¿Imapaqtaq kawsanchik?

¿IMARAYKUTAQ KAY TAPUYMAN KUTICHIYTA MASKʼANANCHIK TIYAN? Runaqa, kawsaynin qhasi mana kaq kasqanta yuyasqanrayku, sunqu pʼakisqa kawsan. Chantapis, wakin runasqa, imatachus kawsayninkuwan ruwanankuta yachasqankurayku, ima chʼampayta atipanankupaqpis, wakichisqas kachkanku. Juk doctor Viktor E. Frankl sutiyuq, pʼichus Alemaniapi jatun maqanakuyta rikurqa, nirqa: “Kawsayninchik mana qhasipaqchu kasqanta yachaylla, ima ñakʼariypipis yanapayta atipawanchik”, nispa.

Chaywanpis wakinqa, mana jinatachu yuyanku. Runa yuyasqanmanjina, sapa juk imapaqchus kawsachkasqanta yachanan tiyan. Jinallamanta kawsay rikhurisqanta yachachiqkunaqa, kawsayninchik qhasi mana kaqlla kasqanta yachachinku.

Imapaqchus kawsasqanchikta yachanapaqqa, Jehová Ruwawaqninchikta tapuna kanman, imaptinchus pay kawsayta quwanchik. Chaymanta imatachus Palabranniqta niwasqanchikta, qhawarina.

¿Imatá Biblia yachachin?

Bibliaqa, Dios ñawpaq kaq qharita, warmitawan ruwachkaspa mana qhasi mana kaqpaqchu ruwasqanta nin. Imatachus Jehová, ñawpa tatasninchikman kamachisqanta, qhawarina.

Génesis 1:28: “Miraychej, kay pachaman juntʼaychej; atiyniyojtaj kaychej, kamachispa mama qochapi kaj challwasta, tukuy pʼisqosta, jallpʼa patapi tukuy qhatatakojkunatawan, nispa.”

Chayrayku Diosqa, Adán, Eva, wawasninku ima, kay Jallpʼata juk paraisoman tukuchinankuta, munarqa. Chantapis, mana munarqachu runa machuyananta, wañunanta, Jallpʼata chʼichichanankuta ima. Chaywanpis, ñawpa tatasninchik mana allin kaqta akllasqankurayku, juchayuq paqarikunchik, wañunchik ima (Génesis 3:2-6; Romanos 5:12). Jina kaptinpis, Jehovap munayninqa, mana tikranchu. Jallpʼaqa, juk chhikamantawan, paraisoman tukunqa (Isaías 55:10, 11).

Jehovaqa, allin yuyayniyuqta, kallpayuqta, ima ruwawanchik, munayninta juntʼanapaq. Mana munasqanchikmanjina kawsanapaqchu, ruwasqa kanchik. Kay urapi pʼitikuna sutʼinchanqa, imachus Diospa munaynin ñuqanchikpaq kasqanta.

Eclesiastés 12:13: “Chay tukuy imasta uyarisqanchejmantaqa kayta nisunman: Diosta manchachikuy, kamachisqasnintataj juntʼay. Kay imasllata runaqa astawan ruwanan tiyan.”

Miqueas 6:8: “Payqa kayta munan ruwanaykita: Cheqan kajta ruwanaykita, khuyakuyta munakunaykita, Diosniykimantaj kʼumuykunaykita.”

Mateo 22:37-39: Jehová “Diosniykitaqa munakunki tukuy sonqoykiwan, tukuy almaykiwan, tukuy yuyayniykiwantaj. Chaymin leypa kamachisqasninmanta aswan kuraj, ñawpaj kajtaj. Qhepan kaj kamachisqapis ñawpaj kajman rijchʼakullantaj: Runa masiykita munakunki qan kikiykita jina.”

¿Imaraykutaq Bibliap yachachisqan sunqu tiyaykuyta quwanchik?

