Vɩɩmã võor yaa bõe?
Vɩɩmã võor yaa bõe?
BÕE YĨNG TƖ SOK-KÃNGÃ LEOOR BÃNGR TAR YÕODO? Ninsaal sã n tagsdẽ tɩ vɩɩmã pa tar yõodo, bũmb pa be n namsd-a n ta rẽ ye. La ned sã n mi a vɩɩmã võor sõma, a soab tõe n maoa ne zu-loeesã n tõoge. A Viktor Frankl sẽn yaa Otiris logtor sẽn põs nazi rãmbã sẽn kʋ nebã kʋ-beedã gʋlsa woto: “Baa toog pʋgẽ, bũmb pa be n tõe n kɩt tɩ ned sɩd maan a sẽn tõe fãa n kell n vɩɩmd n yɩɩd a soab sẽn na n miẽ t’a vɩɩmã tara võor ye.”
La nebã tara tagsa toɛy-toɛy vɩɩmã võor wɛɛngẽ. Neb wʋsg tagsdame tɩ yaa ned kam fãa n segd n yãk a vɩɩmã võore. La neb nins sẽn tẽed tɩ vɩɩmã waa yaarã yetame tɩ vɩɩmã meng pa tol n tar võor ye.
Tõnd sã n dat n sɩd bãng vɩɩmã võor meng-menga, d segd n soka Wẽnnaam a Zeova sẽn yaa vɩɩmã yẽgrã. D ges a Gomdã sẽn yet bũmb ning rẽ wɛɛngẽ.
Biiblã sẽn yet bũmb ninga
Biiblã yetame tɩ Wẽnnaam a Zeova sẽn naan pipi raoã ne pipi pagã, pa zaalem yĩng ye. A ra tara raab sẽn yaa vẽenega. Ad a Zeova sẽn da rat bũmb ning ne tõnd yaab rãmbã:
Sɩngre 1:28. “La Wẽnnaam ninga bãmb zut bark n yeel-b tɩ b rog kamb n pid dũniyã la b tõog-a. La b soog zĩmã sẽn be koomã pʋsẽ wã la bõn-yɩgdɩ wã sẽn yɩgd yĩngrã la rũms nins fãa sẽn kẽnd dũniyã zugã.”
Wẽnnaam da ratame t’a Ãdem ne a Hawa la b kambã maneg tẽngã gill t’a lebg arzãna. A ra pa rat tɩ ninsaalbã kʋʋndẽ la b kiidẽ, a ra leb n pa rat tɩ b sãamd tẽngã ye. La d yaab a Ãdem ne a Hawa sẽn yãk yam n kɩɩs Wẽnnaamã yĩnga, d fãa lebga yel-wẽn-maandba, la d kiidẽ. (Sɩngre 3:2-6; Rom dãmba 5:12) La baa ne rẽ, a Zeova raabã pa toeem ye. Ka la bilfu, tẽngã na n lebga arzãna.—Ezai 55:10, 11.
A Zeova naana tõnd tɩ d tar pãng la yam n tõe n pids a raabã. A pa naan tõnd tɩ d soog d mens ye. Biiblã verse nins sẽn pʋgdã pʋsẽ, b wilga Wẽnnaam sẽn naan tõnd ne raab ningã.
Koɛɛg Soaba 12:13. “Kelg koɛɛg baasgo. D wʋma fãa. Zoe Wẽnnaam la f sak bãmb tõodo. Tɩ bõe, ninsaal fãa tog n maana woto.”
Miise 6:8. “Yaa bõe la bãmb baood yãmb nengẽ, sã n ka tɩ y maan sẽn yaa tɩrga, n wilg nonglem daar fãa la y sik y mens n sak bãmb bala?”
Matɩe 22:37-39. “Nong Zusoabã fo Wẽnnaamã ne f sũur fãa, la ne f sɩɩg fãa, la ne f yam fãa. Ada yaa pipi tõogo, la a yaa tõog sẽn yaa kãseng n yɩɩd tõodã fãa. La ad a yiib soabã sẽn wẽnd yẽnda: Nong f yak wa f menga.”
