Morero wa Bophelo ke Ofe?

KE KA BAKA LA’NG KARABO E LE BOHLOKWA? Ke dilo tše sego kae tšeo di bakelago batho kgateletšego go feta kgopolo ya gore bophelo ga bo na morero. Ka lehlakoreng le lengwe, motho yo a nago le morero o itšego bophelong o kgona go lebeletšana le mathata ka katlego. Viktor E. Frankl, setsebi sa tshepedišo ya tša megalatšhika le mophologi wa Polao e Sehlogo o ngwadile gore: “Ke leka go bolela gore ga go na selo lefaseng seo se ka atlegago ka go thuša motho gore a tšwele pele a phela gaetšita le ka tlase ga maemo a mabe, bjalo ka tsebo ya go tseba gore go na le morero bophelong bja motho.”

Lega go le bjalo, go na le dipono tše dintši tše di ganetšanago tabeng ye. Ba bantši ba nagana gore ke motho yo a swanetšego go itirela phetho ya gore morero wa bophelo ke ofe. Ka mo go fapanego, ba bangwe bao ba dumelago thutong ya tlhagelelo ba ruta gore bophelo ga bo na morero wa kgonthe.

Lega go le bjalo, tsela e nago le tlhaologanyo ya go hwetša morero wa bophelo ke go botšiša Monei-bophelo, Jehofa Modimo. Ela hloko seo Lentšu la gagwe le se bolelago tabeng ye.

Seo Beibele e se Bolelago

Beibele e ruta gore Jehofa Modimo o be a e-na le morero o itšego bakeng sa monna le mosadi ge a be a ba bopa. Jehofa o neile batswadi ba rena ba pele taelo e latelago.

Genesi 1:28. “Tswalang Le atê, tlalang lefase, Le le fenyê Le buše ’hlapi tša lewatlê le ’nonyana tša xodimo, le nyabanyaba yohle ya diphedi mó ’faseng.”

Modimo o be a rerile gore Adama le Efa gotee le bana ba bona ba dire lefase ka moka paradeise. O be a se a rera gore batho ba tšofale gomme ba hwe; le gona o be a sa nyake gore batho ba senye tikologo. Lega go le bjalo, ka baka la dikgetho tše mpe tšeo di dirilwego ke batswadi ba rena ba pele, re abetše sebe le lehu. (Genesi 3:2-6; Baroma 5:12) Lega go le bjalo, morero wa Jehofa ga se wa fetoga. Kgaufsinyane lefase e tla ba paradeise.—Jesaya 55:10, 11.

Jehofa o re bopile re e na le matla le bohlale bja go phethagatša morero wa gagwe. Ga se a re bopela gore re ipuše. Ela hloko kamoo ditemana tše di latelago tša Beibele di hlalosago morero wa Modimo bakeng sa rena.

Mmoledi 12:13. “A re kweng phêthêxô ya ditaba tšohle: Boifa Modimo, O lôtê taêlô tša xaxwe. Ké se se swanetšexo batho bohle.”

Mika 6:8. “Se Morêna a se nyakaxo xo wene: Ké xo dira tokò ké xo rata botho, ké xo sepela le Modimo w’axo O n’e boipoetšò.”

Mateo 22:37-39. “O rate Jehofa Modimo wa gago ka pelo ya gago ka moka le ka moya wa gago ka moka le ka monagano wa gago ka moka.’ Ye ke taelo e kgolo-kgolo le ya pele. Ya bobedi ya go swana le yona ke ye, ‘O rate moagišani wa gago go etša ge o ithata.’”

Kamoo Karabo ya Beibele e re Neago Khutšo ya Kgonthe ya Monagano

E le gore motšhene le ge e le ofe o raraganego o šome gabotse, o swanetše go šomišetšwa morero woo o hlametšwego wona gomme o šomišwe ka tsela yeo mohlami wa wona a rerilego gore o šomišwe ka yona. Ka mo go swanago, e le gore re pheme go ikgobatša—e ka ba e le moyeng, monaganong, maikwelong goba mmeleng—re swanetše go diriša maphelo a rena ka tsela yeo Mmopi wa rena a rerilego gore re a diriše ka yona. Ela hloko kamoo go tseba ga rena  morero wa Modimo dikarolong tše di latelago tša bophelo go ka re neago khutšo ya monagano.

