?From Wanem Yumi Laef?

?FROM WANEM I IMPOTEN BLONG FAENEMAOT ANSA? Samting we i mekem tingting blong man i trabol moa i bitim eni narafala samting hemia tingting ya se laef blong man i blong nating nomo mo i no gat wan risen from wanem hem i laef. Be man we i save stret risen from wanem hem i laef, tingting blong hem i defren. Nomata wanem nogud samting i kasem hem, tingting blong hem i strong mo hem i naf blong kamgud kwiktaem. Viktor E. Frankl i wan dokta we i stadi long ol nev long bodi blong man. Hem i bin laef tru long taem ya we ol Nasi oli bin kilim i ded plante man mo hem i raetem se: “Mi save talem se, i no gat wan samting long wol we i save givhan long wan man blong laef tru long enikaen trabol we i nogud olgeta, olsem save ya se laef i gat wan mining.”

Be i gat plante defdefren tingting from wanem yumi laef mo ol man oli no save agri se weswan nao i stret. Plante man oli ting se wanwan man i tekem desisen from wanem hem i laef. Defren olgeta, sam man we oli bilif long evolusen oli tijim se i no gat wan bigfala risen from wanem man i laef.

Be, beswan rod blong faenemaot risen from wanem yumi laef hemia blong lukluk i go long Jeova God, Man ya we i Givim Laef long yumi. Tingbaot wanem we Tok blong hem i talem long saed ya.

Wanem We Baebol i Talem

Baebol i tijim se Jeova God i gat wan spesel plan taem hem i wokem man mo woman. Jeova i talem tok ya long faswan papa mama blong yumi.

Jenesis 1:28. “Hem i blesem tufala, mo i talem long tufala se, ‘I gud yutufala i gat plante pikinini blong yutufala, blong olgeta we bambae oli kamaot biaen long yutufala, bambae oli save go stap long olgeta ples long wol. Nao bambae yufala i save mekem evri samting long wol ya oli stap aninit long han blong yufala. Mi mi putum yufala blong yufala i bos long ol fis, wetem ol pijin, mo ol narafala samting we i gat laef we oli stap long wol ya, i stat long olgeta we oli bigbigfala, i go kasem olgeta we oli smosmol.’”

Plan blong God hemia se Adam mo Iv mo ol pikinini blong tufala oli mekem fulwol i kam wan paradaes. Hem i no wantem se ol man oli kam olfala mo ded, mo i no wantem we ol man oli spolem wol ya. Be from we faswan papa mama blong yumi, Adam mo Iv, tufala i mekem wan jus we i no waes nating, yumi evriwan i gat  sin mo yumi ded. (Jenesis 3:2-6; Rom 5:12) Nating se i olsem, stamba tingting blong Jeova i no jenis. I no longtaem bambae wol ya i kam wan paradaes.—Aesea 55:10, 11.

Taem Jeova i wokem yumi, hem i mekem se bodi mo tingting blong yumi oli naf blong folem plan blong Hem. Hem i no wokem yumi blong yumi laef folem prapa tingting blong yumi nomo. Makem olsem wanem ol vas ya blong Baebol oli talem klia plan we God i gat long saed blong yumi.

Prija 12:13. “Antap long ol samting ya, wan samting nomo mi wantem talem long yu, se yu mas tinghevi long God, yu mas ona long hem, mo yu mas obei long ol tok blong hem, from we hemia nao samting we hem i mekem yumi from.”

Maeka 6:8. “Hem i God blong yumi, mo hem i wantem blong yumi stap mekem ol fasin we i stret gud, mo blong yumi stap soemaot we yumi lavem ol man tumas, mo blong yumi stap fren gud wetem hem long evri haf blong laef blong yumi, we tingting blong yumi i stap daon.”

Matiu 22:37-39. “‘Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.’ Hemia nao loa ya we i hae moa long ol narafala loa, mo i nambawan blong folem. Mo narawan, we klosap i sem mak long hem, i talem se, ‘Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.’”

