Nunin Eng Nge A Tum?

ENGVANGIN NGE A CHHANNA HMUH CHU THIL PAWIMAWH TAK A NIH? Nun hian awmzia leh thiltum rêng a nei lo tih ngaihtuahna neih chu mihringte tâna lungngaihna thlentu berte zînga mi a ni a. Kawng leh lamah chuan, miin nuna thiltum chiang tak a neih chuan dinhmun hrehawm pawh a tuar theiin ngai a awh leh vat thei a ni. Indopui Pahnihnaa Judate suatna ata dam khaw chhuak thluak leh hriatna tha zâm chungchâng zir mi, Viktor E. Frankl-a chuan: “Khawvêlah hian nunin awmzia a nei tih hriatna aia dinhmun chhe ber pawh hlawhtling taka tuar chhuak thei tûra min ṭanpui theitu dang a awm lo, ka’n ti tawp teh ang,” tiin a ziak a ni.

Amaherawhchu, he mi chungchângah hian ngaih dân tam tak leh inkalh tak takte a awm a. Mi tam tak chuan nunin a tum chu mahni ṭheuhva insiam mai tûr niin an ngai a ni. Chu mi nêna inkalhin, chanchhâwnna ringtu ṭhenkhat chuan nun hian awmzia tak tak a nei lo tih an zirtîr thung.

Mahse, nunin a tum hmu chhuak tûra Nunna min Petu, Pathian Jehova râwn chu thil inâwm ber a ni. He mi chungchâng Bible-in a sawi hi ngaihtuah teh.

Bible Sawi Dân

Bible chuan Pathian Jehova’n mipa leh hmeichhia a siam khân an tân thiltum chiang tak a nei tih a sawi a. Ani chuan kan nu leh pa hmasa berte hnênah a hnuaia thupêk hi a pe a ni.

Genesis 1:28. “Chi tam tak thlaha lo pungin, leilung hi luah khat ula, in thu thuin awmtîr rawh u; tuifinriata sangha chungah te, chunglêng sava chungah te, thil nung leia bawkvâka kal zawng zawng chungah te thu nei bawk rawh u.”

Adama leh Evi leh an fate’n leilung pum pui paradis-a an siam chu Pathian thiltum a ni a. Mihringte tar a, an thih chu a thiltum a ni lo va, mihringte’n leilung an tihchhiat lah a duh hek lo. Amaherawhchu, kan nu leh pa hmasa berte’n duh thlanna fing lo tak an lo siam avângin, sual leh thihna kan rochun a. (Genesis 3:​2-6; Rom 5:12) Chutichung pawhin, Jehova thiltum chu a inthlâkthleng chuang lo. Rei lo têah lei hi paradis-ah a lo chang ang.​—⁠Isaia 55:​10, 11.

Jehova chuan a thiltum hlen chhuah nân taksa lam leh ngaihtuahna lama theihna neiin min siam a. A hnên aṭanga inla hrang tûrin min siam lo. A hnuaia Bible chângte’n kan tâna Pathian thiltum a sawite hi lo chhinchhiah rawh.

Thuhriltu 12:13. “Hêng thu zawng zawng khaikhâwmna hi i ngaithla teh ang: Pathian ṭih la, a thupêkte vawng rawh; hei hi mihring zawng zawng tih tûr chu a ni mai.”

Mika 6:⁠8. “LALPAN a phût che chu a eng nge ni? Dik taka tih leh khawngaihna ngainat leh i Pathian nêna thuhnuairawlh taka lên dun a ni lo vem ni?”

Matthaia 22:​37-39. “‘Lalpa, i Pathian chu i thinlung zawng zawngin, i thlarau zawng zawngin i rilru zawng zawngin i hmangaih tûr a ni.’ . . . Chu chu thu pêk ropui leh pawimawh ber a ni. Tin, a dawttu, a anpui chu hei hi a ni, ‘Nangmah i inhmangaih angin i vêngte pawh i hmangaih tûr a ni,’ tih hi.”

