraki’. Akawa taqit sipansa jachʼa mandamientoxa. Payïri mandamientosti ukar uñtatarakiwa: ‘Jaqi masimarusti juma kipkarjam munarakim’”.

Biblian qhanañchäwipax kunatsa chuym qhanartayistu

Mä máquina jan pirtiyañatakixa, kuna amtamp luratänsa ukatakikiw apnaqasiñapa ukat luriripax kunjam apnaqañaw sisa ukaruw istʼasiñapa. Ukhamasti, kunjamtï Diosax jakasiñasa munkäna ukhamarjamarakiw jakañasa, ukhamatwa sum sarnaqaskañäni, jan ukasti janiw Diosarux sum yupaychxsnati, janirakiw sums  amuyasxsnati, llakinakaw apistaspa, janchi tuqitsa aynachtʼsnawa. Diosan amtapat yatiñax kunjamsa chuymasar qhanartayaspa ukanak jichhax uñxatañäni.

Kunas jakäwisan nayraqat thaqhañasäspa uka tuqitxa, waljanix qullqiw wali wakisirixa sasaw sapxi. Ukampis Bibliax akham sasaw iwxi: “Khitinakatix qamir kankaña thaqapxi ukanakaxa, janiw yantʼanakarux atipjapkiti, ukatsti taqi casta luqhi amtäwinakan sipitaparuw jalantapxi, ukatsti jan waliruw puripxi” sasa (1 Timoteo 6:9, 10).

Ukhamasti, khitinakatix qullqi chuymäñat sipansa Diosar munasipki ukanakax kusisiñwa jikxatapxi (1 Timoteo 6:7, 8). Chiqpachansa, wali wakisiriw irnaqañaxa, ukhamatwa kunatix jakañatak munaski ukanak jikxatapxaspa (Efesios 4:28). Ukampisa Jesusan iwxataparuw istʼapxi: “Janiw khitis pä patronarux sirvkaspati, maynirux munaniwa, maynirusti uñisirakiniwa, jan ukax maynirux jachʼachaniwa, maynirusti jiskʼacharakiniwa; Diosampiru qullqimpirux janiw khitis sirvkaspati” (Mateo 6:24).

Ukhamaxa, irnaqäwiru nayrar uchañat sipansa jan ukax qullqi chuymäñat sipansa, Diosar munasirinakax Diosan munañapwa nayraqat phuqapxi. Jehová Diosar istʼasapuni sarnaqapxani ukhaxa, Diosax janiw apanukkaniti uk sumwa amuyasipxi. Chiqpachansa, Diosan luqtirinakapäpxchixaya jupaw jupanakarux uñjaskani (Mateo 6:25-33).

Kunjamsa mayninakar uñjañasa uka tuqitxa, waljanix mayninakatxa janiw llakisipkiti, jan ukasti jupanakat nayraqat llakisipxi. Akapachanxa janiw sumankañax utjkiti, ¿kunatsa? Kunattix walja jaqinakax ‘jupanakakiw jaqïñ munapxi’ (MT), ukat ‘jan munasiñanïpxiwa’ (2 Timoteo 3:2, 3). Kunapachatix maynix chuyma ustʼayi jan ukax jan jupjam amuyki ukhaxa, ‘colerat chuymampiw wal arnaqjapxi, jan wali arunakampiw tuqisipxi’ (Efesios 4:31). Chiqpachansa, lakap jan imtʼasiñ yatisaxa, “nuwasiñanakwa utjayi”, ukampis colerasitap chuymapar chhaqtayir jaqixa chuymas qhanartataw sarnaqi (Proverbios 15:18).

Khitinakatix Diosan kamachiparjam phuqasa, jaqi masipar jupa pachparjam wal munasipki ukanakaxa, ‘maynit maynikamaw khuyaptʼayasipxi ukat maynit maynikamaw perdonasipxaraki’ (Efesios 4:32; Colosenses 3:13). Mayninakax janis jupanakar sum uñjapkchixa, Jesusatpunwa yatiqasipxi, kunattix ‘janiw jupax jan wali arumpi kuttʼaykänti’ (1 Pedro 2:23). Kunjamtï Jesusas siskänxa, jaqir yanaptʼasaw kusisiñ jupanakax jikxatapxi, janis yaqhipax yuspärasiripkchixa yanaptʼasipkakiwa (Mateo 20:25-28; Juan 13:14, 15; Hechos 20:35). Khitinakatix Yuqapat yatiqasipki ukanakarux Jehová Diosax qullan ajayup churi, uka chʼamampiw chuymas qhanartata ukat samarata sum jakasipxi (Gálatas 5:22).

¿Jutïri tuqit yatiñax kunjamatsa chuymas qhanartayistaspa?

[4 janan qhanañchäwipa]

Kusisitäñatakixa kunatakis jaktan uk yatiñaw wakisi

[5 janan fotopa]

Kunjamatsa chuymas qhanartata sarnaqsna ukwa Jesusax yatichistu