Ge ba thea dilo tše di tlago pele maphelong a bona, batho ba bantši lehono ba neela maphelo a bona go kgoboketšeng mahumo. Lega go le bjalo, Beibele e lemoša ka gore: “Bao ba ikemišeditšego go huma ba wela molekong le molabeng le dikganyogong tše dintši tša go hloka tlhaologanyo le tše gobatšago.”—1 Timotheo 6:9, 10.

Ka lehlakoreng le lengwe, bao ba ithutago go rata Modimo go e na le tšhelete ba hwetša sephiri sa go kgotsofala. (1 Timotheo 6:7, 8) Ba kwešiša bohlokwa bja go šoma ka thata e bile ba a tseba gore ba na le boikarabelo bja go itlhokomela ka dilo tšeo ba di nyakago. (Baefeso 4:28) Eupša gape ba tšeela godimo temošo ya Jesu e rego: “Ga go yo a ka bago lekgoba la marena a mabedi; gobane o tla hloya yo mongwe a rata yo mongwe, goba o tla kgomarela yo mongwe a nyatša yo mongwe. Le ka se be makgoba a Modimo le a Mahumo.”—Mateo 6:24.

Ka gona, go e na le go dira gore mošomo wa boiphedišo goba go phegelela mahumo e be selo se se tlago pele maphelong a bona, bao ba ratago Modimo ba dira gore go dira thato ya gagwe e be selo se se tlago pele bophelong. Ba a tseba gore ge e ba go dira thato ya Modimo e le selo sa bohlokwa maphelong a bona, gona Jehofa Modimo o tla ba hlokomela. Ge e le gabotse, Jehofa o ikwa a ikarabela gore a dire bjalo.—Mateo 6:25-33.

Ge ba dirišana le batho, ba bangwe ba etiša dikgahlego tša bona pele. Lehono lefase ga le na khutšo, kudu-kudu ka gobane batho ba bantši ba fetogile “baithati, . . . ba ba se nago maikwelo a borutho a tlhago.” (2 Timotheo 3:2, 3) Ge motho yo mongwe a ba nyamiša goba a sa dumelelane le pono ya bona, ba ineela ‘bogaleng le pefelong le mašateng le polelong e gobošago.’ (Baefeso 4:31) Go e na le go ba nea khutšo ya monagano, go palelwa ke go itshwara mo go bjalo go “tsoša thšitanô” feela.—Diema 15:18.

Ka mo go fapanego, bao ba kwago taelo ya Modimo ya gore ba rate baagišani ba bona go etša ge ba ithata ba ‘botho go yo mongwe le yo mongwe, ba šokelana ka bonolo gomme ba lebalelana ka bolokologi.’ (Baefeso 4:32; Bakolose 3:13) Gaešita le ge ba bangwe ba sa ba sware ka botho, ba katanela go ekiša Jesu, yoo ge a be a rogwa ‘a sa kago a ithogela.’ (1 Petro 2:23) Go etša Jesu, ba kwešiša gore go hlankela ba bangwe, gaešita le bao ba sa lebogego seo ba se direlwago, go tliša kgotsofalo ya kgonthe. (Mateo 20:25-28; Johane 13:14, 15; Ditiro 20:35) Jehofa Modimo o nea moya wa gagwe go bao ba ekišago Morwa wa gagwe, gomme moya wo o dira gore ba be le maikwelo a kgonthe a khutšo.—Bagalatia 5:22.

Lega go le bjalo, pono ya gago ka bokamoso e ka kgoma bjang khutšo ya gago ya monagano?

[Mantšu a ipiletšago a tsopotšwego go letlakala 6]

Motho o swanetše go ba le morero o itšego bophelong

[Seswantšho go letlakala 7]

Jesu o re ruta kamoo re ka bago le khutšo ya monagano