Ima laya maquinallapis sumaqta purinanpaqqa, ruwaqnin imapaqchus ruwarqa, chaymanjina apaykachakunan tiyan. Kikillantataq,  Ruwawaqninchikpa nisqanmanjina kawsaptinchikqa, tukuy imapi allinta riwasun. Qhawarina, imaynatachus Diospa munayninta yachayqa, sunqu tiyaykuyta quwanchik.

Kawsayninchikpi imatapis ñawpaqman churachkaspa, achkha runas qhapaqyaylla allin kasqanta yuyanku. Mana chaymanjinataq, Bibliaqa yachachiwanchik: “Qhapajyayta munajkunarí sajra munaywan atipachikuspa, tojllapi jina urmanku imaymana pierdechej wampu munapayaykunaman”, nispa (1 Timoteo 6:9, 10).

Diosta munakuqkunaqa, kapusqallankuwan sunqu juntʼasqa kawsakunku (1 Timoteo 6:7, 8). Chantapis, mikhunapaq, pʼachallikunapaq ima, llamkʼananku kasqanta yachanku (Efesios 4:28). Chaywanpis, Jesuspa nisqanta kasukunku: “Mana pipis atinchu iskay patronesta ujllapi sirviyta, imaraykuchus ujninta chejnenqa, ujnintataj munakonqa; chayrí, ujninman kʼaskakonqa, ujnintataj qhesachanqa. Mana atinkichejchu ujllapi sirviyta Diosta, qhapaj kaytawan” (Mateo 6:24).

Kawsayninkupi, munayninkuta, llamkʼayninkuta ima, ñawpaqman churanankumantaqa, Diospa munayninta ñawpaqman churanku. Chantapis Jehovap nisqanta kasukuspa kawsaptinkuqa, pay, paykunata qhawananta yachanku. Diostaq chiqamantapuni allinninkuta munan (Mateo 6:25-33).

Wakkunawan kawsasqanchikpi, runaqa, paykunallapaq imatapis maskʼanku. Kay pachapiqa, mana sunqu tiyaykuy kanchu, imaptinchus runaqa, ‘imallatapis paykunallapaq munanku’, ‘mana sunquyuq’ runastaq, kanku (2 Timoteo 3:2-4). Pillapis sunqunkuta pʼakiptinku, chayri nisqanta mana uyariptinku, paykunaqa, ‘phiñakunku, rabiakunku, chʼaqwanku, runaq contranta saqrata parlanku’ ima (Efesios 4:31). Saqra munayninkuwan atipachikusqankurayku, mana sunqu tiyakuyninku kanchu, astawanpis “chʼajwa[lla]ta rikhurichin[ku]” (Proverbios 15:18).

Dios kamachirqajina, runa masinkuta paykunatajina munakuqkunaqa, ‘jukkuna jukkunawan kʼachas kanku, khuyakunku, perdonanakunkutaq’ (Efesios 4:32; Colosenses 3:13). Chantapis, runa paykunata chiqnichkaptinpis, Jesusjina ruwanku, payta maldeciptinkupis, “payqa mana maldecillarqatajchu” (1 Pedro 2:23). Payjinataq, yachanku, kusiyqa runa masinkupaq allin kaqta ruwaymanta jamusqanta, manapis paykunap, ruwayninkuta allinpaqchu qhawanku (Mateo 20:25-28; Juan 13:14, 15; Hechos 20:35). Jehovaqa, Churinjina ruwaqkunaman espíritu santonta qun, chayrayku paykunaqa, sunqu tiyasqa kawsakunku (Gálatas 5:22).

Aswan qhipapaq imachus kananta yachay, ¿imaynatá sunqu tiyaykuyta quwasunman?

[4 paginapi sutʼinchaynin]

Runaqa kawsayninchikpi imatachus ruwananchikta yachayta, necesitanchik

[5 paginapi dibujo/foto]

Jesusqa, sunqu tiyasqa kawsananchikpaq yachachiwanchik