Bible Chhânnate’n Rilrua Thlamuanna Dik Tak Min Neihtîr Dân

Khâwl ropui tak engpawhin ṭha taka hna a thawh theih nân chuan, a siamtu thiltum leh a hman dân tûra a duan nêna inrema hman chu a  ngai a. Chutiang bawkin, kan thlarau lam, rilru lam, ngaihtuahna lam, a nih loh leh taksa lama mahni intihchhiatna pumpelh tûr chuan, min Siamtuin a lo tum dân anga nun kan hman chu a ngai a ni. Pathian thiltum hriatnain a hnuaia nun kawng chi hrang hrangtea rilrua thlamuanna min pêk theih dân hi ngaihtuah rawh.

Nuna thil dah pawimawh tûrte an insiam hunah, tûn laia mi tam takte chuan hausak ûm chu an dah pawimawh ber a. Amaherawhchu, “hausak tumte chu thlêmnaah te, thangah te, âtthlâk leh tikhawlo thei duhna tam takah te an tlu lût ṭhîn,” tiin Bible chuan a vaukhân a ni.​—⁠1 Timothea 6:​9, 10.

Kawng leh lamah chuan, pawisa aia Pathian hmangaih zirtute chuan lungâwina thurûk chu an hmu a. (1 Timothea 6:​7, 8) Anni chuan taihmâk a pawimawhzia hre thiamin, mahni taksa lam mamawh thawk chhuak tûr an ni tih an hria a ni. (Ephesi 4:28) Mahse, Isua vaukhânna thu pawh chu an la thu tak hle bawk: “Tuman hotu pahnih rawng an bâwl kawp thei lo; pakhat huain pakhat an duh ang, a nih loh leh pakhat ṭanin pakhat an hmusit ang. Pathian leh sum rawng in bâwl kawp thei lo ve,” tih chu.​—⁠Matthaia 6:⁠24.

Chuvângin, Pathian hmangaihtute chuan hnathawh emaw, hausak ûmna emaw aiin Pathian duhzâwng tih chu an dah pawimawh ber a. Pathian duhzâwng tih chu an nuna thil pawimawh ber an nihtîr chuan Pathian Jehova’n anmahni a enkawl dâwn tih an hria a ni. Dik takin Jehova chuan chutianga anmahni enkawl chu a mawhphurhnaah a ngai tlat a ni.​—⁠Matthaia 6:​25-33.

Mi dangte nêna an indâwrnaah, mi tam tak chu mahni an indah hmasa a. Tûn lai khawvêlah hian remna a awm lo, a chhan bul ber chu mi tam tak chu “mahni inhmangaihtu te, . . . hmangaihna pianpui nei lo te” an lo nih tâk vâng a ni. (2 Timothea 3:​2, 3) Mite’n anmahni an tihbeidawn emaw, an ngaih dân an kalh emaw hunah, “thinurna te, tauhna te, ânna te, sawichhiatna te” hmangin an chhâng lêt a ni. (Ephesi 4:31) Chutianga insûmtheihna tlâkchhamna chuan, rilrua thlamuanna ni lovin, “inhauna a chawk tho” zâwk mah a ni.​—⁠Thufingte 15:⁠18.

Chu mi nêna inkalhin, mahni an inhmangaih anga ṭhenawmte hmangaih tûra Pathian thupêk zâwmtute chu an ‘inkhawngaih tawnin an inlainat tawn a, an inngaidam tawn’ bawk a ni. (Ephesi 4:32; Kolossa 3:13) Mi dangte’n ngilnei lo taka an cheibâwl hunah pawh, mi hauhva a awm laia “hau ve thung lo” Isua entawn chu an tum tlat a ni. (1 Petera 2:23) Anni chuan thil an tihsakate’n lâwm nachâng an hriat loh hunah pawh, Isua anga mi dangte rawngbâwlsaknain lungâwina tak tak a thlen tih an hria a. (Matthaia 20:​25-28; Johana 13:​14, 15; Tirhkohte 20:35) Pathian Jehova chuan a Fapa entawntute chu a thlarau a pe a, chu thlarau chuan an nunah remna, a nih loh leh thlamuanna a rah chhuak a ni.​—⁠Galatia 5:⁠22.

Mahse, engtin nge nakin hun tûr i thlîr dân chuan i rilrua thlamuanna chu a nghawng theih? (w08 2/1)

[Phêk 6-naa thu lâk chhuah]

Miin a nunah thiltum chiang tak a neih a ngai

[Phêk 7-naa milem]

Isua chuan rilrua thlamuanna neih theih dân min zirtîr