Muloñadi Chitwekalilaku?

MULOÑADI CHITWATELA KWILUKILA CHITWEKALILAKU? Mazu akwila nawu wumi hiwalemaku nawa kwosi nkeñelu yayeni yitwekalilaku, diwaswejaña kuneñesha antu. Ilaña muntu weluka chekalilaku, womikaña yuma yakala yejima nikubula chineñi. Viktor E. Frankl, wadiza jawoñu, mwoñololu, ninyijila nawa wapulukili muwubanji weneni, wasonekeli nindi: “Mukaayi mwosi chuma, chinukuhosha nami, chinateli kukwasha muntu kuhanda chiwahi hela muwubanji weneni chinabadiki hakwiluka nawu kudi chuma cheneni chaleñela muntu kwikalaku.”

Hela chochu, antu atoñojokaña yuma yashiyashana haniyi nsañu. Antu amavulu atoñojokaña nawu muntu himuntu watela kwiluka yomweni muloña wekalilaku. Kwambukaku, antu amakwawu akuhwelela mukubalumuka kwayuma atañishaña nawu kwosi chuma chacheni chaletesha twikaluku.

Dichi njila yayeni mutwatela kwilukila muloña wutwekalilaku yidi yakudizila kudi Mukwakuhana Wumi, Yehova Nzambi. Talenu Izu dindi chidahosha haniyi nsañu.

Chahoshaña Bayibolu

Bayibolu yatañishaña nawu kwadiñi chuma chacheni Yehova Nzambi chayileñeleliyi eyala namumbanda. Yehova wayinkeli anvwali jetu akusambila iji nshimbi.

Kutachika 1:28. ‘Semununenu, muvuleña, muwanini heseki, mudovwahishi; ikalenu anyanta niawanshi amwijiya, niawatujila ahaluzwizu, niayuma yayumi yejima yendaña hamaseki.’

Nzambi wakeñeli nindi Adama naEvu nianyanawu awanishi iseki dejima kwikala paradisa.  Hakeñeli nindi antu ashinakajaña nikufwaku; nawa hakeñeli nindi antu akisañani isekiku. Dichi hamuloña wakwila anvwali jetu atachi afuukwili chatama, twaswana nshidi nikufwa. (Kutachika 3:2-6; Aroma 5:12) Hela chochu, nkeñelu yaNzambi hiyinahimpikuku. Katataka iseki dikekala paradisa.—Isaya 55:10, 11.

Yehova watuleñeli nañovu jakumujimba niyitoñojoka kulonda tuwanishi nkeñelu yindi. Hatuleñeli nindi tudiyuleña chakadi yenaku. Talenu yitoñojoka yaNzambi kutalisha kudi antu chinayilumbululiwu muyibaba yinalondelu yamuBayibolu.

Mukwakutaŋisha 12:13. ‘Nsañu yinakumi dehi; yuma yejima tunatiyi dehi; mutiyi Nzambi woma, hembaku kuleja kwindi; chuma chatelela muntu chochenichi hohu.’

Mika 6:8. ‘Indi Yehova nakeñi chumanyi kudeyi? Nakeñi wili chaloña, wukeñi luwi, wendi naNzambi yeyi chakudizoza.’

Matewu 22:37-39. ‘Keñaku Yehova Nzambi yeyi namuchima weyi wejima, nawumi weyi wejima, namaaneyi ejima. Dilu lushimbi lwabadika lwakusambila. Kudi nawa lwamuchiyedi lwafwana neyi ilu nawu, Keñaku mukwenu neyi chiwadikeña eyi aweni.’

Ñakwilu yaBayibolu Chiyaleñelaña Kubula Kwakamena

Hakwila nawu ikina dakala dizatiki chachiwahi, atela kudizatisha kwesekeja nankeñelu nimudimu wuyadituñililuwu kudi wadibazili. Munjila yoyimu, neyi hitunakukeña kuluwankanaku, chili lwakuspiritu, muyitoñojoka, hela lwakumujimba, twatela kuzatisha wumi wetu kwesekeja nankeñelu yaNleñi yetu. Talenu kwiluka nkeñelu yaNzambi chikunateli kutwileñela kubula kwakamena muniyi yuma yamuwumi wetu.

Hakufuukula yuma yalemeshawu nankashi muwumi wawu, antu amavulu makonu adiñijaña hohu mukufwila maheta. Hela chochu, Bayibolu yababeshaña nawu “antu akukeña nawu aheti, akudimbukila mukweseka, akufwa mumuhetu, akufwila yuma yawusupi yayivulu yakatishaña.” 1 Timotewu 6:9, 10.

Ilaña, antu afwilaña kumukeña Nzambi kubadika kukeña mali awanaña njila yakwikalilamu namuzañalu nayuma yiyakweti. (1 Timotewu 6:7, 8) Eluka chichawahila kuzata nañovu cheñi eluka nawu akweti mudimu wakwakamena yisaka yawu lwakumujimba. (Aefwesesa 4:28) Cheñi atiyililaña kufumba kwaYesu kwakwila nawu: “Kwosi muntu natweshi kukalakela anyanta ayeduku; chiña yohelahu wumu, akeñahu mukwawu; hela yokakelahu wumu, mukwawu amudiwula. Himukutwesha kukalakela niNzambi nimahetaku.”—Matewu 6:24.

Dichi chatela atwamijeñaku mudimu wakumujimba hela kukeña maheta, antu amukeña Nzambi atwamijañaku kwila nkeñelu yindi muchihandilu chawu. Eluka nawu Yehova Nzambi wukuyakamena wutiya ashindamena chikupu hakwila nkeñelu yaNzambi mukuhanda kwawu. Nawa Yehova yomweni wadinka mudimu wakuyakamena.—Matewu 6:25-33.

Hakudikunda nawantu, antu amavulu akeñaña wena kwikala hambidi. Makonu, mukaayi mwosi kuwunda chikupu, muloña antu amavulu anekali “akwakudikeña, . . . abulaña kukeñañana mwasemwakenawu.” (2 Timotewu 3:2, 3) Neyi muntu yoyineñesha hela yakaana munafuukuluwu, alendumukaña ‘nandombu, nikuzuwa nimapumba, nikutukana.’ (Aefwesesa 4:31) Chatela awundishi nyichima, kubula kudihemba ‘kwasañumunaña jakufwilañana.’—Yishimu 15:18.

Kwambukaku, antu ovwahilaña nshimbi yaNzambi yakukeña akwawu neyi chadikeñawu aweni ‘adikokwejaña muntu namukwawu; ekala namuchima wawushona; adanakenaña muntu namukwawu.’ (Aefwesesa 4:32; Akolose 3:13) Hela chakwila akwawu anakuyila katama, wena afwilaña kwimbujola Yesu, watukiluwu ilaña “hafuntishili cheñi matukaku.” (1 Petulu 2:23) Kufwana Yesu, eluka nawu kukalakela amakwawu kwaletaña muzañalu weneni, kushilahu niantu abulaña kusakililla chuma chinayikoñeluwu. (Matewu 20:25-28; Yowanu 13:14, 15; Yililu 20:35) Yehova Nzambi wayinkaña antu amwimbujolaña Mwanindi spiritu yajila, nawa iyi spiritu yayiletelaña kuwunda kwakweni mukuhanda kwawu.—Aŋalija 5:22.

Hanu dinu, yuma yimwatoñojokaña nenu yakamwekana kumbidi yayileñelaña ñahi kubula kwakama?