Biiblã sẽn kõt leoor ninsã sẽn tõe n kɩt tɩ d yamã gãand bãan to-to
Sẽn na yɩl tɩ masĩn tõog n tʋm sõma, rẽnda d tũ sẽn maan-a masĩnã sẽn yet tɩ d rɩk-a n tʋm to-to wã. Tõnd me sã n pa rat n sãam d vɩɩmã, rat n yet tɩ n sãam d yamã, d yĩnsã la zood ning d sẽn tar ne Wẽnnaamã, d segd n vɩɩmdame tɩ zems ne d Naandã sẽn dat bũmb ningã. D ges Wẽnnaam daabã bãngr sẽn tõe n kɩt tɩ d yamã gãand bãan to-to.
B sã n yet tɩ b yãk bũmb nins sẽn tar yõod n yɩɩd b vɩɩmã pʋgẽ wã, yaa ligdã ne arzɛkã baoob n pak neb wʋsgo. La Biiblã yaool n yetame tɩ “neb nins sẽn dat n yɩ arzɛgs rãmbã kẽeda makr la kũusr pʋgẽ, la ratem wʋsg sẽn yaa yalemdo.”—1 Tɩmote 6:9, 10.
La neb nins sẽn nong Wẽnnaam n yɩɩd ligdã sũy nooma ne b sẽn tarã tɛka. (1 Tɩmote 6:7, 8) B miime tɩ b segd n tʋma wʋsg n ges b meng yelle. (Efɛɛz rãmba 4:28) La b pa yĩmd a Zezi sẽn yeelã me ye. A yeela woto: “Ned ka be sẽn tõe n sak zu-soben-dãmb a yiib ye. Yẽ na n kisga a yembr la a nong a yembre, walla yẽ na n nonga a yembr n paoog a yembre. Yãmb ka tõe n sak Wẽnnaam la arzegs [me] ye.”—Matɩe 6:24.
Rẽ n so tɩ neb nins sẽn nong Wẽnnaamã pa get tɩ b tʋʋmã bɩ laogã baoob n tar yõod n yɩɩd b vɩɩmã pʋgẽ ye. Yaa Wẽnnaam daabã maaneg n tar yõod n yɩɩda. B miime tɩ sã n yaa Wẽnnaam a Zeova raabã maaneg n pak-b n yɩɩda, a pa tõe n pa ges-b yell ye.—Matɩe 6:25-33.
Neb wʋsg mens yell bal n pak-ba. Laafɩ sã n pa be dũniyã pʋgẽ, naoor wʋsgo yaa nebã wʋsg sẽn nong b mens la b pa “tar nin-bãan-zoeerã” yĩnga. (2 Tɩmote 3:2, 3) Ned sã n maan tɩ pa ta b yam, bɩ ned sã n pa tagsd wa bãmb sẽn tagsd to-to wã bala, yaa “sũ-yikr la no-koɛɛm la kãnegr” la b tʋʋmde. (Efɛɛz rãmba 4:31) Yõk-m-meng kaalem woto pa kɩtd tɩ ned yam gãand bãan ye. “Wata ne zabr” bala.—Yelbũna 15:18.
La neb nins sẽn tũud Wẽnnaam noorã n nong b taabã wa b mensã ‘maanda taab neere, n tar sũ-bʋgsem, la b kõt taab sugri.’ (Efɛɛz rãmba 4:32; Kolos rãmba 3:13) Baa nebã sã n namsd-ba, b modgdame n dɩkd a Zezi togs-n-taare. Ned sã n da gom a Zezi wẽnga, a pa lebsd wẽng ye. (1 Pɩɛɛr 2:23) Wala a Zezi, b miime tɩ f sã n sõngd nebã, baa neb nins sẽn pa tar mi-beoogã, f sɩd paamda sũ-noogo. (Matɩe 20:25-28; Zã 13:14, 15; Tʋʋma 20:35) Wẽnnaam a Zeova kõta a vʋʋsem sõngã neb nins sẽn dɩkd a Biigã togs-n-taarã, tɩ rẽ kɩtdẽ tɩ b yamã gãe bãane.—Galat dãmba 5:22.
La wãn to la yãmb sẽn tagsd to-to beoog-daarã wɛɛngẽ wã tõe n kɩt tɩ y yamã gãand bãane?
[Goam sẽn tar pãngã, seb-neng a 6]
Ned fãa ratame t’a vɩɩmã tar võore
[Foto, seb-neng a 7]
A Zezi wilga tõnd sẽn tõe n maan to-to tɩ d yamã gãand bãane