?Wanem Bambae i Hapen Long Fiuja?

?FROM WANEM I IMPOTEN BLONG FAENEMAOT ANSA? Samting we man i ting se bambae i hapen long fiuja blong hem, i save gat paoa long wanem we hem i mekem long laef blong hem naoia. Sipos man i no gat wan gudfala hop blong fiuja maet hem i save tingting olsem: “I gud yumi gohed, yumi kakae, yumi dring, from we tumora bambae yumi ded.” (1 Korin 15:32) Plante taem, tingting olsemia i save lidim man blong kakae tumas, dring bitim mak, mo wari moa. Yes, i no givhan long man nating blong gat trufala pis long tingting blong hem.

Tru ya, sipos fiuja i dipen nomo long traehad blong ol man bambae yumi no gat hop. Naoia ol man oli stap mekem win, wota mo graon blong wol i kam doti moa i bitim eni narafala taem bifo. Ol man oli fraet tumas se bambae i gat niuklia faet mo ol bom blong ol teroris oli stap kam plante. I gat plante bilian man raonabaot long wol oli stap safa from ol sik mo from we oli no gat naf kakae. Nating se i olsem, i gat sam gudfala risen we yumi save gat wan hop blong fiuja blong yumi.

Yumi ol man yumi no naf blong talemaot stret wanem bambae i hapen long fiuja. Be Jeova God i tokbaot hem wan olsem man we ‘long stat blong olgeta samting, hem nao i stap talemaot fastaem ol samting we biaen oli hapen. Bifo finis, hem i talemaot ol samting we biaen oli kamtru.’(Aesea 46:10) ?Wanem samting we Jeova i talem se bambae i hapen long fiuja?

Wanem We Baebol i Talem

Jeova i no save letem ol man oli spolem wol ya fulwan wetem ol laef samting we oli stap long hem. Yes, Baebol i promes se God bambae i “spolem ol man ya we oli stap spolem wol.” (Revelesen 11:18) Jeova bambae i yusum Kingdom blong hem long heven blong finisim rabis fasin long wol ya mo mekem i kamgud bakegen olsem hem i bin wantem fastaem. (Jenesis 1:26-31; 2:8, 9; Matiu 6:9, 10) Ol vas blong Baebol we oli kam biaen oli givhan long yumi blong kasem save se laef long fiuja bambae i olsem wanem. Ol vas ya oli tokbaot ol samting we bambae oli hapen i no longtaem mo bambae oli gat paoa long laef blong olgeta man long wol.

Ol Sam 46:8, 9. “Yufala i kam, yufala i luk ol samting ya we Hae God i mekem. Yufala i luk ol bigbigfala wok ya we hem i mekem long wol. Hem i stap mekem ol faet i finis long olgeta ples long wol. Hem i stap brekem ol bonara, i stap spolem ol spia, mo i stap bonem ol sil long faea.”

Aesea 35:5, 6. “Long taem ya, ol blaen man bambae oli save lukluk, mo olgeta we sora blong olgeta i fas, sora blong olgeta bambae i open bakegen. Olgeta we leg blong olgeta i nogud, bambae leg blong olgeta i kam gud bakegen, nao oli jamjam olbaot, oli danis, mo olgeta we oli no save toktok, bambae oli toktok, nao bambae oli glad, oli stap singsingaot from. Long draeples, ol springwota bambae oli kamkamaot, nao i mekem we bambae i gat ol reva oli stap ron long hem.”

Aesea 65:21, 22. “Man we i wokem haos blong hem, hem bambae i save stap gud long hem. Bambae i no moa gat narafala man i save kam tekemaot haos ya. Man we i planem plantesen blong grep, hem bambae i dring waen blong ol grep ya. Bambae i no moa gat narafala man i save kam stilim ol waen blong hem.”

Daniel 2:44. “God ya we i stap long heven bambae i stanemap wan king we rul blong hem bambae i no save finis samtaem. Bambae i no gat wan king i save winim hem. Bambae hem i save flatemgud paoa blong ol narafala king, nao bambae hem i rul oltaem gogo i no save finis.”

Jon 5:28, 29. “I gat taem i stap kam we ol dedman bambae oli harem voes blong [Jisas], nao bambae oli aot long beregraon blong olgeta.”

Revelesen 21:3, 4. “God bambae i kampani wetem olgeta, mo hem bambae i God blong olgeta. Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”

Ansa Blong Baebol i Givim Trufala Pis Long Tingting

Fastaem we yumi harem ol nambawan promes ya maet yumi ting se oli wan drim nomo. Be hemia ol promes we God nao i mekem, i no ol promes blong man. Mo Jeova God “i no save giaman.”—Taetas 1:2.

Sipos yu yu lanem blong trastem ol promes blong God mo yu folem ol loa blong hem, bambae yu save gat pis long tingting blong yu oltaem, nating se yu fesem ol bigbigfala traem long laef blong yu. Bambae ol samting olsem wo, kakae i sot, sik, ol trabol blong olfala mo ded, oli no save spolem pis blong yu olwe. ?From wanem? From we taem yu stap fesem ol traem ya, yu yu save sua fulwan se Kingdom blong God bambae i finisim olgeta nogud samting ya.

?Olsem wanem yu save gat wan hop olsem long fiuja? Yu mas jenisim ‘tingting blong yu’ mo yu wan yu mas pruvum se “ol samting we God i wantem oli gud, oli mekem man i glad, mo oli stret gud olgeta.” (Rom 12:2, NW) Maet bambae yu nidim moa pruf blong yu save sua fulwan se ol promes blong Baebol bambae oli kamtru. Traehad blong yu blong lukaot pruf ya i no blong nating. I no gat tumas narafala samting we yu save mekem long laef blong yu we bambae i givim pis long tingting blong yu olsem save ya bambae i mekem.