Ansa Blong Baebol i Givim Trufala Pis Long Tingting

Sipos yumi wantem se wan mesin i wokgud, yumi mas yusum mesin ya long fasin we i stret mo folem plan blong man we i wokem hem. Long sem fasin, sipos yumi wantem we fasin fren blong yumi wetem God i stap gud, mo yumi haremgud long tingting, filing mo bodi blong yumi, yumi nidim blong yusum laef blong yumi folem plan blong Man we i Wokem yumi. Tingbaot olsem wanem save ya long saed blong plan blong God i save givhan long yumi blong gat pis long tingting long ol defren haf ya blong laef.

Taem ol man oli jusumaot ol samting we oli impoten long laef, plante oli jusum blong yusum laef blong olgeta blong hivimap ol sas samting. Be Baebol i givim woning ya long yumi, i talem se: “Ol man ya we oli wantem kam rijman, be oltaem, ol samting blong traem yumi oli stap mekem olgeta oli foldaon. Ol samting we oli wantem, we i krangke, mo we i stap spolem olgeta, i olsem trap blong kasem olgeta.”—1 Timoti 6:9, 10.

Defren olgeta, ol man we oli lavem God moa i bitim mane, oli lanem blong stap glad long samting we oli gat. (1 Timoti 6:7, 8) Oli kasem save se i impoten blong wok had mo oli save se i wok blong olgeta blong givim samting we famle blong olgeta i nidim long saed blong bodi. (Efesas 4:28) Be oli tinghevi tu long woning we Jisas i givim taem hem i talem se: “I no gat man we i save wok blong tu masta wantaem. Sipos man i mekem olsem, bambae hem i laekem wan, be i no laekem narawan, i agens long hem. No bambae hem i save ona long wan masta, be i stap lukluk nogud long narawan. Yufala i no save mekem we God i bos blong yufala, be long semtaem nomo, mane tu i bos blong yufala.”—Matiu 6:24.

Taswe, ol man we oli lavem God oli no putum wok long fasples long laef blong olgeta mo oli no yusum laef blong olgeta blong ronem ol sas samting. Be samting we i impoten long laef blong olgeta, hemia blong mekem wanem we God i wantem, mo oli save se sipos samting ya i stap long fasples long laef blong olgeta, bambae Jeova God i lukaotgud long olgeta. Yes, long tingting blong Jeova hem i mas mekem olsem.—Matiu 6:25-33.

Taem ol man oli joen wetem ol narafala, plante oli tingbaot olgeta fastaem. Tede, i no gat pis long wol mo bigfala risen from wanem i olsem hemia from we plante man oli “tingbaot olgeta nomo, . . . oli no man blong gat sore long man.” (2 Timoti 3:2, 3) Taem narafala i mekem tingting blong olgeta i foldaon mo i no agri wetem tingting blong olgeta, oli kam ‘kros kwik mo taem oli kros, oli sakem tok blong olgeta i go antap, mo oli tok nogud long narafala.’ (Efesas 4:31) Fasin olsem, we man i no save bos long hem wan, i no givim pis long tingting be i “pulum rao i kam.”—Ol Proveb 15:18.

Defren olgeta, ol man we oli obei long loa blong God blong lavem ol narafala man raonabaot long olgeta olsem we oli lavem olgeta wan, oli ol man we oli stap ‘mekem i gud long narafala, oli kaengud long olgeta, mo oli fofogivim olgeta.’ (Efesas 4:32; Kolosi 3:13) Oli traehad blong folem fasin blong Jisas, nating se man i no kaen long olgeta. Taem ol man oli bin tok nogud long Jisas, hem i “no tok nogud bakegen long olgeta.” (1 Pita 2:23) Olsem Jisas, ol man we oli obei long God oli kasem save se taem oli wok blong narafala oli faenem trufala glad, nating se narafala ya i no gat tangkiu from samting we oli mekem. (Matiu 20:25-28; Jon 13:14, 15; Ol Wok 20:35) Jeova God i givim tabu spirit long olgeta we oli folem eksampol blong Pikinini blong hem, mo tabu spirit ya i wokem trufala pis long laef blong olgeta.—Galesia 5:22.

?Be olsem wanem tingting blong yu long saed blong fiuja i save afektem pis we yu gat long tingting blong yu?